Home 6 ئەرشیفی بابەتەکان 6 بۆ نادیە موراد بوو بە پەیامبەری دەنگی قوربانیانی کارەساتی شەنگاڵ؟

بۆ نادیە موراد بوو بە پەیامبەری دەنگی قوربانیانی کارەساتی شەنگاڵ؟

لە گۆشەیەکی ترەوە

پرس و ڕای هەفتانە، گۆشەیەکی هەفتانەیە کە هاوڕی موزەفەر عەبدوڵا دەینووسێت، بۆپێشەوە هەر دوو هەفتە جارێک، باسێک یان چەند باسێکی بڵاودەکاتەوە…لەم گۆشەیەدا “بۆ نادیە موراد بوو بە پەیامبەری دەنگی قوربانیانی کارەساتی شەنگاڵ؟ ؟…دەخوێننەوە

 

 

بەخشینی خەڵاتی نۆبڵی جیهانی بۆ ئاشتی بە نادیە موراد، کە خۆی قوربانییەکی کارەساتی خەڵکی شەنگاڵ بوو، لە هەفتەکانی ڕابردوودا بۆتە یەكێک لە ڕوداوە گەورەو گەرمەکان و جێگای پرس و ڕای گشتی. ئەم ڕوداوەش جارێکی تر تاوان و کارەساتی کۆمەڵکوژی خەڵکی شەنگاڵ و ناوچەکانی دەوروبەری کردەوە باس و بابەتێکی گەرمی هەنوکەیی. هاوکات بوونی ئەم کچەش کە بۆتە هێما و پەیامبەرو قارەمانی ناو ئەو خەڵکە ستەملێکراوەوکارەساتەکە زیاتر بۆتە خاڵی ململانێ و پرس و راگۆڕینەوە بە لایەنگری ونەیاری. ئەگەر چی نادیە موراد بەهرەمەندە لە گەورەترین پشتیوانی بەرەی ئازادیخوازی و یەکسانیخوازی ئینسانی لە ئاستی دونیا، بەڵام هاوکات بۆتە جیگای بێڕیزی و سوکایەتی سیاسی و شەخسی بە تایبەتی لەلایەن کەسانی خاوەن ئایدیۆلۆژی ئیسلامی و قەومی و خێڵەکییانە لە کوردستان. تەنانەت تاکو تەرا کەسانیک کە خۆی بە ئازادیخوازو یەکسانیخوازو چەپ دەزانێت بەهۆی دەمارگیری ئایدیولۆژی و پێوەری هەموو ڕوداوەکان و کەسایەتییەکان بە بێژنگی ئایدیۆلۆژی خۆی پێی خزاوەتە ئەم سوکایەتی کردنەوە. زیاتریش بەبەهانەی وەرگرتنی خەڵاتەکەوە کە ئەمە خەڵاتی دەزگایەکی بۆرژوازی و سیستەمی سەرمایەداری جیهانییە. بەم بەهانەیەوە ئەوەیان لەبیرچووە کە کرۆکی پەیام و ئەرکەکەی نادیە موراد وەک قوربانی و پەیامبەرێکی ئەم روداوە کارەساتبارە چییە؟. بەڵام پرسیاری سەرەکی ئەوەیە بۆ لەنێو هەموو ئەو خەڵکەی کە بە شێوازی جۆراوجۆر بوونە قوربانی، نادیە موراد بوو بە پەیامبەری جیهانی دەنگی راستەقینەی ئەو خەڵکە، لە کاتێکدا ئەو کۆمەلگەیە کەسانی سیاسی و ئەکادیمی و ڕۆشنبیر ی و داکۆیکاری مافەکانی ژنان و مافی مرۆڤ تیدابووە ؟!؟ بۆ وەڵامی سادەو کورتی ئەم پرسیارە وا پێویست دەکات ئاماژە بە چەند ڕاستییەکی سیاسی و میژویی بابەتی بدەین بۆ زیاتر ڕۆشنکردنەوەی پرسەکە. بەر لەهەر شتێک پێویستە ئەوە بڵێم کە من راوبۆچوونم لەسەر ئەو کارەساتەو پیویستی بوونی کەسانی وەک نادیە دابوو تا ببنە پەیامبەرو نوینەری دەنگی راستەقینەی قوربانیانی ئەو کارەساتە لە وتارێکی ٣ ساڵ لەمەوبەر بەناوی کێ دەبێتە ئەننا فرانکی شەنگاڵ کە هێشتا خودی نادیە موردا وەک پەیامبەرێکی ئەمرۆ دەرنەکەوتبوو. ئەوکات لە برگەی سەرەتاوە نوسیبوم: کە زۆر جار لە ڕووداوە گەورەکاندا، جا چ ڕاپەرین و شۆڕشەکان بیت کە ئومێدو هیواو ویستی گەورە بە مرۆڤەکان دەبەخشێت بۆ گۆڕانکاری و وەرچەرخان، یاخود کارەساتە مرۆڤایەتیەکان بێت کە بێ ئومێدی و بێ هیوای و بێ توانایی بەدوادا دێت، کەسانێک دەبن بە قارەمان و مێژوویی ئەو ڕوداوانە دەنووسنەوەو دەگێڕنەوە کە بە واقعی لەگەڵیدا ژیاون. وە ڕەنگە هەرگیز بە خەیاڵی خۆیاندا نەهاتبێت ئەم کەسانە دەبنە ئەم پەیامبەرو قارەمانە میژووییانە. بۆ نمونە لە دەورانی سیستەمی کۆیلایەتی کێ پێشبینی ئەوەی کردەوە کە سپارتاکۆس دەبێتە پەیامبەرو قارەمانی خەباتی ئازادی بۆ کۆیلەکان. یاخود لە میژویی نوێدا کێ پێشوەخت پێشبینی کردەوە کە ماندیلا ناوێک دەبێتە هێماو پەیامبەرو قارەمانی خەباتی دژی رەگەزپەرستی لە هەمو ئەفریقا..! یاخود کێ پێشبینی ئەوە دەکرد کچە مناڵیکی وەک ئەننا فرانک کە لە ترسی فاشییەکان لە چاپخانەکەی باوکی دوو ساڵ خۆیان شاردەوە، بەلام بە نووسینەوەی یاداشتە رۆژانەیییەکانی توانی لاپەرەکی گەورە لە مێژووی ستەم و چەوسانەوەی ئەو دەورانەی ئاشکرا بکات. و وەک دوای کارەساتەکەش ببێتە یەکیك لە هیماو پەیامبەرە قارەمانەکانی ئەو کارەساتە…! یان کێ پێشبینی دەکرد لاوێکی وەک محمد بوعەزیزی کاسبکاری هەژار لە دژی ستەم و چەوسانەوەی دەسەڵاتی بن علی لە تونس ئاگر لە جەستەی خۆی بەرداو ئەو ڕوداوەش بێیتە مەشخەڵی چەند ڕاپەرینی گەورە لە چەند وڵات و چەند دەسەڵاتی سیاسی سەرکوتگەر بڕوخێنێت..! ئەمانەو دەیان نمونەی زیندوی تری سیاسی و مێژویی دەکرێت وەک بەڵگە ئاماژەی پێ بکەین لە وەڵامی ئەم پرسیارە کە بۆ نادیە مورادێکی گومناو بوو بە پەیامبەرێکی جیهانی دەنگی راستەقینەی خەڵکی قوربانی کارەساتی شەنگاڵ. جا ئەوانەی ناوەڕۆکی روداوەکان و دەرکەوتنی پەیامبەرو رابەرو قارەمانەکانی لە بۆتەی ئەو کێشەو ململانێیانەوە دێنە دەرێ و کرۆکی پەیامەکەیان نابینن، ئەوە تەنها لە روانگەی ئایدیۆلۆژیایەکی رووتی خۆیانەوە روداو و ململانی و کارەکتەکانی وهەڵدەسنگێنن. جا ئەوانە یان خاوەن ئایدیۆلۆژیایەکی فاشستین یاخود زۆر دەمارگیرانە لەو ئایدیۆلۆژیایە گەییشتون. کاتێک هەر کەسێکی ئیسلامی یاخود بەهەر پلەیەک بروای بە ئاینی ئیسلام بێت، بەڵام بەهۆی ئەوەی نادیە موراد سەر بەباوەری دینی ئەو نییەو سوکایەتی و بێریزی ئەخلاقی و شەخسی پێ دەکات ئەوە جگە لە دەمارگیرێکی فاشی هیچی تر نییە. کاتێک کورد زمانێک کە بەو هۆیەی نادیە موراد بە کوردی قسەی نەکردوە یاخود ناسنامەی کوردایەتی بۆ خۆی دانەتاشیوە و بگرە بڕوای بە ناسنامەیەکی ترە و سوکایەتی و بێ ڕێزی ئەخلاقی پێ دەکەن ئەوە ئەو کەسانە بێگومانە خاوەن باوەڕێکی دەمارگیری قەومی فاشین. نادیە موراد پێویستە ئازاد بێت لەوەی بە چ زمانێک قسە دەکات و بیروباوەری چییە. هیچ کەس مافی ئەوەی نییە بە بەهانەی زمان و بیروباوەرو کەلتور ،و تەنانەت هەتا بۆ ئەو خەڵاتەی وەرگرتوە بێ ڕێزی پێبکات. بێڕێزی کردن بە نادیە موراد بێڕێزی کردن و سوکایەتی کردنە بە خودی کارەساتی شەنگال و قوربانییەکانی. ئەو لەبەر زمان و بیروباوەرو کەلتور… نەبۆتە پەیامبەرو… قارەمانی ئەو کارەساتە نەخیر هەرگیز…! بێگومانە ئەوانە هۆکارێک بوونە بۆ کۆیلەو قوربانی بوونەکەی، بەڵام ئەوەی ئەوی کردوە بە پەیامبەرو قارەمانی ئەو روداوە کارەساتبارە بە پلەی سەرەکی لەبەر ئەوەیە کە ئەو خاوەن ئیرادەو ئامادەیی و قوربانی ئازادانەیە لە پێناوی گەیاندنی کرۆکی ئەو کارەساتە بە ڕای گشتی ئازادیخوازی جیهان. بۆیە ئەگەر لەم گۆشە نیگایەوە سەرنجی کارەسات و قوربانییەکانی خەڵكی شەنگال و خودی ڕۆڵ و ئەرک و پەیامەکەی نادیە موراد بدەین ئەوە بەو ڕایە دەگەین کە ئەو بەڵێ ئەمڕۆ لە نێو دەیان هەزار کەسی قوربانی، و تەنانەت ئەوانەی لەناو ڕیزەکانی حزبەکانی کوردایەتی و خێڵەکیەکاندان و خاوەن بڕوانامەو سیاسەتمەدارن، بەڵام نادیە بۆتە هێماو پەیامبەرو قارەمانی ئەو خەڵکە قوربانییە. بەڵێ ئەوەی ئەم قوربانییەی کردە پەیامبەرو قارەمانی کارەساتی شەنگال، تەنها ئیرادەو ئامادەیی و عەزم و جەزمی ئینسانی خۆی بوو. خۆ ئەگەر هەر کەس و لایەن و دەزگاو دەوڵەتیکێش لە پشتی ئەو ڕوداوە هەر مەبەست و بەرژەوەندیەکییان هەبێت، کە بیگومانە زۆریان هەیانە، ئەوە هیچ لە پێگەو ڕۆڵ و ئەرک و پەیامەکەی نادیە کەم ناکاتەوەو نابێت کەم بکریتەوە.

 

تێبینی: ئەم بابەتە لەبۆپێشەوەی ژمارە ٣٨ کە بەرواری ١٥ی ئۆکتۆبەر بڵاوبۆتەوە

About hkkk

Check Also

دیمانەی بۆپێشەوە لەگەڵ هاوڕێ کاوە کەریم، بە بۆنەی ١٩ ساڵ تێپەربوون بەسەر ڕووداوی تیرۆریستی ١١ سێبتەمبەردا…

بۆپێشەوە: هێرشی تیرۆریستی و خۆکوژی ١١سێپتەمبەر… دنیای تەکاندا و بواری کردەوە تا ئەمریکا ملهوڕی و …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *