hkkurdistan
تاهیر عیسا له‌گه‌ڵ هاوپشتیدا:
هاوپشتی: له‌په‌یوه‌ند به ناره‌زایه‌تیه‌کانی ئێستا و بارودۆخی کوردستان و قەیرانەکان، بەپێویستمان زانی تەوەری باسێکی تایبەت بکەینەوە، بۆ شرۆڤەکردن و ڕۆشنایی خستنە سەر سێبەرەکان. بۆ ئەم مەبەستە کەوتینە گفتوگۆ لەگەڵ ژمارەیەک لە چالاکوانی مەدەنی، هەڵسوڕاوی سیاسی، ڕۆشنبیر و خاوەن ڕاو و تێڕوانینی تایبەتدا. ئێمە سوپاس و پێزانینی زۆرمان بۆ ئامادەیی ئەو دڵسۆزانە هەیە، لە پەرۆشیان بۆ چارەنووسی خەڵک، بە خێرایی وەڵامی تەوەرەکەیان دایەوە وەک هەوڵێک بۆ پشتیوانی لە داواکاریەکانی خەڵکی کوردستان.
دەقی دیمانەی بەڕێز تاهیر عیسا سەبارەت بە ناره‌زایه‌تیه‌کانی ئێستا، بارودۆخی کوردستان و قەیرانەکان.
هاوپشتی: سەرەتا لە بارودۆخی کوردستانەوە دەچینە نێو باسەکەوە. ئەو هۆکارانە چین کەدۆخی ئێستایان بەرهەمهێناوە؟
تاهیر عیسا: هۆکارگەلیی زۆر هەن، کە ئەم دۆخەی ئێستایان بەرهەم هێناوە، بەڵام بۆ دەستنیشان کردنیی بنەڕەتیی ترینیان دەبێت چەند هەنگاو بڕۆینە دواوە،کە گرنگترینیان بەبڕوای من دەرهاویشتەکانیی دوای جەنگیی کەنداون، کە دەروازەی بۆ گووزەرکردنیی حیزبە قەومیە کانیی بارگاویی بە عەقڵیەتو فەرهەنگیی شاخیی دابڕاو لەهەر جۆرە تایبەتمەندیێکیی مەدەنیانەو سوکولاریی، بۆناوشانۆی دەسەڵاتداریێتیان کردەوەو هەر لەسەرەتای پڕاکتیکی دەسەڵاتیاندا جگە لەهەڵپەی دزینو هەڵوشینو ئاو دیو کردن، چیی تریان نەدەزانیی، هاوکات هەردوو گەمارۆی ئابووریی ، یەکیان نێو دەوڵەتیی بۆ سەرعێڕاقو کوردستانو دوومیشیان گەمارۆی خودیی دەوڵەتی عێڕاق بو سەر خەڵکی کوردستانو دواتریش دەرچوونیی بڕیاریی نەتەوە یەکگرتووەکانو کردنەوەی هێڵی سیو شەشو سیوحەوتیی دژە فڕین،کە کوردستانیی لەکۆمەڵگایەکیی شارنشینی شێوە ستاندارد جیهانییەوە بۆ ئۆردووگایەکیی گەورە گۆڕییو پارتییو یەکیەتییش بوون بە دوو موڕاقیبیی دزێو،بەسەرخەڵکەوەو خەڵکەکەشیی لە هاووڵاتیی ئاساییەوە بۆ ئۆردووگانشینیی پاسیڤو ملکەچو بێ ئیرادەو چاو لەدەست،هێڵدرانەوە! لەناو هەمان هەلو مەرجیی سیاسیی ئابووریی کۆمەڵایەتیدا، ململانێ قێزەونەکانیی هەردوو چاودێرە دزێوەکەی ناسیۆنالیزمی کوردیی پارتییو یەکیەتیی، لەسەر دەسەڵاتوتاڵانو بڕۆیی داهاتیی گومرگەکان، کوردستانیان ڕاکێشیی شەڕێکیی کوشندەی ناوخۆیی کردوو هەلو مەرجیی ژیانو گوزەرانیی خەڵکی هەژارو کەمدەرامەتیان، سەرباریی بەکوشتدانیی هەزاران لەڕۆڵەکانیان کە لەپێناویی چەندسەد دینارێکیی بەچەندمانگ جارێک ناچاربوون ببنە سووتەمەنیی ماشێنیی جەنگیی کوشتارگاکانیان، خراپترکرد . دەرهاویشتەکانیی ئەم هەلو مەرجە سەختو دژوارە ڕۆژ لەدوای ڕۆژ هەرچیی زیاتر خەڵکیی هەژارو نەداریی کوردستانیی هەژارترو بێ ئیرادەوبێ ئاسۆتر دەکردو، لەبەرامبەریشدا توێژێکیی سیاسیی حیزبیی تاسەر مۆخی ئێسقان بێ مۆڕاڵیی بازرگانو قاچاخچیی پولپەرەستیی، لەسەر لاشەی کەڵەکەبووی کوژراوانیی شەڕیی ململانێ عەشیرەتیەکانیان هەرچیی زیاترو زیاتر دەوڵەمەندترو هەڵاوساوتر دەکرد! ڕوانگاو تێڕوانینیی ئەم دەسەڵاتە سەرو خەڵکییە،ـ لەبەرامبەر خەڵکێکیی پاسیڤو بێ ئێرادەکراودا، کە جگە لەبزووتنەوەی شووڕایی کە لە دوای خڕۆشانە جەماوەریەکەی نەوەدو یەکدا دەوریی کاریگەرو بەرچاویی بوو خوازیاریی گێڕانەوەی ئیرادەو پڕاکتیکردنیی دەسەڵاتیی ڕاستەوخۆی جەماوەریی کرێکارو زەحمەتکێش بوو، کە دواتر هەر بەهەڕەشەو چاوسوورکردنەوەکانیی حیزبە قەومیەکانو بەدواداهاتنیی کارەساتیی کۆڕەویی خەڵک ،وەک بزووتنەوەیەکیی سیاسیی سەربەخو، لەباربرا.دواتر لەغیابیی هەر چەشنە ئامادەییو ڕێکخراوبوونێکیی سیاسیی یان سەندیکایی چینو توێژە هەژاروو دەستتەنگەکانیدا، دەستیی ئەم تاقمەی بۆ تاڵانو بڕۆو برسیی کردنو بێمافکردنەکانیدا ئاواڵاترو باڵاتردەکرد. لەدەورانیی ڕێککەوتنە سیاسییە ستڕاتیجیەکایی نێوانیشیاندا(پارتییو یەکیەتیی)و لەدوای داڕووخانیی یەکجاریی حکوومەتیی بەعث لە ساڵیی دوو هەزارو سێداو بەشدارییکردنیان لەحکومەتیی بەناو فیدڕاڵیی عێڕاقو پەسەندکرانیی بوودجەی لەسەداحەڤدە بۆ کوردستان، دەرگایەکیی تریی گەندەڵکاریی گەورەیان بەڕوودا کرایەوەو هەرچی سەرمایەیەک کە لەعێڕاقەوە بەناویی خزمەتگووزارییە کۆمەڵایەتیەکان بڕیاریی لەسەر دەدرا ئەوان وەک دوو حیزبیی سەرەکیی بەشیی شێریان وەک بوودجەی حیزب لێدەبردوو بەشیی ئەحزابیی بچووکیی ڕەنگاوڕەنگیی قەومییو ئیسلامیی مەعاشخۆریی دەورو بەریشیان بۆ دەمچەورکردنو بێدەنگکردنیان لێدەدا، کە هەر لە بەشەبوودجەی خەڵکدا بەسەدان دامو دەزگایی میدیاییو کەناڵیی ئاسمانییان بۆ فریو دانو چەواشەکردنی خەڵک کە بەپارەیەکیی خەیاڵیی هەڵدەسوڕان، بەڕێوەدەبردو لە هەمان کاتیشدا لەململانێی هەڵبژاردنەکانیشیاندا بە ملیاران دۆلاریان بۆکڕینی دەنگیی خەڵکو بێدەنگکردنیان تەخشانو پەخشان دەکردو بەهەزاران کەسیان بەڕوتبەی جۆراوجۆریی خەیاڵییو بەهەزاران چەکدارو پێشمەرگەی سەردیوارو بن دیواریان لەڕکابەریی یەکترداو بۆ ڕاگرتنیی باڵاننسیی هێزیی نێوانیان دادەمەزراند، بەڵام لەدوای گەشەکردنی خێرای تەکنۆلۆجیاو بەهرەمەندبوونیی بەرەبەرەی خەڵکی کوردستان لە ئەنتەرنێتو تۆڕەکۆمەڵایەتیەکانو ئاشنابوونیان بەدنیای دەرەوە، چاوەڕوانیی خەڵکیی کرێکارو زەحمەتکێشیی کوردستانیی بردە سەرەوەو ڕۆژ لەدوای ڕۆژ هەرچیی زیاترلە و قڵیشتو درزە فراوانەی نێوان خۆیانو دەسەڵاتیی هەڵاوساویی مافیایی وەئاگا دەهاتەوە، کە بەرەنجامەکەی هاتنە مەیدانیی حەقدەی شوبات بووکە بە پلانیی ئۆپۆزیسیۆنێکیی هەلپەرەستی لیبڕاڵیو ئیسلامیی خامۆشوکراو ناکام مایەوە!
هاوپشتی: ئەمرۆ لە کوردستاندا باس لەچەندین قەیران دەکرێت، قەیرانی دارایی، قەیرانی سەرۆکایەتی وپەرلەمان، قەیرانی پەیوەندیەکانی هەرێم لەگەڵ حکومەتی بەغدا، قەیرانی کارەباو خزمەتگوزاری و موچە… بەڕای ئێوە چ قەیارانێک بە سەرچاوەی سەرەکی ئەم هەموو قەیرانانە دەزانن؟
تاهیر عیسا: جگە لەقەیرانیی دەسەڵات لەکوردستاندا هیچ جۆرە قەیرانێکیی تر بوونیی نییە! هەموو ئەو قەیرانانەی باسیان لێوە دەکرێت، تەنیا بۆ داپۆشینیی شکستیی سیاسییو ئیداریی چەند ساڵ دهسەڵاتداریێتیی خۆیانە، باس لەقەیرانیی دارایی دەکرێت کە بەشێکیی بناغەیی ئەم دەسەڵاتە کەپارتییە هۆکارەکەی بۆ حکومەتی مەرکەزیی دەگەڕێنێتەوە، بەڵام هۆکارییی ململانێکانیشیان لەگەڵ مەرکەزداو بڕینی بوودجەی هەرێم، پەیوەستە بە پەیوەست بوونیان بە ململانێ کۆنەپەرستانەکانی ناوچەکەو تایبەتیی تر ململانێکانی نێوان هیلالیی شیعییو هیلالی سوونییەوە، کەئەوان لەپێناو پاراستنیی بەرژەوەندییە حیزبییو بنەماڵەییەکانیانو بۆقایمکردنیی دەسەڵاتیی سەرەڕۆیان بەرژەوەندیەکانیان لە گرێ بەستیی پەنجا ساڵەی نەوت لەگەڵ تورکیادا، دەدۆزییەوە، هەر لێرەشەوە کەوتنە ململانێی دەوڵەتیی عێڕاقەوە!
هاوپشتی: حکومەت دەڵێ بەهۆی قەیرانی دارایی موچەکان بڕاون و لەکاتی خۆی نادرێ. هاوکات لەگەڵ ئەوەشدا لە لێدوان و دانپێدانانی بەرپرسانی حزبە دەسەڵاتدارەکان دەبیستین، هۆی سەرەکی ئەم قەیرانە داراییە بەتاڵانبرنی ملیارەها دۆلاری ئەم کۆمەڵگایەیە لەلایەن بەرپرسان و کۆمپانیا تاڵانچیەکانی حزبە دەسەڵاتدارەکان. خوێندنەوە و لێکدانەوەی ئێوە بۆ قەیرانی دارایی بە دیاریکراوی چییە؟
تاهیر عیسا: ڕۆژانە گوێهەڵخستن لەلێدوانە جۆراو جۆرەکانیی کادیرو لێپرسراوە باڵا حیزبییو بەناوحکومیەکانیان،لە ڕادێیۆو کەناڵە ئاسمانییە جۆراو جۆرەکاندا لەسەر تۆمەتبارکردنیی یەکترو لێدوانەکانیان، لەسەرپارە خەزێنکراوەکانیانو، لێدوانەکانیان لە سەردەست بەسەراگرتنوقۆرخکردنیی بازاڕە جۆراو جۆرەکان، لەلایەن کۆمپانیا حیزبیەکانیانەوە، وەهەروەها لێدوانەکانیان لەسەر ئەو ڕێژە زۆرەی تانکەریی نەوتو سەتان هەزار بەرمیل نەوتەی لەڕێگای بۆڕیە نەوتەکانەوە بەڕێدەکرێت، لێدوانەکانیی حکومەتە تاک حیزبیەکەیان، وەدرۆ دەخاتەوە! دوا لێدوانیی ڕەسمیان لە سەر داهاتیی کاشیی هەرێم نزیکەی پێنج سەت ملیار دیناربوو، کە دەیان گووت دەتوانین نیومووچەی سەرجەم مووچە خۆرانیی پێدابین بکەین، ئێ باشە هەر بەپێی ئەو داهاتە ڕاگەیاندراوەیان بێت، دەیان توانیی هەر دوومانگ جارێک مووچەی تەواوی مووچە خۆرانیی لێبدەن! بەڵام هەتا ئێستا وا بۆ نزیکەی پێنج مانگ دەچێت مووچەی مووچە خۆرانیان نەداوە! کەواتە تەنیا لێدوانەکانیی خۆیان گەواهیی گەندەڵکاریی بێ پەردەوبێگوومانیی خۆیانییان دەسەلمێنێت.
هاوپشتی: خویندنەوەتان چییە بۆ هەنگاوەکانی حکومەتی هەرێم بۆ چاکسازی و ئەوخالانەی کەحزبەکان لەکۆبوونەوەیان لەگەڵ مەسعود بەرزانی رایانگەیاند وئەوانەشی کەخودی بەرزانی بۆ چارەسەری دۆخی ئێستا خستویەتیەڕوو؟
تاهیر عیسا: بەبڕوای من ، هەر کەس پێی وابێتو کەمتریین چاوەڕوانیی لەم دەسەڵاتەو حیزبەکانی بۆ چاکسازیی هەبێت، بای نووکیی دەرزیش لەماهیەتیی ئەم دەسەڵاتەو حیزبەکانیی نەگەییوە! ئاخر چاوەڕوانیی چاکسازیی لەدەستەو تاقمیی مافیایی ، بەمانای شەرعیەتدانەوەیە بەدەسەڵاتداریێتیی مافیایی ! چونکە بەکردەوە لە ماوەی بیستو پێنج ساڵیی ڕابردووی دەسەڵاتیاندا هەم لەتاڵانو بڕۆی بێ پەردەیانو هەم لە سەرکوتیی مافو ئازادیەکانیی خەڵکو هەم لە تیرۆریی سیاسیی چالاکو هەڵسوڕاوو ڕۆژنامەوانەکانیی کۆمەڵگادا، ڕووی دزێوو چەپەڵی خۆیانیان نیشانمان داوە، دواجار مافیا خۆی وەک بوونێکی خەتابارو خەتەرناک بەسەر ژیانیی خەڵک، لەکۆمەڵگادا دەبێت لەژێرپرسیاردابێت؟ هەر جۆرە پڕووپاگەندەیەکیشیان بۆ چاکسازیی دەبێت لەخۆیانەوە دەستپێبکەن، وە هەر جۆرە چاوەڕوانیێکیش لەخۆیانەوە مەحاڵو خەیاڵ پڵاوییە! چونکە دواجار بوونیی ئەوانو پێگەو جێگەی سیاسییو کۆمەڵایەتیان لەکۆمەڵگادا بە گەندەڵییەوە بەستراوەتەوە !
هاوپشتی: ئێستا هەموولایەنەکان باس لەچاکسازی دەکەن، هاوکات باس لەکاراکردنەوەی پەرلەمان وگێڕانەوەی وەزیرەکان و حکومەت دەکەن بۆ سەردەمی پێسوو.. پێتان وایە بەم هەنگاوانە قەیرانی دەسەڵات چارەسەر ده‌بێت؟ بەواتایەکیتر تاچەند پێتان وایە کەئەم حکومەت و دەسەڵاتە دەتوانێ چاکسازی بکات؟
تاهیر عیسا: پەڕلەمان لەوڵاتانیی هەرە پێشکەوتووی جیهانیشدا تەنها دەزگای شاردنەوەو پۆشینیی ناکۆکیە چینایەتیەکانیی کۆمەڵگایە کە بەناویی نوێنەرایەتیی درۆزنانەی خەڵکەوە، هەر چوار ساڵ جارێک واریدیی هەڵبژاردنێکی گاڵتەجاڕانەی تەنیا نێوان حیزبە بۆرژوا کان دەبێت ، کە هیچ وەختێک نوێنەرانیی کرێکارانو خەڵکیی زەحمەتکێش ناتوانن وەنەیانتوانیوە بڕۆنە شەڕیی هەڵبژاردنێک کە دواجار براوەی ڕەها تەنیا حیزبە بۆرژوازیەکانو نوێنەرانیی ملیاردلێرەکان بووە! کە لەکوردستاندا نەک هەر تۆزقاڵێک نزیکایەتیی لەگەڵ پەڕلەمانیی وڵاتانیی پێشکەوتووش نییە، بەڵکو لەچوارچێوەکەیدا یاسای چەکو زمانیی زبریی هێز ،یاساکانیش یەکلا دەکاتەوە! کە وەک لەسەر پرسیی سەرۆکایەتیی هەرێم بینیمان، بەئەندازەی قاوەخانیەک کاریگەریی لە هاوکێشە سێاسیەکاندا نەبووە!وە هەروەها پەڕلەمان وەک دەزگای چاودێریش، لە پاڵ هەموو کابینەکانیەوە تالانو بڕۆی بێ پەردە کراوەو بەڵام لەکامیانیدا توانیویەتیی لێپرسراوێکیی حیزبیی باڵا بەتۆمەتیی گەندەڵیی ڕاکێشیی دادگاو لێپرسینەوە بکات؟! ئەو حیزبانەی باس لەکاراکردنەوەی پەڕلەمانیش دەکەن، تەنیا بیانوویەکە، لەلایەک بۆ کپکردنەوەو سارکردنەوەی تووڕەیی خەڵکو نەجاتدانیی سیستەمیی فەرمانڕەواییە لەئاستیدا، وە لەلایەکی تریش بۆ ڕاکردنو شانخاڵیکردنیانە لەئاست بەرپرسیاریەتیی هەر چەشنە تەقینەوەیەکیی لەناکاویی جەماوەریی تووڕەو ناڕەزایی کە زۆر چاوەڕوانکراوە!
هاوپشتی: یەكێتی لە کاتێکدا خۆی لایەنێکی سەرەکی حکومەتە و خاوەن پۆستی جێگری سەرۆک وەزیرانە. لە کۆبونەوەی مەکتەبی سیاسی، داوا لەحکومەت دەکا پیاچوونەوە بە پرۆژەی پاشەکەوتی فەرمانبەرو موچەخۆران بکات و پیاچونەوەی پێویستە. چۆن خوێندنەوە بۆ ئەو هەڵوێستەی یەکێتی دەکەن؟
تاهیر عیسا: یەکیەتیی هەم زۆر زەبوونانە مامەڵە لەگەڵ دۆخەکەدا دەکات، هەم زۆر هەلپەرەستانە، وەک مەلای مەشهوورە ، خورمژیی دەوێت، واتە هەم خورماو هەم مێوژ، ئەم هەم دەیەوێت شەریکیی هەریسیی تاڵانیەکە بێتو هەمیش لەبەردڵان بێت. ئەمەش بەدەردی ئەم هەلومەرجە ئاڵۆزکاوەی ئێستای کوردستان نایخوات!
هاوپشتی: راتان لەسەر ناوەرۆک ولایەنەکانی پرۆژەی چاکسازیەکەی بزوتنەوەی گۆران چییە؟
تاهیر عیسا: بزووتنەوەی گۆڕان، ئەوەندەی لەپڕۆژە چاکسازیەکەیدا جێگاو ڕێگای سیاسیی بزووتنەوەکەیو گەڕاندنەوەی یوسف محمدی بۆ پۆستەکەی بۆ گرنگە، هێندە ژیانو گوزەرانیی خەڵکو مووچەی مووچەخۆرانیی بۆ گرنگ نییە و نەبووە، ئەوان ئەگەر لەخەمیی خەڵکدا بوونایا ، لەبریی مەرجیی گەڕاندنەوەی سەرۆکیی پەڕلەمانبۆ پۆستەکەی مەرجیی پێدانیی مووچەی پێشوەختیی مووچەخۆرانیی کوردستانیان دەکردە پێشمەرجە سیاسەکانیی خۆیان لەگەڵ حکوومەتیی پارتیدا! وەهەروەها گۆڕان باشیش بۆی مەعلومە کە دەسەڵاتیی هەرێم ناچنە پای جێ بەجێکردنیی هیچ پڕۆژە بڕیارێکی چاکسازیی کە نەک تەنیا لەوانەوە پێشکەش کرابێت ، بەڵکوئەوانەی خۆشیان جێبەجێناکەن! بەڵام ئەوەی گۆڕان دەیکات، تەنیا یاریی کردنە بە هەستو نەستیی خەڵکیی کوردستان، کە هەر لەئێستاوە وەک قۆناغیی هەڵبژاردن مامەڵە لەگەڵ سایکۆلۆجیای تاک دەکەن!
هاوپشتی: بنەمای ناڕەزایەتیەکانی ئەم دەورەیەی خەڵکی کرێکارو زەحمەتکێسی کوردستان بۆچی دەگەڕێننەوە وتاچەند لایەنی هاوبەشو جیاوازی لەگەڵ جوڵانەوەی ١٧ شوباتدا بەدیدەکەن؟
تاهیر عیسا: دەسەڵاتدارانیی هەرێمو حیزبەکانیان، لەحەڤدەی شوباتدا، ئەگەر زاتیی ئەوەیان دەکرد ، ناڕەزایەتیەکانیی خەڵک بەوە تۆمەتبار بکەن کە دەستیی ئۆپۆزیسیۆنیی گۆڕانو ئیسلامیەکانیان لەپشتەو بەناڕەزایەتیی دەستکردو دروستکراو تۆمەتبار دەکران! بەڵام ئەمڕۆ دەرفەتێک بۆ ئەم تۆمەتانەش نەماوەو هەلو مەرجیی ژیانو گوزەرانیی خەڵک بە جێگایەک گەییوە کە تەحەمول ناکرێت، پێنج مانگ بێ مووچەیی مووچەخۆرانو کاریگەرییو دەرکەوتەکانیی لەسەر بازاڕوڕێژەی بێکارییو هەژارییو نەداریی موتڵەق، ڕۆژ لەدوای ڕۆژ لە زیادبوونو فراوان بووندان، کە ئاکامەکەی مەعلوم نییە چپەرچەکرداروهەڵچوونێکیی خودبەخودیانەی ئەوتۆی لێدەکەوێتەوە کەکۆمەڵگا بەرەو هەلو مەرجێکیی خراپتر لەسوریاو یەمەنو لیبیا دەبات!
هاوپشتی: لە چەند رۆژی ڕابردوو یەکێک لە شێوازەکانی ناڕەزایەتی مامۆستایان و کارمەندانی تەندروستی بایکۆت ببوە، ئەو شێوازە لە ناڕەزایەتی چەندە بە کارساز دەبین؟ لە بایکۆت کارسازتر چییە؟
تاهیر عیسا: بەبڕوای من بایکۆت لەلایەن مامۆستایانو کارمەندانیی تەندروستیی، تەنیا دەتوانێت وەک ڕەمزیی ناڕەزایەتیی نیشاندانو بەس، لەبەرامبەر دەسەڵاتدا خۆی بنوێنێت، نەک وەک وەسیلەی بەدیهێنانو تەحقیقی ئامانجێک،چونکە دەسەڵات لەکوردستاندا لەڕووی مۆڕاڵەوە بەجێگایەک گەییوە کە باکیی نەبە پەککەوتنیی پڕۆسەی خوێندنو زانستیی کۆمەڵگایە وە نەباکیی بەباریی تەندروستیی هاووڵاتیانە، بۆیە هەتا ئەو جێگایەی بتوانێت زەمانەتیی مانەوەی دەسەڵاتیی گەندەڵکارانەی خۆی بکات لەئاست هەر چەشنە ئیعترازو ناڕازایەتیێنکدا بێدەنگو بێجواب دەبێت، وە بەتایبەتیش کە بایکۆتو ناڕەزایەتیەکان پرژو بڵاوو ناسەراسەرییو بێڕابەربن، باشتر دەتوانێت گوێو چاویی خۆیان لەئاستیاندا کەڕوکوێر بکات، بۆیە بۆ ئەوەی ناڕەزایەتیەکان کارسازتر بێت پێویستە لەئاستیی سنفیدا قەتیس نەکرێتو پەیوەندییو هەماهەنگیی بەرفراوان لەئاستیی تەواویی مووچەخۆرانوکارمەندانیی بەشەجۆرارەکانو خەڵکیی کرێکارو بێکاریشدا دروست بکرێت! دواجار بزووتنەوەیەکی بەرفراوان بێتە مەیدان کە ئومێد بە چینو توێژیی هەژارو دەستەنگیی کۆمەڵگاش بدات کە بەڕیزەکانیانەوە بۆ جێبەجێکردنیی دواکاریەکانیان پەیوەست بن! سەردەرهێنانیی ڕابەرانیی کرێکارییوپێشڕەو بووە بەپێویستیێکیی حه یاتیی ئەم دەورەیەو ئەرکیی هەوڵدان بۆ لێکهەڵپێکرانو یەکخستنیی بزووتنەوەی چینو توێژە هەژارو دەستەنگەکانی لەباریی مێژووییەوە کەوتۆتە ئەستۆ!
هاوپشتی: ناڕەزایەتیەکانی ئێستا چ ئاسۆیەکیان لەبەردەمە، ئەو ئاستەنگ وئەگەرانە چین کەلەبەردەم ئەم بزووتنەوەیەدان؟ لەئێستادا هەڵسوڕاوان و رابەرانی ئەم ناڕەزایەتیانە دەبێ چی بکەن وچ ئاستێک لەتوانایی وپێشرەوی بەدەستەوەبگرن؟
تاهیر عیسا: هیچ ئاسۆیەک بۆ بەدیهێنانیی مافو داواکاریەکانیان ، لەناو چوار چێوەی ئەم هەلو مەرجە سیاسیەی ئێیستادا ، بەدیی ناکرێت، نەبوونیی ڕێکخراوێکیی سەراسەریی یان مەجمەعیی عموومیی یان نەبوونیی کۆبەندێک بۆ ڕێکخستنو یەکخستنیی تەواویی بزووتنەوە جۆراو جۆرەکانو یەک دەنگ کردنیان ، یەکێکە لەئاستەنگیەکانیی بزووتنەوەی ئیعترازیی ئەم دەورەیەو بەبێ ئەم هاودەنگیی کردنە ناتوانێت چەند هەنگاوێک بڕواتە پێشەوە، گەندەڵکارانو دەسەڵاتەکەیان هەتا ناڕازایەتیەکان بە پڕژو بڵاوییو ناڕێکخراویی ببینێت ، زیاتر دەتوانێت سوود لەکات ببینێت بۆ نائومێدکردنو بێ ئاسۆ کردنیان!
