ئیوارەى رۆژى پێنج شەممە سآ کەسى نەناسراو لەگەڕەکى ئیسکان لەشارى هەولێر پەلامارى نەبەز گۆران، سەرنوسەرى گۆڤارى جیهان دەدەن و دواى لێدان وئازاردانى سەورچاوى برینداردەکەن. ڕووداوێکى ئاوا جگەلە دەستدرێژى و کردەوەیەکى ئەشکنجەدان شتێکى زیاتر نییە و لەپشتیەوە بڕیارى دەسەلاتداران و بەرپرسیارانى پارتى ویەکیتى  ڕاوەستاوە.

ئەم هێرشە وپەلاماردانە چەقوکێشى و ملیهووریە بۆسەر نەبەزگۆران، جگەلەوەى  تەواوى دام ودەزگاى قەزایى و یاسا و دادگا ومەدەنى بوونى دەسەلاتەکەى پارتى ویەکیتى دەخاتەژێر پرسیارەوە، ڕاستەوخۆ لەچوارچێوەى هەوڵێکى زەبوونانەى دەسەلاتداراندایە بۆ بەرتەسکردنەوەى ئازادى ڕادەربڕین و ڕۆژنامەگەرى وچاو ترساندن و سنوردارکردنەوەى ڕۆشنبیران و کارى ڕۆژنامەگەرى  وسەرکوتکردن ودەم بەستنیان. نەبەز گۆران بەوهۆیەوە دەکەوێتە بەردەم هێرش و پەلاماردان چونکە لەماوەى ڕابردوودا بەقەلەم وڕەخنەکانى پەردەى لەسەر ڕاستیەکان و کارنامەى گەندەڵى وسەرکوتگەرى  دەسەلات وسەرانى حزبە میلیشیایىیەکانى وەک پارتى ویەکیتى هەڵداوەتەوە و ئەمەش لەلایەن ئەوانەوە  لەتواناى تەحەمول کردندا نەبووە.

ئەم ڕووداوە تەنها هێرش و پەلامارێکى چەقۆکێشى نییە بۆ سەر شەخسى نەبەزگۆران، بەڵکو زەنگى خەتەرێکە لەڕاستاى سوکایەتی کردن بەئازادى ڕۆژنامەگەرى و ڕۆژنامەنوسان وهەرکەسێک کەناڕازى بێت بەدەسەلاتى ئێستا، بۆیە دەبێ لەلایەن تەواوى ڕۆشنبیران و ڕۆژنامەنوسان وخەڵکى ئازادیخوازەوە ئیدانەو سەرکۆنەبکرێ و نابێ ڕێگا بدرێت بەدەسەلاتداران و بەرپرسیارانى ئەحزابى حاکم، دەسەلاتى سەرکوتگەرى خۆیان بەزەبرى لێدان وراسپرادنى چەقۆکێشان و ئەشکەنجەکردنى هاولاتیان بەسەر کۆمەڵگادا زاڵ بکەن و ئازادییەکان سنوردار بکنەوە و کۆمەلگاش لەنیو فەزاى ترس و ملهوریدا ڕابگرن.

حیزبى کۆمۆنیستى کرێکاریى کوردستان وێراى ئیدانە وسەرکۆنەکردنى ئەم دەست درێژەیەى کەکراوەتە سەر نەبەز گۆران، بەتەواى تواناوە بۆ پاراستنى ئازادى ڕۆژنامەگەرى و بیروڕا دەربڕین، رادەوەستێت و داوا دەکات کەدەسەلاتداران تاوانبارانى ئەم کردەوە قێزەووونە دەستگیربکەن و کەسان ولایەنى سیاسى پشتى ئەم ڕووداوە بۆڕاى گشتى ئاشکرا بکەن. حیزبى کۆمۆنیستى کرێکاریى کوردستان  هاتنە مەیدان و دەربڕینى ناڕەزایەتى بەرفراوانى خەڵکى ئازادیخواز و ڕۆژنامەنوسانى کوردستان  لەبەرامبەر دەست درێژى وهەوڵى سەرکوتگەرانەى بەرپرسیاراندا، بەتەنها ڕێگاى بەرگرتن بەم جۆرە کردەوە قیزەون وناشارستانیانە دەزانى.

حیزبى کۆمۆنیستى کریکاریی کوردستان

30/10/2009