هەڕەشەکانی مەسعود بارزانی لە حکومەتی عێراق و واژۆکردنی گرێبەستی حکومەتی هەرێم لەگەڵ دوو کۆمپانیای ئەمریکی

گفتوگۆ لەگەڵ خەسرەو سایە سەرۆکی مەکتەبی سیاسی دەربارەی هەڕەشەکانی مەسعود بارزانی لە حکومەتی عێراق و واژۆکردنی گرێبەستی حکومەتی هەرێم لەگەڵ دوو کۆمپانیای ئەمریکی بۆ وەبەرهێنان لە بواری گازی هەرێمی کوردستاندا

ئۆکتۆبەر: دوای چەندڕۆژێک لەهەڕەشەکانی مەسعود بەرزانی لەدەسەڵاتدارانی بەغدا، سەرۆکی ئەنجومەنی وەزیرانی حکومەتی هەرێم، مەسروربەرزانی، سەردانی ئەمریکای کرد و لەگەڵ دوو کۆمپانیای ئەمریکی، واژۆی گرێبەستێکی ١١٠ ملیار دۆلاری لەبواری وەبەرهێنانی ووزەو گازی سروشتی هەرێمی کوردستان ڕاگەیاند. تاچەند پێتان وایە هەڕەشەکانی مەسعود بەرزانی وواژۆکردنی گرێبەستێکی لەو جۆرە پەیوەندیان پێکەوە هەیبێت؟ بۆچی لەئیستادا پارتی وحکومەتەکەی دەست بۆ هەڕەشەو واژۆکردنی گریبەستێکی لەم جۆرە بەبێ گەڕانەوە بۆ بەغدا دەبات، لێکدانەوەی ئێوەچیە؟

خەسرەو سایە: ئەگەر هەردوک ئەم هەنگاوەی پارتی لەچوارچێوەی دۆخی ناوچەکەو ئەو کێشانەی کە ساڵانێکە لەنیوان هەرێم و بەغدادا هەیە، دابنێن، ئەوا بەدڵناییەوە پێکەوە پەیوەست دەبن. بەدەربرینێکی تر دەکرێ بڵێم کە هەم هەڕەشەکانی مەسعود بەرزانی و هەم ڕاگەیاندنی واژۆی گرێبەستەکەی وزەو گازی هەرێم، دوو ئاماژەن بۆ دەرکەوتنی سەرەتاکانی ئەو گۆڕانکاریانەی کە لە هاوکێشەی هێزدا لەعێراق و لەبەڕڕۆشنایی دۆخی ناوچەکە، ماوەیەکە بۆتە جێگای مشتومڕی ناوەندە سیاسیەکان. بەڵام بۆ وەڵامی ئەو بەشە لەپرسیارەکە کە دەڵێت: بۆچی لەئێستادا پارتی و حکومەتەکەی هەم بەزمانی هەڕەشە دەدوێ و هەم بەبێ پرسی حکومەتی عیراق گرێبەست واژۆدەکات؟، بەپێویستی دەزانم لەسەر دوخاڵی سەرەکی ڕاوەستم:

یەکەمیان: بەشێوەیەکی گشتی ڕووداوەکانی سوریاو شەڕی ئیسرائیل و ئەمریکا و هاوپەیمانەکانی لە غەززە کە لەئەنجامدا بەشکستێک بۆ ئێران و هەموو ئەو دەستەوتاقمانەی بەناوی “بەرەی مقاوەمەت”ەوە لەناوچەکەدا ڕۆڵیان دەگێرا، گەیشت، پێگەی هێزە شیعەکان و خودی حکومەتەکەی سودانی، لەرزاندووە و بۆتە مایەی سەرهەڵدانی مشتومڕ و کۆمەڵیک ناکۆکی لەسەر چۆنیەتی تێپەڕکردنی دۆخی ئێستای عێراق و ئایندەی ئەو سیستەمە سیاسی و حکومەتیەی کە ساڵانێکە لایەنە شیعەکان بەدەخاڵەت و پشتیوانی ئێران و هێزە میلیشیاییەکانیان، هاوسەنگی هێزی بەقازانجی حکومەتی مەرکەزی بەرامبەر پارتی و ئەحزابی ناسیونالیستی کورد ڕێکخستبوو، لەئێستادا بەزیانی لایەنە شیعەکان کەوتۆتەوە و ملی ناوە بەگۆڕانکاری لەم هاوسەنگیەی هاوکێشەی هێزەکاندا. بەپێچەوانەشەوە ڕووداوەکانی سوریا و ناوچەکە و مەسەلەی چەکدانان و خۆهەڵوەشانەوەی پەکەکە و پێگەیەک کە هێزەکانی هەسەدە بەدەستی هێناوە، وەک ئەوەی کە مەسەلەی کورد و حزبە ناسیونالیستەکانی کرۆدتە جێگای سەرنج و چاوتێبڕینی ئەمریکاو دەوڵەتانی ڕۆژئاواو خودی ئیسرائیلیش تا وەک کارتێکی سیاسی بۆ ڕیکخستنەوەی ناوچەکە بەدەستیەوە بگرن. پێگەی پارتی وحکومەتەکەی لەبەرامبەر حکومەتی عێراقی و لایەنە شیعەکاندا بەرەوسەرەوە بردووە. جەولە دیبلۆماسیەکانی سەرۆکی هەرێم، بۆ ئەلمانیا و فەرەنساو تورکیا و ولاتانی کەنداو، تا دەرکەوتنی پارتی وەک لایەنێک بۆ یەکخستنی هێزە کوردیەکانی سوریا و ڕۆڵی حکومەتی هەرێم لە هاوکاریکردنی تورکیادا بۆ جێبەجێکردنی پڕۆسەی چەکدانانی پەکەکا، تا داواکەی مایک پۆمیۆ، وەزیری دەرەوەی پێشوی ئەمریکا، بۆ پشتیوانیکردنی هەرێم.. هەموویان ئەم پێگەیەی پارتی و حکومەتەکەی بەرجەستە دەکەنەوە، لەبەرامبەر بەغددا.

دووەمیان:  مەسەلەی لەئارادابوونی هەڵبژاردنەوەی پەرلەمانی عێراقە، کە هەم حکومەتەکەی سودانی خستۆتە حاڵەتێکی کاتیەوەو هەم لایەنە شیعەکانی خسۆتە بەردەم دڵەڕاوکێ و چاوەڕوانییەوە و نایانەوێت ڕاستەوخۆ بکەونە بەرامبەر پارتی و حیزبە ناسیونالسیتە کوردەکانەوە، چونکە دەزانن لە پێکێهنانەوەی هاوپەیمانێتی و ڕێکەوتنەکانی داهاتوودا بۆ بەدەستهێنانەوەی پێگەی خۆیان پێویستیان پێیەتی. ئەمەش دیسانەوە هاوکێشەی هێزی بەگشتی لەبەردەم گۆڕانکاریدا داناوە… هەموو ئەمانەش وایان کردووە کە پارتی هەم زمانی هەڕەشە بگرێتەبەر وهەم بەبێ گەرانەوە بۆ بەغدا واژۆی گرێبەستەکانی لەئەمریکا بکات. واتە پارتی دۆخەکەی خوێندۆتەوەو دەزانێت کەهەم حکومەتی عێراق و هەم لایەنە شیعەکان لەو پێگەیەدا نین کەبتوانن وەک پێشوتر مامەڵە بکەن و فشاری زیاتر لەسەر پارتی و حکومەتی هەرێم دابنێن.

ئۆکتۆبەر: وەزارەتی دەرەوەی ئەمریکا لە ڕاگەیاندراوێکدا پێشوازیی لەگرێبەستەکرد، پرسیارەکە ئەوەیە کەبۆ ئەم گرێبەستە لەئەمریکا کراوە؟ ئایا هێج پەیوەندیەکی بەسەردانەکەی ترامپ بۆ ڕۆژهەلاتی ناوەڕاستەوە هەیەو دەچێتە چوارچێوەی ئەو گرێبەستە ئابوری و بازرگانیانەوە کە ترامپ لەگەڵ سعودیەو ولاتانی کەنداودا بەستویەتی؟ یاخود جۆرێکە لە فشاری سیاسی ئەمریکا بۆسەر حکومەتی ناوەندی؟

خەسرەو سایە: بەدڵنیایەوە ئەو گرێبەستەی کە مەسرور بارزانی لەگەڵ کۆمپانیا ئەمریکیەکاندا بەوجۆرەی کە واژۆی کردوە هەم فشارە لەسەر حکومەتی عیراق وهەم یەکێکە لەدەرهاویشتەکانی سەردانەکەی ترامپ بۆ ڕۆژهەڵاتی ناوەڕاست. بەڵام لەڕوانگەی سیاسەتەکانی ئەمریکاوە بەرامبەر بەئێران، ئەو گرێبەستەی مەسرور بەرزانی واژۆی کردووە، گۆشەیەک لەم سیاسەتانەی ئەمریکا پڕدەکاتەوە. واتە ئەوەی کە لەئێستادا ئەمریکا ڕاستەوخۆ و یەکلایەنە لەڕۆژهەڵاتی ناوەڕاستدا ئامادەگی هەیە و لەهەوڵدایە وەک ‌هێزی یەکەم و سەرەکی لە ڕیکخستنەوەی سیستەمی ئەمنی و بازرگانی ڕۆژهەڵاتی ناوەڕاستدا، ڕۆڵبگێڕێ و جێگایەک بۆ ئێران نەهێڵێتەوە، نەک هەر پشتیوانی لە گرێبەستەکانی حکومەتی هەرێم بەپیویست دەزانێت، بگرە وەک بەشێک لە سیاسەتەکانی بۆ بڕینی دەستی ئێران لەعێراق و لاخستنی، ئەم کارتەی بەدەستەوە گرتووە. ئەگەر پێشوتر ئەمریکا ناچاربووە لەگەڵ ئێراندا ڕێبکەوێت، تا پێگەی خۆی لەعێراقدا رابگرێ، ئەگەر ناچاربووە لەسەروو سزا ئابوریەکانی خۆیەوە لەسەر ئێران، ملبدات بەحکومەتی عێراق تا پڕۆتۆکۆڵی هاوردەکردنی کارەباو گاز لەگەڵ ئێراندا واژۆبکات، ئەوا دوای گۆڕانکاریەکانی ناوچەکە و ڕۆڵی یەکلایەنەی ئەمریکا، چیتر ئامادەنییە بۆ درێژەدان بەم ڕۆڵەی ئێران لەعێراقدا، هەم لەڕوی سیاسی و ئەمنی و سەربازیەوەو هەم لەڕوی ئابوری و بازرگانیەوە. بێگومان لەم نیوەدا گرێبەستەکەی حکومەتی هەرێم لەگەڵ کۆمپانیاکاندا، ئەم بۆشاییە بۆ ئەمریکا پڕدەکاتەوەو دەیکاتە بەدیل و فشارێک بەسەر حکومەتی عێراقەوە. لەیەک وتەدا مەبەستی ئەمریکا لەپشتیوانی کردنی گرێبەستەکەدا، ئەوەیە کە دەستی ئێران لەعێراقدا، بەیەکجاری چ لەروی سیاسی و ئەمنیەوەو چ لەڕوی بازرگانیەوە ببڕێ و لێرەشەوە خۆی وکۆمپانیاکانی یەکلایەنە لەعێراقدا ڕۆڵبگێرن.

ئۆکتۆبەر: بەپێی ڕاگەیاندنەکەی وەزارەتی سامانە سروشتیەکانی هەرێم، ئەو دوو گرێبەستە کۆنن و تەنها کۆمپانیای جێبەجێکار گۆڕانی بەسەردا هاتووە، هەروەها وەزارەتی نەوتی عێراقیش لەڕاگەیاندنێکدا ئەو گریبەستەی بە نایاسایی “باطڵ” ناوزەدکرد، تاچەند ئەم هەڵوێستە دژبەیەکانە ڕیگەدەدات بەوەی کەئەو گرێبەستانەی حکومەتی هەرێم لەگەڵ کۆمپانیا ئەمریکیەکاندا واژۆیکردووە، جێبەجێ بکرێن؟ هاوکات خودی واژۆکردنی گرێبەستەکان چ کارێگەریەکی لەسەر پەیوەندیەکانی نیوان هەرێم وبەغدا دادەنێت؟

