Home 6 ئەرشیفی بابەتەکان 6  گرینگی و پێویستی بزووتنەوەی شوورایی …

 گرینگی و پێویستی بزووتنەوەی شوورایی …

نووسینی: عەبدالرحمن رەسوڵ…

لەسەردەمی ئێستادا لەزۆرێک لە وڵاتانی جیهان سیستەمی دەسەڵات بێ ڕوحمانە زۆرینەی خەڵکی کۆمەڵگە دەچەوسێنێتەوە، لەژێر ناوی پاراستنی ( نیشتمان ونەتەوە وئایین وفکرو دەوڵەت وحیزب) دا، جۆری سیستەمەکانیش (سەرمایەدارییە کە بەجۆری ئایینی و نەتەوەی و مەلیکی وپاشایی وشاهانشایی وپەرلەمانی)    داپۆشراوە کەبەردەوام یاساکان و دەستوور لەدژی ماف و ئازادییەکانی خەڵکی چەوساوەو هەژار و ئازادیخوازو  یەکسانیخواز و مرۆڤ دۆستان و ژینگە پارێزەرانی کۆمەڵگە نوێ دەکەنەوە و دەمەزەردی دەکەنەوە بۆئەوەی بەردەوام بن لەگەشدانی بێکاری و هەژاری وجیاکاری وچەوسانەوە وگەندەڵی ودزینی سەروەت سامان وپوڵی گشتی کۆمەڵگە. بەهۆی ناوشیاری خەڵکی چەوساوە و هەژارو بێکارو ئاوارەی کۆمەڵگەوە چەوسێنەران بەردەوام دەبن لەچەوسانەوە و سازکردنی شەڕ وقەیران و بۆگەشەدانی ئاوارەیی وهەژاری و لەناوبردنی مرۆڤەکان..

لەقۆناغی ئێستای مرۆڤایەتیدا هێنانە گۆڕێی بزووتنەوەی شوورایی پێویست و گرینگە بۆ بەشداریکردنی ڕاستەوخۆی خەڵک لەدانانی یاساو دەستوور بەپێی پێویستی و خواستی مرۆڤەکانی کۆمەڵگە بۆهێنانەدی ماف وئازادییەکان  کەکۆمەڵگە ئاراستە بکات بۆچەسپاندنی دادپەوەری ویەکسانی وئازادی بێ قەیدوشەرتی سیاسی. لە ڕوویی جیهانییەوە چەند نمونەیەک باس دەکەم،  ناڕەزایەتییەکانی خەڵکی فەرەنسا کەلەناوجەرگەی دەوڵەتانی ئەوروپایە و یەکەمین وڵات بوو ڕێنسانس و ڕیفۆرمی لەئاییندا کرد ودینی لەدەوڵەت جیاکردەوە، سیستەمی کردە سیستەمێکی سیکۆلار. ئێستاش ئەوا ماوەی چەند مانگە لەساڵی ٢٠١٩ خەڵک لەسەرشەقامەکان داوای گۆڕانکاری دەکات لەیاساکان وبڕیارەکانی دەوڵەت، بەڵام لەبەرئەوەی نەتواندراوە باش ناڕەزایەتییەکان ڕێکبخرێت و بەئاراستەیەک ناڕەزایەتییەکان گەشەپێبدەن کەخەڵک خۆی ڕاستەوخۆ بەشداربێت لەڕێگای شووراکانییەوە بۆ یاسادانان و ئیدارەدانی کۆمەڵگا، پارێزەرانی سیستەمی سەمایەداری کەپێکهاتوون لەحیزبەکانی بەشدار لەدەسەڵات و حکومەت وبازرگان وسەرمایەدار و خاوەن کۆمپانیاکان و هەموو ئەوانەی پارێزەری ئەوجۆرە دەسەڵات وسیستەمەن کاردەکەن بۆ لەمپەردانان و پاشکەشەپێکردن وپەرتکردنی ناڕەزایەتییەکانی خەڵک لەجۆری بەڵێن دان وفرێودان وزیندانیکردنی خۆپیشاندەراندا. لەگەڵ ئەوەی خەڵکی ناڕازی وخۆپیشاندەران بەردەوامن لەسەرشەقامەکان و ناڕەزایەتی دەردەبڕن، بەڵام دەسەڵاتدارانی دەوڵەت زۆربە ساردی وەڵامی خواست و داواکارییەکانیان دەدەنەوە. ئەگەرچی بەردەوام بوونی خەڵکی ناڕازی وخۆپیشاندەری فەرەنسا نیشانەی ئومێدو سەرکەوتن وبەدیهێنانی خواست وداواکارییەکانیانە، بەڵام ئەگەر ئەم ناڕەزایەتی و خۆپیشاندانانە بە جۆرێک ڕێکبخرایە لەجۆری بزووتنەوەی شوورایی خەڵکی، کە سەرجەم شارەکانی بگرتایەتەوە و ئامانجی بەدیهێنانی بەشداریکردنی ڕاستەوخۆی خەڵک بایە لەدانانی یاساکاندا ئەوا سەرکەوتووتر دەبوو. ئەو نارەزایەتییەی کەلەوڵاتانی تری ئەوروپاو ئەمریکاو بەریتانیاش هەروایە پارێزەرانی سیستەمی سەرمایەداری هەموو هەولێک دەدەن بۆپاشکەشەپێکردنی نارەزایەتییەکان یان کەمکردنەوەی خواست و مافەکانیان.  هەر بۆیە لەئەنجامی ناڕێکخراوەیی و پەرشوبڵاوی ناڕەزایەتییەکانەوەیە کە دەسەڵات وەڵامی خوست و داواکارییەکانی خەڵکی ناڕازی نەک ناداتەوە، بەڵکو بەردەوام نەخشەو پلانی ئەوە جێبەجێ دەکات کە پاشەکشە بکات لەو یاسا وبریارانەی کەساڵانی پێشتر دەریکردووە لە ڕوویی مافی خانەنیشینی  و دابینکردنی بیمە کۆمەڵایەتی و بێکاری ومافی پەنابەرانەوە. لەئەنجامی پەرشوبڵاوی وناوشیاری خەڵکی   چەوساوە و پەنابەرانەوە بۆ ڕێکخراوبوونیان لەڕێکخراوی جەماوەری خۆیاندا لەقۆناغی ئێستادا بزووتنەوەی ڕاسیسزم و ناسیۆنالیستی و فاشیزم لەپێشکەوتووترین دەوڵەتانی جیهان  نەشونماو گەشە دەکات کەئەمەش خوڵقاندنی لەلایەن دەوڵەتانی چەوسێنەری سەرمایەداری زلهێزەوە هاوکارو پشتیوانی دەکرێت، بۆئەوەی بەر بەگەشەی بزووتنەوەی کرێکاری و ئازادیخوازی ومرۆڤدۆستی بگرێت.

ناڕەزایەتییەکانی خەڵکی سودان بەهۆی ئەوەی لەسەرەتاوە  ڕێک نەخرابوو لەناوبزووتنەوەیەکی جەماوەری شووراییدا کەئامانجی وەرگرتنی دەسەڵات بێت لەلایەن خودی خەڵکەوە. کەخودی کەخەڵکی ناڕازی بەشداربێت لەدانانی یاساو بەڕێوەبردنی دەوڵەت وکۆمەڵگەی سوداندا، خەڵکی ناڕازی سودان تەنها ئامانجی ڕووخانی ڕژێم وسیستەمی چەوسێنەر لەجۆری کەسەکان بوو، نەک لەجۆری سیستەمی چەوسێنەر. هەربۆش لە دوایی نەمانی دیکتاتۆر لەشێواز کەسەکەدا بەهەمان جۆری ڕابردوو، بەڵکو خراپتریش لەژێر ناوی پاراستنی نیشتمان ودەوڵەتدا دیسان کەوتنە گیانی خەڵکی ناڕازی  و ڕاپەڕیوی سودان بۆ پاشەکشەپێکردنی  لەخواست و داواکارییە ئینسانییەکانیان وگەشەی بزووتنەوەی ئازادیخوازی وپێشکەوتخوازی لەسودان. کەواتە لەئێستادا خەڵکی ناڕازی تاکە ڕێگایان ئەوەیە بزووتنەوەی شوورایی خۆیان بەهێز بکەن و دەست بەهەڵبژاردنی شووراکانیان بکەن و لەهەر گەرەک و شارێک  کە بۆیان دەکرێت دەسەڵات وسیستەمی شوورایی دابمەزرێن وبەرگری لێبکەن. لە عێراق پاش چەندین ساڵ لەدوایی ڕووخانی ڕژێمی فاشی بەعسی، خەڵکی عێراق زۆرینەی لەهەژار وبیکاری دا دەگوزەرێت، هەربۆیە بەردەوام خەڵک ناڕازییە، بەلام کێشەی گەورە ئەوەیە ناڕەزایەتییەکانی خەڵکی عێراق پەرش و بڵاوە بەهۆی نووشیاری خەڵکەوە ناڕەزایەتییەکانی خەڵک ئاراستە دەکرێت بۆهێنانەدی بەرژەوەندی وسوودی سەرۆکی (حیزب وخێڵ وعەشیرەت وئایین ونەتەوەکان) ڕۆژانە لەکەناڵی ڕاگەیاندنەکان و لەفەیسبووکەوە خەڵکی ناڕازی بێزاری خۆی بەرامبەر سیستەمی چەوسێنەری دەوڵەتی ئایینی عێراق دەردەبڕێت و لەسەرشەقامی شارەکان خۆپیشاندان وناڕەزایەتی دەردەبڕێت بۆهێنانەدی ماف و ئازادییەکانیان وباشکردن ودابینکردنی خزمەتگوزاری وداواکاری وخواستەکانیان، بەڵام لەلایەن پارێزەرانی سیستەمی چەوسێنەری عێراقەوە وەلامیان نادرێتەوە وساڵ لە دوای ساڵ پاش چەندین هەڵبژاردن وگۆرانکاری لەسەرۆکی  وەزیران وسەرۆکی پەرلەمان وسەرۆکی کۆمارو وەزیرو ئەندام پەرلەمانەکان کۆمەڵگەی عێراق لەڕووی دەست ڕاگەیشتن بەباشبوونی خزمەتگوزارییەکان و دابینکردنی ماف وئازادییەکانەوە لەپاشەكشەی بەردەوامدایە. چارەسەریش بەندە بەخودی خەڵکی ناڕازی وچەوساوە وکڕێکار وئازادیخوازانەوە، کەخۆیان لەبزووتنەوەیەکی شوورایی ڕاستەوخۆی خەڵکیدا ڕێکخراو بکەن و داوای گۆڕانی سیستەمی چەوسێنەرو نابەرابەر بکەن  کە خەڵک خۆی یاساکان وسیستەم دابنێت، نەک سەرۆکی حیزب وخێڵەکان لەباشووری کوردستان ئەوا زیاتر لەچەندین ساڵە دەسەڵات وحکومەت لەلایەن حیزبەکانەوە کە لەسەربنەمایی سیستەمی خێڵایەتی حیزبی دامەزراوە بەڕێوەدەچێت و پارێزگاری لێ دەکرێت، لەشێوازی بەڕێوەبردندا لەلایەن پارتی دیموکراتی کوردستانی عێراقەوە بەڕێوەدەبرێت و زۆرترین دەسەڵاتەکانی بەدەستەوەیە، بەڵام لەناوەڕۆکدا سەرجەم حیزبەکانی باشووری کوردستان بەحیزبەکانی بەناو ئۆپۆزیسیۆنیشەوە  کەبزووتنەوەی گۆڕان وئیسلامییەکان وحیزبەسێبەرەکانی یەکێتی وپارتی وحیزبی شیوعی بەرگری وپارێزەری لەمانەوەی ئەم جۆرەسیستەمە خێڵایەتی وحیزبییە دەکەن، لەشێوازدا قسە لەگۆڕانی بەشێک لەسیستەمی چەوسێنەر دەکەن بە ڕیفۆرم وچاکسازی، بەڵام ئەوا زیاترلە ٢٨ ساڵە باس لەپێویستی ڕیفۆرم دەکرێت لەسیستەمی چەوسێنەری باشووری کوردستاندا هیچ جۆرە ڕیفۆرم وچاکسازییەکیش ڕووی نەداوە، گەشەی بێکاری وهەژاری وئاوارەیی وسازکردنی قەیران وکێشەو خراپی خزمەتگوزاری و بەرتەسککردنەوەی ئازادی ڕادەربڕین وزیندانیکردنی هەڵسوڕاوانی ئازادیخواز و تیرۆرکردنی ڕۆژنامەنووسان و کەسانی ڕەخنەگر لەسیستەمی چەوسینەری باشووری کوردستان هەر بەردەوامەو درێژەی هەیە، کەچی سەرۆکی حیزبەکان وئەندامانی پەرلەمان سەرۆکی حکومەت خەڵات دەکەن و پۆست وپلەی لێپرسراوێتی بەرزدەکەنەوەو دەیکەنە سەرۆکی هەرێمی باشووری کوردستان لەساڵی ٢٠١٩، هەرچەندە کێشە ئەوە نییە کێ دەبێتە سەرۆکی هەرێم، بەڵکو کێشە ئەوەیە بۆخەڵک کەهەمان سیستەم درێژەی پێ دەدرێت. لەقۆناغی ئێستادا دەبێت ئەوە بزانین کەخەڵکی هەژارو چەوساوەو… کرێکار و زەحمەتکێشی کوردستان بەهۆی ناهۆشیاری و خۆشباوەڕیان بەومافیایانەی حیزبەکانی باشووری کوردستان  کە لەژێرناوی کوردایەتی  دا ٢٨ ساڵە کۆمەڵگە وێران و بێمافی دەکەن وژینگە وێران دەکەن. ئەم دەسەڵاتدارانە بازرگانی بە ژیانی خەڵکی قۆناغی ئێستاو نەوەکانی داهاتوەوە دەکەن. هەر ڕۆژەی هێزێکی داگیرکەر دەهێنە سەر ماڵی خەڵک و سەروەت وسامانی سەرزەوی و ژێر زەوی ئەدزن وتەخشان وپەخشانی پێدەکەن و ڤێلاو میوانخانەو کۆمپانیاو یانە وخانوو وشوقەی لە وڵاتانی عەرەبی وئەوروپا پێ دەکڕن. ئێستاش لەدوای بەدەستەوەدانی کەرکوک و شەنگال و خانەقین و مەخمور و لەداهاتوودا نۆرەی سلێمانی و هەولێر و دهۆک زاخۆش دێت کەبیفرۆشن و بەوجۆرە بێت داگیر دەکرێت لەلایەن دەوڵەتانی داگیرکەرەوە هەرچەندە لەڕوویی سیاسییەوە داگیرکراوە. هەر ڕۆژەی شارێک بە دەوڵەتێک  دەفرۆشن..

ئەگەرخەڵکی باشووری کوردستان دەیەوێت ڕزگاری بێت لەدەست چەوسانەوەو هەژاری ونابەرابەری وبێکاری و ئاوارەکردندا کە بەردەوام خۆشەویستانیان لە دەریا وڕێگاکانی ئەوروپا نەبنە قوربانی  ئەوا دەبێت بەهێزو توانای هۆشیارانەی خۆیان بێنە مەیدان و لە ڕێکخراوی شورای گەڕەک وشارو شوێنی نیشتەجێی بوونی  خۆیاندا خۆیان ڕێکخراو و یەکگرتوو بکەن، ڕێگە بە هیچ حییزب و ڕێکخراوێکی حزبی  نەدەن دەست بەسەر ڕێکخراوەکەیاندا بگرێت و بەحیزبی بکات. خۆیان خۆیان بەڕێوەبەرن، لەمڕۆوە دەست بەگفتوگۆو ڕاگۆڕینەوە بکەن لەسەر چۆنێتی ڕێکخراوکردنی ناڕەزایەتی وخۆپیشاندانەکانتان لەناوبزووتنەوەیەکی شوورایی بەهێزو پرکاریگەردا دوور لە کاریگەری دانانی سیاسەتی بازرگانی  سەرۆکی حیزبە مافیاکانی باشووری کوردستان، لەقۆناغی  ئێستا زەمینەی دروستکردن وگەشەدان بەبزووتنەوەی شووراکان بۆ خەڵکی کوردستان زۆر لەبارترە  لە سالی ١٩٩١.لەبەرئەوەی ساڵی ١٩٩١خەڵکی باشووری کوردستان جۆرو دەسەڵاتی حیزبەکانی نەبینیبوو، بەڵام ئەوا ٢٨ ساڵە دەچەسێتەوە لەژێر سیستەم و دەسەڵاتیان هەروەها ئاستی وشیاری ژنان وگەنجان ولاوان باش گەشەی کردووە، ئیمکاناتی ڕاگەیاندن ئاسانترە، لەلایەن هەمووکەسێکەوە دەتواندرێت فەیسبوکەکەی وموبایلەکەی بکاتە مەیدانێک بۆ داکۆکیکردن لەهێنانەدی نان کار ئازادی، حکومەتی شوورایی، مەیدانی کاری هاوبەش لە نێوان ئەوحیزب و ڕێکخراو گروپانەی خواستی هێنانەدی ماف وئازادییەکانی خەڵکیان هەیە  لەبارە. هەروەها ئەرکی هەڵسوڕاوانی کرێکاری، جەماوەری، ژنان، لاوان، ژینگەپارێزانە لەڕێگای کۆبوونەوەی گشتی رێکخراوەی سەربەخۆی خۆیان پێکبهێنن. سەرکەوتن وهێنانەدی خواست وداواکاری خەڵکی نارازی بەندە بەگەشەی ئاستی وشیاری و تێگەیشتن لە ئیدارەدانی خۆبەرێوەبەری شوورایی  و هەڵگرتنی بەرپرسیاریەتی وجۆرێک لەڕابەرایەتی خود کردن لەلایەن کرێکار و خەڵکی زەحمەتکێش وچەوساوە بۆ بەڕێوەبردنی دەسەلاتی ئیداری وسیاسی و ئابووری کۆمەلگە، کە لەڕێگای نۆێنەرانی هەڵبژێردراوی راستەوخۆی خەڵک لە کۆبوونەوە گشتییەکان کە هەڵدەبژێردرێن. بەسە ئیتر وەرنە مەیدان بەتێکۆشانێکی هاوبەش و گشتگیر دوور لەلوکاڵی و ناوچەگەرێتی. شەقامەکانی شار پڕبکەن لە دەنگی ناڕەزایەتی وبەرزکردنەوەی خواست وداواکاری (نان، کار، ئازادی، حکومەتی شوورایی) با بکرێتە داواکاری ڕۆژانەو بەردەوامی خەڵکی ناڕازی باشووری کوردستان. هەروەها مەرگ و نەمان بۆ دەسەڵاتی دزو گەندەڵ و مافیاکان لە کوردستان دروشمی هەمووان بێت .

خەڵکی ئێران و ڕۆژهەڵاتی کوردستان ماوەی چل ساڵە بەتوندترین جۆرو شێواز دەچەوسێندرێنەوە وزیندانی دەکرێن و ئازارو ئەشکەنجەو لەسێدارە دەدرێن وکۆڵبەرانیان تیرۆردەکرێت لەلایەن پارێزەرانی سیستەمی فاشیزمی ئیسلامی ئێرانەوە.

گرینگە خەڵکی ڕۆژهەڵاتی کوردستان و ئێران وشیاربێت و ئەوە بزانێت دابینکردنی داواکاری و خواستە ڕەواکانی خەڵکی هەژارو چەوساوەو کۆڵبەرو کرێکارانی نارازی هەنگاوێکی بەهێزی بەرەوپێشچوونی کۆمەڵگەیە بەرەو هێنانەدی ماف و ئازادییەکانی تەواوی تاکەکانی کۆمەڵگە. ئەگەرچی بە دڵنییایەوە سیستەمی فاشیزمی ئیسلامی ئێران بەهیچ جۆرێک مل بەدابینکردنی خواست و داواکارییەکانی ئێستای کرێکارانی ناڕازی نادات کەواتە ئەرکی هەموو لایەکە بە گەشەدان بەهاوخەباتی تێکۆشانی ئازایخوازانە خەبات و ناڕەزایەتییەکانی شارەکانی ڕۆژهەڵاتی کوردستان و ئێران بە گوڕترو بەجۆشتر بکات، بۆئەوەی هەرچی زووترە گوێ بیستی سەرکەوتنی تێکۆشانەکانی خەڵکی ناڕازی چەوساوەو کرێکاران بین. سەرجەم ناڕەزایەتییەکان بکرێن بەیەک ئاراستەی گشتگیر کەتەواوی شارەکان بگرێتەوە و پەرتەوازەیی و پەرشوبڵاوی ‌هێزە جیاوازەکان هەڵبوەشێندرێتەوە، هەموویان بکرێنە یەک ناڕەزایەتی گشتگیر و بەهێزی جەماوەری، کە سەرجەم بەشە جیاوازەکانی کۆمەڵگە لەخۆبگرێت. هەربۆیە تاکە ڕێگای چارەسەر بۆ کۆتاییهێنانی سەرجەم کێشەو قەیرانەکانی ئێران و کوردستان، بەرپاکردنی شۆڕش و ڕاپەڕینە بۆ گۆڕانکاری لەسیستەمی چەوسێنەرو نابەرابەر و سەرکوتگەری سیستەمی ئیسلامییە و دامەزراندنی سیستەمێکی شورایی ئازاد و بەرابەرە.

ئەویش بە بەهێزکردن و گەشەدان بە تێکۆشانی هاوبەش و یەکگرتووانەی بزووتنەوەی شورایی خەڵکی کودستان و ئێران مسۆگەر دەبێت، پێویستە ئەم جارە لە ئاڵوگۆڕکردن و گۆڕانی سیستەمەدا خەڵکی بە تاقی کردنەوەی جۆرە سیستەمێکی جیاوازتر لە جۆرە سیستەم و دەسەڵاتەکانی ڕابردوو لە جۆری دەسەڵاتی سەرکوتگەری دینی و قەومی ڕوبەڕوویی قۆناغی داهاتوو ببێتەوە، ئەویش لە سەرەتایی هەنگاوەکانی بۆ پێشەوەدا دەسەڵات و ئیدارەدانی خەڵک تاقی بکاتەوە لەجۆری شورایی دا، کە باشترین هەنگاو و نەخشە ڕێگایە کە کۆمەڵگە بەرەو کۆمەڵگەیەکی ئازاد و بەرابەر ئاراستە بکات.

قۆناغی ئێستای ئێران سەردەمێکی هەستیارە بەهۆی هەبوونی وشیاری خەڵکی ناڕازی شارەکانی ئێران و کوردستان بەگشتی وکرێکاران و زەحمەتکێشان بەتایبەتی کە زۆر ئازایانە و تێکۆشەرانە هاتوونەتە مەیدان لە کرێکاران ومامۆستایان وکۆڵبەران وخەڵکی زەحمەتکێش وچەوساوە بۆ بەدیهێنانی ماف و ئازادییەکانیان، پێویستە خەڵک وشیاربێت بەجۆرێک کە دابینکردن و بەدیهێنانی ماف و ئازادییەکان و کۆتاییهێنان بە کێشە وقەیرانەکان بێ ڕاپەڕین و شۆڕش مەحاڵە وهەرگیز بەدی نایە و سیستەمی تیرۆریستی ئێستا ئیسلامی بەهیچ جۆرێک مل نادات بەدابینکردنی خواست و داواکارییەکانی خەڵکی ناڕازی ئێران وکوردستان، بۆیە تەنها ڕێگاچارە ڕێکخرابوونی خەڵکی ناڕازییە لەجۆری بزووتنەوەی شوراییدا کە لەنێوخۆیاندا بە گفتوگۆ و ڕاگۆڕینەوە و هەڵبژاردنی شوراکانی خۆیان دەست بە تێکۆشانی جۆراوجۆری سیاسی و ڕۆشنبیری و فەرهەنگی و کۆمەڵایەتی بکەن. لە ئێران و ڕۆژهەڵاتی کوردستان و عێراق وباشووری کوردستان هەر وڵات وکۆمەڵگەیەک بێت  بە بانگەواز نابێ، بەقسەکردن نابێت بەدروستکردنی گروپ بەندی نابێت بەناو گۆرینی ناوی مەکتەبی سیاسی و کۆمیتەی ناوەندیی ڕێکخراو وحیزبەکان بە ئەندامی شووراکان نابێت، یان بە ناونانی شوورایی کاتی نابێت، بەپیرۆزدانان و دانانی هێڵی سوور بۆڕەخنەگرتن لەهەڵەی سیستەمی خێڵ وئایین ونەتەوەکان نابێت، بەڵکو بزووتنەوەی شوورایی پرۆسەیەکە کە لە دروستکردنی ڕیکخراوە جەماوەریەکانەوە دەست پێ دەکا و ئەمەش لە مەیدانی کار و بەرهەمهێناندا دەتوانێ پێشڕەوی بکا و تا دواتر لە ناوەندەکانی تردا دەتوانرێ پێکبێت و ببێتە بزوتنەوەیەکی سەراسەری. ئەمەش پێویستی سیستەم وئیدارەدانی شوورایی یە کە بەواتایی دەرکردنی یاسا وبڕیارەکان لەجۆری بڕیاری بەکۆمەڵ وگەشەدانە بە کۆمەڵکاری،  کۆبونەوەی هەڵسوراوان بەتەنیا ناتوانێ ناوبنرێ شوورا و بزووتنەوەی شوورایی. دەبێت ئەوەش بزانین کە شوورا لەگەڕەکدا لە دەورانی ئاساییدا دروست نابێ لە کاتێکدا گەرەک تێکەڵاوێکە لە خەڵکی جۆراوجۆری چینەکان کە بەرژەوەندی جیایان هەیە و پەیوەندی ڕۆژانەیان لە شوێنێکی ترەوە ڕیکدەخرێ. هەربۆیە دەبێ لەو جۆرە شیعاردانە ناواقعیانە دورکەوینەوە کە بەبۆنەی هەڵبژاردنەوە بێ یان کێشەی ناوخۆی حزبە دەسەڵاتدارەکان یان حیزبە ئۆپۆزیسیۆنەکان کە پێمان وابێت بە ڕاگەیاندن ودامەزراندنی گرووپ وحیزبێک بەناوی شووراوە شوورا پێک دێت! ئەوا زۆرهەڵەیە ئەم تێڕوانین وبۆچوونە، ڕاستی ئەوەیە کە کرێکاران و فەرمانبەران وخەڵک بەگشتی لە پرۆسەی ڕیکخراوکردنی ناڕەزایەتیەکان و لە شوێنەکانی کارکردنیاندا دەتوانن بزووتنەوەی  شوورایی دروست بکەن. کۆمۆنیستەکان وئازادیخوزو یەکسانیخوازەکان پێویستە لەم پرۆسەیەدا بەشداربن و دەوری سەرەکی بگێڕن تا بتوانن بزووتنەوەیەکی سەراسەری شوورایی بەگەڕ بخەن. و قۆناغ بەقۆناغ وهەنگاو بەهەنگا بەرەوسەرکەوتنی باشتر بچێت.

بزووتنەوەی شوورایی  ئەوەیە کەپەیامی مرۆڤایەتی خۆی پێشکەشی تاکەکانی کۆمەڵگا بکات، کۆماری تیرۆریستی ئیسلامی ئێرانیش شورای هەیە، بەڵام شوراکانی بۆسەرکوتی ناڕەزایەتی وتێکۆشانە ئازادیخوازی وپێشکەوتنخوازەکانی کۆمەڵگەیە، کەواتە گرینگ ئەوەنییە چ ناوێکی هەیە، بەڵکو گرینگ ئەوەیە چ جۆرە پەیامێکی بۆباشتربوونی ژیانی مرۆڤە چەوساوەکانی کۆمەڵگەی پێیە، بەچ جۆرێک چارەسەری کێشەی نەتەوەیی و چینایەتییەکان دەکات. کەواتە دەرئەنجام دەگەینە ئەو ئەنجامە سیستەمی شوورایی سیستەم وحکومەتێکی مرۆڤایەتییە، نەک سیستەمێکی نەتەوەیی وئاینی، بەڵکو بەهۆی هەبوونی یاساو دەستوورو سیستەمە مرۆڤایەتی و مرۆڤدۆستیەکەیەوە زۆر بەئاسانی دەتوانێت چارەسەری کێشەی سیستەمی میللی ونەتەوایەتی  نەتەوەکانی ژێر فەرمانڕەوایەتی خۆیی بکات. ئەمەش بۆئەوە دەگەرێتەوە کە سەرچاوەکەی لەبنیادنانی بەدی هاتووە. هەربۆیە بەسیستەم و حکومەتی شوورایی دەگوترێت دەسەڵاتی خۆبەڕێوەبەری لەلایەن خەڵک خۆیەوە، بەجۆرێکی ئازادانە و بڕیاری کۆمەڵکاری پێشکەوتنخوازانەو مرۆڤایەتیانە.

تێبینی: ئەم بابەتە لە بۆپێشەوەی ژمارە ٥٤ بەرواری ١٥/٦/٢٠١٩ بڵاوبۆتەوە

About hkkk

Check Also

کشانه‌وه‌ی هیزه‌کانی ئه‌مریکا وپێشهاته‌کانی جه‌نگ له‌کورستانی سوریا …

گفتوگۆ له‌گه‌ڵ عه‌بدوڵا موحمود … کشانه‌وه‌ی هێزه‌کانی ئه‌مریکا له‌سوریا، ڕه‌وتی ڕوداواکان وجه‌نگ له‌کوردستانی سوریای ڕاکێشاوه‌ته‌ …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *