Home 6 ئەرشیفی بابەتەکان 6 پزیشکان و پەرستاران و کرێکاران و کارمەندانی تەندروستی …

پزیشکان و پەرستاران و کرێکاران و کارمەندانی تەندروستی …

پەیامێک لەحزبی کۆمۆنیستی کرێکاریی کوردستانەوە

پزیشکان و پەرستاران

کرێکاران و کارمەندانی تەندروستی

سەرەڕای کار و ماندوبونی بەردەوامی ئێوە و ڕاوەستانی جەسورانەتان لەڕیزی پێشەوەی بەرەکانی جەنگ لەدژی کۆرۆنا، بەڵام هێشتا کۆرۆنا  لەکوردستان ڕوو لە هەڵکشان و ڕۆژانە قوربانیەکانی خۆی لە هاوڵاتیان دەستێنێت و، تادێت ژمارەی توشبووان بەم پەتا نەگریسە ڕوو لەزیادبوونە. بێگومان ئێوە وردەکاری ئەم دۆخە و لێکەوتە و ئاکامە مەترسیدارەکانی لەهەموو کەس باشتر دەزانن و هەستی پێدەکەن.

هەموو ئەو ڕاستیە دەزانین کە هۆکار و سەرچاوەی ئەم دۆخە ناهەمووارە، حکومەت و دەسەڵاتێکە کە کەمترین بەرپرسیارێتی نیشانداوە لەئاستی ژیان و گوزەران و سەلامەتی تەندروستی هاوڵاتیانی ژێردەسەڵاتی خۆی. ئەم حکومەت و دەسەڵاتە نەک نەیتوانیوە پێداویستیە تەندروستیەکان و بژێوی خەڵکی دابین بکات،  بەڵکو کەوتووەتە نەدان و بڕینی موچی فەرمانبەران. لەباتی دامەزراندنی دەرچوانی زانکۆ  و پەیمانگاکانی پسپۆڕ لەبواری تەندروستی و کردنەوەی دەیان و سەدان بنکەی تەندروستی و فریاگوزاری و چاودێری پزیشکی لەناوەندی شارەکان و لەگەڕەک و کارگە و زانکۆ و دامەزراوەکاندا، کەوتۆتە بڕین و نەدانی موچەی پزیشک و کارمەندانی تەندروستی.

حکومەتی هەرێم  زۆر دەمێکە دەیەوێت فەشەل بە کەرتی تەندروستی گشتی بهێنێت بۆ ئەوەی تەسلیم بەکەرتی تایبەتی بکات، هەربۆیە ئێستا بەئاشکرا ڕایگەیاندووە کە توانای ڕووبەڕووبوونەوەی پەتاکەی نەماوە و دۆخەکە لەژێر کۆنترۆڵ دەرچووە، چونکە ژمارەی پزیشک و پەرستار و کارمەندی تەندروستی کەمە، نەخۆشخانەکان توانای وەرگرتنی نەخۆشیان نییە و ئۆکسجین و جیهازی هەناسەدان بەردەست نین.

بەگشتی کەرتی تەندروستی فەشەلی ڕاگەیاندووە و داوامان لێدەکات کە ڕووبکەینە کەرتی تایبەت و بازاڕی کۆمپانیاکانی دەرمان و کلینیک و  نەخۆشخانە ئەهلیەکانی کۆمپانیاکانی خۆیان.

کاروکردەوەی ئەم حکومەت و دەسەڵاتە  لەکاتی سەرهەڵدانی پەتای کۆرۆناوە تائێستا بەڕۆشنی ئەوە دەردەخات کە دەستیان خستۆتە نێو دەستی ڤایرۆسی کۆرۆناوە و  پێکەوە دەیانەوێت خەڵکی هەژار و کەمدەرامەتی کوردستان بکەنە قوربانی سود و قازانجی خۆیان. بەڵام ئایا بڕیاڕ هەر ئەوەیە کە ئەم جارەش خەڵکی هەژار و دەستدەنگی کوردستان باجی فەشەلی سیاسی و دارایی ئەم حکومەتەی گەندەڵکاران بدەن؟ ئایا تەنها چارە هەر ئەوەیە کەژیان و تەندروستی خۆمان و کۆمەڵگا بسپێرین بەدەسەڵاتێکی گەندەڵ و نابەرپرس؟ لێرەوەیە رۆڵی پێشرەوانە و ئینساندۆستی و بەرپرسانەی ئێوە و هەموو ئازادیخوازان و جەماوەری ناڕازی کرێکار و زەحمەتکێش دێنێتە پێشەوە، ئەویش بەوەی کە بە چاوێکی بەرپرسیارانەوە لەدۆخەکە بڕوانین و هەنگا و بەرەو لەدەستگرتنی سیستەمی تەندروستی هەڵگرین و لەچنگی حوکمەتێکی فاشیل و گەندەڵکاران دەری کێشین.

کرێکاران و کارمەندانی خۆراگری تەندروستی!

پەرستاران و پزیشکانی ناڕازی!

فەشەل و بێتوانایی ئەم حکومەتە کە هەموو ڕۆژێک لەلایەن بەرپرسانەوە بەشێوەی جۆراوجۆر دەدرێت بەگوێی کۆمەڵگادا، بەمانای ئەوەیە کە ئەم دەسەڵاتە چیتر شەرعیەتی بەڕێوەبردنی کۆمەڵگا و ئیدارەدانی کەرتی تەندروستی نیە و نابێت هیچ چاوەڕوانیەکی لێبکرێت، بگرە مانەوە لەسایەی ئەم دەسەڵاتەدا، سپاردنی کۆمەڵگا و سەلامەتی هاوڵاتیانە بەکارەساتێکی ئینسانی.

 

هەربۆیە کاتی ئەوەیە سیستەمی تەندروستی و کارگە و کۆمپانیاکانی دەرمان و هەموو نەخۆشخانە و دامودەزگاکانی پەیوەندیدار جەماوەری بکرێنەوە. ئیتر کاتی ئەوەیە کە پزیشکان و پەرستاران، کرێکاران و کارمەندانی تەندروستی و دەرمانسازی لەڕێگای ڕێکخراوە جەماوەریەکانی خۆیانەوە، ناوەندەکانی تەندروستی کۆنترۆڵ بکەن و بەڕێوەبردنی بگرنە ئەستۆ و ئەم خزمەتگوزاریە لەبازنەی بازاڕ و کۆمپانیاکانی سەر بەدەسەڵات دەرکێشن و بەخۆرایی لەبەردەست هاوڵاتیاندا دایبنێن.

 

بەدڵنیایەوە بۆ ئەم کارە زۆربەی خەڵکی کوردستان پشتیوان و هاوسەنگەرتان دەبن، ئەوان ڕۆڵی ئینسانی و بەرپرسیارانەی ئێوە پزیشک و پەرستاران و کرێکاران و کارمەندانی تەندروستیان لەبەرچاوە کەچۆن لەریزی پێشەوەی شەڕ لەدژی کۆرۆنا جەسورانە ڕاوەستاون و گیانی خۆتان خسۆتۆتە بەرەدەم مەترسیەوە. هەر بۆیە کۆمەڵگا بەچاوی ڕێز و هاوخەباتیەوە لەئێوە و کارەکانتان دەڕوانێت.

خەبات و ناڕەزایەتیەکانی ئێوە بۆ موچە و دابینکردنی پێداویستی و کەشێکی گونجاو بۆ ڕووبەڕووبوونەوەی پەتای کۆرۆنا، خواست و جوڵانەوەیەکی بەرهەقە و دەتوانێت لەدرێژەی فراوانکردنەوە و ڕێکخراوکردن و گرێدانەوەی بەناڕەزایەتی بەشەکانی تری کۆمەڵگاوە، گۆڕانکاری گەورە لەکەرتی تەندروستیدا بکات.

 

دەستبردن بۆ پێکهنانی کۆمیتە و شورای کارمەندان و پزیشکانی تەندروستی، تا پێکهینانی تۆڕی هاوکاری کۆمەڵایەتی و دەستەکانی پزیشکانی ئازاد و سەربەخۆ، هاوکات سازدانی کۆبوونەوەی گشتی لەنێو ناوەندەکانی تەندروستی و هەڵبژرادنی نوێنەرانی خۆتان و گەڵاڵەکردنەوەی پرۆژەی چۆنیەتی ئیدارەکردنی نەخۆشخانە و دامودەزگاکانی تەندروستی لەلایەن خۆتانەوە دەتوانێت لە یەکەمین هەنگاوەکان بێت بەئاراستەی لاخستنی ئەو بەرپرس و بەڕێوەبەرە فاشیل و هیچ کارانە بێت کە لەلایەن حکومەتی حزبەکانەوە دانراون و جێگرتنەوەیان بەکارمەند و پەرستاران و پزیشکانی دڵسۆز. هەر لەڕێچکەی ئەم خەباتە و بەڕاکێشانی پشتیوانی جەماوەری، سندوقی دابینکردنی موچە و، خەرجی پزیشک و کارمەندانی تەندروستی دابین بکرێت و هیچ کەسێک ناچار بەجێهشتنی کارەکەی نەکرێت.

ئەزمونی چەند مانگی ڕابردوو نیشانیداوە، کە یەکلاکردنەوەی جەنگی کۆرۆنا کاری کۆمەڵایەتی  و جوڵانەوەی بەرهەقی خەڵکی ئازادیخواز  و ناڕازی کوردستانە، کاری پزیشکان و پەرستاران و کارمەندانی راوەستاو و دڵسۆزە، کاری هەموو ئەو ئینسانانەیە کەسەلامەتی تەندروستی کۆمەڵایەتی بەهەقێکی بێئەملاو ئەولای هاوڵاتیان دەزانن و دەیانەوێت لەدەستی کۆمپانیا و بازرگانانی چاوچنۆک و بەرپرسانی گەندەڵ دەرکێشن و وەک خزمەتگوزاریەکی خۆڕایی بەڕێوەی بەرن و بخرێتە خزمەت هاوڵاتیانەوە.

 

ئەمانە نەک هەر ئاسۆ و بەدیلێکن بۆ سەرکەوتن بەسەر پەتای کۆرۆنادا، بگرە هەڵکردنی چرای ئومیدن بۆ جێخستنی نموونەکی تر لە بەڕێوەبردنی کۆمەڵگا و سیستەمێکی تر کە سەلامەتی تەندروستی و باشبژێوی بۆ هەمووان دەستەبەر دەکات، کەواتە وەرن با هەر ئەمڕۆ ئەم چرای ئومێدە هەڵبکەین.

حزبی کۆمۆنیستی کرێکاریی کوردستان بەڕاوەستانی لە ڕیزی خەباتی ئێوەدا، تەواوی توانا و هەوڵی خۆی لەم پێناوەدا دەخاتە خزمەتەوە.

پەرەگرتوو بێت خەبات و تێکۆشانی پزیشکان و پەرستاران و کارمەندانی تەندروستی لەپێناو سەلامەتی تەندروستی و کۆمەڵایەتیدا!

بژی دەسەڵاتدارێتی جەماوەری!

حزبی کۆمۆنیستی کرێکاریی کوردستان

تەموزی ٢٠٢٠

 

 

About hkkk

Check Also

گفتوگۆ لەگەڵ ڕێبوار ئەحمەد، لەبارەی بڵاوبوونەوەی کتێبی “لەبری بیرەوەری” و کاردانەوەکانی …

ئەفسانە یان فاشیزم بۆپێشەوە: کتێبە تازەکەی مەلا بەختیار (لەبری بیرەوەری) گۆشەیەکی تر لە تاوان و …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *