گه‌ر مه‌رگ کۆتایی و دابڕانی ژیانی فیزیکی و جه‌سته‌یی ئینسان بێت له‌ دۆست و ئازیزانی، ئه‌وا کار و کردوه‌ باشه‌کانی، یادگارییه‌ شیرینه‌کانی به‌ زیندوو ڕاگرتنی ئه‌و ئینسانه‌یه‌ له‌ زیهنی  دۆست و خۆشه‌ویستانیدا.

قادر مه‌جید، ئه‌و ئینسانه‌ خه‌باتکار و تێکۆشه‌ره‌ بوو، که‌ ساڕێژبوو له‌ دڵسۆزی بۆ چینه‌که‌ی بۆ هاوڕێان و بۆ حیزبه‌که‌ی. قادر مه‌جید ژیانی به‌ جوانترین و بایه‌خترین دیاری سرووشت ده‌زانی بۆ ئینسان، ئه‌و دۆست و ئاشقی ژیان بوو، ده‌یوست هه‌میشه‌ ژیان جوان وڕازاوه‌ بێت، هه‌ر بۆیه‌ وه‌ک خه‌باتکارێک تێده‌کۆشا له‌ دژی ئه‌وانه‌ی که‌ له‌ هه‌وڵی ناشرینکردنی به‌هاکانی ژیانن و له‌ هه‌وڵی سه‌ندنه‌وه‌ی ژیانی شایسته‌ به‌ ئینسانن.

به‌لای قادر مه‌جیده‌وه‌ ئه‌و رێگه‌یه‌ی که‌ ئه‌و هه‌ڵیبژاردووه‌ ئینسان نه‌ک هه‌ر تێدا به‌نرخه‌، به‌ڵکو پیربوون تێیدا ئه‌فسانیه‌ و ئینسان  هه‌میشه‌ خۆێنی لاوێتی به‌ده‌مارکانیدا ده‌گه‌ڕێ، بۆیه‌ هه‌میشه‌ به‌‌ پاک وته‌میزی به‌ گورجوگۆڵی ده‌تبینی.

بوونی که‌سانی وه‌ک قادر مه‌جید ، بۆ ئه‌مڕۆی کۆمه‌ڵگه‌ی پڕ چه‌وسانه‌وه‌ و نابه‌رابه‌ری ئینسانی وه‌ک ئۆکسیجین پێویسته‌ ، به‌ له‌ده‌ستدانی ئه‌م ئینسانانه کۆمه‌ڵگه‌ی ئینسانی تێیدا زه‌ره‌رمه‌نده‌.

یادی قادر مه‌جید به‌رز و به‌ڕێزه‌، له‌ده‌ستدانی خه‌مێکی گه‌وره‌ و زیانێکه‌ به‌ ئاسانی قه‌ره‌بوو ناکرێت.  به‌ ئومێدی دڵنه‌وایم بۆ خێزان و منداڵه‌کانی بۆ براکانی به‌ تایبه‌ت هاوڕێی ئازیزم ڕێناس عارف، به‌ ئومێدی دڵنه‌واییم بۆ هه‌موو هاوڕیان ودۆستانی هاوخه‌باتی.