Home 6 ئەرشیفی بابەتەکان 6 کوردستان پێویستی بە کۆمۆنیزمە …

کوردستان پێویستی بە کۆمۆنیزمە …

ابراهیم حسێن

هیچ کاتێک ئەوەندەی ئێستا ژیانی سادەی مرۆڤ لەژێر دەسەڵاتی سەرمایە و بۆرژوازی لە کوردستان نەکەوتۆتە وەها تەنگانەیەکی قووڵ وسەرتاپاگیرەوە. پارێزراونەبوونی گیانی مرۆڤ، نەبوونی سیستەمێکی تەندروستی ودابین نەبوونی هیچ جۆرە بیمەیەکی تەندروستی کۆمەڵایەتی،  نەبوونی سیستەمێکی پەروەردەو فێرکردن وقەیرانی  قووڵ وهەمەلایەنەی ژیانی فەرهەنگی و زانستی، وێرانی و داڕوخاوی بواری خزمەتگوزاریە سەرەتاکانی وەک ئاوو کارەبا، کێشەی کارو نان وژیانی سادە، نەبوونی ئازادی ونەبوونی هیچ ئاسایشێکی سادەی ئابوری وسیاسی. سەرجەم ئەمانە سیمای هەمووڕۆژەی ئەو ڕەزالەتەیە کە لە کوردستانی ژێر سایەی دەسەڵاتی سەرمایەو بۆرژوازی و حیزبە سیاسەکانی لە ناسیۆنالیستیەکەیەوە تائیسلامیەکەی، لە حزبە بچووکەکانی  ئۆپۆزیسیۆنیەوە تا گەورەو حاکمەکەی، ناویان لێناوە ژیان.

کۆمەڵگەیەکی وێڵ کراوی ژێردەسەڵاتی کۆمەڵە حیزبێکی بۆرژوا، کە بە زۆری چەک ومیلیشیا خەریکی پاسەوانی کردنن لەوحەوشە بێ دەرگاوپەنجەرەیەی کاری هەرزان وکەڵەکەی سەرمایە، دەسەڵاتی کەمایەتیەکی میلیاردێری خاوەن سەرمایە کە ئامادە نیە و ناتوانێ وەڵام بە لانی کەمی ژیان وگوزەرانی کرێکاران و بێبەشانی کۆمەڵگە بداتەوە. ئامادەیە جوڵانەوەی کرێکاری و بێبەشان بۆ لانی کەمی ژیان بە توندوتیژی وسەرکوت وەڵام بداتەوە. قوتی دەمیان، کرێ وموچەی کاری لێشاوێک لە کرێکارو مامۆستاو دکتۆرو پەرەستارو فەرمانبەر کە بە هۆیەوە کۆمەڵگە بە پێوە ڕاوەستاوە بە بارمتە بگرێ. بەڵام لە بەرامبەر ملهوڕی سوپای دەوڵاتانی هاوچینەکانیان بۆسەر شوێنی ژیان و کاری هاوڵاتیانێک کە ڕۆژ تا ئێوارە ڕەنج دەدەن، دەنگیان لێوەنایەت وبێدەست وپل و هیچ لە دەست نەهاتوون.

کەمتر لەمێژوودا وا ڕێک کەوتووە کۆمەڵگەیەک بەوشێوەیە؛ هەمووجۆرە ئاسایشێکی سیاسی وئابووری و کۆمەڵایەتی لێ زەوت کرابێت.

بورژوازی کورد بۆماوەی نزیک بە ٣٠ساڵە توانیویەتی حاکمیەتی خۆی وەک پاسەوانی نەوت وگرێبەستە خەیاڵیەکان و دابین کردنی بازاڕێکی بێ حیساب وکتاب بۆکەڵەکەی سەرمایە لەهەلومەرجی شێواوی ڕاگوزەری سیاسیدا، و لە دڵی بێ نەزمی وفەوزاو یەکلانەبوونەوەی مەسەلەی دەسەڵاتی دەوڵەت و بەقیمەتی سەپاندنی یەکێک لەناهەموارترین هەلومەرجە سیاسی و کۆمەڵایەتیەکان بەسەر چینی کرێکاروکۆمەڵگە درێژە پێ بدات.

بۆرژوازی کوردو دەسەڵاتەکەی وەک قەوارەیەکی سیاسی میلیشیایی و بازرگان، کەتەنیا ئەرکی پاراستنی سەرمایە وکۆمپانیا گەورەکانی نەوت بووە، سەردەمی تەواوبووە و هیچ شەرعیەتێکی نەماوە. ئیتر خۆری سەردەمی زێڕینی ئەوقەڵەمڕەوەی دەسەڵاتی دیفاکتۆی بۆرژوازی کورد لەم فۆرمەی ئێستایدا بێ کەڵک و ماوە بەسەرچووە. لەشکرکێشی و بۆردومانی ڕۆژانەی سوپای دەوڵەتەکەی ئۆردۆگان،  وگەڕانەوەی سوپای عێراق و هەڵواسران وڕاوەستانی تەواوی ژیانی ئابوری وئیداری و بێ ئەرک بوونی تەواوی دام و دەزگا فەرمیەکانی وەک پەرلەمان و دادگا و دەسەڵاتی بورژوازی کورد، بەڵگەی دەستبەرداربوونی ئە م دەوروودوکانەیە.

ئیتر چارەنووسی سیاسی کۆمەڵگەی کوردستان و هەڵبژاردەی ئەوکۆمەڵگەیە لەپەیوەند بە چارەنوس و ئایندەی سیاسی خۆی و مەسەلەی ئازادی و ئاسایش لێڵ ونادیارە. بۆرژوازی کورد وەڵامێکی تری پێ نیە جگە لە درێژکردنەوەی ئەو هەلومەرجە تائەوپەڕی خۆی، ودرێژەدان بە پاسەوانی کردن لە دەسەڵاتی خۆی، وخۆ ئامادەکردن بۆ یەک کاسەکردنەوەیی زیاتری دەسەڵات لەگەڵ بۆرژازی لە عێراق.

ئەم سیناریۆیەو ئەم دوورنمایە، درەنگ یا زوو خەریکە ڕوودەدات. هەلومەرج و پێداویستیەکانی ئەم هاوکاسەبوون و ئەم تێکەڵبوونە سیاسی وئابووریە لە قاڵبی بازاڕو دەوڵەتێکی یەک پارچە تروبەهێزتری بۆرژوازی کامەیە؟ لە دڵی چ ڕەوەندگەلێکدا ئەم مەسەلەیە یەکلادەبێتەوە ؟ هەرئێستا دە کرێ ببینرێ.

بەڵام ئایا کۆمەڵگەی کوردستان، چینی کرێکارو جەماوەری زەحمەتکێش وبێبەش ئامادەن چارەنوسی خۆیان بەم سیناریۆیانەی بورژوازی بسپێرن و ژیان وئایندەی خۆیان، ئازادی و خۆشبەختیان بە گەزی بەرژەوەندیەکان و سیاسەتی ئەم کەمایەتیە سەرمایەدارەی کوردایەتی و حیزبە سیاسیەکانی بپێون؟

کۆمەڵگەی کورستان، چینی کرێکارو بێ بەشانی کۆمەڵگە، ڕێگایەکی تر، ئاسۆیەکی کۆمەڵایەتی و ئاڵایەکی تری ڕادیکاڵی سیاسیان بۆ بەرگری لەخۆ، بۆشەڕکردن لە پێناو دەرهێنانی تەواوی هەڵبژاردەی ژیان وگوزەران و ئازادی وخۆشبەختیان لەدەستی بۆرژوازی ودەسەڵاتەکەی، و بە دەستەوە گرتنی هەڵبژاردنی چارەنووسی خۆیان لەبەردەستە. ئەم کۆمەڵگەیە کۆمۆنیزمێکی ڕادیکاڵ و یەکسانیخوازی کرێکاریی هەیە، کە هەرلەسەرەتاوە تائێستا ئاڵای (نا) ی بە دەسەڵاتی بورژوازی، بە دەسەڵاتی ئەو کەمایەتیە سەرمایەدارە، بە کوردایەتی و ناوەڕۆکە کۆنەپەرست و دژی ئازادیەکەی، بە چارەنووسێک کە بۆرژوازی دەیەویست بیکاتە بەشی کرێکاران و بێبەشان بەرزکردۆتەوە. چینی کرێکارو بێبەشانی کۆمەڵگەی کوردستان هێزێکی سیاسی، کۆمۆنیزمێکی ڕادیکاڵی هەیە کەسەرباری هەمووئاستەنگیەکانی، سەرباری هەموو گوشارو توندوتیژی و سەرکوتێک، سەرباری هەڵبەستنی بێ ئەوپەڕی درۆ کە لەدژی بەکارهات، خۆی ڕادەستنەکرد! سازشی نە کردو نەچەمایەوە، بۆ یەک ڕۆژ لە( نا )ی خۆی بە دەسەڵاتی ئەم کەمایەتیە سەرمایەدارە، بە دەسەڵاتی بۆرژوازی کورد بە سەرجەم حیزبەکانیەوە لە ناسیوناڵیستیەوە بۆ ئیسلامیەکەی بە پەرلەمان و میلیشیایەوە، نەهاتە خوارەوە.

کۆمەڵگەو چینی کرێکارلە کوردستان کۆمۆنیزمێکی هەیە کە هەرلەسەرەتاوە بەرلەوەی بورژوازی کورد لە دڵی سەرگەردانیەکی سیاسی کە بەسەرکوردستاندا سەپێنرا، بکرێتە کوێخا،لە ڕێگەی شێوازی بەڕێوەبردنی شورایی و جوڵانەوەی شورایی لە ڕێگەی پێکهێنانی ڕێکخراوە جەماوەریە ڕادیکاڵەکان وپێکهێنانی حیزبی سیاسی وڕیزی سیاسی وچینایەتی سەربەخۆوە، هاتە مەیدانی جەنگی سەپاندنی ئازادی وخۆشگوزەرانی و گێڕانەوەی هەڵبژاردەی چارەنووسی سیاسی و ئابوری کۆمەڵگە وبەڕێوەبردنی بۆدەستی کرێکاران وکۆمەڵگەخۆی.

ئەم کۆمۆنیزمە پێویستیەکی گرنگ و سەرمایەیەکی گەورەی ‌سیاسی کۆمەڵگەیە بۆ ڕزگاری و گێڕانەوەی ئیرادە بۆ ئینسانەکان، بۆ خۆشبەختی و پرسی ئازادی و یەکسانی. مەسەلەی سوێندخواردن و پابەندی عیرفانی وسۆفیانەو ئەخلاقی نیە؛ بەڵکو پڕۆسەیەکی سیاسی و واقیعیە و جێبەجێ بوونی لە دنیای واقیعدا لە گرەوی بەدەستەوەگرتنی دەسەڵات و هێزی کۆمۆنیزمدایە وە ک جوڵانەوەیەکی واقیعی کۆمەڵایەتی وڕیشەدار لە کۆمەڵگە ، کە کێشەی لەگەڵ ڕیشەی چەوسانەوەدا هەیە، و دەبێ بەناچاری بۆ ڕزگاری خۆی هەموو کۆمەڵگە ڕزگاربکات. بۆ ئەوەی ئەو کارەبکات دەبێت دەست بەرێ بۆ ڕیشەی کێشەکان، ڕیشەی چەوسانەوە، ڕیشەی ماددی، نەبوونی ئازادی، بۆ ڕیشەی  نەبوونی  یەکسانی و خۆشبەختی.

جوڵانەوەی کۆمۆنیستی کرێکاری تەنیا ڕوویەکی کێوێکی گەورەی کۆمەڵایەتیە لە قوڵایی کۆمەڵگەدا کە خەون بەئازادی وخۆشبەختیەوە دەبینێت و لەهەر دەرفەتێکدا کە لەبەردەمیدا بکرێتەوە ناچارە کۆمۆنیزمی خۆی لە خەبات بۆ ئازادی وخۆشبەختی و بۆسەرکەوتن لە وجەنگەدا هەڵبژێرێت.

٧ی تەموزی٢٠٢٠

About hkkk

Check Also

دوو پارتی  سیاسی لە ئەڵمانیاو کەنەدا پشتیوانی خۆیان  بۆ ناڕەزایەتیەکانی خەڵکی کوردستان دەردەبڕن …

لەدریژەی کەمپەینی ڕێکخراوی دەرەوەی حزبی کۆمۆنیستی کرێکاریی کوردستادا بۆ بەدەستهێنانی پشتیوانی لەناڕەزایەتی خەڵکی کوردستان و …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *