ڕۆژی سێ شهممە ڕێکەوتی ٢١ی کانونی دووەمی ٢٠٢٥، پەرلەمانی عێراق لەسەر بنەمای ڕێکەوتن و ساتوسەودایەکی سیاسی پێشتری نێوان لایەنە ئیسلامیە شیعە و سوننە و ناسیۆنالیستە کوردەکاندا، (٣) یاسای جیاوازی پێکەوە لەناو ناڕەزایەتی بەشێكی بەرچاو لە ئەندام پەرلەمانەکان و بەپێچەوانەی شێوازە باوەکانی دەنگدانەوە، پەسەندکرد و تێپەڕاند. ئەو یاسایانەی کە لەم بەندوبەستەی لایەنە قەومی و مەزهەبیەکانەوە داسەپێندران، بریتی بوون لە هەموارکردنەوەی یاسای باری کەسێتی ژمارە ١٨٨ی ساڵی ١٩٥٩، بەپێی مەزهەبەکانی سوننە و شیعەی جەعفەری، لەلایەن کوتلەی پەرلەمانی شیعەکان و یاسای لێبوردنی گشتی، لەلایەن سوننیەکانەوە، لەگەڵ یاسای گەڕانەوەی ئەو موڵکانەی لەسەردەمی رژێمی بەعسدا دەستی بەسەردا گیرابوو لەلایەن ئەندام پەرلەمانە کوردەکانەوە، پێشنیارکرابوو.
بێگومان پێکەوە دەنگدان لەسەر (٣) ی یاسای جیاواز و تێپەڕاندنی بەوجۆرەی کە ڕێکەوتنی لەسەرکرابوو، دەرخەری جەوهەری کۆنەپەرستی و داڕزیوی سەراپا سیستەمێکی فیدراڵی_قەومی لە عێراقدا، دەخاتەبەرچاو کە لەسەر بنەمای بەرژەوەندیە سیاسیەکانی دەستەوتاقمی قەومی و ئاینی و تیرەگەری دامەزراوە، کە نەک هەر هیچ جێگایەک بۆ مافی هاوڵاتیبوونی یەکسان، دادپەروەری، لە کەمترین ئاستیدا ناهێڵێتەوە، بەڵکو لەبنەوە، مانای لەئارادابوونی پەرلەمان و سیستەمی دیموکراسی و دەنگدانی هاوڵاتی، لە هەرە ئاستی نزمی خۆیدا لە عێراقدا دەخاتە ژێر پێی سەرانی بەرژەوەندیخواز و فاسدی عەمامە بەسەر و مەلا و نەتەوەچییەکانی لایەنە ئیسلامی و قەومیەکانەوە، کە تائێستا کارنامە و مێژوویەکی پڕ لە گەندەڵی و تاوانکارییان دەرهەق بە خەڵکی عێراق و کوردستان تێپەڕاندووە. خودی ئەوەی کە لەم سەودا و ڕێکەوتنەی ئەم دەستەوتاقمانەدا، لاقەکردنی کچانی (٩) ساڵ، لەڕێگای پەرلەمانەوە دەکرێت بەیاسا و دەستدرێژی سێکسی بۆ سەر کچانی مناڵ شەرعیەت پێدەدات، لە ڕوانگەی ئێمە و خەڵکی ئازادیخواز و ژنان و بەرەی ناڕازییانی کۆمەڵگهوە، ئهو پهرلهمانه جگه له دهزگایهكی بێبهها و ناشهرعی هیچی تر نییه. ئیتر ئهو ڕاستیه دهركهوتووه كه خودی پەرلەمان کە گوایە ئهنجومهنی “نوینەرانی خەڵکە” ئامرازێکه به دەست دەستەوتاقمێکی کۆنەپەرستهوه، کە ئامادەن بۆ گەیشتن بە بەرژهوەندیەکانی خۆیان و سەپاندنی باوەڕ و سیاسەتی دژەژنی و دژە ئینسانییان، کۆمەڵگه بەرەو دواوە ڕاپێچ بكەن و لە بێڕەوشتی و فەساد و کۆنەپەرستیدا نوقمی بکەن.
ئەوەی کە ئهندام پهرلهمانه كوردهكانی حزبە ناسیۆنالیست و ئیسلامیهكان لەناو پەرلەمان، دەنگیان بەو یاسایانە داوە، شانازی بەوەوە دەکەن کە توانیویانە مافێکی مێژوویی بۆ ئەو هاوڵاتیە کوردانە بگێڕنەوە کە لەسەردەمی بەعسدا ماڵوموڵکیان داگیرکراوە. بەڵام بەو کارەیان گەورەترین تاوانیان بەرامبەر بە کچانی مناڵی عێراق ئەنجامداوە و دەبێ بکەونە بەر نەفرەتی خەڵکی ئازادیخوازی کوردستان. دەبێ ئەو ئەندام پەرلەمانانەی دەنگیان بەو یاسا دڕندانە و نامرۆڤانەیە داوە، لەهەر جێگایەك ببینرێن، وەکو تاوانبارێکی مناڵبازی خەتەرناك تەماشا و ڕیسوا بکرێن.
ئەم ساتوسەودا قێزەونە لەسەر ژیان و کەرامەتی خەڵکی عێراق و ژنان و مناڵانی کچی عێراق دەبێ ریسوا بکرێ. دەبێ پەرلەمانی عێراق و هەموو ئەو هێزانەی لەپشتی دەرکردنی ئەم یاسا قێزەونەوە ڕاوەستاون و بەرگری لێدەکەن، بکەونە بەر نەفرەتی خەڵکی ئازادیخوازی کوردستان و عێراق. دەبێ نارەزایەتیەکانی ژنان و پیاوانی ئازادیخوازی کوردستان و عێراق، لە ماوەی ٤ مانگی ڕابردوودا دژ بە هەوڵەکانی تێپەڕاندنی ئەم یاسا داڕزیوەی دەستدرێژیکردنە سەر کچانی مناڵ و سەپاندنی یاسا دینی و مەزهەبیەکان بەسەر ژناندا لە پرۆسەی هاوسەرگیریدا، لە چەندین شاری کوردستان و عێراق، كه توانی تێپەڕاندنی ئەم دەستدرێژیە بۆ سەر جەستە و کەرامەت و مافەکانی مناڵانی کچ بەتایبەتی و ژنان بەگشتی دوابخات، ئێستا بە گوڕوتینێکی گەورەتر و فراوانترەوە بێتەوە مەیدانی شارەکانی کوردستان و عێراق. دەبێ ئەم سوکایەتی و دەستدرێژیە بۆ سەر ژنان و کچانی مناڵ دەستبەجێ بوەستێنرێت! پێویستە لە ئاستی رێکخراوەکانی ژنان و بەرگری لە مافەکانی مناڵان و سەرجەم رێکخراو و کەسایەتی ئازادیخوازی دنیا جوڵەیەکی گەورە و کاریگەر دروستبکرێ تا پەرلەمانی عێراق و دەزگای دادوەری عێراق ناچار بە پاشەکشە و هەڵوەشاندنەوەی ئەم بەناو یاسا قێزەون و داڕزیوە بکەین.
حزبی کۆمۆنیستی کرێکاریی کوردستان
٢٦ی کانونی دووەم/٢٠٢٥