مەخابن کۆمەڵگا بە دەستى سەدان کێشە و گرفت گیرۆدەیە،حیزبە ئیسلامیەکان و مەلا و ئاخوندەکان کە خۆیان بە رزگارکەرى بەشەریەت دەناسێنن نوزەیان لەبەرەوە نایەت،بەڵام لەبەرامبەر نووسین و بڵاوکردنەوەى چەند ووتار و کتێبێک و لێکۆڵینەوەیەکى مەیدانى و زانستى لەسەر مێژووى ئیسلام و کار و پرۆژە و ماهیەتى حیزبە ئیسلامیەکان هاواریان لێ هەڵساوە و بە هەموو ئەندامەمانى لەشیان پەلاماردەدەن.

دوایى بڵاوبوونەوەى چەند تێبینیەکم لەسەر سیاسەت و کارکردنى یەکگرتووى ئیسلامى کوردستان،چەند برادەرێک بە ووتار و تەلەفۆن و نووسین بە شێوەیەکى زۆر توند دوور لە هەموو عورف و عاداتێکى ئەخلاقى و سیاسى وەڵامیان دایەوە،لەیەکى تریشەوە کۆمەَلێک مەلا بە پاڵپشتى حیزبە ئیسلامیەکان خەریکى کەمپینێکن دژى بڵاوکردنەوەى نووسین و کتاب و لێکۆڵینەوە بەبێ سانسۆر و کۆنترۆڵ،دیارە لە هەوڵى تریشدا دەستیان نە پاراستووە، بۆیە لەبەرامبەر ئەو هێرش و پەلاماردانانە کە هاوکات بوو لەگەڵ یەکتر بە پێویست زانى چەند تێبینیەکى تر ئیزافە بکەم.

هەر هەفتە و یەکێک لە وڵاتانى دراوسێ و ناوچەکە هێرش دەکات و گوند و ناوچە سنورییەکان بۆردومان دەکان و مناڵ و ژن و لاو و گەنجانى ئەو وڵاتە لەناودەبات و کەم ئەندام دەکات،خەڵکى بەدەست نەبوونى و هەژارى و دەست کورتیەوە دەناڵێنن،قوتابیان و مامۆستایان و فەرمانبەران بەدەست رۆتینەوە گیرۆدەن،بەهۆى بوونى یاسا و دەستورێکى نامەدەنى رۆژانە سەدان گەنج و لاوى کوڕ و کچ خەون و خولیاکانیان لێ دەبێت بە سەراب.....،کەچى مەلا و عەممامە بەسەرەکان و حیزبە ئیسلامیەکان مێشێک میوانیان نیە،لەلایەکى تریشەوە دژى ئازادى نوسین و بڵاوکردنەوە و لێکۆڵینەوەن کە سەرەتاترین و ساکارترین مافى هەر کەس و لایەنێکە کە چى دەڵێت و چى بڵاودەکاتەوە.

سەرەتا هاورێیانى موسڵمان زۆر دوایى لێبوردنتان لێ دەکەم،من ناتوانم بەم زمان و فەرهەنگە نزمەى کە ئێوە پێى پێ دەئافتن و وەڵامى منتان پێ داوەتەوە من قسەى پێ بکەم بۆیە خۆم لە زۆرێک لە وەڵامەکانتان دەپارێزم،کاک ئاوات لە مەکتەبى راگەیاندنى یەکگرتوو بە تەلەفۆن پێم دەڵێت( تۆ وەکو مەڕ کاوێژ دەکەیت و کاوێژکردنەکەشت لە خزمەتى پارتى و یەکێتیدایە و چوونە سەنگەرت لە یەکگرتوو خزمەتکردنە بە گەندەڵى پارتى و یەکێتیدا...)هەروەها جەنگى ناوێک لە نامەیەکدا بۆم دەنوسێت(...هەر هیچ نەبێت توانیومانە کەسانى وەکو تۆ لە کوردستاندا کەم بکەینەوە و ئیستا کافرى وەکو تۆ بە ترسەوە لەسەر حیزبە ئیسلامیەکان و ئاینى پیرۆزى ئیسلام دەدوێن وناتوانن قسە قۆڕەکانیان بە راحەتى بڵاو بکەنەوە... )

دیسانەوە دووبارەى دەکەمەوە،گەندەڵى و دزى و راووڕووتى و نایەکسانى و بێ مافى پارتى و یەکێتیم هەزار جار پێ باشتر لە حوکمى شمشێر و سەرپەراندن و تێزاب و زیندەبەچاڵکردن و دەست بڕینەوە و تەقاندنەوە و رەجم کردن و لە چادر هەڵکێشانى ژنان و گیرکردنى مناڵان لە حوجرەى مزگەوتەکانى ئیسلامیەکان، لە کاتێکدا هیچ بەرنامە و پرۆژە و سیاسەتێک نیە من بە پارتى و یەکێتی و دەسەڵاتدارانى کوردستان ببەستێتەوە و بە هەموو شێوەیەک لە هەوڵدام بۆ گۆڕین و ژێر یەژوورکردنى ئەو دەسەڵاتە گەندەڵ و بێ سیستەم و نایەکسانە،بەڵام ئێوەى ئیسلامیەکان مردنتان بە ئێمە نیشان داوە بۆیە بە سەر ئێشەى پارتى و یەکێتى مەمنونین!ئەوەش باش بزانن خەڵکى کوردستان زۆر لەئێوە دەترسن کە لە ئەنجامى نەمانى پارتى و یەکێتى ئێوە ببن بە هێز و فرسەت بقۆزنەوە،بۆیە بە شێوەیەک لە شێوەکان لەبەرامبەر دەسەڵاتى پارتى و یەکێتى نەرمى دەنوێنن و بەدوایى بەدیلێکى مەدەنى دەگەرێت کە تەعبیر لە خواست و وویستەکانیان بکات،

من لە ووتارەکەى سەرەتاشم بە روونى ئەوەم باس کردووە و بەیەک ووشەش بەرگریم لە دەسەڵاتى پارتى و یەکێتى نەکردووە.

لەلایەکى ترەوە بەدەست من نیە،ئێوەى ئیسلامیەکان لە هەموو دونیا بە هێزى کاولکار و داخراوى کۆمەڵکا ناسراون و رۆژانەش کار لەسەر جێکردنى ئەو پرۆژانە دەکەن،لەهەر شوێنێک دەسەڵاتان هەبێت ژنان و ئافرەتان دەبێت چاوەڕوانى قیامەت بکەن و دەست لە ژیانى ئیستا هەڵگرن،چونکە بەپێى یاسا و دەستوور و شەرعیەتەکەتان پلەدوون و ئالیەتى خزمەتکردن و چێژ وەرگرتنن، مناڵان خۆشى و شادى و یارى و ژیانى بەرائەتى مناڵیان لێ دەبێت بە حەرام،لاوان دەبێت بۆ ئەبەد باسى خۆشەویستى و سەرگەرم کردن و جوانى و بەختەوەرى نەکەن،ئازادى و مافە فەردى و مەدەنیەکان دەبێت بە خەون،هەر ئیستا خەریکن ئەو تروسکاییەى کە بە هەوڵ و ماندووبوون و قوربانى خەڵک بەدەست هاتووە لەبارى بەرن و هاوار دەکەن و پەلامار دەدەن،هەژارى و برسیەتى و جیاوازى نێوان چینەکان درێژە پێ دەدەن،تیرۆر و تۆقاندن و مل پەراندن بەشێکى جیانەکراوەى بردنەپێشەوەى سیاسەت و بەرنامەکانتانە،....    .دەتوانن یەک مەملەکەتم نیشان بدەن کە ئێوە باڵا دەست بن و ئەو مەرگەساتانەى لەسەرەوە باس کرا بەشێک نەبێت لە کۆمەڵگاکە،جا قسەى من لەسەر ئەوەیە،کە ئێوە خاوەنى ئەو بەرنامە و پرۆگرامانەن و ناتوانن ببن بە ئومێدى خەڵکى کوردستان کە دڵیان بۆ ئازادى و یەکسانى و خۆشگوزەرانى و رەفاهیەت و خۆشى و گەشت و سەیران مەدەنیەت لێ دەدەت.

لە کۆتاییدا دەڵێم، هاورێیان پەیامەکەتان رۆشنە دەتانەوێت خەڵکى کوردستان هەمیشە لە تاریکیدا بژین و هەموو دەرگاکانیان لەسەر دابخەن و هیچ جۆرە دەخاڵەتێکیان لەسەر ژیان و چارەنووسى سیاسى و ئابورى و کۆمەڵایەتى و فەرهەنگى کۆمەڵگادا نەبێت،بۆیە دەتانەوێت مافى بیرکردنەوە و نووسین و قسەکردن و بڵاوکردنەوەیان لێ زەوت بکەن.