Home 6 ئەرشیفی بابەتەکان 6 گفتوگۆ لەگەڵ عوسمانی حاجی مارف، سەبارەت بە پرسی سەربەخۆیی کوردستان!
گفتوگۆ لەگەڵ عوسمانی حاجی مارف، سەبارەت بە پرسی سەربەخۆیی کوردستان!

گفتوگۆ لەگەڵ عوسمانی حاجی مارف، سەبارەت بە پرسی سەربەخۆیی کوردستان!

بەرنامەی هەرهەفتەیەو باسێک لەگەڵ هاوڕی عوسمانی حاجی مارف، سکرتێری کۆمیتەی ناوەندی

“ئەوە هەڵەیەکی گەورەیە، گەر بە دوای ئەوەدا بڕۆیت، کە دابەشبوونی عێراق ئیجابیترە لە یەکگرتوو مانەوەی یان بە پێچەوانەوە. مەسەلەکە لەهەر بارێکدا بێت بۆ ئێمە کۆمۆنیستەکان، لەبەرچاوگرتنی بەرژەوەندی گشتی چینی کرێکارو جەماوەری زەحمەتکێش‌و ڕەوەندی خەباتە لەدژی بۆرژوازی،. کەوایە بەر لەهەرشتێک پێویستە ئەم هێزە سیاسییانە وەلابنرێن و لە دەسەڵاتدا نەبن”

خەسرەو سایە: قسەو باسی سەربەخۆیی کوردستان‌و پێکهێنانی دەوڵەت‌و سازدانی ڕیفراندۆم یەکێکە لەو باسانەی کە لە میدیاکانی کوردستانەوە قسەو باسی لەسەر دەکرێت. بەتایبەتی لە دوای ئەم کێشمەکیشانەی بارزانی لەگەل عێراقدا، بۆتە یەکێک لە شیعارەکانی پارتی‌و بارزانی. بەڵام سەرەتا پێم خۆشە ئاورێک بدەینەوە لەسەر بارودۆخی ئێستای عیراق و بەگشتی بێینە سەر ئەم تەوەرە. ئێوە بارودۆخی ئێستای عیراق چۆن دەبینن؟ عێراق‌و کوردستان ئیستا لە چ بارودۆخێکدایەو بۆ کوێ دەڕوات‌و چوارچێوەکەی چۆنە؟
عوسمانی حاجی مارف: شکستی نەخشەو سیاسەتەکانی دەوڵەتی ئەمریکا لە ناوچەی رۆژهەڵاتی ناوەراست، جەنگ وکارەساتەکانی ناوخۆی سوریا، کێشمەکێشی دەوڵەتانی ناوچەکە لە پەیوەند بە عێراقەوە و دەخالەتیان لە عێراقدا بە تایبەتی تورکیا وئێران لەهەمان کاتدا سعودیەو قەتەر، شکستهێنانی فیدڕاڵیزم و پرۆسەی بەزۆر پێکهێنانی دەوڵەتی هاوبەشی قەومی وئیسلامی وتائفی، دەرکەوتنی دووهێزی باڵادەست لە بەرامبەر یەکدا بە دوو ستراتیژی و بەرژەوەندی جیاوازو کێشمەکێش و پێکهێنانی بارگرژی بەردەوام لەعێراق وکوردستاندا، بەنوێنەرایەتی مالکی و بارزانی و زاڵکردنی ناجێگیری سیاسی، .. هەموو ئەمانە واقعیەتی هەلومەرجی ئێستای وێناکردووەو ئەبینین هێزێکی وەک داعش ئەتوانی بکشێتە ناو مەیدانی زیاتر قوڵکردنەوەی ئەم قەیرانەو لە شەورۆژێکدا خەڵکی موسڵ وچەند ناوچەیەکی تر بخاتە ژێر چەپۆکی درندانەیەوە، تا ئایندەی عێراق و کوردستان بە حالی سوریا بەرن. هەڵبەتە پێویستە ئاماژە بەوە بکەین کە وەڵامی ئەمریکا بۆ شکستەکانی لە بەرامبەر ئێران ونەتوانینی ئارامکردنەوەی سوریا کارکردێکی جدیە لەزیاتر وێرانکردن و شیواندنی هەلومەرجی سیاسی ئێستای عێراقدا. ئەتوانم ئەوەش بلێم کە بە ئاکام گەیشتنی ئەم بارودۆخە بە قوڵبونەوەی زیاتر قەیران و گەیشتن بە شەری داعش و پێکهێنانی فەزای شەرو بەهێزکردنی گیانی نەتەوەپەرستی و تائفی بە تایبەتی بە دوای داگیکردنی موسڵ لە لایەن هێزەکانی داعشەوە لە ماوەیەکی کەمدا. ئاڵوگۆڕێکی تایبەت وجدی لە ناوچەکەدا بەدی هات ، کە ناتوانی بێ کاریگەر نەبێت لە هاوکێشەی سیاسی و جێگاورێگای هێزە سیاسیەکان لە نەخەشەو سیاسەتەکانیاندا، عێراق کە چەندین ساڵە دەرگیری سیناریۆی تاریکە بە حزوری ئەم هێزە قەومی و ئیسلامی و تائفیە میلیشیایانەوە، ئێستا دەورانێکی سەختر بەسەر دەبات کە هەلومەرج و چارەنووسێکی نادیارو رودانی کارەسات و جەنگێکی گەورە و بە چەندەها سیناریۆ دەکرێت لێک بدرێتەوە. ئاڵوگۆڕێکە، کەدەکرێت چەندین دەردەسەری‌ لێبێتەوەو قوربانییەکەشی خەڵک‌و دانیشتوانی عێراق و کوردستان دەیدات.
شەرو دەعوای مالکی و بەرزانی و تەرحکردنی دابەشکردنی عێراق بە هەریمی سونەو شیعە و کوردی بە ناوی ریکخستنەوەی پەیوەندی هەرێم و بەغدا و بەرگرتن بە شەر، یان پێکهینانەوەی حکومەتی بنکەفراوان و رزگاری نیشتمانی بە دەوری مەسەلەکانی ناردنە دەرەوەی نەوت و بودجە و هیزی پیشمەرگەو مادەی ١٤٠ و ناوچە کێشە لەسەرەکان هەر لەسەرەتاوە نیشاندانی دەورانێکی پر مەترسی و نالەبارو چرکردنەوەی زیاتری ناجێگیری سیاسیە کە لە سایەی مانەوەو سیاسەتەکان و دەوری ئەم هێزە سیاسیە کۆنەپەرستانەدایەو ئەم هەلومەرجە زیاتر بەروە دواوەوە دەبات، دەورانێک وەها لەقەیرانی سیاسی و بارگرژی و نائەمنی و عەسەکەریان هێناوەتە ئاراوە کە لەقۆناغێکدایە ناتوانن بەرێگای سیاسی و دانوسان بەڕیکەوتنێک بگەن و عێراق بگەرێننەوە دۆخی پێش ئیستاو ئارام بێتەوە، چونکە کیشمەکێشی جەمسەرە جیهانی و ئیقلیمیەکان و ئالوگۆریک لە هاوسەنگی و نەخشەکانی ئەواندا پێشهات، قەیرانی ناوەندو ئیقلیمیشی بردە ئاستێکی ئاڵۆزترو مەترسیدارترەوە.

خەسرەو سایە: ئێستا لە نیوەندەکانی سیاسەت‌و ئەو بۆچوونانەی لە میدیاکانەوە دەخرێنە ڕوو کە دوو ئایندە وێنا دەکرێت بۆ بارودۆخەکانی ئیستای عێراق‌و کورستان، کە ئەویش وەلانانی مالکی‌و دووبارە دەستپێکردنەوەی پڕۆسەی سیاسی‌و یەکخستنەوەی ئەم لایەنانەو ڕێککەوتنیان‌و گەڕاندنەوەی ڕووداوەکان بۆ پیش داگیرکاری موسڵ لە لایەن داعشەوە. بۆچوونێکی تریش هەیە، کە دەڵیت ئێستا عێراق بە تەواوەتی دابەش بووەو ئەمەریکا لایەنگری دابەشبوونیەتی‌و بەتایبەتیش باڵی ئەو بەشەی لایەنگری سعودیەو ناسیۆنالیستی عەرەب‌و قەتەر بە تایبەتی. تورکیا‌و بارزانیش تەئکید لەوە دەکەنەوە کە سەربەخۆییەک بۆ ئەم ناوچانە هەبێت. بۆچوونتان چییە لەسەر ئەم تەرحانە؟ پێتان وایە کامیان واقعی بێت‌و ئەمەریکا زیاتر بە شوێن کامیانەوەیە؟
عوسمانی حاجی مارف: ئەوەی کامیان واقعییە، ئەتوانین دواتر قسەی لەسەر بکەین، بەڵام ئەوەی ئەم هەلومەرجە بەرەو کوێ دەڕوات‌و ئاکامەکانی چی دەبێت، لەو سیناریۆیانەی کە زیاتر پێشبینی دەکرێت لە توند بونەوەی کێشمەکێشی نێوان هێزە سیاسیەکان و تێشکاندنی ‌هێزە سەربازیەکانی حکومەتی ناوەند لە موسڵ و تکریت و ئەنبار، هەروەها دەرکردنیان لە ناوچە کێشە لەسەرەکان و جۆری خۆکۆکردنەوەو خۆئامادەکرنی هێزەکانی دەرگیر لەم کێشمەکێشەدا و دروشمەکانیان لەبەرامبەر یەکتردا و دەخالەتی ولاتانی ناوچەکە فەزایەکی شەری خولقاندووە کە ئیمکانی ئەوە هەیە شەڕێکی گەورە بقەومێ‌و عێراق بە هەمان ئاراستەی سوریاد بەرن، یاخود دابەشبوونی عێراق بکەنە سێ هەرێمی سوننەو شیعەو کورد کە بەبەردەوامی لە فەزای شەردا دەمێنێتەوە. ئەم سینارۆیانە ئەنجامی ناجێگیری سیاسیی‌و کیشمەکێش‌و بەرژەوەندیەکان و ئاڵوگۆڕ لە هاوسەنگی ئەم هێزە سیاسییانە، ئێوە سەرنج بدەن، بارزانی لە چەند ساڵی ڕابردوو، لەسەر مەسەلەکانی بودجە، نەوت، فراوانکردنی دەسەلاتی و ستراتیژی لە پەیوەند بەکردنی کوردستان بە بازارێک بۆ تورکیادا، بۆتە هێزێکی باڵادەست‌و جەمسەرێکی سەرەکی لە نێوان هێزە سیاسیەکان کە بۆ پاراستنی بەرژەوەندیەکان و نەخشەو سیاسەتەکانی چەندین گەمەو مامەڵەی سیاسی کردوەو دەیکات، هێزێکە کۆنتڕۆلی بەشێکی زۆری کوردستانی کردوەو خاوەنی حکومەتی کوردستانە، کێشمەکێشەکانی بەناوی کوردەوە لەگەڵ دەوڵەتی مەرکەزی‌و مالیکی، ئاشکرایەو بە ڕۆشنی دەیبینین. لە هەمان کاتیشدا مالیکی بە نەخشەوە سیاسەتی پاراستنی یەکپارچەیی خاکی عێراق‌و پەیوەند بە نەخشەوە سیاسەتەکانی کۆماری ئیسلامی ئێرانەوە بۆتە هێزێکی باڵادەست و جەمسەرێکی تری سەرەکی لە هێزە سیاسیەکانی عێراق و کوردستاندا، ئەم دوو هیزە واتە بارزانی مالکی بوونەتە وێنای کێشمەکیشی هێزە سیاسیەکانی عێراق و تەواوی هێزە سیاسیەکانی تر بە دەوری کێشمەکێشی ئەم دوو هێزەدا کۆبوونەتەوەو لە چاوەروانیدان. ئاکامی ستراتیژی جیاوازی ئەم دوو هێزەو ئاکامی نەگەشتنیان بە ئەنجامێک، بە مانایەک کە مالیکی نەیتوانییەوە یەکپارچەیی عێراق و کۆنترۆڵی دەسەڵاتی ناوەندی بپارێزێت‌، لەلایەکی تریشەوە بارزانی لە بەرامبەر مالیکیدا بۆ بەرژەوەندییە سیاسییەکانی نەیتوانییەوە یەکلای بکاتەوە، دیارە ئاکامەکەی بەو ئاراستەیەدا دەروات، لە بەردەوامی و زیاتربونی دۆخی بارگرژی و ناجێگیری سیاسی لە عێراقدا، هیزێکی وەکو داعش و کۆنە بەعسیەکان سود لەبۆشاییەکی ئاوهادا وەردەگرن و لە ماوەیەکی کەمدا چەند ناوچەیەک داگیر دەکەن، بەدوای ئەم حاڵەتە هاوکێشەی سیاسی و هاوسەنگی هێزەکان ئاڵوگوری بەسەر دێت و گەمەکە لە ئێستادا بە قازنجی مالکی نیە، ئەتوانین ئاماژە بەوەش بدەین کە ئێستا رەوتی ناسیۆنالیستی عەرەب‌و ئیسلامی سیاسی سونەش بونەتە بەشێک لە هاوکێشە سیاسیەکەی عێراق و دۆخێکی پر مەترسیدارتر پێشهاتووە، لە هەمان کاتدا سەرنج بدەن، کە بارزانی شەڕی داعش ناکات و بە قازانج‌و “فرسەتی زێرین” بۆ مەسەلەی کورد‌و دەوڵەتی کوردی دەیبێنێت، هاوکات سعودیەو تورکیاو ئەمەریکا، کە چۆن بتوانن لەم ڕێگەیەوە بە وەلانانی مالکی یا کەمکردنەوەی دەسەڵاتی، دەورو دەخالەتی ئێران لە عێراق و ناوچەکەدا ببەستن یا کەم بکەنەوە، یەکێک لە سینارۆکان ئەوەیە، کە مالیکی وەلا بنریت‌و دەوڵەتی یاسا یان حزبی دەعوە بە جۆرێک هاوپەیمانێتی شیعەکان پێکبهێنن، بەڵام ئەمانە چەنێک واقعییە، دیارە کە هاوسەنگی هێزە سیاسییەکان دیاری دەکات، بەتایبەتی ئەو ناوچانەی بەناوی سونە کە کەوتۆتە ژێردەسەڵاتی داعش و بەعسیەکان، لەگەڵ ئەوەی هاوکێشەی سیاسی عێراقیان گۆریوەو بونەتە لایەنێک و ناوچەیەکی عێراقیان کۆنترۆل کردووە بەڵام هێشتا هێزێک نیە لە نێونیاندا کەوەک هێزیکی باڵادەست و جەمسەرێکی سەرەکی دەرکەوتبێت، بەڵکو لە چەند هێزک پێک هاتون و قابلی هەڵوەشاندنن، بە مانایەک سیناریۆی دابەش بونی عێراق بە سێ هەرێم و لەسایەی دەسەڵاتی داعش و بەعسیەکاندا نەک ناتوانێ ئارامی سیاسی دابین بکات بەڵکو فەزای شەری کۆنەپەرستانەو هەڵگیرسانی شەر زیاتر درێژە پێ دەدات، لە لایەکی تریشەوە ئەو مەسەلانەی دەوڵەتی ئەمەریکا مەترحی دەکات، ئێران قەبوڵیان ناکات، ئەو مەسەلانەش کە ئیران مەترحی دەکات، ئەمەریکاو تورکیاو بارزانی قەبوڵیان نابێت. بەگشتی هەلومەرجێکی ئاڵۆز پێشهاتووە، ئاڵوگۆڕیکی تازەیەو ناتوانریت عیراق بگەڕێنتەوە بۆ پیش سەردەمی داگیرکردنی موسل کەلە لایەن داعشەوە جێ‌بەجی کراوە، چارەنوسی عێراق نائەمن و پرگێژاو و سەخت و نادیارە، شەرکردن لە بەرامبەر داعش و بەعسیەکان و دەرپەراندینان مانای سیاسی جدی هەیە و مەرجی سەلامەتی هاوڵاتیانە، هەرهێزێک هاوکاری و رێکەوتنیان لەگەڵدا بکات، ئەوە دوژمنایەتی ئاشکرای خەڵکی کرێکارو زەحمەتکێشی عێراق و کوردستان دەکات، دەبێت عێراق لەم جۆرە هێزانە پاک بکرێتەوە.

خەسرەو سایە: هەر لەم بارەوە باس لە دوو بۆچوون دەکرێت سەبارەت بە ئایندەی عێراق، ئەویش کە لایەک باسی پاراستنی یەکپارچەیی خاکی عێراق دەکات، لایەکی تریش دەڵێت جیابوونەوە باشترەو ناوچەیەک بۆ شیعەکان، ناوچەیەک بۆ سوننەکان‌و ناوچەیەکیش بۆ کوردەکان لە ژێر ناوی دەوڵەتی کوردیدا. لێرەدا دابەشبوونی عێراق بە کردەوەش خۆی نیشان داوە، بۆ نمونە باس دەکریت، کە مالیکی تەنها لە ناوچەی سەوزدا دەسەلاتی هەیە. مسعود بارزانی‌و حزبەکانی کوردستان لەو ناوچانەدا کە پێشتر کێشمەکێشی سیاسییان لەسەر دەکرد، ئێستا هێزی چەکداری حزبەکانی خۆیانیان تێدا جێگیر کردووەو دەلێن ماددەی ١٤٠ کۆتایی پێهاتووە. هەروەها سوننەکانیش دەڵین، کە ناگەڕێننەوە هەتاوەکو هەموو ئەو ناوچانە نەگرین. واتە ئێستا عێراق بە کردەوە پارچە پارچە بووە. بۆچوونی پارچەپارچەبوونی عێراق‌و یەکگرتووی خاکی عێراق، کامیان بە قازانجی خەڵکە؟
عوسمانی حاجی مارف: ئێمە کۆمۆنیستەکان هەرلەسەرەتاوە دژی عێراقێکی یەکپارچەیی بووین کەلەناوخۆی خۆیدا دابەشبوونێکی قەومیو ئاینیو تایەفەگری یەکی خستوە وئەمەشمان بەزیانی خەڵکی کرێکارو زەحمەتکێش زانیوە، لەئێستاشدا کە دابەشبونی عێراق لەسەربنەمای قەومیو ئاینیو تایفەگەری ئاماژەی بۆدەکرێ، بە هەمان شێوە بەپڕۆژەیەکی سیاسی وکۆنەپەرستانەی هەمان ئەو هیزە بۆرژوا قەومیو ئیسلامیانە دەزانین کەبەر لەڕوداوەکان لەژێر دروشمی یەکپارچەیی خاکی عیراقدا کۆببونەوە. بەم جۆرە بەلای ئێمە کۆمۆنیستەکانەوە ئەگەر عێراق یەکپارچە بمێنێتەوە وەیا دابەش بێت، بەلام مادام لەسەر بنەمای قەومیو ئاینی ووەک پرۆژەی هێزە قەومی وئیسلامیەکان دەستی بۆدەبرێ، بەهەردووبارەکەدا بەزیانی خەڵکی دەزانین. بالەم بارەوە ئاماژە بە واقعیەتێک بدەم: وجودی ئەم هێزە سیاسییانە بە مانای ئەحزابی قەومی، ئەحزابی تائیفی‌و ئیسلامی بەشێکن لە پێکهێنانی ئەم قەیران و کیشمەکیشە. کاریگەرن لە سەر هەلومەرجی ئاڵۆزی‌و بارگرژی و ناجێگیری‌ و نەبونی ئەمنیەت و هەڵگیرسانی شەڕ. خودی ئەم هێزە سیاسییانە بە جیا لە شکستی سیاسەتەکانی ئەمەریکاو کێشمەکێشی نێوان دەوڵەتانی ناوچەکە، عاملێکی ئەساسین لە پێکهێنانی ئەم بارودۆخە. ئەمانە گەر “حکومەتی ئینقاز”ی نیشتیمانی یان بنەکە فراوان دروست بکەنەوە، نمونەکەیمان بینیوە، بەوەی ڕێککەوتنیان کردووە، پەرلەمانیان هەیە، وەزارەتیان هەیەو حکومەتی شەراکەتیان دروستکرد، بەڵام ئەمەش ئاکامەکەیەتی ئەبینین کە وەزعی سیاسی عێراقیان زیاتر شیواندووە و نائەمنترو وێرانکردووە، مەبەستم ئەوەیە کە کێشەکە بەوە سەیرناکرێت و چارەسەر نابێت کە پاراستنی یەکپارچەیی عێراق بێت یاخود دابەش بکرێت بە سێ هەرێم یا سێ دەوڵەت، بەڵکو کێشەکە بۆ خۆی وجودی ئەم هێزە سیاسییانەیە کەلەسەر بنەمای قەومی و ئیسلامی و تائفی دامەزراون. بە بۆچوونی من ئەوە هەڵەیەکی گەورەیە، گەر بە دوای ئەوەدا بڕۆیت، کە دابەشبوونی عێراق ئیجابیترە لە یەکگرتوو مانەوەی یان بە پێچەوانەوە. مەسەلەکە پێکهاتەی ئەم هێزە سیاسییانەیە. پێویستە ئەم هێزە سیاسییانە وەلابنرێن و لەدەسەڵاتدا نەبن، پێویستە خەڵک ناڕەزایەتی بەردەوام دەربڕێت بەرامبەریان. هەتا ئەم هێزە سیاسییانە لە دەسەڵاتدا بن ئەوە گەورەتین بەڵایە بەسەر ژیانی خەڵکەوە. ئەمە ئەسڵی مەسەلەیە.
بەڵام وەکو ئێوەش ئاماژەتان پێدا، ئەسڵیمەسەلەکە باڵادەستی هێزە میلیشیاکانە. بۆ نمونە تەماشا بکە، بارزانی چەندین ساڵە ناوچەی خۆی جیاکردۆتەوەو دەسەلاتەو سەربەخۆی خۆی هەیە، بە ئارەزوی خۆی قاجاخچێتی و بازرگانی بە نەوتەوە دەکات، یاری بە دەسەڵاتی سیاسی و ئایندەی کوردستان و هێزە سیاسیەکانی ترو دامودەزگاکانی دەسەڵات دەکات، ئیتر سەربەخۆیی کوردستان ڕادەگەێنێت یان نا، لەبەرامبەر دەوڵەتی کوردیی جدیە یان نا، ناوچەکە ناوچەیی ژێر دەسەلاتی بارزانییە. نە دەورو دەنگی خەڵک و رفراندۆم هیچ ئیعتبارێکی هەیەو نە حسابیش بۆ هیزەکانی هاوپەیمان ودەوروبەری دەکات، بەڵکو ئەو ستراتیژو سیاسەتە پەیرەوی دەکات کە پاریزەری لە دەسەڵاتی رەهاو هەتاهەتایی بارزانی و پارتی دەکات، باسی سەربەخۆیی کوردستانەکەشی بۆ بەهێزکردنی زیاتری دەسەڵاتەکەیەتی. مالیکیش بە هەمان شێوە لە عێراقدا بەغداو بەشێکی زۆر لە ناوچەی خواروی عێراقی گرتووەو کاروباری سیاسی و بەرژوەندیەکانی هێزەکەی بەرێوە دەبات، لە کاتێکدا کە نەیتوانی مەرکەزیەتی عیراق بپارێزیت و شکستی هێنا. هیزەکانی تری وەکو داعش‌و “سوننە”و نەقشبەندی‌و… ئەو هێزانەی تر کە هەن، ناوچەی ژێر دەسەلاتی خۆیان جیاکردۆتەوە. وجودی ئەم هیزە سیاسییانە و دەوریان لە شانۆی سیاسی عێراقدا بە کارو ڕاگەیاندن‌و سیاسەتیان هەتا‌ ڕێکەوتنەکانیشان بارگرژی راناگرێ و هەمیشە بەنزین دەکەن بە ئاگردا، بە بۆچوونی من لە سایەی ئەم هێزە سیاسییانەدا ناتوانرێت جیگیری سیاسی بۆ عێراق و کوردستان دابین بکرێت، دەبێت هێزی سەربەخۆی خەڵک بە دوور لە ئاسۆی ناسیۆنالستی و ئیسلامی و تائفی بێتە مەیدان.
ئەوەش کە ئێستا عێراق بە کردەوە دابەش بووە لە نێوان ئەو هێزە سیاسیانەداو دەیانەوێ بە ناوی سونەو شیعەو کوردەوە رەسمیەتی پێ بدەن، دابەشکردنێکی کۆنەپەرستانەو زیاتر ئاڵۆزکردنی هەلومەرجی سیاسی عێراقە و توندکرنەوەی فەزای شەرو کارەساتە، قەبولکردنی دەسەڵاتی داعش و بەعسیەکان و مالکی و بارزانیە و سەپاندنیەتی بەزۆر بەسەر خەڵکی عێراق و کوردستاندا.

خەسرەو سایە: هاوڕێ عوسمان ئێمە زۆر جار لە ئەدەبیاتی حزبدا باس لەوە دەکەیت، کە نە خاک موقەدەسە، نەک یەکپارچەیی عێراق بۆ ئێمە مەسەلەیە، بەڵکو ئەمنیەت‌و سەلامەتی‌و ژیانی نۆرماڵی هاوڵاتیانی ئەم ناوچەیە بۆ ئێمە جێگەی مەسەلەیە. جارێکی تر دەمەوێت ئەو پرسیارە تەئکید بکەمەوە، کە ئایا دابەشبوونی عێراق بەسەر ئەم ناوچانەدا، بە قازانجی خەڵکە یان لە زەرەریەتی؟ بۆ نمونە ئەگەر خەڵکی ئەم ناوچانە ڕۆژگار لە راپرسیەکدا ببینین کە دابەشبوونیان لە قازانجدایە، ئەم جۆرە هەنگاوە جێگەی پشتیوانی ئێمە دەبێت؟
عوسمانی حاجی مارف: منیش زیاتر تەئکید لەو خاڵە دەکەمەوە، کە بوونی ئەم هێزە سیاسییانە بە مانای هێزی بۆرجوازی قەومی و ئیسلامی و تائفی ومیلیشیایی لە مەیدانی سیاسی عێراقدا بۆ خۆیان بە زیانی خەڵکن، جا سیاسەتەکەیان لە هەر دەورەیەکدا بۆچ بەرژوەندیەک بەکار دەهێنن لە مەسەلەکە ناگۆردرێت، واتە یەکدەگرن لە خاکێکدا یان لێک جیا دەبنەوە، ئەوە مەوقعیەتیان لەبەرامبەر کرێکاران و زەحمەتکێشاندا هەر دوژمنایەتیە. مەبەستم ئەوەیە کاتێک ئێمە لایەنگری لە دابەشبونی عێراق یان یەکگرتوویی لە هەرخاکێک دەکەین کە بەدەورو ئێرادەی خەڵک، بە دەنگی خەڵک و لە رفرادۆمێکدا کە لە فەزایەکی ئازاد و ئارام و دوور لە دەسەڵاتی هێزە میلیشیاکان فەراهەم بێت و دەبێتە مایەی سەلامەتی و ئەمنیەتی هاوڵاتیان و خۆشگوزەرانیان، بۆ ئێمە ئینسان موقەدەسە نەک خاک، بەڵام دیارە کە سەلامتی و ئەمنیەت لە سایەی نەعرەتەو جاردانی نەتەوەپەرستی و شەری مەزهەبی و تائفیدا هیچ کات بەدەست نایەت و ئیمکانی نیە، دەسەڵاتی ئەم جۆرە هێزانە خەڵک بێ دەورو بێ ئیرادەو بێ چارەو بێ دەسەڵات دەکەن، ئەوەی پارتی باسی دەکات رفراندۆم نیە بەڵکو بەیعەتە بۆ سەپاندنی سیاستەکانی، گەر پارچەپارچە بونی هەر خاکیک دەورو دەخالەتی کرێکارن و زەحمەتکێشان مسۆگەر کات بێ ئەملاو ئەولا جێگای پشتیوانی ئێمەیە، بەڵام ئەگەر دەسەلاتێک لە هەر خاکێک و ولاتیکدا بە ناوی شیعە، سونە و نەتەوەوە دروست بکرێت، نەک پەیوەندی بە دەورو ژیانی کرێکارو زەحمەتکیشەوە نییە، بەڵکو مایەی پاراستنی ئەو جۆرە دەسەڵاتەیان لەسەر بێ ئیرادکرن و چەوسانەوەی درندانەی کرێکاران و زەحمەتکێشان داناوە، کە جگە لە کارەسات و دەردی سەری شتێکی تر نابەخشن، بۆیە جێگای پشتیوانی و لایەنگری ئێمە نیە.واتە قسە لەسەر دەورو کارکردی ئەو هێزە سیاسیانەیە کە دەوڵەت بەرێوە دەبەن. هیزێک بە ناوی سوننەو هێزیکی تر بە ناوی شیعەو هێزەکانی تر بە ناوی عەرەب و کورد و تورکمان کارەساتێکە بەر لەوەی خاک دابەش بکات ئینسانەکان دابەش دەکەن و جیایان دەکاتەوەو دەیان کەنە دوژمنی یەکترو گەورەترین مەترسی بۆ ژیانی ئینسانەکان فەراهەم دەهێنێت، ناتوانرێت لە سایەی دەسەلاتێکی کۆنەپەرستی قەومی و تائفی‌و میلیشیادا، ژیانی ئاسودەو ئاسایش و ئارامی بۆ خەڵکی دابین بکرێت، جگە لەمەش لە ئێستادا کە فەزای شەرەو هێزێکی وەک داعش ناوچەیەکی فراوان دەخاتە ژێر چەپۆکی دەسەڵاتی دراندانیەوەو هەلومەرجی سیاسی ئاڵوگۆریکی تر بە خۆیەوە دەبینێت و شوێن داگیر دەکات، بە ملێون خەڵک ئاوارە دەکەن و بە هەزاران دەکوژرێن و دەسەڵاتێکە بە دژی ژنان و ئنسان کوشتن بەرێوەدەچێت، لە هەمان کاتیشدا مەترسیەکە بۆ ناوچەکەو نائارامی سیاسی و گێژاوەکەی قووڵتر کردۆتەوەو ئاڵۆزتری کردووە، دابەشکردنی عێراق بە سێ هەرێم یا سێ دەوڵەت لەسایەی ئیمتیاز دان بە داعش و بەعسیەکان نەک رێگا چارەی ئارامی و جێگیری سیاسی نیە بەڵکو فەراهەم هێنانی فەزای شەرێکی ترسانک و نەوەستاوە.
ئەگەر مەسەلەی سەربەخۆیی کوردستانیش لە پەیوەند بەم فەزایەوە مەترح بکرێت، لە سەر بنەمای ویران بون و ماڵویران و کوشتارگای شوێنەکانی تری عێراق مەترەح بکرێت..!؟ ئەوە سیاسەتێکی نائینسانیەو خزمەت بە سیاسەت و سات وسەودای حزبەکانی کوردایەتی دەکات و لە هەمان کاتدا بە رەسمەیەت ناسین و قەبولکردنی دەسەڵاتی داعش و بەعسیەکانە و دەوری ئێرادەو دەنگی خەڵکی تیا پێشێل دەکرێت.

خەسرەو سایە: ئاماژەتان بە هاتنە ناوەوەی داعش‌‌وو کۆنەپەرستی‌و دژە ئینسانی کرد، بەڵام ئێمە نابینین لە میدیاکانی کوردستاندا، بە تایبەتی میدیاکانی حزبەکانی دەسەڵاتدار، ئاماژە بەوە بکەن، کە ئەم هێزە کۆنەپەرستەو پیویستە لە ژیانی خەڵکیدا پاک بکرێتەوە. پێم خۆشە بزانم نەزەری ئێوە چییە، لە هەڵوێستی حزبی کۆمۆنیستی کرێکاریی کوردستان سەبارەت بە داعش. پێویستە خەڵک چ بکات؟ حزب پیویستە چ بکات؟ چۆن دەکرێت ئەم بەڵایە لە کۆڵ خەڵک بکرێتەوە؟
عوسمانی حاجی مارف: پێش هەموو شتێک پێویستە ئاماژە بە نیگەرانی و ترسی خەڵک بکرێت لە بەرامبەر هێزێکی وەک داعشدا، ئەبینین لە هەر جێگایەک باس لە نزیک بونەوەی داعش دەکرێت خەڵکانێکی بێ شومار بە سەدان کیلۆمەتر دوردەکەونەوە و هەڵدێن و ئاوارە دەبن، واتە داعش هێزیکی درندەو مەترسیدارە، دەورو نەخشێک کە داعش لە ساحەی سیاسی عێراقدا هەیەتی، لە وێنەی تاڵیبان‌و بن لادن‌و جندلئسلامە. وجودی ئەمانە بە سەعات و بەرۆژ کوشتاری خەڵکە، کارەساتە، ئاوارەییە، تەنانەت کۆنتڕۆڵکردنی ژیانی شەخسی بەشەرەکانە لە هەموو بوارێکدا. مرۆڤ دەخەنە چوارچێوەیەکەوە، کە دەرفەتی هیچ هەناسەیەکی ناداتێ. واتە هیزێکە کە نابێت هەبێت، نابێت وجودی هەبیت! هێزەکە دەبێت پابکرێتەوەو ڕابماڵدرێت! نابێت ئازاد بێت چونکە ئینسان کوژن و درندەن! بە بۆچوونی من لە هەر شوێنێکدا بن، پیویستە ڕێگەیان لێ بگیرێت، دەستیان کۆتا بکرێت‌و دووربخرێنەوەو کۆتاییان پێ بهێندرێت. نابێت هیچ دەورێکیان هەبێت و گوندەیی بەسەر خەڵکدا بکەن.
واتە کاتێک ئەمانە بۆ ژیان‌و ئارامی‌و ئەمنیەتی خەڵک لە دورو نزیکەوە جێگەی مەترسیین، دەبێت نەمێنن، هەر هێزێکیش سازش یان ڕێککەوتن لەگەڵ ئەمانەدا بکات، دژی خەڵکەو دوژمنایەتی لەگەڵ خەڵکدا دەکات. ئەم هێزە لە هەر جێگەیەکی دنیادا بێت، گەورەترین دوژمنی بەشەریەتە. گەورەترین دوژمنی ئنسان، ژنان، لاوان‌و منداڵان‌و ژیانی خەڵکە. هەر هێزێک ئەمانە وەک هیزێکی سیاسی مامەلە بکات، سازشیان لەگەڵدا بکات، ڕێککەوتنیان لەگەڵدا بکات، سودی سیاسی تیا بەدی بکات، مانای وایە کە ئەو هێزەش چووەتە ئەو بەرەیەوەو بەدوای ئەو بەرژەوەندیە سیاسیانەوەیە کە دژ بە ژیانی خەڵکن. ئەگەر چی ئەم هیزانەی تریش، هەر یەک لە مالیکی، بارزانی‌و هێزەکانی تری ساحەی سیاسی بۆ خۆیان کۆنەپەرستن‌و لەبەرەی خەڵک نین و خواستەکانی خەڵکیان بۆ گرنگ نیە، بەڵام لانی کەم دەکرێت ڕێگەی سیاسی بگیرێتە بەر لەبەرامبەریاندا. بەڵام ڕێگەی سیاسی لە گەڵ هیزێکی لە چەشنی داعش‌و تاڵیبان بە هیچ جۆرێک ناگیرێتە بەرو ناکرێت. تەنها ڕێگە کۆتایی هێنانە پێیان. ڕێککەوتن لەگەڵ ئەم جۆرە هیزانە مەترسیدارە. ئێستا ڕێگەو سیاسەتێک کە بارزانی دەیگرێتە بەر، کە دەڵێت شەڕی داعش ناکەم، دروشمی دەوڵەتی کوردی بەرز دەکاتەوە، بە بۆچوونی من مایەی ئاوارەیی‌و دەربەدەری‌و مەترسییە، تەنانەت بۆ کوردستانیش، لەلایەکی تریشەوە دەوڵەتە کوردیەکەی جگە لە هەر مەبەست و مانایەکی تر لەسەر حسابی کارەسات و ئاوارەیی و کوشتارگای بەکۆمەڵی دانشتوانی ژێر دەسەڵاتی داعشدا دادەمەزرێنێت، سەربەخۆیی کوردستانی بارزانی بەرەسمیەت ناسین و قەبولکردنی دەسەڵاتی داعشە، بە بۆچوونی من پێویستە بە هەرچی هێزە، هەوڵ بدەین دەوری داعش‌و تاڵیبان‌و ئەو هیزە تیرۆرستە ئیسلامیانەی تر کە لە عێراق و سوریادا دەوریان هەیە، کاریگەری ڕاستەوخۆیان هەیە لەسەر مالوێرانی و تێکرمانی ژیانی خەڵک، کۆتاییان پێ بهێنرێت و خەڵکی رزگار بکرێن لە ژێر دەستەییان.

خەسرەو سایە: ئێوە خۆتان دەزانن ئەحزابی ناسیۆنالیستی کورد، بە تایبەتی پارتی بە هاتنی داعش‌و خوڵقاندنی ئەم سینارۆ تاریکە کە یەخەی بە کۆمەڵگای کوردستان‌و عێراق گرتووە، باس لەوە دەکەن، کە کوردستان کەوتۆتە بەردەم فرسەتێکەوەو ئیتر کاتی ئەوە هاتوە دەوڵەتی سەربەخۆی کوردستان، یاخود بە قسەی خۆیان دەوڵەتی کوردستان دابمەزرێت‌و ناوچە جێناکۆکەکان لە ژێر سایەی پێشمەرگەدا پارێزراوە. ئێوە ئەم بۆچوونانە چۆن لێک دەدەنەوە؟ ئایا واقعەن سەربەخۆیی کوردستان‌و دامەزراندنی دەوڵەتی کوردی فرسەتێکە؟ یاخود لە قازانجی کێدایە؟ ئایا لە قازانجی خەڵکی کوردستاندا، کاتێک ساڵانێکی زۆرە ئێمە باس لە سەربەخۆیی کوردستان دەکەین‌و ڕێگاکانی پێشنیار کراوە؟
عوسمانی حاجی مارف: هەلبەتە ئەوە رۆشن و ئاشکرایە کە حزبی ئێمە وەک رێگە چارەیەک لەبەرامبەر هەلومەرجی سیاسی و کێشەو ئایندەی کوردستاندا و کۆتایی هینان بە سەرگەردانی، مەسەلەی جیابونەوەی کوردستان و پێکهێنانی دەوڵەتی سەربەخۆو گەرانەوە بۆ رای خەڵکی لەرێگەی رفراندۆمەوە لە بەرنامەی حزبماندا نوسراوەتەوەو کارییشی لەسەر کراوەو دەکرێت. بەڵام ئەوەی لە سەرەتادا ئاماژەم پێدا، کاتێک بەیانیەک لە خەو هەستاین‌و داعش موسڵی داگیرکردووەو سەدان هەزار ئاوارە بون و هەزارن کوژران، بەرەوروی ئاڵوگۆڕێکی جدی بوین لە ناوچەکەدا. مەسائل و کێشەی تر هاتۆتە بەرەوە. ئێستا هەلومەرجێکی ترە، مەسئولیاتی تر‌و سیاسەت و نەخشەکاری تر دێنە ئاراوە، هاوکێشەی سیاسی و هاوسەنگی هێزەکان ئاڵوگۆریان بەسەردا هاتووە، بۆ نمونە پاککردنەوە هیزەکانی داعش مەسەلەیەکی حەساس و جدی و گرنگە، هەڵنەگیرسانی جەنگ بەرگرتن بە شەری قەومی و تائفی لە نێوان ئەم هێزە سیاسیانەدا، مەسەلەیەکی گرنگە، ئاستی توند بونەوەی کێشمەکێشی هێزەکان و فەزای شەرو مەترسی شەرێکی گەورەی خستۆتە بەردەرگای ماڵەکانمان، بەرگرتن بەهەڵگیرسانی جەنگ لە نێوان مالیکی‌و بارزانیدا، مەسەلەیەکە جدیە و نابێت ئەو جەنگە ڕووبدات. ئەگەری هاتنی ئێران‌و تورکیاو دەخالەتی ئەمەریکاو ڕووسیا لە ڕووی سەربازییەوە، واتە بە سوریاکردنی عێراق هاتۆتە ئاراوە، مەسەلەیەکە کە دەبێت بەری پێ بگیرێت، سیناریۆی دابەشکردنی عێراق لە سەر بنەمای قەومی و تائفی جگە لەوەی واقعیەتیکی تاڵ و نائینسانیە لە هەمان کاتدا بەرەسمیەت ناسینی دەسەڵاتی داعشە، دەبێت هەڵویستی توند لەبەرامبەریا بنوێنین، ئەمانە کێشەی واقعیەین و مەسەلەکەیە لە ئێستادا، کە حزبە ناسیۆنالستەکانی کوردستان لەسەر فەزای هاتنە ناوەوەی هێزێکی وەک داعش و بەسوریاکردنی عێراق قومار دەکەن و باس لە فرسەتی زێرین دەکەن..! دروشمی دەوڵەتی کوردی و سەربەخۆیی کوردستان دروشمی شەرن نەک دروشمی دەرکێشانی کوردستان لە کێژاو ناجێگیری سیاسی، ئەوەی جێگای سەرنجە لەم هەلومەرجە سیاسیەی ئێساتدا، ئەحزابی ناسیۆنالیستی کورد، هەروەها ئەحزابی سوننەو شیعەش، بە حساباتی گەرم راگرتنی فەزای شەر و بەهێزکردنی ئحساسات قەومی و مەزهەب ئەم دروشمانە مەترەح دەکەن، ئاگری شەرەکە بە بەرپاکردنی دوبەرەکی قەومی و تائفی گەرم دەکەن، مەسەلەکەیان ڕزگارکردنی خەڵک نییە، مەسەلەکەیان سەربەخۆبوونی خەڵک و یەکپارچەیی عێراق و پاراستنی ئەمنیەت نییە، بەڵکو توندبونەوەی کێشمەکێش و شەڕی ئەم هێزە سیاسییانەیە لە پێناو بەرژوەندیە سیاسەکان و مانەوەی دەسەڵات و فراوانکردنی نفوزیانە. سەربەخۆیی کوردستان بۆ پارتی بۆ قۆرخکردنی دەسەلاتی رەهاو سەپێنراویەتی، بۆ وەبەرهێنای نەوت و بازرگانی و قاچاخچیتیە بە نەوتەوە، بۆ دامەزراندنی ئیماراتی بارزانی و ئیسرائیلێکی ترە لە رۆژهەڵاتی ناوەراستدا. شیعاری سەربەخۆیی بارزانی، بەنزین کردنە بە ئاگرداو شیعارێکە بۆ شەڕ. شیعارێک نییە بۆ ڕزگارکردنی خەڵک. شیعارێکە بۆ قوڵکردنەوەی ئەو شەڕو کوشتارەی ئیستا لە عێراقدا هەیەو لە هەمان کاتدا دان پیانان و بەرەسمیەت ناسینی دەسەڵاتی داعشە، بارزانی بۆئەوە پیشنیاری ناکات، کە کوردستان کیشەی هەیەو بیەوێت کێشەکەی چارەسەر بکات و بگەرێتەوە بۆ رای خەڵک، ئەوەی ئێستا بارزانی پیشنیاری دەکات، بۆ باڵادەستی خۆی‌و گەرمکردنی شەڕەو دەکرێت چاوەڕوانی کارەسات‌و ئاوارەیی زیاتر لێ بکرێت.

خەسرەو سایە: بۆچوونێک هەیە دەڵێت سەربەخۆیی لە ئێستادا باشترە تا ئەوەی کوردستان بچێتە ژێر کاریگەری ئەو ململانێیەو جەنگ‌و دەخالەتی دەوڵەتان، چونکە لە باری سەربازییەوە هەلومەرجەکە زۆر خراپتر دەکات. لە ڕێگەی سەربەخۆییەوە، لانی کەم ئەمنیەتێک بۆ ئەم ناوچەیە دەگەڕێتەوەو خەڵکی باشتر لە هەلومەرجی ئەمنی بەهرەمەند دەبیت‌و کوردستان دەردەکیشیت لەم هەلومەرجە جەنگییەی ئیستا هەیە. تا چەند ئەمە واقعییە؟
عوسمانی حاجی مارف: تەماشا بکەن یەکێک لەو خالانەی ئەمانە زۆر تەئکیدی لەسەر دەکەنەوە، ئەوەیە کە ئیسرائیل دان بە دەوڵەتەکەیاندا دەنیت. واتە لە هەمان کاتدا بیکەنە پێگەیەک، کە ئەمەریکا بتوانیت دەورو نەخشی تێدا ببینێت. واتە ئەمە دەوڵەتێک نییە کە چارەسەری کێشەی کوردستان بکات، ئەمە دروستکردنی چوارچێوەیەکە، کە بۆ بەرژەوەندی ئەمەریکاو ئیسرائیلە. واتە ئەمە نەک لە جەنگ ڕزگاری ناکات، بەڵکو ڕۆژانە ڕووبەڕووی جەنگ و کارەساتی بەردەوامی دەکاتەوە لە وێنەی ئیسرائیل و فەلەستین.