خەسرەو سایە: لەڕوانگەی ئەو قسانەی پێشوتردا من وای دەبینم کە لەدۆخی ئێستادا، واژۆکردنی ئەو گرێبەستەی کە کراوە، زیاتر لایەنی سیاسی هەیە تا ئابوری و بازرگانی. واتە پارتی دەیەوێت لەبەر رۆشنایی ڕۆڵی ئەمریکا لەناوچەکەو ئەو ئەو پشتیوانیەی ڕایگەیاندووە، هەروەها بەهۆی ئەو گۆڕانکاریانەی کە لە هاوکێشەی هێزدا، لەنیوان ‌هێزەکانی ناوخۆی عیراقدا بەڕێوەیە، مەسەلەی گرێبەستەکان بکاتە کارتێکی سیاسی بۆ ناچارکردنی حکومەتی عیراق هەم بۆ هەناردە کردنەوەی نەوتی هەرێم و هەم بۆ ڕێکەوتن لەسەر پەسەندکردنی یاسایەک بۆ نەوت و گاز، بەوجۆرەی کە لە قازانجی پارتی و حکومەتی هەرێمدا بێت. خودی ئەوەی کە مەسرور بەرزانی بەبێ گەڕانەوەو ئاگاداری حکومەتی عیراق، واژۆکردنی گرێبەستەکانی، ئەویش لەبواری وزەو گازدا دەباتە ئەمریکا، لەکاتێکدایە کەدەزانێت حکومەتەکەی سودانی لەمەوقعیەتێکدا نییە جگەلە دەرکردنی ڕاگەیاندن، لەئێستادا کاردانەوەیەکی زیاتری هەبێت. بەتایبەتی وەک ئەوەی کە گرێبەستەکان ئاشکرایان کردوە بەرهەمهێنانی گاز ووزە بۆ بەرکار‌هێنانی ناوخۆ و کارەبا دەبێت، نەک بۆ ناردنەدەرەوە. ئەمەش سەختیەکی ئەوتۆ لەبەردەم پارتی و حکومەتی هەرێمدا لەڕوی دەستوری و قانونیەوە، وەک ئەوەی لەمەسەلەی بەرهەمهێنانی نەوت و گرێبەستەکانیدا هەیە، پێکناهێنێت. بەلام ئەوەی کە ئەم گرێبەستانە چ کارێگەریەک لەسەر پەیوەندیەکانی هەرێم و بەغدا، دادەنێت، ڕاستیەکەی بەشێوازو ناوەڕۆکی ئەو گۆرانکاریانەو پێگەی هەردوولا و لایەنەکان لەشکڵدان بەهاوکێشەی هێزو ئەنجامەکانی ئەم هەڵبژاردنەوە دەگەڕێتەوە کەبریارە لەمانگی ١١ی ئەمساڵدا سازبدریت.

بێگومان لەو چوارچێوەیدا کەناویان ناوە “سیستەمی فیدڕالیزم”بەردەوام پەیوەندیەکانی هەرێم و بەغدا لەژێر کاریگەری روداوەکانی ناوخۆ و ناوچەکە و هێزهاوسەنگی نیوان لایەنەکان و دەستەوتاقمی میلیشیایی و دەخاڵەتی دەولەتانی ناوچەکەدا، واتاو فۆرمی جیاجیای بەخۆیەوە گرتوە کە جارێک ناسیونالیزمی کوردو حیزبەکانی بالادەستبون و جارێکی تریش هیزە شیعەکان. ئەگەر سەرنج بدەین لەقۆناغیکدا کە پێگەی هەرێم و ئەحزابی ناسیونالیزمی کورد لەفیدرالیزمەکەی عێراقدا بەهێزبوو، وە لەبەرامبەردا کەحکومەتی عیراق ناجیگیرو ڕیزی شیعەکانیش پەرت و لێکدابڕاوبوو، پارتی و حکومەتی هەرێم باسیان لە ئابوری سەربەخۆ و ناردنەدەرەوەی نەوت و گرێبەستی پەنجا ساڵەیان لەگەڵ کۆمپانیاکانی تورکیادا بەبێ حسابکردن بۆ دەستورو یاساو حکومەتی عیراق دەکرد، کاتیکیش کە بەدوای تەواوبوونی شەڕی داعشدا هاوکێشەکە گۆردراو لە کەرکوک و ناوچە دابراوەکان وەدەرنران، سەری تەسلیمیان دانەواند، نەک هەر فرۆکەخانەو داهاتی ناوخۆ و ئەمنیەتی سنورەکان و.. بگرە کەیسی نەوتیان بەتەواوی تەسلیم کرد و ئینجا کەوتنە ئەوەی کە بڵێن”ستراتیژمان لەبەغدایە”! ئیستاش وەک باسمان کرد دۆخەکە گۆرادراوە و پارتی و حکومەتەکەی دەیەوێت مەسەلەی گازو وزە وەک کارتێك بۆ وەرگرتنی ئیمتیازات و چارەسەرکردنی کێشەکانی خۆی لەگەڵ بەغدادا بەدەستەوەبگرێ، لیرەوەیە کە دەلێم ئەو گرێبەستانەی کە پارتی لەئەمریکا واژۆی کردووە، زیاتر لایەنی سیاسیان هەیە تا ئابوری و چۆنیەتی جێبەجێبونەکەشی بەداهاتوی گۆرانکاریەکان لەناوخۆی عیراق و شکڵگرتنی هاوکێشەی هێزەوە هەیە.

 

ئۆکتۆبەر: دەوری یەکێتی چی دەبێت لەم نێوەدا بەتایبەتی کە کێلگەکانی گازی سروشتی هەموویان دەکەونە ناوچەی دەسەلاتی یەکێتی و زۆنی سەوزەوە؟ وەکو ئاگادارن تائێستا یەکێتی هیچ هەڵوێستێکی رەسمی لەوبارەوە رانەگەیاندوە! بەڵام وەزیری پێشمەرگە کە سەر بەیەکێتیە لەکاتی واژۆکردنی پرۆتۆکۆلەکەدا دەردەکەوێ!

خەسرەو سایە: بەدلنیاییەوە، بەبێ ڕێکەوتنی ژێربەژێرو نەهێنی نێوان یەکیەتی و پارتی و تەنانەت بەبێ ڕۆڵی ئەمریکاو ئاگاداربونی لەگرێبەستەکان هەرگیز پارتی ناتوانێت بەتەنها دەست بەرێت بۆکارتێکی لەمجۆرە. تائەو جێگەیەی بەدەوری یەکیەتی دەگەڕیتەوە جگە لەوەی کە ڕازیکراوە بەوەرگرتنی بەشێک لە داهات و قازانجێک لەحاڵەتی جێبەجێکردنی گرێبەستەکاندا، بەڵام لەڕوی سیاسیەوە ناچارە لەگەڵ پارتیدا بسازێت و لەو نەخشەو سیاسەتەدا کە پارتی لە بەرهەمهێنانی وزە و گازدا گرتویەتیەبەر، جێگای خۆی پەیدابکات! چونکە یەکیەتیش ئەوە دەزانێت کە پشتیوانەکەی کە ئێران و ئەو لایەنانەبوون لە شیعەکان کە سیاسەتی خۆیان لەڕێگای ڕۆڵی ئێران لەعیراق وناوچەکەدا دەبردە پێشەوە، زەربەی خواردوە و ناچارە لەگەڵ گۆرانکاریەکاندا خۆی بگونجێنێ و بەجۆرێک لەجۆرەکان لەگەڵ پارتیدا بسازێ و لێی نزیکببێتەوە و ئەم قۆناغەش تێپەڕێنی. نەرمینواندن لەئاست دانوسەنەکان بۆ پێکهینانی کابینەی نوێی حکومەتی هەرێم و داواکردن لەپارتی تا بەیەک لیستی هاوبەش لەناوچە جێناکۆکەکان بەشداری بکەن، تا ڕاوەستانی بێدەنگی لەئاست واژۆکردنی ئەو گرێبەستانەدا کە مەسرور بەرزانی واژۆیکردوە، هەمویان ئاماژەن بۆ ئەم پێگەیەی یەکیەتی لەدۆخی ئیستادا، بەگشتی و لەبەرامبەر پارتیدا بەتایبەتی.

 

ئۆکتۆبەر: خەڵکی کوردستان چی خێرێك لەم سیاسەتە تازەیەی پارتی و حکومەتەکەی دەچنەوە؟ ئایا لەحالەتی جێبەجێکردنی گرێبەستەکاندا، هیچ گۆرانکاریەک بەسەر دۆخی ژیان و گوزەرانی خەڵکدا دێنێ و لانیکەم نابێتە مایەی ئەوەی مەسەلەی موچەی فەرمانبەرانی کوردستان ڕووبەڕوی کێشەیەکی تربکاتەوە؟

خەسرەو سایە: ڕاستەیەک هەیە کە نابێت لەبەرچاوی نەگرین، ئەویش ئەوەیە کە ئەم گرێبەستانە کە بەقەوارەی ١١٠ ملیار دۆلار واژۆکراوە، سەرمایەیەکی زەبەلاح لەدەرەوە دەهێنێتە ناوخۆی کوردستانەوە و ئەمەش کارێگەری لەسەر باری ئابوری کوردستان بەگشتی دەبێ و بووژانەوەیەک، بەتایبەتی لەڕەخساندنی هەلی کاردا بەدواوە دەبیت، بەڵام بوژانەوەی ئابوری ئۆتۆماتیکی بەمانای بوژانەوەی دۆخی خراپی ئابوری و بژێوی خەڵکی کرێکارو زەحمەتکێش نایەت، ئەمەی دواییان پەیوەندی بەئاستی خەباتی چینایەتی و هۆشیاری ڕیزەکانی کرێکاران و ڕێکخراوبون و لەمەیداندابونیان بۆ بەدەستهێنانی نان و کارو خزمەتگوزاریەکانەوە بەندە. ئەزمونی حوکمرانی ئەحزابی بۆرژوازی کورد ئەوەی نیشانداوە کە لەو قۆناغەشدا کە بەرهەمهینان و فرۆشتنی نەوت لەدەستی یەکیەتی و پارتیدابوو، خەڵک جگە لە گرانی و هەژاری و بیکاری و نەبونی خزمەتگوزاریەکان شتێکی تریان بەنسیب نەبوو، تەنانەت دواتریش بڕینی مووچەو وێرانبوونی ژیرخانی ئابوری و وەستانی بازاڕی بەدواداهات. هەربۆیە نابێت چاوەڕوانی زیاتر لەمە لە سیاسەتی نابەرپرسانەی دەسەلاتێک بکرێ، کە لەقازانجی بازاڕو کۆمپانیاکان و دووبنەماڵەی دەسەڵاتدرادا، ڕۆڵی گێراوە. لەسەرێکی تریشەوە ئەم گرێبەستانەی واژۆکراون ڕاستیەکەی تەنها بەکارخستنی کۆمپانیاکان و سەرمایەکانیان نیە، بەڵکو سیفەتی هاوبەشێتیان لەقازانجدا هەیە. هەروەک لەمیدیاکانەوە باس دەکریت کە قازانجەکان بەڕێژەی لە٤٤٪ی دەکەوێتەدەستی حکومەتی هەریم و هەردوپارتی دەسەڵاتدارو لە٥٦٪ کۆمپانیاکان دەیبەن. ئەمەش ڕاووڕووتێکی ئاشکرای کۆمپانیا ئەمریکیەکانە، نەک خزمەتککردنی خەڵک.

تائەو جێگەیەشی کە ئاخۆ ئەم گرێبەستانە کێشەکانی مووچەی فەرمانبەرانی هەرێم قوڵترو فراوانتر ناکاتەوە؟ ڕاستیەکەی ئەوەیە کە خەڵکی کوردستان لەگەڵ دوو دەسەلاتی دژەخەڵکی هەم لەهەرێم و هەم لەبەغدا بەرەوڕوون، ئەم دەسەڵاتانە کە نەک هەر هیچ بەرپرسیاریەتیەک بەرامبەر بەژیان و گوزەرانی هاوڵاتیانی ژیڕدەستیانەوە نیشان نادەن، بەلکو ژیان و بژێوی ئەوان بە بازار و کۆمپانیاکان و بەرژەوەندیە سیاسی و ئابوریەکانی خۆیانەوە دەبەستنەوە، هەموو شتێکیان لێچاوەڕوان دەکرێ و دوورنیە ئەم گرێبەستانەش وەکو پاساو و کارتێکی سیاسی لەبەرامبەریەکدا بەدەستەوە بگرن و مەسەلەی مووچەوقوتی فەرمانبەرانیش بخەنە کێشەیەکی بێچارەوە. واتە دەمەوێت بڵیم پەیوەندیەکانی حکومەتی هەرێم و بەغدا کە لەچوارچێوەی فیدرالیزمێکی قەومی لەرزۆک و شکستخواردودا پیناسەی بۆ دەکرێت، لەهەر دۆخێکدا دەرفەت دەکاتەوە کە هەریەک لەم دوو لایەنە یاری بە ژیان و گوزەرەنی هاوڵاتیانەوە بکەن، مەسەلەی مووچەش لە دەرەوەی ئەم بازنەیە نیە! نابێ خەڵک بەگشتی و موچەخۆرانی کوردستانیش بەتایبەتی، هیچ چاوەڕوانیەکیان لەم دوو دەسەڵاتە هەبێت. بەلکو بەخەباتی خۆیان دەبێ بۆ داخوازیەکانیان وبۆ باشکردنی بژێویان بڕوانن.