كۆمیته‌ی سلیمانی

حزبی كۆمۆنیستی كریكاریی كوردستان

ئه‌مڕۆ چوارشه‌ممه‌ ڕێكه‌وتی 23/12 خه‌ڵكی زه‌حمه‌تكێشی شارۆچكه‌ی پیره‌مه‌گرون بۆ ده‌ربڕینی ناڕه‌زایه‌تی هێزی جه‌ماوه‌ری خۆیان هێنایه‌ به‌رامبه‌ر سه‌رۆكایه‌تی شاره‌وانییه‌وه‌ و بۆبه‌رپه‌چ دانه‌وه‌ی تۆمه‌ت و قسه‌ پڕوپوچه‌كانی سه‌رۆكی شاره‌وانی كه‌له‌كه‌ناڵی ته‌له‌فزیۆنی نه‌ورۆزه‌وه‌ ده‌رهه‌ق به‌دانیشتوانی ئه‌م ناوچه‌یه‌ كردبووی، به‌به‌ستنی ڕێگای نێوان سلێمانی و دوكان گه‌یشت و له‌به‌رامبه‌ریدا ده‌سه‌ڵاتداران وه‌ك

پیشه‌ی هه‌میشه‌ییان به‌هێنانی پۆلیس و ئاسایش و هێزی چه‌كداریان كه‌وتنه‌ ترساندن و ته‌قه‌كردن له‌خه‌ڵكی ناڕازی، تا له‌مڕێگایه‌وه‌ به‌ر به‌شه‌پۆلی توڕه‌یی و بێزاری خه‌ڵكه‌كه‌ بگرن. ئه‌مه‌له‌كاتێكدایه‌ كه‌خه‌ڵكی زه‌حمه‌تكێشی شارۆچكه‌ی پیره‌مه‌گرون چه‌ندین جاره‌ ناڕه‌زایه‌تی و بێزاری خۆیان سه‌باره‌ت به‌ بارخراپی ئاستی خزمه‌تگوزاری له‌م ناوچه‌یه‌دا به‌ڕووی ده‌سه‌ڵاتداراندا ده‌ربڕیوه‌ و ئه‌وانیان له‌خواسته‌كانی باشكردنی ئاو وكاره‌با و خانوبه‌ره‌و ڕێگاوبان و ته‌ندروستی ئاگاداركردۆته‌وه‌. به‌ڵام پشتگوێ‌ خستن و به‌پیره‌وه‌ نه‌هاتنی دام وده‌زگاكانی حكومه‌ت و به‌فه‌رامۆش سپاردنی ژیانی ڕۆژانه‌ی دانیشتوانی ئه‌م ناوچه‌یه‌، سه‌ڕه‌رای به‌ڵَێن و وه‌عده‌كانی سه‌رده‌می هه‌ڵبژاردنه‌كان، به‌ناچار خه‌ڵكی ئه‌م ناوچه‌یه‌ی له‌حاڵه‌تێكی ناڕه‌زایه‌تی به‌رده‌وامدا ڕاگرتووه‌ و هیچ بووارێكی له‌به‌رده‌مدا نه‌هێشتونه‌ته‌وه‌ جگه‌له‌وه‌ی كه‌په‌نا بۆ خۆپیشاندان وهێنانه‌مه‌یدانی ڕیزی جه‌ماوه‌ری خۆیان به‌رن.

ناڕه‌زایه‌تی خه‌ڵكی شارۆچكه‌ی پیره‌مه‌گرون گۆشه‌یه‌ك له‌ ئیعتراز و ناڕه‌زایه‌تی خه‌ڵكی سه‌رجه‌م شاره‌كانی كوردستان به‌ڕووی نه‌بوونی خزمه‌تگوزاری و به‌ته‌نگه‌وه‌ نه‌هاتنی ده‌سه‌ڵاتدارێتی بۆرژوازی گه‌نده‌ڵی بزووتنه‌وه‌ی كوردایه‌تی ده‌خاته‌ڕوو كه‌ له‌لایه‌كه‌وه‌ خه‌ریكی دزی وگه‌نده‌ڵی و گیرفانپركردن وپێكهینانی ژنانی فیرعه‌ونانه‌ن بۆخویان وله‌لایه‌كیتریشه‌وه‌ ڕاگرتنی خه‌ڵكیان له‌بێده‌ره‌تانی و نه‌بوونی خزمه‌تگوزاریه‌كاندا كردۆته‌ كارنامه‌ی سه‌ره‌كیان. خه‌ڵكی زه‌حمه‌تكێشی شارۆچكه‌ی پیره‌مه‌گرون و باقی شاره‌كانی تری كوردستان به‌و ڕاستیه‌ ئاشنان كه‌سامان و داهاتی كۆمه‌ڵگای كوردستان له‌ده‌ستی تاقمێكی كه‌می مشه‌خۆر وچه‌ك به‌ده‌ستی هه‌ردوو حزبی میلیشیاییدا قورغكراوه‌ و له‌ولاشه‌وه‌ زۆرینه‌ی خه‌ڵكی شه‌ریف وئازاده‌ بێبه‌رین له‌سه‌رتایی ترین ئاستی خزمه‌تگوزاری. ئه‌م ناعه‌داله‌تیه‌ش بنه‌مای هه‌ربزووتنه‌وه‌یه‌كی هه‌قخوازانه‌ی خه‌ڵكی كریكاروزه‌حمه‌تكێشی كوردستانه‌. هاتنه‌مه‌یدانی خه‌ڵكی شارۆچكه‌ی پیره‌مه‌گرون جارێكیتر ئه‌وڕاستیه‌ ده‌سه‌لمێنێته‌وه‌ كه‌ته‌نها به‌خه‌بات و هاتنه‌ مه‌یدانی ڕیزی یه‌كگرتووی جه‌ماوه‌ر ده‌توانرێ‌ ڕیشه‌كانی ئه‌م نایه‌كسانی و بێده‌ره‌تانیه‌ هه‌ڵكه‌ندرێ‌ و ده‌سه‌ڵاتداران ناچار بكرێن به‌باشكردنی ژیانی رۆژانه‌ی هاولاتیان.

خواسته‌كانی خه‌ڵكی شارۆچكه‌ی پیره‌مه‌گرون له‌دابینكردنی خزمه‌تگوزاری وپیداویستیه‌كانیان، خواستیكی ڕه‌واو به‌رهه‌قه‌. هه‌رده‌سته‌و تاقمێك كه‌ئیدعای حكومه‌ت و ده‌سه‌لات ده‌كات ئه‌ركیه‌تی ژیانی شارساتیانه‌و مه‌ده‌نی بۆهاولاتیانی بنده‌ستی خۆی دابین بكات. حزبی كۆمۆنیستی كرێكاریی كوردستان به‌ته‌واوی تواناوه‌ له‌پشت ئه‌م ناره‌زایه‌تیه‌و خواسته‌كانی خه‌ڵك ڕاده‌وه‌ستێ‌ وبانگه‌وازی ڕابه‌ران و هه‌ڵسوراوان و كه‌سایه‌تی ئه‌م ناره‌زایه‌تیه‌ی شارۆچكه‌ی پیره‌مه‌گرون ده‌كات كه‌له‌ده‌وری ئه‌م خواستانه‌ كۆببنه‌وه‌ و به‌تێكۆشانی سه‌ربه‌خۆی خۆیان به‌ر به‌ هه‌رپیلانێكی سه‌ركوتگه‌رانه‌ی ده‌سه‌لاتداران بگرن:

• دابینكردنی ده‌ستبه‌جێ‌ی خزمه‌تگوزاره‌یه‌كان ئه‌ركی ده‌سه‌لاتدارانه‌.

• ده‌ست له‌كاركێشانه‌وه‌ی سه‌رۆكی شاره‌وانی و دادگایی كردنی، خواستی به‌رهه‌قی خه‌ڵكه‌و ده‌بێ‌ ده‌سه‌لاتداران مل به‌م خواسته‌ی خه‌ڵك بده‌ن.

• سپاردنی به‌ڕێوه‌بردنی ژیانی ئه‌م شارۆچكه‌یه‌ به‌نوێنه‌رانی هه‌ڵبژێردراوی خه‌ڵك و كونترۆڵی بۆدجه‌و پرۆژه‌كان له‌لایه‌ن نوێنه‌رانی خه‌لكه‌وه‌ ته‌نها وه‌لامه‌ به‌راگرتنی گه‌نده‌لی و به‌فه‌رامۆش سپاردنی ژیانی ڕۆژانه‌ی هاولاتیان.

ته‌واوی خه‌لكی زه‌حمه‌تكیش وئازادیخوازی كوردستان ئه‌ركیانه‌ به‌شێوه‌ی گونجاوی خۆیان پشتگیری له‌خواسته‌كانی شارۆچكه‌ی پیره‌مه‌گرون بكه‌ن وئه‌وان له‌سه‌نگه‌ری ته‌نهاییدا رانه‌گرن.