ئه‌مڕۆ 12ی ئایاری 2010، له‌سه‌ر بانگه‌وازی کۆمیته‌ی فینله‌ندای حیزبی کۆمۆنیستی کرێکاریی کوردستان، جه‌ماوه‌رێکی زۆر له‌ ئه‌ندامان و لایه‌نگران و دۆستانی حیزب و ره‌وه‌ندی کوردی له‌دژی تیرۆری سه‌رده‌شت عوسمان، له‌ شاری هیلسنی پایته‌خت، خۆپیشاندانێکی شکۆمه‌ندیان به‌ڕێخست.

سه‌ره‌تا، خۆپیشانده‌ران له‌ ئیزگه‌ی کوڵۆساری که‌ چه‌ند سه‌د مه‌ترێک دووره‌ له‌ بالوێزخانه‌ی عێراقه‌وه‌، کۆبوونه‌وه‌و پاشان به‌ڕێپێوان و وتنه‌وه‌ی دروشمی "ده‌سه‌ڵاتی میلیشیا، سه‌رکوت ئه‌کاته‌ ڕێگا"، "نه‌ تیرۆر و نه‌ تۆقان – ئازادی و مافی یه‌کسان"، "دوێنی سۆران ئه‌مڕۆ سه‌رده‌شت، نا بۆ ده‌سه‌ڵاتی بێ ده‌ربه‌ست" به‌ره‌و باڵوێزخانه‌ی عێراق به‌ڕێکه‌وتن.

کاتێك گه‌یشتنه‌ به‌رده‌م باڵوێزخانه‌ی عێراق، خۆپیشانده‌ران به‌ هه‌ردوو زمانه‌کانی فینله‌ندی و کوردی چه‌ندین دروشمیان ده‌وته‌وه‌ که‌ سه‌رکۆنه‌ی تیرۆری سه‌رده‌شت عوسمان و رۆژنامه‌نوسان و هه‌ڵسوڕاوانی سیاسی ده‌کرد له‌لایه‌ن ده‌سه‌ڵاتی میلیشیاییه‌وه‌ له‌‌ کوردستان.

 پاشان مسته‌فا باهر به‌رپرسی کۆمیته‌ی فنلاندی حزبی کۆمۆنیستی کرێکاریی کوردستان پاشئه‌وه‌ی به‌ناوی حیزبه‌وه‌ به‌خێرهاتنی ئاماده‌بوانی کرد، وته‌یه‌کی پیشکه‌ش کرد و تیایدا باسی له‌ چۆنێتی ڕوودانی تیرۆره‌که‌‌ کرد . باسی له‌وه‌ کرد که‌سه‌رجه‌م خه‌ڵکی کوردستان په‌نجه‌ی گومان بۆ ده‌زگا ئه‌منیه‌کانی حکومه‌ت و پارتی دیموکراتی کوردستان راده‌کێشن که‌ده‌سه‌ڵاتی شاری هه‌ولێری به‌ده‌سته‌وه‌یه‌. باسی له‌وه‌کرد که‌ ناکرێ له‌ ناوجه‌رگه‌ی شاردا به‌به‌رچاوی پاسه‌وانانی زانکۆوه‌ باندێکی تیرۆریست خوێندکارێك برفێننن و پاشان‌ به‌ 11 بازگه‌دا تێیپه‌ڕێنن به‌ره‌و موصل و که‌سیش نه‌توانێت ‌بیانگرێت. هه‌روه‌ها ئاماژه‌ی به‌وه‌دا که‌تائه‌وکاته‌ی ده‌سه‌لاتدارانی هه‌ولێر تاوانباران ده‌ده‌نه‌‌ دادگا گومان له‌سه‌رخۆیان ده‌مێنێته‌وه‌. ‌هه‌روه‌کو له‌درێژه‌ی قسه‌کانیدا مسته‌فا باهیر به‌رپرسی کۆمیته‌ی حیزب له‌ فنله‌ندا باسی له‌تیرۆری چه‌ندین که‌سایه‌تی و هه‌ڵسوراوی سیاسی دیکه‌ کرد که‌ له‌ژێرده‌سه‌ڵاتی پارتیدا تیرۆرکراون؛ له‌وانه‌ نه‌زیر عمر ناسراو به‌ئارام ،ابونصیر، شاپور و قابیل و .. هیچ کاتێکیش تاوانباران ئاشکرا نه‌کراون و دادگایی نه‌کراون. له‌ کۆتایی وته‌که‌یدا به‌رده‌وام بوونی حزبی کۆمۆنیستی کرێکاریی کوردستانی ڕاگه‌یاند له‌ وه‌ستانه‌وه‌ به‌دژی تاوانی تیرۆر و ئینساکوژی و سه‌رکوتی ئازادی سیاسی له‌ کوردستان و تێکۆشان له‌ پیناو ئازادیدا و بانگه‌وازی ئاماده‌بووانیشی کرد بۆ به‌شداریکردن له‌م خه‌باته‌دا.

پاشان هه‌ریه‌که‌ له‌ عه‌باس شوان- نوسه‌ر، ڕێبوار عارف- له‌لایه‌ن فیدراسێۆنی په‌نابه‌رانی عێراقیه‌وه، ره‌زا که‌مانگه‌ر له‌ لایه‌ن حزبی کۆمۆنیستی کرێکاریی-حکمه‌تیسته‌وه و هه‌ردی فه‌تاح له‌لایه‌ن ئه‌نجومه‌نی بزووتنه‌وه‌ی گۆرانه‌وه‌ له‌ فنلاند وته‌یان پێشکه‌شکردو تاوانی کوشتنی سه‌رده‌شت عوسمان و تیرۆرو تۆقاندنیان له‌ کوردستان ئیدانه‌کرد و ته‌ئکیدیان له‌سه‌ر تێوه‌گلانی ده‌سه‌ڵاتدارانی هه‌ولێریان له‌و روداوه‌وه‌ کرد.

له‌کۆتایی خۆپیشاندانه‌که‌دا مسته‌فا باهر له‌گه‌ڵ 2 که‌سی دیکه‌دا وه‌کو نوێنه‌ری خۆپیشانده‌ران یاداشتێکی ناره‌زایه‌تیان دایه‌ده‌ست‌ نوێنه‌رانی باڵویزی عێراق تا له‌رێگای ئه‌وانه‌وه‌‌ بگه‌یه‌نرێته‌ مه‌سعود بارزانی سه‌رۆکی هه‌رێم. یاداشتنامه‌که‌ ئاماژه‌ی به‌وه‌کردوه‌ که‌ ده‌سه‌ڵاتدارانی هه‌ولێر به‌رپرسن به‌رامبه‌ر تیرۆری سه‌رده‌شت عوسمان و داوای لێکۆڵینه‌وه‌ و دادگاییکردنی تاوانباران ده‌کات. پاشان خۆپیشاندانه‌که‌ به‌وتنه‌وه‌ی دروشمه‌کان کۆتایی پێهێنرا!

کۆمیته‌ی فنلاندی حزبی کۆمۆنیستی کرێکاریی کوردستان

12.5.2010