Home 6 ئەرشیفی بابەتەکان 6 دیمانەی بۆپێشەوەیە لەگەڵ جمال ئەیوب کادری حزبی کۆمۆنیستی کرێکاریی عێراق سەبارەت بە لەشکرکێشی تورکیا و هۆکارەکانی و رۆڵی حزبەکانی بزوتنەوەی کوردایەتی…

دیمانەی بۆپێشەوەیە لەگەڵ جمال ئەیوب کادری حزبی کۆمۆنیستی کرێکاریی عێراق سەبارەت بە لەشکرکێشی تورکیا و هۆکارەکانی و رۆڵی حزبەکانی بزوتنەوەی کوردایەتی…

بۆپێشەوە: بەجیا لەبوونی دەیان بارەگاو بنکەی ئاشکراو نهێنی، سەبازی و هەواڵگری هەردوو ڕژیمی تورکیاو ئێران، ناوە ناوەش هێرشی سەربازی ڕاستەوخۆ یان بۆردومان و تۆپبارانی ناوچە سنورییەکان دەکەن، هۆکاری ئەم لەشکرکێشی و سنور بەزاندنانە چییە؟

جەمال ئەیوب: ئەگەر باس لە هۆکار بکرێت بۆ ئەو پێشێلکاریانە، دیارە هۆکار زۆرن کەدواتر بە خێرایی ئاماژەیان پێدەدەم. بەڵام بە بڕوای من لەهەموو شت زیاتر کە وادەکات ئەو دەوڵەتانە بێشەرمانە و بێپەردە سنوور ببەزێنن، و پێشێلکاری دەرهەق بەخەڵکی ئەو ناوچانە ئەنجام بدەن نەبوونی دەوڵەتێکە لەعێراق.

دەوڵەت بەومانایەی کە خاوەن سەروەری ئاسایشی خۆی بێت، دەوڵەتێ بە پێی یاساو ڕێسا نێو دەوڵەتیەکان بتوانێ لە شەڕو پەلامارو دەستدرێژی پارێزراو بێت.

لەم وڵاتەدا کۆمەڵێک دەستەو تاقم و باندی مافیایی دەسەڵاتیان گرتۆتە دەست، ئەوان خۆیان بەشێکن لەستراتیژیەتی سیاسەتی داگیرکارانەی ئەو وڵاتانە. هەرئێستا لەم وڵاتەدا جگە لەئێران و تورکیا بەو هەموو بنکە و بارەگا نهێنی و ئاشکرایانە کە ئاماژەت پێداوە، هێزەکانی ئەمەریکا، چەکدارانی داعش دەیان هێزو میلیشیای دیکەی سیخوڕی عەشایەری و بەکرێگیراو لە عێراق هەن، جگە لەهێزی دوو حیزبی ناسیونالیستی کوردی کە بەناوی حکومەتی هەرێمەوە لەکوردستان دەسەڵاتی خۆیان بە‌زەبری سەرکووت راگرتووە. دووهێزی بەکرێگیراوی وڵاتانی ناوچەکەن کە خۆیان بەشێکن لەهۆکاری ئەو پێشێلکاریانە.

ڕژێمی فاشیستی تورکیا بەبەهانەی بوونی بارەگاکانی PKK لەوناوچانە، و ڕژێمی سەرکوتگەری ئێرانیش بە بەهانەی جموجۆڵ وچالاکیەکانی پژاک لەو ناوچانە، کە ئەویش حیزبێکە سەر بە پەکەکەیە، پاساو بۆ لەشکرکێشی و پێشێلکاریەکانی خۆیان دەهێننەوە. ڕاستیەکەی نە پەکەکە، وە نە پژاک ئەو دووهێزە نین کە مەترسی جیدیان لەسەر ئەو دەوڵەتانە دانابێت، بەڵکو دوو پاساو و دوو بەهانەن کە ئەو دەوڵەتانە بیانەوێ شەڕی مانەوەی خۆیان لە ناوچەکە و لەبەرانبەر حەریفەکانیان بکەن. دەستدرێژی ئەو وڵاتانە بەتایبەت تورکیا هەر بەناوچە سنوریەکانەوە نەماوەتەوە، بەلکو چۆتە قوڵایی کوردستان.

بەپێی ڕێکەوتنێک کە لەنێوان عێراق و تورکیا ئەنجامدراوە، هەرلایەکیان بۆ پاراستنی سنورەکانی خۆیان لەهەرهێزێکی چەکدار، تا پانزە کیلۆمەتر بەدرێژایی سنور دەتوانن هێزی سەربازی بجوڵینن. بەڵام لە ئێستادا جگە لەشریتی حدودی، تورکیا لەشارەکان دەیان بنکەی جاسوسی سەربازی دامەزراندوە، بەوەش نەوەستاوە لەڕێگەی فرۆکەی بێ فرۆکەوانەوە هەرچێگەیەک بیەوێ دەیکاتە ئامانجی خۆی.

بۆپێشەوە: چ دەوڵەتی تورکیاو چ ڕژێمی ئێران پاساوی هێرش و سنوربەزاندنیان، بوونی هێزە ئۆپۆزیسیۆنی وڵاتەکانیانە، تاچەندە ئەوە ڕاستە و مەبنای هێرشەکانیانە؟

جەمال ئەیوب: من پێم وایە ئەوە پاساوێکی گاڵتەجاڕیانەیە، نە پژاک ئەوهێزە مەترسیدارەیە بۆسەر ئاسایشی سنوری ئێران وە نە پەکەکە ئێستا لەسەر ئەمنیەت و ئاسایشی سنورەکانی تورکیا کاریگەری هەیە، کوشتنی دوو پاسدار و جەندەرمە هۆکاری ئەو دەخاڵەتە سەربازیە نین. ئەگەر پارتی ژیانەوی کوردستان (پژاک) لەناوسنورەکانی ئێرانە لەوێ چالاکی دەکات، بوردومانی گوندو دێهاتەکانی کوردستانی عێراق هیچ پاساوێکی نییە. بەنیسبەت پارتی کرێکارانی کوردستانیشەوە (پەکەکە) تەنها بیانوویەکی ڕووتە، ئەوحیزبە هیچ چالاکیەکی سەربازی لەتورکیا نییە بەساڵیش مەفرەزەیەک لەسنورەکان ناجوڵێنێ. تورکیا کوشتەی ناو هەمانەکەیە شەڕی یەکینەکانی پاراستنی گەل (یەپەگە) لەگەڵ داعش لەسوریا و تێکشکاندنی ئەو هێزە تیرۆریستیە کەدەست و پێی تورکیایە لەعێراق سوریا لیبیا و باقی ناوچەکانی دیکە، تورکیای توڕە کردوە. تورکیا دەیەوێ سەردەمی سەڵتەنە و خەلافەتی چەندسەد ساڵی پێشوی تورکیای مەزن (دەوڵەتی عوسمانی)دروست بکاتەوە.

کاتێک کە ئێران و ئەمەریکا کێشەکانیان لەگەڵ یەکدی لەسەر چەکی ئەتۆمی ئاسایشی کەنداو دەخاڵەتی ڕاستەوخۆ لە عێراق و یەمەن بەحرەین وسوریاو لوبنان قوڵ دەبێتەوە، ئێران پایگا سەربازیەکانی حەشد دەکاتە سەکۆی ناردنی موشەکەکانی خۆی بۆ سەر بنکەسەربازیەکانی ئەمەریکا، ناوچە سنووریەکانی کوردستان دەکاتە هەڕەشە بۆ حکومەتی مەرکەزی. ئەگەر عێراق بییر بکاتەوە لە بەرەی هاوپەیمانەتی دژ بەئەمەریکا بێتەدەر یان ساردی لەبەرانبەر چوونەدەرەوەی هێزەکانی ئەمەریکا لە عێراق بنوێنێ، ئەوا ئێران هەڕەشەکانی بۆسەر عێراق زیاد دەکا. ئەو کارە بۆ تورکیا لێکدانەوە و شیکردنەوەیەکی تری پێویستە. تورکیا دەیەوێت بازنەی نفوزی سیاسی و سەربازی خۆی لە ناوچەی ڕۆژهەلاتی ناوەڕاست گەورە بکاتەوە ،بچووکترین بەهانە ڕەنگە گەورەترین دەخاڵەتی سەربازی بخوڵقێنێ. تورکیا دەیەوێ لە عێراق هەروەک سوریا هێزە سەبازیەکانی جێگیر بکات، بۆئەو کارەش هەم چاوساغ وە هەم یاریدەدەری باشیشی هەیە. تورکیا هەروەک چۆن ڕیڕەوێکی ئاوی لەدەریای ناوەڕاست بۆ دەخاڵەتی خۆی لە لیبیا و سودان کردۆتەوە، هەرواش دەیەوێت پشتێنەیەکی سەربازی لەناوچەکانی کوردستانی سوریا و عێراق بۆخۆی پێک بهێنێت. ئامانجیش لێی وەستانەوەیە لەبەرانبەر هەر ئیدارەیەکی سەربەخۆ و خۆجێیی لەکوردستان، هاوکات فروانکردنەوەی نفوزی سەربازی خۆی لەناوچەکە.

بۆپێشەوە: چ حکومەتی هەرێمی کوردستان و چ حکومەتی بەغدا، کاردانەوەیەکی بەرچاویان لەبەرامبەر بە هێرش و ملهوڕی وڵاتانی ناوچەکە بۆسەر کوردستان نییە، هۆکاری ئەم بێدەنگییەیان چین؟

جەمال ئەیوب: حکومەتی هەرێم و حکومەتی ناوەندی شێوەی دوو کانتۆنی ئیدارەی خۆجێی هەردوو دەوڵەتی تورکیا و ئێرانن، حوکمی عێراق و کوردستان دەکەن. حکومەتی هەرێم یا ڕونتر بڵێم هەردوو حیزبی دەسەڵات لە کوردستان، بەهەزارو یەک پرۆتۆکوڵ وگرێبەستی سەربازی و ئەمنی ئاسایش سیاسی بازرگانی …هتد بە هەردوو دەوڵەتی ئێران و تورکیاوە وابەستەبوونەتەوە.

ئەم دوودەسەڵاتە بۆ مانەوە و درێژەدان بەدەسەڵاتی خۆیان، هەرشتێ کە نەشێ بکرێت دەیکەن. بۆیە جگە لە بووکەڵەیەک لەبەرانبەر ئەو دوو دەوڵەتە هیچی تر نین.

حکومەتی عێراقیش ئەو کانتۆنە گەورەیەی دەسەڵاتی کۆماری ئیسلامی ئێرانە لە عێراق. ئەو حکومەتە هەموو شتێکی بۆنموونە بڕیاری سیاسی، سەربازی، ئەمنی، ئابووری، …هتد لەئێرانەوە وەردەگرێت. ئەو دوو دەسەڵاتە واتە حکومەتی ناوەندی و هەرێم ناتوانن کاردانەوەی جیدی و کاریگەریان بێت لەبەرانبەر ئەو پێشێلکاریانەدا. تەماشای بەیان و لێدوانەکانیان بکەن لەو بارەوە؛ هێندە شەرمنانە و ترسنۆکانە و رێکارانەیە قەشمەریت پێی دێت. بە پێی ئەو ڕێکەوتنە ئەمنیەی کە عێراق و تورکیا مۆریان کردووە ڕێگە بە تورکیا دراوە بێتە ناو خاکی عێراقەوە بۆ ڕاوەدوونانی چەکدارانی پەکەکە. ئەو ڕێکەوتنە لەسەردەمی ڕژێمـی پێشوی عێراق مۆرکراوە و ئێستاش کاری پێدەکرێت . لە ڕیکەوتنەکەدا هاتووە کە تورکیا بۆ ئەو دەخاڵەتگەریە پێویستی بە مەشوەرەتی عێراقیش نییە. ئەوە جگە لەڕێکەوتنە شومەکانی نێوان پارتی (حکومەتی هەرێم) و تورکیا. ئەوەش بەسە بۆ ڕژێمی تورکیا کە نیازە گڵاوەکانی لە ناوچەکە جێبەجێ بکات.

خاڵێکی دیکە کە ئەو دوو لایەنەی بەو کۆیلەیەتیە وابەستە کردووە، بەرژەوەندیە ئابوری و بازرگانیەکانە. بۆنمونە ئاستی ئاڵوگۆری بازرگانی تورکیا و عێراق لە ٢٠٠٣ بۆ ٢٠١٨ گەیشتۆتە ١٠٠ ملیار و ٩٥٦ ملیۆن دۆلار، ئەوە بێ ئاڵوگۆری نەوت لەنێوان هەدردوو وڵات. هەروەها ئاستی ئاڵوگۆی بازرگانی نێوان عێراق و ئێرانیش نزیکەی ٩ ملیاروو ٢٠٠ ملیۆن دۆلار بووە لەهەمان ئەو ساڵانە. بەنیسبەت کوردستانەوە بە وتەی سەرپەرشتیاری کاروباری بازرگانی ئێران موحەمەدی رەزا زادە لە کوردستان، ئێران لە ئێستادا بڕی ئاڵوگۆری بازرگانی لەگەڵ کوردستان بە بڕی ٢٨ ملیارو ٤٨٠ ملیۆن دۆلارە. بە نیسبەت تورکیا و کوردستانیش بەپێی وتەی نێچرڤان بارزانی ئاستی ئەو ئاڵوگۆرە ١٣ ملیار دۆلارە کاردەکرێت کە بۆ ٢٠ ملیار دۆلار لەساڵێک بەرزبکرێتەوە. ئەوداتایانە بۆ پەیوەندی ئاڵوگۆری بازرگانی نێوان دوو وڵات بەتەنها ناتوانن هیچ هۆکارێک بن کە جێگەی ئاماژە بێت، بەڵام کاتێک بۆ کۆمەڵێک باندی بازرگانی و دزو تاڵانکار کە سامان وداهات و هاوردەی ئەو کۆمەڵگەیە بۆ بەڕژەوەندی شەخشی حیزبی خۆیان بەکار بهێنن، ئەوە ئەو داتایانە مانایەکی زۆریان دەبێت نیشانی دەدەن کە ئەم دەسەڵاتانە لە کوردستان و عێراق تا چەند وابەستەن بە بەرژەوەندییە ئابوری وتایبەتیەکانی خۆیانەوە. بۆئەوان ئەوە گرنگترە تا بەزاندنی سنور یا شکانی سەروەری وڵات یا وێرانکردنی ماڵ و حاڵی ئەو خەڵکە.

 

بۆپێشەوە: لە ئەگەری هێرشی سەربازی تورکیا یان ئێران بەشێوەی فراوان بۆ ناو هەرێمی کوردستان، چارەنووسی دەسەڵاتی هەرێم و حکومەت چی بەسەردا دێت؟

جەمال ئەیوب: من پێم وانیە ڕژیمی ئێران و تورکیا هیچ کێشەیەکیان لەگەڵ ئەودەسەڵاتەی هەرێمدا هەبێت.هیچ دەسەڵاتێکی دی هێندەی ئەو دەسەڵاتە ناتوانێ خزمەت بەو ستراتیژە سەربازی و ئەمنیانە بکات کە ئەو دوو دەوڵەتە لە عێراق و کوردستاندا هەیانە. ڕاستە چ ئێران وە چ تورکیا دوو بەرژەوەندی جیاواز لە ناوچەکە تەی دەکەن، بەڵام هەردوولا لەسەر ئەوەی کە لە عێراق و کوردستاندا بەڕێوە دەچێت ناکۆکیەکان نییە. تورکیا عێراقێکی لاواز و بێ سیادەی دەوێت، لە کوردستانیش هاوپەیمانێکی وەک پارتی یا (حکومەتی هەرێم) ی دەوێت. تورکیا بەئەندازەی پێویست هاتۆتە ناو خاکی کوردستانەوە. ئەو لەهەرجێگایەک ئامانجێک شک ببات دەیپێکێت، گرنگ نییە لەهەر جێگایەکی کوردستاندا بێت. بۆ ئێرانیش مەسەلەکە هەروایە، ئێران سەرباری ئەوەی دەسەڵاتێکی دەستەمۆی باشی بۆخۆی لە عێراق دروست کردوە، تەنانەت دەتوانێت لەڕیگەی هێزی نیزامی ئەو دەسەڵاتەی عێراقەوە هەرکارێکی سەربازی لەدژی نەیارەکانی ئەنجام بدات. هەروەک وتم بنکە و بارەگاکانی حەشدی شەعبی سەکۆی هاویشتنی موشەکی ئێرانە بەرەو بنکە سەربازیەکانی ئەمەریکا. کەواتە حیزبووڵڵا دەهێنن بۆناو قوڵایی خاکی عێراق و پەلاماری ئەمەریکای پێدەدەن. بەنیسبەت کوردستانیشەوە تا ئەوکاتەی یەکێتی بالادەستی زوونی سەوزە، ئێران بەجۆرێک حاکمی مەنتەقەکەیە. بەو مەنتقە دەڵێم پێشبینی هیچ پەلامارێکی سەربازی ئەو دوو دەوڵەتە بۆ کوردستان ناکەم تا ئەو جێگەیەی دەسەڵاتی کوردی لەکوردستان خۆیان دابەشبوونی نفوزی هێزی ئەو دووتەرەفەن لە ناوچەکە. بە پێچەوانەوە پەلاماری سەربازی زیاتر ناوچەکە شلۆقتر دەکات و ڕەنگە ڕکێفی ڕووداوەکان پێچەوانەی بەرژەوەندە سیاسی و سەربازیەکانی ئەو دوو وڵاتە بشکێتەوە. بۆیە بۆئەوان درێژەدان بە حاڵی مەوجوود باشترین شتێکە کە دەستی پێوەبگیرێت.

