Home 6 ئەرشیفی بابەتەکان 6 بەیاننامەی حزبی کۆمۆنیستی کرێکاری کوردستان بەبۆنەی یەکی ئایار، ڕۆژی جیهانی چینی کرێکارەوە!

بەیاننامەی حزبی کۆمۆنیستی کرێکاری کوردستان بەبۆنەی یەکی ئایار، ڕۆژی جیهانی چینی کرێکارەوە!

یەکی ئایار ڕۆژی هاوپشتی و هاوچارەنوسی و توندکردنەوەی خەباتی یەکگرتوانەی چینی کرێکارە بەڕووی سەرتاپای سیستەمی زاڵمانەی سەرمایەداری، لەسەراسەری جیهاندا. یەکی ئایار ڕۆژی هیچ نەتەوەو ئاینێک نییە، بەڵکو رۆژی بەرجەستەکردنەوەی ناسنەمەی جیاوازی چینایەتی کرێکارە، بەرامبەر بەدەسەڵاتی چینی بۆرژوازی و هەموو ئەو رەوت و بزوتنەوانەی کەبەم یان بەو شیوەیە پاساوی مانەوەی سەرمایەداری و دەسەڵاتەکەی دەکەن بەسەر کۆمەلگاوە.

کارنامەی سەرمایەداری و چینی بۆرژوازی و دەولەتەکانی لەدونیای ئەمڕۆدا، هەرساتە و هەر ڕۆژە، ناتەبایی و پێچەوانەبوونی خۆی لەگەڵ کۆمەلگای بەشەری و ئومێد و ئارەزووە ئینسانیەکانی نیشان دەدات. ئەمڕۆ بۆرژوازی ئیمپریالیستی بۆ دەرچون لە قەیرانێکی ئابوری کوشندە کەتێی کەوتوە لە ململانێیەکی سەخت دان بۆ دابەشکردنەوەی جیهان لەنێوان خۆیاندا کە جەستەی ملێۆنەها ئینسانی لە ناوچەی رۆژەهەڵاتی ناوەڕاستدا کردۆتە خۆراکی ماشێنی جەنگ و میلیتاریزمەکەی، لەلایەکی تریشەوە، سیاسەتی برسیکردن و لێگرتنەوەی ئابوری چ لە ناوخۆی ووڵاتانی ئیمپریالیستی‌و چ لە وولاتانی ژێردەستەدا بەدەستەوە گرتووە.

خودی ئەوەی کە ڕۆژهەلاتی ناوەراست کراوەتە گۆماوی خوێن و جێگایەك بۆ سەپاندنی باڵادەستیی هیزە ‌ئیمپریالیستەکان و دەولەتانی ناوچەکەو هەڵکشانی دەستەوتاقمی تیرۆریست و ئینسان کوژی لەنمونەی داعش، بەڵگەی ئەو راستیەن کەچینی بۆرژوازی و نیزامەکەی جگەلە دەستبردن بۆ جەنگ و کاولکاری و ئاوارەیی و کوشتاری بەکۆمەڵی ئینسان و پەرەدان بەتیرۆریزم و راسیزم، کارنامەیەکی تری نیە بۆ بەلاداخستنی ناکۆکیە ناوخۆییەکانی.

ساڵی رابردوو کرێکاران‌و جەماوەری بێبەشی کوردستان لەنێو کەشوهەوای جەنگ‌و نائارامیی ناوچەکەدا، سەختترین دەورانی ژیان‌و گوزەرانی تێپەراندوە. وێرای بێمافی‌و نەبوونی یاسایەکی کار کە لانی کەمی ماف و ئازادیەکانیان بەرەسمی بناسێت، لەگەڵ سەرکوت و هەژاری و نەداری‌و بیکاری بەرفراوان بەرەوڕووکراونەتەوە. بۆرژوازی کوردو حزبە دەسەلاتدارە قەومی و ئیسلامیەکانی، بۆ هەستانەوەی باری داڕوخاوی ئابوری و قەیرانی سیستەمەکەیان، لەلایەک سیاسەتی نەدان و لێگرتنەوەی موچە و دەستبردن بۆ بێکارسازی گرتۆتەبەرو لەلایەکی تریشەوە نامەسئولەیەتی خۆیان بەرامبەر بەدابینکردنی خزمەتگوزاریەکان راگەیاندووە و لانی کەمی بەدەستهێنانی بژێوی کرێکاران و خەلکی زەحمەتکێشیان بەبازاڕی مونافەسەی سەرمایەو خاوەن کۆمپانیاکان سپاردووە، کە هەژاری و نەداریەکی بێوینەیان بەسەر چینی کرێکاری کوردستاندا داسەپاندووە.

ئەزمونی یەکساڵی رابردووی ناڕەزایەتیە جەماوەریەکان، کەڕۆژانە یەخەی دەسەلاتدارانی کوردستانی گرتووە، لەلایەک ئەو راستیەی لەمەحەک داوەتەوە، کەبۆرژوازی کوردو دەسەلاتی حزبەکانی هیچ شەرعیەت و هەقانیەتێکیان بۆ مانەوە لەسەر کورسی دەسەڵات نەماوە. تەنانەت هەرجۆرە باشکردنێکی بەرچاو لەژیانی ئابوری و سیاسی و کۆمەلایەتیدا، بەلەکارخستنی ئەم دەسەلاتەوە گرێ دراوەتەوە. لەلایەکیتریشەوە هەمان ئەزمون زۆر بەروونی بانگەوازی چینی کرێکاری کوردستان دەکات بۆ بەلاداخستنی دۆخی ئیستا و بەدەستەوەگرتنی چارەنوسی کۆمەڵگا.

هاوڕیانی کرێکار، جەماوەری زەحمەتکێش و بێبەشی کوردستان!

چینی کرێکار بۆ رزگاری خۆی وکۆمەڵگا لەدەست کەمایەتیەکی خوینمژو مفتەخۆرو گەندەڵ، هیچ ڕێگایەکیتری لەبەردەمدا نییە جگە لە پشتبەستن بەهیزی خۆی نەبێت. سەرەکیترین هۆکاری مانەوەی دەسەلاتدارێتی بۆرژوازی کورد بە هەموو شکست‌و و قەیرانەکانیەوە، پەرتەوازەییی و ناڕێکخراوبونی ریزی ئێمە کریکاران‌و زەحمەتکێشانە. تەنانەت کرێکاران کاتێک دەتوانن لەخەباتی ڕۆژانەیاندا خواستەکانی خۆیان بەسەر دەسەلاتداران و خاوەنکاردا داسەپیین، کەزاڵ بن بەسەر ئەم پەرشوبلاویی و ناڕێکخراوبوونەیاندا و وەک هێزێکی یەکگرتوو رێکخراو دەرکەون. هەموو هەوڵیکی بۆرژوازی کورد بۆئەوەیە تا ریزەکانی چینی کرێکارو کۆمەڵانی بەشمەینەت لەپەرشوبلاویی و پارچەپەرچەییدا رابگرن و لەم ڕیگایەشەوە بمان کەنە سەربازی بێکرێی ڕاگرتنی دەسەڵاتەکەیان.

کرێکارانی کوردستان وێرای ئاستەنگیەکانی بەردەمیان، بەڵام هیزێکی گەورەی کۆمەڵایەتین. ئەگەر هێزی سەدان هەزاری کرێکارانی بەرهەمهێنانی نەوت ، کرێکارانی ناوەندەکانی تەندروستی و شارەوانی و کارەباو خزمەتگوزاریەکان، ئەگەر ڕیزی هەزاران کرێکاری کشتوکالی و کرێکارانی کۆمپانیان و کارگە گەورەو بچوکە ئەهلیەکان ، ئەگەر ژنانی کرێکار و خیزانە کریکاریەکان، لەپاڵ ڕیزی چەندسەد هەزاری بێکاران و زەحمەتکێشانی کەمدەرامەتدا، لەیەک ڕیزی چینایەتی سەربەخۆ ورێکخراو یەکگرتووداو لەژێر ئالای شۆڕشی کرێکاریدا، پێ بنێینە مەیدانی خەباتی سیاسیەوە، بەدڵنیاییەوە نەک هەر سێلاوێک لە تواناو هیز لەخۆدەگرن کەحسابی کۆمەڵگا لەگەڵ چینی بۆرژوازی و دەسەلاتەکەی یەکلابکاتەوە. کەواتە با ئایاری ئەمساڵ بکەیەنە سەرەتایەک بۆ زاڵبوون بەسەر گرفتی پەرشوبلاوی ڕیزەکانمان. با دەست بەرین بۆ دروستکردن و پێکهێنانی رێکخراوە حزبی و غەیرە حزبیەکانی کرێکاران و جەماوەری زەحمەتکێش و بێبەشی کوردستان.

بژی ئایار .. بروخێ نیزامی سەرمایەو سەرمایەداری!

حزبی کۆمۆنیستی کرێکاری کوردستان

٢٥/٤/٢٠١٦

About hkkk

Check Also

پشتیوانی نامەی کراوەی …

پشتیوانی نامەی کراوەی  (کۆمیتەی داکۆکیکار لە مافو ئازادیەکانی/ هەرێمی کوردستان-عێراق) سەبارەت بە  دەستگیرکراوەکانی هەولێر و …