له‌بانگه‌وازێکدا که‌پێشتر بۆ سیمینارێک له‌ ژێر ناوی: "دۆسیه‌ی هه‌ڵه‌بجه‌ و ئیعترافه‌کانی تاڵه‌بانی و نه‌وشیروان" دا له‌ شاری ئۆسلۆ بۆ جمال محسن ڕاگه‌یه‌نرابوو، ڕۆژی شه‌ممه‌، 20   ی فێبریوه‌ری، به‌به‌شداری ژماره‌یه‌ک له‌خه‌ڵک سمیناره‌که‌ له‌لایه‌ن به‌هار مونزیه‌ره‌وه‌ به‌ڕێوه‌برا.

جمال محسن باسه‌که‌ی له‌ دوو به‌ش پێکهاتبوو،‌ به‌شی یه‌که‌م ڕاسته‌وخۆ له‌سه‌ر ئیعترافه‌کانی تاڵه‌بانی و نه‌وشیروان له‌سه‌ر یه‌ک باسکردو له‌وێدا کۆمه‌ڵێک نموونه‌ له‌قسه‌کانی خۆیانی هێنایه‌وه‌ و شییکردنه‌وه‌. دواتر باسی له‌سیاسه‌ت و هه‌ڵوێستێک کرد که‌ حزب له‌و باره‌یه‌وه‌ گرتوویه‌تیه‌ به‌ر که‌ بریتییه‌ له‌ خواستی دادگایی کردنی ئه‌و دووانه‌ و لێسه‌ندنه‌وه‌ یان نه‌مانی شه‌رعیه‌تی ده‌سه‌ڵاتی ئه‌وان. هه‌روه‌ها چه‌ند به‌شێکی له‌کتێبی "پشتائاشان له‌ نێوان ئازار و بێده‌نگیدا که‌ له‌ نووسینی قادر ڕه‌شیده‌ (ناوسراو به‌ ابو شوان) و کادرێکی حزبی شیوعی بووه‌ که‌ خۆی شایه‌تحاڵێکی ناو ڕووداوه‌کانی پشتئاشان و قڕناقا بووه، خسته‌ڕوو‌.‌

‌به‌شی دووه‌می سیمیناره‌که‌ش په‌یوه‌ست بوو به‌هه‌ڵبژاردنه‌کانی ئه‌م دواییانه‌ی عێراق و سیاسه‌تی بایکۆتکردن که‌ هه‌دوو حزبی کۆمۆنستی کرێکاریی کوردستان و عێراق گرتوویانه‌ته‌ به‌ر. له‌وێشدا ته‌ئکیدی له‌وه‌کرده‌وه‌، که‌به‌شداریکردنی خه‌ڵکی کوردستان له‌هه‌ڵبژاردندا به‌عه‌مه‌لی کوردستان ئه‌خاته‌وه‌ چوارچێوه‌ی عێراقێکی عروبییه‌وه‌. هه‌روه‌ها له‌درێژه‌ی باسه‌که‌یدا جه‌ختی له‌وه‌ کرده‌وه‌ که‌ سه‌رانێکی وه‌ک نه‌وشیروان و تاڵه‌بانی که‌ خۆشیان په‌رده‌یان له‌سه‌ر تاوانه‌کانی یه‌کتر هه‌ڵداوه‌ته‌وه‌ نه‌ک هه‌ر نابێ ده‌نگیان پێ بدرێ به‌ڵکو ئه‌بێ له‌به‌رده‌م دادگادا ڕاوه‌ستن..

هه‌روه‌ها ئاماده‌بون ده‌خاله‌تێکی گه‌رمیان کرد له‌باسه‌کاندا به‌پرسیارو قسه‌کردن و له‌کوتایدا جمال محسن روناکیی خسته‌ سه‌رلایه‌نه‌کانی پرسیاره‌کان.