بۆپێشەوە: ڕۆڵی پارتی ویەکێتی، لەهێرشی وڵاتانی ناوچەکە بۆسەر کوردستان چۆن دەبینن؟

جەمال ئەیوب: بەداخەوە پارتی و یەکێتی ڕۆڵی یەکجار نەرێنیان لەو سیناریۆیەدا هەیە؛ ئەوان خۆیان گرفتێکی گەورەی نێو کێشەکەن، ئەوان بەشێکی ئەسڵی ئەو کارەساتەن کە لەئاکامی دەخاڵەتی سەربازی ئەو دوو دەوڵەتەدا خەڵکی کوردستان ڕووبەڕووی بوونەتەوە. پارتی و یەکێتی زیاتر وەک دوو هێزی بەکرێگیراو لەو نێوەدا ڕۆڵ دەگێڕن، وەک لەوەی دوو حیزبی دەسەڵاتدار کە بەرپرسیارەتی ئەمن و ئاسایشی خەڵکی هەرێمەکەیان لەئەستۆدا بێت! ئەوان لەپێناو مانەوەی دەسەڵاتی خۆیان ئامادەی لەوەزیاتر و زیاتر هەن کە پێیان بسپێردرێت! هەندێکجار ئاستی هاوکاری و یارمەتیان دەچێتە ئاستی بەشداری سەربازی و چاوساغیکردن لە راوەدوونانی نەیارانی ئەو دوو دەوڵەتە. ئەگەر سەرنج بدەین هەردوو ڕژێمی تورکیا و ئێران لە ئێستادا خەریکن لەو هێزو میلیشیا چەکدارانە سوود وەرگرن کە ڕوی تێدەکەن. ئێران ئیستیفادە لە حەشد و حیزبوڵاو حوسیەکان و حەماس دەکات، تورکیاش سوود لە داعش و بەرەی نوسرەو هێزە تێکشکاوەکانی دوای داعش لە سوریاو مورتەزەقەکانی لیبیا دەبینێت. من بە دووری نازانم ئەو ستراتیژەی ئەو دوو دەوڵەتە لە عێراق و کوردستان بەو ڕەوتەدا نەڕوات. هەرئێستا پارتی و یەکێتی خەریکە وەک دوو هێزی مورتەزەق جاش بەکرێگیراو دەکەونە پێش سوپای ئەودوو وڵاتەوە، شەڕی پەنا تاشەبەردەکانی کوردستان بۆ ئەو دەوڵەتانە بکەن.

 

بۆپێشەوە: خەڵکی کوردستان لەبەرامبەر بە هێرش و ملهوڕی وڵاتانی ناوچەکە دەبێ چی بکەن؟ و چ ئەرکێکیان دەکەوێتە ئەستۆ؟

جەمال ئەیوب: ئەرکی خەڵکی کوردستان بە بڕوای من دەبێت بە لەلابردنی دەسەڵاتی ئەو دوو حیزبە لەکوردستانەوە دەست پێبکات.

خەلکی کوردستان سەرەتا دەبێت ئەو زەمینە و هۆکارانە لەبەین ببەن کە ڕێگەیداوە بەو ڕژێمانە بە ئارەزووی خۆیان بای باڵی خۆیان بدەن، و دەخاڵەتی سیاسی و ئەمنی وجاسوسی و سەربازی لەکوردستاندا بکەن.

هەڵوەشاندنەوەی تەوای ئەو ڕێکەوتنە ئەمنی و سەربازیانەی کە حکومەتی مەرکەزی لەلایەک، وە هەردوو حیزبی دەسەڵاتدار لە کوردستان لەلایەکی دیکە بۆ ڕێگە پێدان بە هاتنی ئەو هێزانە بۆ ناو قوڵایی خاکی کوردستان ئەنجامیان داوە دەبێت دەست بەجێ هەڵوەشێتەوە.

لە کوردستانیشدا من پێم وایە تا ئەو دوو حیزبە لەدەسەڵاتدا بن مومکین نییە دەخاڵەتی سەربازی ئەو دەوڵەتانە بۆ کوردستان کۆتایی پێبێت، بۆیە دەسەڵاتی ئەو دوو حیزبە هەرچی زووتر کۆتایی پیبێت خەڵکی کوردستان هەنگاوێک لەبەدی هێنانی ئەو ئامانجە نزیکتر دەبنەوە.

ڕاستە خەڵکی کوردستان دەبێت بەدەنگ بێن و لەبەرامبەر ئەو داگیرکارییە بوەستنەوە. بەڵام ئەگەر بیهێنینە پێش چاو ئەو کارە زۆر جار کراوە و سەرەنجامێکی ئەرێنی و موسبەتی وای نەبووە کە بەئامانجی خۆی بگات، چونکە ئەو حیزبانە هیچ گوێیەکیان لە خواستی خەڵک نییە خەباتی مەدەنی ناڕەزایەتی خەڵکی لایان حیسابی پۆشێکشی بۆناکرێت! هۆکەشی ئاشکرایە چونکە ئەو دوو حیزبە بە هیچ جۆرێک لەگەڵ خەباتی مەدەنی ژیانی شارستانیەتی کۆمەڵگەدا جووت نایەنەوە. تا ئەو جێگەیەی حکومەتی عێراق خۆی بەڕێکەوتنی ڕەسمی، و هەردوو حیزبی دەسەڵات لە کوردستان بە ڕێکەوتن لەگەڵ ئەو هێزەداگیرکاریانە ڕێگە بەو داگیرکاریە بدەن، ئاستەمە بەوجۆرە لە خەبات و ناڕەزایەتی بەر بەو داگیرکاریە بگیرێت. تەنانەت پروتۆستۆکردنشی لەلایەن حکومەتی عێراق و حیزبە کوردیەکانەوە گاڵتەکردنە بە خەڵکی.

بۆپێشەوە: هێزە بەناو ئۆپۆزیسیۆنەکانی هەرێم، هەڵوێستیان لەبەرامبەر لەشکرکێشی و ملهوڕی وڵاتانی ناوچەکە چۆنە؟

جەمال ئەیوب: ئەگەر مەبەست لە ناوی بەناو ئۆپۆزیسیۆن، ئەو هێزانە بێت کەشەریکە دزو شەریکە تەشریع کردنی دزی و سەرکوتگەریەکانی دووحیزبی دەسەڵاتن لە پەرلەمان، و کورسیەک یازدە کورسی یا زیاتریان هەیە، ئەوانە هیچیان ناچنە خانەی ئۆپزسیۆن بوونەوە. ئەوانە کۆمەڵیک حیزب و دەستەوتاقمی پارەخۆرو شەریکە دەسەڵاتن. ئەوانە لەبەرانبەر پارە و بودجەی حیزب وموچەی ئەندامانی پەرلەمانتارەکانیان و ئەو نەسریە و حەوافزانەی وەریدەگرن لەهەموو سیاسەت و نەهامەتیەکی ئەو خەڵکە بەرپرسیارن. ئۆپۆزیسیۆنێک کە هەبێت دەنگی ناڕەزایەتی خەڵک و ئەو حیزب و ڕیکخراوانەن کە لە سەنگەری نارەزایەتیەکانی خەڵکی وەستاون، لەبەرانبەر ستەم و بێعەدالەتی دەنگ هەڵدەبڕن، لەگەڵ خەبات و بزووتنەوە ناڕەزایەتییەکانی خەڵکی لەریزی پێشەوەی سەنگەر وەستاون، بەرنامە و پلاتفۆرمی ڕزگاربوون لەو هەلومەرجە دەخەنە بەردەم خەباتی خەڵکی کوردستان ….. ئەوانە دەکرێت بچنە خانەی ئۆپۆزیسێۆن بوونەوە. حیزبی کۆمۆنیستی کرێکاری عێراق و باقی ئەو ڕەوت و ڕێکخراوە سیاسی جەماوەرییانەی لەو ڕاستایەدا وەستاون بریتین لە هێزی ئۆپوزیسیۆنی کوردستان.

پلاتفۆرمی لابردنی دەسەڵاتی ئەو حیزبانە و بەشداری خەڵک لەچارەنووسی سیاسی و ئەمنی و ئابووری و کۆمەڵایەتی خۆیان، تەنها ڕێگە و هەڵوێستی سیاسی یە بۆ دەرباز بوون لەو هەلومەرجە.

About hkkk

Check Also

دووڕوویی سەرانی یەکێتی له ‌رۆژی جیهانی دژی توندوتیژیدا! …

دەشتی جەمال دوێنی بەبۆنەی ٢٥ی نۆڤەمبەر ڕۆژی جیهانی بەرەنگاربوونه‌وه‌ی توندوتیژی لەدژی ژنان، سەرانی یەکێتی نیشتیمانی کوردستان و هاوسەرۆكانی لەنمایشێکی ڕیاکاری و گاڵتەجاڕانەدا کەوتنە …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *