Home 6 ئەرشیفی بابەتەکان 6 گفتوگۆی بۆپێشەوە لەگەڵ نوری بەشیر یەکێک لە هەڵسوڕاوانی بزوتنەوەی شورایی لە یادی ٢٩ ساڵ تێپەڕین بەسەر راپەڕینی خەڵکی  کوردستاندا …

گفتوگۆی بۆپێشەوە لەگەڵ نوری بەشیر یەکێک لە هەڵسوڕاوانی بزوتنەوەی شورایی لە یادی ٢٩ ساڵ تێپەڕین بەسەر راپەڕینی خەڵکی  کوردستاندا …

قسەکردن لەمێژووی سێ دەیەی رابردوو لەکوردستاندا بەبێ قسەکردن لە ڕاپەرین و شوراکان کە دەوری بەرجەستەی کۆمۆنیستەکان و جەماوەری ناڕازی و دژی رژێمی بەعس و بۆ دەسەڵاتداریتی خەڵک هاتنەمەیدان، مێژوویەکی ناتەواو  و شێوێنراوە.

١- بۆپێشەوە: دوای نزیک بە٣٠ ساڵ لە وەدەرنانی بەعس لە کوردستان، جیاوازی سەرەکی نێوان دەسەڵاتی بەعس و دوای بەعس چییە؟ حزبە بۆرژوازییەکانی کوردستان، بەدوای ڕاپەرینی خەڵکی کوردستاندا، بەڵێنی کردنی کوردستان بە بەهەشتیان دەدا، بنەمای ئەو بەڵێنانە چی بوو؟ بۆچی نەیانتوانی ویستەکانی خەڵکی کوردستان وەدی بێنن؟

نوری بەشیر: لەبەرئەوەی نەوەیەکی تازە پێگەیشتووە لەکوردستان کەمتر بە مێژووی دەسەڵاتی حزبی بەعس و دەسەڵاتی حزبەکانی کوردایەتی ئەوکاتە ئاشنان، ئەم گەنجانە تەمەنیان لەنێوان ١٨ بۆ ٢٥ ساڵ دەبێت، لەبەر ئەوەی خۆیان لەناو هەلومەرجەکەدا نەبوون کەم تا زۆر ئەگەر مێژووی ئەو دەورەیەیان بیستبێت دەماودەم یان لەزمانی حزبە دەسەڵاتدارەکانی کوردستان و میدیاکانی ئەوانەوە قسەی لێکراوە یان مێژوویان نوسیوەتەوە و ئەوەش بەئارەزووی خۆیان و لەبەرژەوەندی دەسەڵاتی خۆیانەوە باسیان کردووە، هەربۆیە سەرەتا کەمێک لەسەر ئەو دەورانە قسە دەکەم.

ئێستا کە  نزیکەی سێ دەیە بەسەر دەسەڵاتدارێتی حزبە ناسیونالیستەکانی کوردستاندا تێدەپەڕێت، کە لەئەنجامی ڕاپەڕینی خەڵک لە دژی دەسەڵاتدارێتی دیکتاتۆری حزبی بەعس لەکوردستان هاتنە سەر دەسەڵات، هەر ئەو کات کە کۆمۆنیستەکان و ژنان و پیاوانی ئازادیخوازو داخ لەدڵ لە سیاسەت و کردەوەکانی حزبی بەعس راپەڕین هەر دوای پاککردنەوەی شارەکانی کوردستان لە هێزە سەرکوتگەرەکانی بەعس، شوراکان لەکوردستان وەک دەسەڵاتدارێتی خەڵک دەستیان بۆ براو بزوتتەوەی شورایی وەک بزوتنەوەیەکی سەرتاسەری لەکوردستاندا خەڵک پێی ئاشناو نزیک بوو، وە ترسی خستە دڵی حزبەکانی کوردایەتی پارتی و یەکێتی تا دەگاتە ئیسلامیەکان لەبەر ئەوەی سیاسەتی ئەوانی خستبووە ژێر پرسیارەوە، بۆیە تا ئێستاشی لەسەربێت قسە لەسەر ئەم مێژووە ناکەن، وە هەتا زۆر ڕۆناچن بۆ دەسەڵاتدارێتی حزب بەعس، لەبەرئەوەی هەریەکەیان لەگۆشەیەکەوە پەیوەندیەکی بەجۆرێک لەگەڵ حزبی بەعس و دەزگاکانی هەبووە.

قسەکردن لەمێژووی سێ دەیەی رابردوو لەکوردستاندا بەبێ قسەکردن لە ڕاپەرین و شوراکان کە دەوری بەرجەستەی کۆمۆنیستەکان و جەماوەری ناڕازی و دژی رژێمی بەعس و بۆ دەسەڵاتداریتی خەڵک هاتنەمەیدان، مێژوویەکی ناتەواو شێوێنراوە. هەر بۆیە هەر مێژوونوسێک ئەو مێژوو بنوسێتەوەو باسی دەوری شوراکان نەکات ئەوە دەیەوێت مێژوو بەدڵی خۆی و دەسەڵاتی ناسیونالیزمی کورد بنوسێتەوە. بۆیە لێرەوەیە ئەگەر بێمەسەر پرسیارەکەتان لە جیاوازی سەرەکی نێوان دەسەڵاتی بەعس و دوای بەعس چییە، ئەوا دەتوانین بڵیین:

ئەو دوو دەورەیە هەم جیاوازی هەیەو هەم خاڵی لەیەکچونیش، سەرەتا ئەوەبڵێم ئەوەی گۆڕاوە لە عێراق و کوردستاندا تەنها دەموچاوەکانە، لە دەسەڵاتدارێتی بۆرژوازی قەومی عەرەبی حزبی بەعسەوە بۆ دەسەڵاتدارێتی بۆرژوا قەومی ئیسلامی میلیشیایی عەرەبی لەعێراق و دەسەڵاتدارێتی بۆرژوا ناسیونالیستی کوردی لەکوردستان، هەردوولایان دۆستی نزیکن ئێستا دەسەڵاتدارن، لەیەکچوون ئەوەیە کە هەردوو دەسەڵاتی ئەوکات و ئێستاش دەسەڵاتی بۆرژوا قەومی و نوێنەرانی چینی بۆرژوازی و سەرمایەدارن و کەلێنی نێوان چینەکان لەهەردوو دەورەکەدا ئاشکرایە، واتا دەورەی سەردەمی دەسەڵاتی بەعس و دەورەی دەسەڵاتی حزبەکانی کوردایەتی، کۆمەڵگا وەک کۆمەڵگای سەرمایەداری و کەلێنی چینایەتی نێوان دەوڵەمەندو هەژاران زۆر روونە، ئەوەیش خەڵکانێکی کەم سەروەت و سامانی کۆمەڵگایان لەبەردەستدایەو زۆربەری زۆری کۆمەڵگاش برسی و هەژار. دەسەڵاتی ئەوکات دەسەڵاتی بۆرژوا ناسیونالیستی دیکتاتۆری بێپەردەی عەرەبی بوو کە راستەوخۆ سەرکوت و کوشتار و برسیکردن و جەنگی هەڵدەگیرسان لەدژی هەموو خەڵکی عێراق بە عەرەب و کوردەوە، بەڵام ئێستا لە کوردستان دەسەڵاتی بۆرژوا ناسیونالیستی کورد بەهەموو باڵەکانیەوە سەرکوت و برسیکردنی خەڵکی کوردستانی کردووەتە بەشێکی سەرەکی لەکارنامەی خۆی و هەروەها شەریکە بەشی بۆرژوا ناسیونالستی ئیسلامی و میلیشیایی عەرەبیە لە تاڵانکردنی سەروەت و سامانی کۆمەڵگای عێراقدا. واتا ئەم دەسەڵاتەی ئێستا هەم لەسەروەت و سامانی خەڵکی عێراق دەخوات و هەم لەهی خەڵکی کوردستان.

ئەوەی بەجیاوازیەکان دەگەڕێتەوە لە ئێستای کوردستاندا هەلومەرجێکی ئاوەڵای سیاسی هەیە، ئەوەیە لەسەر ئاستی ناوچەکە هەلومەرجەکە گۆڕاوەو لە ساڵی ٢٠١١وە چەندین جار خەڵکی ناڕازای راپەڕین و هاتنەمەیدان. لەباکوری ئەفریقا دەسەڵاتەکانی میسرو تونسی هێنایە خوارەوەو لە سودان بەهەمان شێوەو رژێمی بەعسیش روخا لەلایەن ئەمریکاوە، لە کوردستان چەندان ناڕەزایەتی ئەنجامداوەو بە دروشمی نەخێر بۆ دەسەڵاتی کوردایەتیش هاتنەمەیدان. لەچەند مانگی رابردوودا لە لوبنان و عێراق و ئێرانیش دەسەڵاتەکانیان خستۆتە ژێر فشارێکی گەورەوە و عومەر حەسەن بەشیریان هێنایە خوارەوەو ئێستا بەناچاری بۆرژوازی خۆی دادگایی دەکات، حەریری لەلوبنان و عادل عبدولمەهدیان ناچار بە وازهێنان کرد. وە کوردستان نە دەوڵەتی سەربەخۆیەو نەبەشێکە لە وڵاتێکی جێگیری سیاسی، کوردستان لەلایەن ئەم نوێنەرانەی کوردایەتیەوە بە دوو زۆنی زەردو سەوز دابەشکراوە، وە هەریەکە هێزی میلیشیای خۆی هەیە و حزبەکانی تر لەو بەینەدا یاری دەکەن، بۆیە دەسەڵاتەکەیان ناجێگیرەو خەڵکیش زۆر لێیان توڕەو خۆشخەیاڵیان بەدەسەڵاتی کوردایەتی لاواز بووە، هەر بۆیە ئەم حزبانەی کوردایەتی ئێستا ناتوانن بەئارەزوی خۆیان بەردەوام سەرکوتی بێپەردە بکەن.

تا بە بەڵێنی حزبەکانی کوردایەتی دەگەڕێتەوە بەوەی کە کوردستان دەکەنە بەهەشت، ئەوە سەرەتای دەسەڵات و لەکاتی هەڵبژاردنەکاندا وەعدەو بەڵینێکە وەک باقی حزبە بۆرژوازیەکانی دنیا خۆڵ دەکەنە چاوی خەڵک تا دەستیان لەدەسەڵات گیردەبێت. بەڵام لەباری واقعیەوە کوردستان بۆ دەسەڵاتی یەکێتی و پارتی و گۆڕان و ئیسلامیەکان و سەرۆک و لێپرسراوان و ئەندام پەرلەمان و وەزیرەکان و سەرمایەداران و مەلاو شێخەکانی دەوریان بەهەشتەو هەرچی سەروەت و سامانی کۆمەڵگا هەیە لەچنگیاندایەو بەئارەزووی خۆیان سەرف دەکەن و سەفەرو سیاحەتی پێوە دەکەن بۆخۆیان خێزانەکانیان.

بەڵام  لەولاوە کوردستان بۆ خەڵکی کرێکارو کەمدەرامەتی کۆمەڵگا لە مامۆستا وکارمەندو کاسبکارو بێکارو لاوان و ژنان جەهەنمە. هەرلەبەر ئەمەیشە نەک نەیانتوانی ویستەکانی خەڵکی کوردستان وەدی بێنن بەڵکو نایانەوێت و لە بەرنامەیان نییە، لەبەرژەوەندی دەسەڵات و میلیشیاکانیان نییە، لەبەرئەوەی دەسەڵات و ماهیەتی سیاسەت و کارنامەیان نوێنەرایەتی خەڵك ناکەن تاکو داواو خواستەکانی خەڵک بەدیبهێنن.

ئەم حزبانەی بزوتنەوەی کوردایەتی وەک هەموو حزبە بۆرژوازیەکانی ناوچەکە، وەک حکومەتی میلیشیاکانی عێراق، جمهوری ئیسلامی ئێران، ئۆردوگان، بەشار ئەسەد، نوێنەری خەڵک نین بەڵکو لەسەر ژیان و خوێنی خەڵك دەژین.

٢- بۆپێشەوە: لەدڵی ڕاپەڕینی خەڵکی کوردستان، چەپ و کۆمۆنیستەکان هاتنە مەیدان بەکردەوە، و بزوتنەوەی شوراییان وەڕێخست، ئەمە چۆن بوو؟

نوری بەشیر: هاتنەمەیدانی کۆمۆنیستەکان و چەپەکان و خەڵکی کرێکارو ئازادیخوازی کوردستان لەڕاپەڕین و دوایی وەرێخستنی بزوتنەوەی شورایی هەر لەخۆوەو دیاردەیەکی کوتوپڕی ئەوکاتە نەبوو، بەڵکو بەرئەنجامی هەلومەرجێکی کۆمەڵایەتی، سیاسی و ئابووری کۆمەڵگای کوردستان و عێراق بوو، کە کەلێنی چینایەتی کۆمەڵگا کوردستان وەک کۆمەڵگایەکی شاری و فراوان بووبووەوە و لەدڵی ئەو هەلومەرجە سیاسی و ئابووریەدا کۆمۆنیستەکان لەدەرەوەی سیاسەت و قەڵەمڕەوی بزووتنەوەی ناسیونالیزمی کوردو دەسەڵاتی حزبی بەعس بەدەیان گروپ و رێکخراوی مارکسی هەبوون  کارو چالاکیان دەکردو بەرچاوو بوون.

بۆیە کاتێک فرسەتێک هەڵکەوت بەرئەنجامی هەلومەرجێکی جیهانی و ناوچەیی، راپەڕین لە جنوب و کوردستان دروستبوو کۆمۆنیستەکان لەژێر کاریگەری کۆمۆنیزم و مارکسیزمی شۆڕشگێڕی ئێراندا بەدوای شۆڕشی ساڵی ١٩٧٩ی ئێراندا، توانیان بەئامادەییەکی زیاترەوە بێنەمەیدان و لەدڵی ئەو هەلومەرجەدا دەستبەرن بۆ شوراکان.

شوراکان وەک دەسەڵاتدارێتی جەماوەری کرێکارو کەمدەرامەتی کۆمەڵگا کە کۆمۆنیستەکان لەپێشەوەی بوون، وەک هێزێکی جەماوەری بەرفراوان کە رێزێکی فراوان لەژنان و پیاوانی توڕە لەرژێمی فاشیستی بەعس و لاوانێکی زۆر لە کچان و کوڕان لەشوێنی کارو ژیاندا لەگەڕەکەکان بە بانگەوازی کۆمۆنیستەکان کۆبوونەوە لەدەوری یەک لەرێگای کۆبوونەوە گشتیەکانەوە شوراکانیان سازدا.

ئەم شورایانە بۆیەکەمین جاربوو لەمێژووی کوردستانداو لەدەرەوەی قەڵەمڕەوی ناسیونالیزمی کوردا هێزێکی وا بێتە مەیدانەوە بە پێچەوانەی کارنامەو بەدیلی حزبەکانی کوردایەتیەوە کە تا ئەوکات ساحەی سیاسی کوردستانیان داگیرکردبوو. بۆیە شواکان هەموو ئەو حزبانەو لەسەرو هەموویانەوە یەکێتی و پارتی ترساندو توڕەی کردن و هاوپەیمانیان دژی شوراکان دروستکردو کەوتنە پڕوپاگەندە بە دژی شوراکان و پاشەکشە پێکردنی.

راستە دەورەی شوراکان کەمبوو وە لەلایەن ناسیونالیزمی کوردەوە پاشەکشەی پێکرا، بەڵام مۆری خۆی دا لەکۆمەڵگای کوردستان وەک بزوتنەوەیەک لە تەرحو پێشنیاری کۆمۆنیستی و کرێکاریی بۆ بەڕێوەبردنی کۆمەڵگا.

٣- بۆپێشەوە: ئەوانەی مێژوو دەگێڕنەوەو دەنووسن، بە دەگمەنیش باسی بزوتنەوەی شورایی ناکەن، هۆکاری ئەمە چییە؟

نوری بەشیر: ئەمەوێت تاکیدێک لەوە بکەمەوە نوسینەوەی مێژووی سێ دەیەو چواردەیەی کوردستان بەبێ باسکردن لە دەوری کۆمۆنیستەکان و راپەڕین و بزوتنەوەی شورایی کارێکی ناتەواوەو تەنها دەبێتە مێژووی هەڵگێڕاوەو چەواشەکاری کە ناسیونالیزمی کوردو حزبەکانی کوردایەتی و رۆشنبیرە ناسیونالیستە نان بەنرخی رۆژ فرۆشەکان دەستی بۆ دەبەن، کە ئەو مێژووە ناتەواو و لەبەرژەوەندی خەڵک نییە.

بەڵام راستیەک بۆخەڵکی کوردستان رۆشنە کە ئەو مێژووەی ئەوان دەینوسنەوەو قسەی لەسەر دەکەن،  ناتوانێت کارنامەی رۆژانەیان لە ژیانی دوو نەوەی کوردستاندا یان ئەگەر ٢٠ ساڵی رابردوو لەبەرچاو بگرین بشارێتەوەو بیشێوێنن، کە هەمووی لەبەردەستی خەڵکی و بەتایبەت لاوانی کوردستاندایە، کە رۆژانە نەفرەتیان لێدەکەن لەبەرئەوەی بە خوێن و گۆشتی خۆیان تەجروبەی دزی، گەندەڵی، تاڵانکاری، فەساد، نایەکسانی، سەرکوت، تیرۆرو نۆکەریان بۆ وڵاتانی ناوچەکەو ئەمریکا بەچاوی خۆیان بینێوەو تاقیکردووەتەوە.

ناڕەزایەتیەکانی رۆژانەی خەڵک و لاوان لەکوردستان زۆر بەچاوە، تا دەگاتە ئەوەی  کە لاوان لەداخی دەسەڵاتی ئەو حزبانەی کوردایەتی کوردستان بە گرتنەبەری رێگای هاتوونەهات جێدەهێلن، هەتا میدیا چەواشەکارەکانی خۆیان ناتوانن ناڕەزایەتیەکان پەردەپۆش بکەن. ئەگەر کەسێک و مێژوونوسێک راستگۆیانە مێژووی ئەم دەسەڵاتە بۆرژوازیەی کوردایەتی بنوسێتەوە، ئەوا دەبێت مێژوو و ئاماری تاڵانکاری، تیرۆری رۆژنامەنوسان، ئازادیخوازن، کۆمۆنیستەکان، تیرۆی ژنان، وازهێنانی منداڵان لەقوتابخانەو رەوانەی بازاڕی کارو عەلاگە فرۆشی، خۆشخزمەتی بۆ دەوڵەتانی ناوچەکەو پێشلەشکری بۆ هێزە دڕندەکانی عێراق، تورکیاو ئێران ئاماژە پێبدەن، نموونەکانی بۆ هەموو خەڵکی کوردستان لە ٣١ی ئابی ١٩٩٦ و پێشلەشکری بۆ هێزەکانی حکومەتی بەعس، پێشکەوتنی دەبابەکانی تورکیا لە ئیبراهیم خەلیلەوە بۆ کوردستان، ١٦ی ئۆکتۆبەر و پێشلەشکری بۆ حەشدی شەعبی و سوپای پاسدارانی جمهوری ئیسلامی ئێران و تەسلیم کردنەوەی نیوەی خاکی کوردستان بە دەوڵەتی مەرکەزی و میلیشیاکانی حەشدی شەعبی نەک بۆ خەڵکی کوردستان بۆ دنیا شاراوە نەیە.

کۆتا قسەم لەسەر ئەوانەی مێژوویان بەوشێوەیە نوسیوەتەوە کەباسی شوراکان و دەورەی کۆمۆنیستەکان و خەڵکی کرێکارو کەمدەرامەتیان نەکردووە ئەوەیە، ئەوە میژوویان شێواندووەو لەبەرژەوەندی ئەو هێزانە نووسیویانەتەوە کە ئێستا خەڵک  نەفرەتیان لێدەکەن. ئەو مێژووە نوسراوەیە مێژووی دژی خەڵکیە، هەر وەک دەسەڵاتی ئێستا دەسەڵاتی دژی خەڵکیە.

٤-       بۆپێشەوە: بزوتنەوەی شورایی تەمەنی کورت بوو، بەڵام دیاردەیەکی نوێ و جێگای پێشوازی خەڵکی کرێکارو زەحمەتکێش بوو. هۆکانی ڕو‌هێنانی خەڵکی بەشمەینەت بۆ شوراکان چی بوو؟!!

نوری بەشیر: هۆکاری ڕو‌هێنانی خەڵکی بەشمەینەت لە خەڵکی کرێکارو زەحمەتکێش بۆ شوراکان دەکرێت لەچەند لایەنەوە قسەی لەسەر بکەین. سەرەتا راپەڕین دەوری بەرچاوی کۆمۆنیستەکان و خەڵکی ناڕازی و لاوانی تووڕە لەدەسەڵاتی بەعس لەشارەکانەوە دەستی پێکردو خەڵک ئەو هێزەی بینی کە ڕاپەرینی شاریی بوو بەپێچەوانەی ناسیونالیزمی کورد کە خەباتی شاخ و دابڕان لەناڕەزایەتی جەماوەری کردبووە بەرنامەی خۆی بۆ ئەوەی دەسەڵات لە قەڵەمڕەوی خۆیدا بێت. خاڵێک کە دەورو کارکردی پارتی و یەکێتی کە تا ئەوکات لە مەرزەکان و لەئێران توند بووبوون دەورێکی وایان نەبوو تا ئەوکاتەی ڕاپەڕین روویدا و شارەکان لەحزبی بەعس پاکرانەوە ئەوسا ئەوان هاتنە ناوەوە، ئەمە تەنها قسەی من و خەڵکیش نیە، بەڵکو قسەی زۆرێک لەسەرانی یەکێتی و پارتی بوو کە وتیان کاتێک ئێمە لە مەرزەکانەوە هاتینەوە، شارەکان کە لە هێزەکانی بەعس پاککرابۆوە.

خاڵێکی تر دەوری سلبی ئەوان لەشاخداو لەشەڕی ناوخۆیی و کوشتاری یەکتری و کارنامەی ” شەڕ، مفاوەزات، شەڕ” یان لەگەڵ رژێمی بەعس و خۆخزانە باوەشی وڵاتانی ناوچەکە و  بینینی ئەوەی کە ئەوان هەموو شتێکن و خەڵک لەشارەکان هیچ نین، راپەڕین ئەوەی پێچەوانە کردەوەو وە کۆمۆنیستەکان و چەپەکان لەکوردستان بەجیا لەوەی کەتبوونە بەر هێرشی رژێمی بەعس و زۆرێکیان لەزینداندا بوون، بەڵام لە شارەکاندا چالاک بوون و لە پێش راپەڕین کۆمیتەکانی ڕاپەڕینیان دروستکردو لەپێشەوەی هێرشەکاندا بوون کە رژێمی بەعسیان لە کوردستان وەدەرنا.

وە بانگەوازی شواراکان و داواکاری خواستی  سەرەکی نان، کار، ئازادی و حکومەتی شورایی و هەروەها ئەنجامدانی کۆبوونەوەی گشتی لەگەڕەکەکان و کارگەکاندا بۆ بەشداری خەڵک لەچارەنوسی خۆیاندا، ئەوانە وایانکرد زۆربەری خەڵکی لەدەوری شوراکان کۆببنەوە.

٥- بۆپێشەوە: کۆتاییهینان بەدەسەڵاتی سەکوتگەرانەو تاڵانچی نزیک بە سێ دەهەی بزوتنەوەی کوردایەتی لە گرەی چیدایە؟

نوری بەشیر: ئەم پرسیارە زۆر هەڵدەگرێت، بەڵام دەکرێت بڵێین کۆتایهێنان بە دەسەڵاتەکانی حکومەتانی ناوچەکە لەگرەوی چیدایە، بۆ دەسەڵاتدارێی کوردستانیش هەمان شتە، ئەگەرچی تا ١٧ی شوباتی ٢٠١١ لەکوردستاندا سەختربوو وەک لەوڵاتانی ناوچەکە بەهۆی کۆمەڵێک هۆکارەوە، کە یەکێک لەوانە خۆشخەیاڵی خەڵک بەدەسەڵاتی ناسیونالیزمی کوردو چەواشەکاریەکانی. بەڵام خۆشبەختانە ئێستا خەڵكی کرێکارو کەمدەرامەتی کۆمەڵگاو لاوان  نەک تەنیا تەجروبەی ٣٠ ساڵ لە دەسەڵاتدارێتی حزبە ناسیونالیستەکانی کوردایەتی لەبەردەمدایە، وەک ئێوە دەڵێن لە سەرکوت و تاڵانچێتی، کە خەڵک بەکردەوە بۆی دەرکەوت کە کاتێک برسی بکرێت، سەرکوت بکرێت، لەبەردەم زیندان و لێدان و کوشتن و تیرۆردا بێت، سەروەت و سامانی کۆمەڵگا بەتاڵان ببرێت و خەڵک خۆی خێزان بە هاوسەرو منداڵەکانیەوە برسی بێت، چ دەسەڵاتدارێتی بۆرژوازی عەرەبی و ئێرانی و تورکی ئەنجامی بدات، یان  دەسەڵاتدارێتی بۆرژوازی کوردی ئەنجامی بدات وەک ئەوەی ئێستا دەیبینین، بۆخەڵک هیچ جیاوازی نیەو یەک چارەنوسە. واتە خەڵک کەمێک لە خۆشخەیاڵیەکانی نەماوە، واتە باشترە لە ساڵی ١٩٩١ لەدەورەی شوراکان و هەڵبژاردنەکانی ئەوکات، کە ئێمە بانگەوازمان دەکرد و دەمانوت حزبەکانی کوردایەتی و لەسەرویانەوە پارتی و یەکێتی نوێنەری سەرمایەداران، شێخ و مەلاو مشەخۆرانن، بەڵام ئێستا زۆربەی خەڵکی کوردستان قسەکانی ئێمە دەکەن.

هەربۆیە خەڵکی کوردستان بەتایبەتی کرێکاران و کەمدەرامەتی کۆمەڵگا لەم سی ساڵەداو بەتایبەت لە ١٧ی شوباتی ٢٠١١ وە پێی ناوەتە قۆناغێکی تازەوە کە نەفرەت لەدەسەڵاتی پارتی و یەکێتی و ئیسلامیەکان بە حکومەتی بنکە فراونەکاەیان و ئێستای حکومەتە سێ کوچکەکەی پارتی و یەکێتی و گۆڕان دەکەن.

بەڵام هێشتا ئەم نەفرەتە کافی نیە، بۆ ئەوەی خەڵکی کوردستان بە کرێکارو کەمدەرامەت لە مامۆستا، کارمەند، کاسبکار و بێکار و ژنان و لاوانی کوردستان لەم دەسەڵاتە تاڵانچی و مافیا و گەندەڵکارانە رزگاریان ببێت، دەبێت وشیارانەتر بێنەمەیدانەوە، واتە لە خۆشخەیاڵی بە ناسیونالیزمی کورد، بەهەموو حزبە رەنگاوڕەنگەکانی بە سیاسەت و کارنامەی، بە شیعار و دروشم و بەڵینەکانی، بە مقەدەسات و پیرۆزی و سەوابتەکانی ئەوان خۆیان رزگار بکەن.

واتە خەڵك دەبێت لەدەرەوەی حزبەکانی کوردایەتی و سیاسەتی ناسیونالێزمی کورد بێتەمەیدان، هەروەک ئێمە کۆمۆنیستەکان چۆن لەپێش ڕاپەرینەوە لەهەموو سیاسەت و سونەت و کارنامەی ناسیونالیزمی کورد خۆمان جیاکردەوەو لەبەرژەوەندی خەڵکی کرێکارو کەمدەرامەتەوە راپەڕینمان ئەنجامداو دەستمان بۆ شوراکان برد، خەڵک دەبێت ئەم کارە بکات، ئەمە لایەنێکە.

لەلایەکت ترەوە خەڵک دەبێت وشیارانە خۆی رێکخراو بکات، خۆی لە حزبی سیاسی بەئاسۆی کرێکاریی و کۆمۆنیستی بێتەمەیدان و خۆیان ئامادە بکەن. خەڵک زەرورە رێکخراوبن لە شوراکانی گەڕەک و کارگەکان و قوتابخانەکاندا خۆیان رێکخراو بکەن و نوێنەرانی ئەمان لە شوراکانی شار دامەزرێنن و نوێنەرانی شارەکان شورای وڵات دامەزرێنن بۆ بەڕێوەبردنی کۆمەڵگا.

دەرسەکانی چەند مانگی رابردووی سودان، لوبنان، عێراق، ئێران و تا دەگاتە دەرسەکانی میسر و تونس و ١٧ شوباتی کوردستان، ئەوەیە کە خەڵک دەبێ بە ئاسۆی کۆمۆنیستی و کرێکاریەوە بێنەمەیدان بۆ داواکاری و خواستەکانیان، هەر بەم ئاسۆیەوە خۆیان رێکخراو بکەن لە حزبی سیاسی و لەدەوری شوراکان. بەبێ ئەو رێکخراو بوونە ئەوە بۆرژوازی دەسەڵات، چەک، سەروەت و سامانی کۆمەڵگای لەبەردەستدایە و سواری شەپۆلی ناڕەزایەتیەکان دەبێتەوە و حزبی سیاسی تر بۆ رزگاربوونی دەسەڵاتەکەیان دروست دەکەن، بەتایبەت خەڵک دەبێت لە خۆشخەیاڵی باڵە رەنگاوڕەنگەکانی بۆرژوازی رزگاری ببێت و بەریزی سەربەخۆی خۆیەوە بێتەمەیدانی ناڕەزایەتی بۆ خواست و داوکاریەکانی بۆ ئەوەی ئایندەیەکی باشتر لە بەرژەوەندی خەڵکی کرێکارو کەمدەرامەت بەدەست بهێنێت.

About hkkk

Check Also

مێژووی شانازی …

لە یادی گیان بەختکردووانی شوراکانی کوردستان ئاسۆ کەمال هەموو ساڵێک لە یادی ئەم ئازیزانەماندا پەپولەی …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *