Home 6 ئەرشیفی بابەتەکان 6 مانیفێستی نوێی بزووتنەوەی (هێلەک زەردەکان) …

مانیفێستی نوێی بزووتنەوەی (هێلەک زەردەکان) …

بزوتنەوەی هێلەك زەردەکان لە فەرەنسا کە نزیکەی ساڵێك بەسەر سەرهەڵدانیان دا تێدەپەڕێ، مانیفێستێکی نوێێان بڵاوکردۆتەوە کە لە ٢٥ خاڵ پێکهاتووە. لەو مانیفێستەدا ڕوانگەی خۆیان بۆ پرسە سیاسی و ئابوریەکانی کۆمەڵگای فەرەنسا خستۆتەڕوو. شایانی وتنە کە ئەم مانیفێستە نوێیە بەبەراورد بە مانیفێستی پێشوویان ڕادیکاڵ تر و پوختەتر دەردەکەوێت. لە مانیفێستی پێشوودا بوونی کاریگەری بزوتنەوە ڕاستڕەوەکانی بۆرژوازی فەرەنسا بەسەر ئەم بزوتنەوەیەوە هەست پێدەکرا. بەلام ساڵێك لە تێکۆشان و بەرەنگاربوونەوە، بزوتنەوەکەی هەرچی زیاتر لە جەوهەرە چینایەتی و دژی سەرمایەداریەکەی نزیكتر کردۆتەوەو خواستەکان و بەرنامەکەشی ڕادیکاڵتر بۆتەوە.

مانیفێستی هێلەک زەردەکان( پوختە)
ئابوری / کار:

*  دیاریکردنی رێژەی باج بەپێی دەستور بە٢٥٪

*  زیادکردنی لانی کەمی مووچەی خانەنشینی و دەستبەری کۆمەڵایەتی بە رێژەی ٤٠٪
*  دامەزراندنی ژمارەیەکی زیاتر لە کەرتی حکومیدا بەمەبەستی دامەزراندنەوەی خزمەتگوزاریە گشتیەکان
* دەستکردن بە پرۆژەی گەورەی بیناسازی بەمەبەستی دابینکردنی خانوو بۆ(٥) ملیۆن کەسی بێخانەو لانە، هەروەها سزادانی ئەو بەرپرسە ئیداری و حکومیانەی کە خەڵك لەسەر شەقامەکان جێدەهێڵن.

* بەشبەشکردنی بانکە زەبەلاحەکان و جیاکردنەوەی بانکە خزمەتگوزاریەکان لە بانکە وەبەرهێنەرەکان.
* هەڵوەشاندنەوەی ئەو قەرزانەی بەهۆی رێژەی زۆری سوودەوە لەسەر خەڵك کەڵەکە بووە

سیاسەت:
* هەموارکردنی دەستور بۆ پارێزگاری لە بەرژەوەندی خەڵك، لەوانە ئەو رێفراندۆمانەی کە دەبێ جیبەجێبکرێن.
*رێگاگرتن لە گروپەکانی فشار و خاوەن بەرژەوەندیە تایبەتەکان لەوەی بتوانن بڕیاری سیاسی بدەن.
* Frexit:  (فرێکزیت) واتە چوونەدەرەوەی فەرەنسا لە یەكێتی ئەوروپا، بەمەبەستی گێڕانەوەی سەروەری ئابوری و سیاسی و دراوی( واتە، رێزگرتن لە ئەنجامی ڕایفراندۆمی ساڵی ٢٠٠٥، کاتێك فەرەنسا دەنگی دا لە دژی پەیماننامەی دەستوری یەکێتی ئەوروپا، کە دوای ئەوە ناوەکەی گۆڕدرا بۆ پەیماننامەی لیشبۆنە، و خەڵکی فەرەنسا پشتی تێکرد)
* وەستانەوە لە دژو ڕێگانەدان بە خۆدزینەوە لە باج لەلایەن سوپەر دەوڵەمەندەکانەوە
* کۆتاییهیانی دەستبەجێ بە تایبەتیکردن، دوبارە خۆماڵیکردنەوەی دامەزراوە گشتیەکان، وەکو ڕیگاوبان و فڕۆکەخانەکان و هێڵی ئاسن و .. تاد.
* لابردنی هەمووجۆرە ئایدیۆلۆژیایەك لەناو وەزارەتی خوێندن و فێرکردن ، کۆتاییهێنان بەهەمووجۆرە تەکنیکێکی تێکدەرانەی خوێندن و فێرکردن
* زیادکردنی میزانیەی یاساو نیزام بەرێژەی چوارهێندە و دانانی کاتێکی دیاریکراو بۆ پرۆسەی دادگاییەکان. فەراهەمکردنی دەستڕاگەیشتنی هەمووان بە سیستەمی دادوەری
* هەڵوەشاندنەوەی ئیحتکار(مۆنۆپۆڵ)کردنی میدیاو دەستوەردانی لە کاری سیاسیدا. دابینکردنی دەستڕاگەیشتنی هەمووان بە میدیا و دەستبەرکردنی جیاوازیی بیروڕا. کۆتاییهێنان بە چەواشەکاری میدیایی(editorial propaganda)
* دابینکردنی ئازادیی هاوڵاتیان بەوەی کە بەدەستور هەرجۆرە دەستێوەردانێکی دەوڵەت لە بڕیاری خەڵك سەبارەت بە خوێندن و تەندروستی و کاروباری خێزانەوە، بەتەواوی قەدەغە بکات.
تەندروستی و ژینگە:
* ڕێگانەدان بە زووبەسەرچوونی ئەنقەستی کاڵاکان- وەرگرتنی گەرەنتی لە بەرهەمهێنەرانی کاڵاکان کە دەبێ کاڵاکانیان بۆماوەی(١٠) ساڵ بەسەرنەچێت، هەروەها ئەدەواتی یەدەکی ئەوکاڵاو کەرەستانەش لەو ماوەیەدا دەست بکەون.
* قەدەغەکردنی هەرجۆرە بوتڵێکی پلاستیکی و هەموو جۆرە پاکەت و قوتویەکی پلاستیکی..
* کەمکردنەوەی دەستێوەردانی کۆگا گەورەکانی دەرمان لە تەندروستی گشتی و بەتایبەتی لە خەستەخانەکاندا.
* قەدەغەکردنی بەروبوومە کشتوکاڵیە دەسکاریکراوە بۆماوەییەکان، دەرمانی دژی مێروو کە دەبنە هۆی شێرپەنجە و هەموو ئەو نەخۆشیانەی بەهۆی دانەوێڵەوە توشی مرۆڤ دەبێت(endocrine disruptors and monocrops)
* دوبارە پیشەسازیکردنەوەی فەرەنسا( بەم پێیە کەمکردنەوەی هاوردەکردن و لە ئەکامیشدا کەمکردنەوەی پیسبوونی ژینگە).

کاروباری دەرەوە
* کۆتاییهێنان بە بەشداری فەرەنسا لە شەڕە دەرەکیە دوژمنکاریەکاندا و هاتنەدەرەوە لە پەیماننامەی (ناتۆ)
* کۆتاییهێنان بە تاڵانکاری و دەستێوەردانی- سەربازی و سیاسی- لە “فرانكافريك”، کە وا دەکات ئەفریقا بە هەژاری بمێنێتەوە. گێڕانەوەی دەستبەجێی سەربازە فەرەنسیەکان. دامەزراندنی پەیوەندی لەگەڵ دەوڵەتە ئەفریقیەکاندا لەسەر بنەمای یەکسان و بەرامبەر
* رێگاگرتن لە کۆچکردنی ئەو کەسانەی کە ناتوانن لەگەڵ کۆمەڵگای فەرەنسادا هەڵبکەن و تێکەڵ بن، بەهۆی ئەو قەیرانە شارستانیە قووڵەی کە ڕوبەڕومان بۆتەوە.
* رێزگرتنی تەواوی یاسای نێودەوڵەتیەکان و ئەو پەیماننامە نێودەوڵەتیانەی کە واژۆمان کردوە…

 وەرگێرانی بۆ کوردی: موحسین کەریم

ئەم بابەتە لە بۆپێشەوەی ژمارە ٦٦ی بەرواری ١٥ دیسەمبەری ٢٠١٩ دا بڵاوبۆتەوە

About hkkk

Check Also

دیمانەی بۆپێشەوە لەگەڵ هاوڕێ کاوە کەریم، بە بۆنەی ١٩ ساڵ تێپەربوون بەسەر ڕووداوی تیرۆریستی ١١ سێبتەمبەردا…

بۆپێشەوە: هێرشی تیرۆریستی و خۆکوژی ١١سێپتەمبەر… دنیای تەکاندا و بواری کردەوە تا ئەمریکا ملهوڕی و …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *