Home 6 14/7 ووتارو به‌ڵگه‌نامه‌کان! 6 ئیسماعیل محەمەد: دەمەوێت بچمە سەردانی گۆڕەکەی نەوشیروان و پێی بڵێم کوا گۆڕی براکەم…

ئیسماعیل محەمەد: دەمەوێت بچمە سەردانی گۆڕەکەی نەوشیروان و پێی بڵێم کوا گۆڕی براکەم…

سبەی ئەڕۆم بۆ گردەكە و سەردانی گۆڕی نەوشێروان دەكەم ..!!! ئەمەوێ سبەی 14/7 بچمە سەردانی گۆڕەكەی نەوشێروان و پێی بێژم كوا گۆڕی براكەم ..!!؟، بەڵی سبەی دەڕۆمە سەر گۆڕەكەی نەوشێروان و پڕ بە گەرووم هاوار دەكەم و ئێژم كوا تەرمی براكەم؟، هاوار دەكەم و ئێژم بەچی حەقێك پێنج گەنجی خێرلەخۆ نەدیووی ئەم وڵاتەت تیرۆر كرد و دەستیشت گرت بەسەر تەرمەكانیاندا؟.

ئەمەوێ لە گردەكەوە بێژم باشە ئەو گەنجانە حەقی ژیانیان نەبوو؟، باشە پاش تیرۆركردنیان ئەوانیش قابیلی ڕێوڕەسم و پرسە نەبوون؟، حەقی ئەوەیان نەبوو دوا قسەیان لەناو خانەوادە و ئازیزانیاندا بكەن؟، باشە ئەو گەنجانە حەقی ئەوەیان نەبوو لە باوەشی دایكیاندا كۆتا هەناسەیان بدەن؟.

وەك ئاشكرایە سبەی 17 ساڵ تێدەپەڕێت بەسەر تیرۆركردنی براكەم و چوار گەنجی خێرلەخۆ نەدیووی ئەم وڵاتە كە پێشمەرگەی حزبی كۆمۆنیست بوون و لەلایەن (نەوشێروان مستەفا) و چەكدارەكانی ئەوكاتەی یەكێتییەوە لە 14/7/2000 بە ڕۆژی ڕووناك خەڵەتانی خوێن كران و تەرمەكانیشیان شوێن بزر كران.

 بۆیە سبەی ئەچمە سەر گۆڕەكەی نەوشێروان و پێی ئێژم باشە چۆن قرچەی جەرگی دایكم ئەهێڵێت لە گۆڕەكەتدا ئارام بگری؟، پێی بێژم باشە 17 ساڵە گوێت لە ناڵەی خوشكە ڕەشپۆشەكانم نەبوو؟، 17ساڵە چۆن هەناسەی ساردی من و برا بێنازەكانمت هەست پێ نەكرد؟، 17 ساڵە من شوێن نەما دەزگەی ڕاگەیاندن نەما هاواری تێدا نەكەم، دەزگە نەما بە مافی مرۆڤی پارلەمانیشەوە من لە دەرگای نەدەم، تۆ بۆ تەنیا جارێك وڵامت نەدامەوە. 

سبەی ئەم وێنەیە ئەبەمە دەروازەی گردەكە و هەڵیدەواسم، چونكە هەندێكەس پێیان وایە تۆ (غاندی و ماندێلا یان گیڤارای)، من ئەپرسم كوا غاندی دەستی بە خوێنی هاونیشتیمانی وڵاتەكەی سوورە؟، كوا ماندێلا گوێی بە سكاڵای هاونیشتیمانی وڵاتەكەی نەداوە و لەلایەن دادگای وڵاتەكەیەوە داوا كراوە؟، ئاخر گیڤارا كەی بەناحەق خەڵكی كوشتووە؟، یان خەڵكانێك پێیان وایە تۆ باوكی هەژارانی من ئەپرسم باوكی هەژاران چۆن دەستی ئەچێتە خوێنی كوڕی خانەوادەیەكی لەم چەشنە هەژار؟.

 تۆ بكوژی هەژاران بووی نەوەك باوكی هەژاران، چونكە هیچ باوكێك ڕۆڵەی خۆی بەو دڕندەییە خەڵەتانی خوێن ناكات، بۆیە سبەی ئەچمە سەر گۆڕەكەی نەوشێروان و پڕ بە گەرووم هاوار ئەكەم، 17 ساڵ قرچەی جەرگی دایكمت نەبیست؟،  17 ساڵ ناڵەی خوشكە ڕەشپۆشەكانمت گوێ لێ نەبوو؟، 17 ساڵ ئێمە گریاین و تۆ حیسابت بۆ دادگا و مافی مرۆڤ و تەنانەت خوداش نەكرد، بەڵام من و خانەوادەكەمان لەو دنیا دادگاییت ئەكەین، سكاڵا دەبەینە لای خودا، چونكە تۆ لەوێ نەحزبت هەیە و نە گرد و نەهێزی چەكدار، دڵنیام مافی هیچ كەسێك لەوێ نافەوتێت، بەڵێ داوا لە خودا ئەكەم و دڵنیایشم خودا حەقمانی سەندووە و ئەیسێنێت، لە كۆتاییدا دروود بۆ ڕوحی پاكی براكەم و هاوڕێكانی، 

ئیسماعیل محەمەد … برای هاوکار محەمەد

تێبینی: ئەم بابەتە لە بۆپێشەوەی ژمارە ٨ بەرواری ١٥/٧/٢٠١٧ دا، بڵاوبۆتەوە…www.bopeshawa.net

About hkkk

Leave a Reply

Your email address will not be published. Required fields are marked *

*