hkkurdistan
عەبدوڵا مەحمود
لەم دوایانەدا زنجیرە درامای “تەوەکول” لەکەناڵی یەکی تەلەفزیۆنی ئیرانی بڵاوبۆوە. لەم درامایەدا باسی هیرشی داعش و رۆڵی قاسمی سلێمانی بۆ پاراستنی هەولێر دەکات، ئەمەش پارتی هەراسان کردووە. میدیاکانی پارتی و سەرانیان گێرانەوەی روداوەکان لەو فیلمانەدا بە شکاندنی شکۆی نەتەوەی کورد!! و سوکایەتی بەبارزانی نیشانی دەدەن. پارتی شکستی خۆی و هێزەکانی بە شکستی نەتەوەو خەڵکی کوردستان دەقەبڵێنێ و بارزانیش بە کاریزمای قبوڵکراوی نەتەوەیی… لە کاتێکدا شکستی پارتی شکستی خەڵکی کوردستان نییەو بارزانیش، نەک تەنها خەڵکی کوردستان، بەڵکو هێزە هاوپەیمانەکانیشی وەکو رەمزی نەتەوەیی تەماشای ناکەن.
سەیرە!! هێرشی دڕندانەی داعش و بودەڵەیی دەسەڵاتی سیاسی بۆ بەرگری، هێندە کۆن نییە، تا لە بیر کەس چوبێتەوە. راکردن لە شەنگال و رادەستکردنی سەدان هەزار ئینسانی بێ تاوان بە چەکدارەکانی داعش، هێرشی داعش بۆسەر مەخمور و راکردنی خەڵک لە هەولێر و ناوچەکانی لە ترسان، پەنابردنی بارزانی بۆ گەورە تیرۆریستی ئیران و ناوچەکە قاسمی سلێمانی بۆ هاناوە چوون… هێشتا بە زیندویی لە بیری هەموو کەسێکی ویژدان زیندو و ئاگادار لە رووداوەکاندا ماوە، کەچی پارتی دەیەوێت شکست بەسەرکەوتن و راکردن بە پێشرەوی و خۆشخزمەتی بە هاوکاری و پاڕانەوە لە گەورە تیرۆریستان، بە هاریکاری هاوبەش، نیشان بدات.
ئەوە لە کاتێکدایە کە گیڕانەوە و نیشاندانی گۆشەیەک لەم روداوانە لە دراماو فیلمەکاندا، هێشتا ناتوانێت راستی رووداوەکان و لێکەوتەکانی بەتایبەتیش مەرگەساتی واقعی ئەو رۆژانە، وێنا بکات…
لەنیو ئەو کارەسات و جینۆسایدەی داعشی ئیسلامی لە موسڵ و پاشان لە شەنگال و شوێنەکانی تردا ئەنجامیدا، پارتی و سەرانی و میدیا بودەڵەکەیان، خەمی شکۆی بارزانی و ئەو هیزە پێشمەرگەیەن، کە نە لەشەنگال و نە لەهیچ جێگایەکی تری کوردستاندا، نەیانتوانی کەمترین بەرگری بکەن و ژیانی هەزارەها ئینسان بپارێزن، لەوەش واوەتر ئامادەنەبوون، راکردن و پاشەکشەی خۆیان بە جەماوەری ئەو شوێنانە بڵێن تا خەڵک بیر لە رێگای خۆیان و بکەنەوە و خۆیان دەرباز بکەن، بەتایبەتیش لە شەنگال دا…
ئەو کاتەش داعش بەرەو مەخمور هات و ترس کەوتە، سەر هەولێر و دهۆک، لە جیاتی پشت بەستن بەرگری و وەستانەوە بەرووی هیزەکانی داعشدا، دەستەو دامانی دنیا و لەوانەش قاسم سلێمانی بوون، ئەمەش بە دانپیانانی خودی سەرانی پارتی کە قاسم سلێمانی رۆڵی گەورە!!ی گیڕاوە، کەچی کاتێک گۆشەیەک لەو راستیانە لەلایەن میدیاکان، هونەرمەندان، و فیلم سازەکانەوە، دەخرێتە ڕوو گڕ دەگرن… سەیرە!! بۆ گیانی دەیان هەزار ئینسانی قەسابی کراو جینوسایدکراو، بۆ هەزاران ژنی ئیغتیساب کراو، بۆ کرێن و فرۆشتن و مامەڵە بە ژنانەوە لە بازاری “عوکاسی” سەردەمدا…وە بۆ سەدان هەزار ئاوارە، نیگەرانییەکیان نییە و لەوەش زیاتر خەریکن سات و سەودای پێوە دەکەن، کەچی لەبەرامبەر گێڕانەوەیەکی کورتدا، هەراسان دەبن و غەرەبی ناتوانایی و پشت کردنە خەڵکی قەسابی کراو… گڕ بەردەداتە بەرژەوەندییەکانی ئەو کات و ئێستایان.
ئەم جەنابانەی بە نیشاندانی گۆشەیەک لە درامای تەوەکولی لەسەر مەخمور، ئاوا هەراسانن، ئامانجیان ئەوەیە ژیانی پڕ دراماو تراژیدی بێ وینەی خەڵکی بیبەشی ئێستای کوردستان، بشارنەوە و پەردە بدەن بەسەر تاوانەکانیاندا. دەیانەوێت دنیای شارستانی و چاوی کامیرا و فیلم سازان دەستیان بە درامای واقعی پڕ زوڵم و تاوانی رۆژانەی ژێر دەسەڵاتی بزوتنەوەی کوردایەتی نەکەوێت…
ئاخر نیشاندانی ئەوەی کە کریکاران و کارمەندان، کار دەکەن و موچەیان پێنادرێت، لەدرێژەی هەمان تاوانی رادەستکردنی خەڵکی شەنگالدا نییە بەداعش؟ ئاخر دانانی باج و رسومات لەسەر هەموو کایەکانی ژیانی هاوڵاتیان و وێرانکردنی خزمەتگوزارییەکان، لە دریژەی هەمان تاوانکاریدا نییە، کە هانا بۆ گەورە تیرۆریستی وەکو قاسم سولەیمانی ببەیت ببێتە فریاد رەس؟
دەسەڵاتی سیاسی بزوتنەوەی کوردایەتی ئەگەر هێشتا فیلمێکی دەرنەهێنرا و نیشان نەدراو و بە دراما نەکراوە، لە ئاستی دنیادا، بەڵام لە دنیای واقعیدا و بۆ خەڵکی کوردستان، فیلم نییە، مەرگەساتی رۆژانەیە.
چۆن ئەوانەی بەشێکن لەتاوانی کوشتاری دەیان هەزار کەسی دەستی داعش کراوە بە فیلم و دراما، ئاواش ئەوەی سام و ترسی داعشی تێکشکاند کراوە بە دراما و فیلم، بەلام لەم دراما و فیلمەدا، ئەکتەرەکانی ژنان و پیاوانی کۆبانێن… خۆبەخشەکانن، نە پارتی و نە قاسم سلێمانی، نە ئەمریکا و نە غەرب… نە ئەوانەی سیڵڤیان دەگرت!!
تەنها کاتێک دەتوانرێت تاوانی تەواوی دەسەڵاتی رەشی بزوتنەوەی بکرێتە فیلمێکی واقعی، کە ئەم دەسەڵاتە بەتەواوەتی رابماڵرێت… ئەو کاتەش بە دەیان هەزار ئەکتەر و بە هەزاران فیلم ناتوانن ئەو زنجیرە تاوانانە نیشان بدەن، کە رۆژانە ئەو دەسەلاتە بەکردەوە ئەنجامی دەدەن، لەوانەیە فیلمی گەورە راماڵینی ئەو دەسەڵاتە بێت.