تەماشا بکەن کیشەی فەلەستین‌و ئیسرائیل نە چارەسەر بووەو نە تەنانەت بە ئارامی گەشتووە، بەڵکو زیاتر لە ٦٠ ساڵە ئاسوودەی نەداوە بە دانیشتوانی ئەو ناوچانە. واتە لە سایەی سیاسەت و بەرژوەندی ئەمریکاو ئیسرائیل و بە ناوی دەوڵەتی کوردییەوە، کوردستانیش دەخەنە نیوان هەمان گێژاوەوە. ئەوەی ئیسرائیل تەئیدی سەربەخۆیی کوردستان دەکات، نەک کوردستان ناپارێزیت لە سیناریۆی ئەگەری ئەو جەنگانەی لە ناوچەکەدا فراوان دەبێتەوە، بەڵکو بەنزین کردنە بە ئاگرداو کێشەیەکی تر دەبێت لە ناوچەکەدا. لەم کاتەدا ئەگەری شەڕو بەسوریا کردنی عێراق لە ئارادایە، پێویستە هەوڵ بدرێت، کە ئەو شەرە ڕوو نەدات‌و خەڵکی لە ئەگەری‌و مەترسیەکانی ئەو شەڕە دوور کەوێتەوە. سەربەخۆیی کوردستانەکەی پارتی ناتوانیت لە مەترسی هێرشی داعش و بەسوریاکردنی عێراق لە ئێستادا بمان پارێزیت.

خەسرەو سایە: باشە ئەمە مانای ئەوە نیە کە حزبی کۆمۆنستی کرێکاری دەیەوێت شانی خۆی لە سەربەخۆی کوردستان پاک بکاتەوە لە بەرنامەی حزب دەریکێشێت.
عوسمان حاجی مارف: هەرگیز نابێت ئەو دەرئەنجامەی لێ دەرکیشین، چونکە تا کیشەی کوردستان لە سەر دانەمەزراندنی دەوڵەت بە هەڵواسراویی بمێنێتەوەو یەکلایی نەبێتەوە ئەوە حزبی کۆمۆنستی کرێکاری پێداگری لەسەر رێگەچارەی خۆی دەکات لەسەر بنەمای گەرانەوە بۆ رای خەڵکی لە رافراندۆمێکدا، تا خەڵکی کوردستان بۆ خۆیان بریار لەسەر چارەنوسی خۆیان بدەن، لە هەمان کاتدا سەربەخۆیی کوردستان لای ئێمە ئامانج نیە رێگەچارەیە، هەربۆیە لە هەلومەرجی ئێستادا کە ئاڵوگۆرێکی تایبەت پێش هاتووە، بەدوای هێرشەکانی هێزەکانی داعش بۆ سەر ناوچەی سونە نشینەکان و داگیرکردنی، وە توندبونەوەو قوڵبونەوەی کێشمەکێشی بارزانی و مالکی پێکهێنانی فەزای شەر لە عێراقدا، هاوکێشەی سیاسی گۆردراوەو بارزانی سەربەخۆی کوردستان بەبەشیک لە گەرمکرنی شەرو دروشمی شەری قەومی بەکار دەهێنێت، بۆیە لەم هەلومەرجەدا هینانە ناوەوەی سەربەخۆی کوردستان وەک رێگەچارەیەک و گەرانەوە بۆ راو بریاری خەڵکی لە رفراندۆمێکدا خالی دەکەنەوەو دەکەوێتە خزمەت بە سیاسەتەکانی بارزانی و پارتی، لەلایەکی تریشەوە سیاسەتێکی دروست نیە لەبەرامبەر هێرشی درندانەی داعشدا، لەبری وەستانەوەو پاکردنەوەی هێزەکانی داعش و رزگارکاردنی خەڵکی ئەو ناوچەیە وەڵامەکەی بەسەربەخۆیی کوردستان بدرێتەوە واتە پێکهێنانی دەوڵەتی کوردی لە سەر حسابی خوێن رشتنی هەزاران ئنسانی ناوچەکانی ژێر دەسەڵاتی داعش، مانای قەبولکردنی دەسەڵاتی داعشە بەسەر خەڵکی ئەو ناوچانەوە کە سەربەخۆیی لە رێگاچارەوە دەکاتە ئامانج و مامەڵەیەکی نائینسانی، لەهەمان کاتدا چونە ناو قەبولکردنی پرۆسەی دابەشبونی عێراقە لەسەر بنەمای قەومی و تائفی، کە ناکرێ کۆمۆنستەکان و ئازادی خوازان بەم دۆخەی ئێستا بە ناوی فرسەت بۆ سەربەخۆیی کوردستان و بەناوی دیفاکتۆ بونی دابەشبونی عێراق لە ئسولی کۆمۆنستی و ئینسانی دورکەونەوە، رزگاربونی عێراق وکوردستان بەگشتی لەم هەلومەرجەی ئێستا پێش هاتووەو گەرانەوەی ئەمنیەت و ئارامی و ئاسودەیی ئەرکی هەر ئێستای کۆمۆنستەکانە بەهەر شیوەیەک کەلەتوانایاندیە و بۆیان دەکرێت و دەگونجێت، هەرکات هەلومەرجی ئازاد و ئارام و لە بار بۆ دابینکردنی فەزای ئازادانە بۆ تەواوی هاولاتیان و دوور لە باڵادەستی هیزە میلیشیاکان دابین بێت بێ ئەملاوئەولا دەبێت رفراندۆم بکرێت و خەڵک بریار لەسەر چارەنوسی خۆی بدات.

تێبینی: ئەم چاوپێکەوتنە کە لە بەرنامەی هەر هەفتەو باسێکی رادیۆی پێشەنگەوە وەرگێراوە، بە پێویستم زانی لەبەر گرنگی باسەکە بۆ زیاتر قسەوباس لەسەر هەلومەرجی سیاسی ئێستا و مەسەلەی سەربەخۆیی کوردستان بەدەستکاری و زیادکردنەوە بکەوێتە بەردەمی خوێنەران/ عوسمان

About hkkk