لە ڕەمەزاندا کردنەوەی مزگەوتەکان لادانە لە ڕێنماییەکان !!…

نووسینی: سەردار عەبدوڵا حەمە …

 بەپێی بڕیارێکی حکومەتی هەرێم لە ڕەمەزاندا مزگەوتەکان دەکرێنەوە. دەبێ بپرسین لەسەر چ بنەمایەکی زانستی ئەم بڕیاڕە دراوە لەم کاتە مەترسیدارەی کۆرۆنادا کە شەپۆلی سێەمی کۆرۆنایە و زۆرتر خەڵک لە دوو شەپۆلەکەی تر تووشی کۆرۆنا دەبن و مردنیش زۆرە؟

ئەم دەسەڵاتە هەمیشە دەبێ پیشانی بدا و بەڵگە بدا بەدەستەوە کە حکومەت کارێک ناکا لە بەرژەوەندی خەڵکی کوردستاندا بێت،  بەڵکو چی لە بەرژوەندی دەسەڵاتە گەندەڵ و دزو مافیاکەیدا بێ ئەوە دەکات .

 ئەو دەسەڵاتە دەیەوێ بەم کارەی دەم و دەست وقاچی خەڵک ببەستێ و دووریان بخاتەوە لە نارەزایەتی لە دژی خۆی  ئیتر  مووچە نادات و ژیانی خەڵک لە کاتی کۆرۆنادا دابین ناکا هەروەک چۆن  کە ٣٠ ساڵە لەسەر حسابی برسیکردن و هەژارترکردنی خەڵک خۆیان دەوڵەمەند کردووە دەیانەوێ بەردەوامی بدەن بەم بارودۆخە. ئەمجارە لەڕێگای مل کەچکردن لە بەرانبەر ئیسلامی سیاسی دا دەیانەوێ بەبێ دەنگی و بە ئارامی ئەو بارودۆخەیان بەردوام بێت .

هەموو ئەوە فێر بووین لە ماوەی یەکساڵ زیاتری بوونی کۆرۆنادا کە زیاتر ئەو کەسانە تووش دەبن و دەمرن کە تەمەنیان زۆررە وە کۆرۆناش خاتری هیچ کەس ناگرێ لەبەر هیچ هۆیەکی و ئایینی و غەیبی دەست پارێزی ناکا و هەموان وەک یەک دەبینێ، ئیتر بۆچی دەبێ کەسە بەتەمەنەکان و گەنجەکان بەهۆی سەردانی مزگەتەوە بکرێنە نێچیری کۆرۆنا و کۆمەڵگەش زیاتر بخەنە مەترسیەوە. 

منداڵان لەبەرئەوەی سیستەمی بەرگریان لە بەتەمەنەکان و گەنجەکان باشترە بۆ ڕووبەڕووبوونەوەی ئەم ڤایرۆسە نەگریسە کەچی دەرگای قوتابخانەیان لێ دادەخرێ و مزگەوتەکانیش بۆ بەتەمەنەکان دەکرێنەوە! ئەمە پێچەوانەی پێوەرە زانستی و ڕێنمایەکانی بەرەنگاری ڤایرۆسی کۆرۆنایە. 

بەپێی بەڵگە زانستیەکان ئەگەر بڕیار بێت لە نێوان مزگەتەکان و قوتابخانەکان هەڵبژاردن بکرێ بۆ ئەوەی کامیان کراوە بن دەبێ قوتابخانەکان کراوە بن و مزگەوتەکان دابخرێن یا دەبێ هەردووکیان دابخرێن .

لێرەدا هەردوولا، دەسەڵاتی کوردایەتی و ئیسلامی سیاسی هاوئامانجن لەوەی هەردوولایان گیان و ژیانی ئینسانیان بۆ گرنگ نییە وە چەند کەس تووشی کۆرۆنا دەبن و دەمرن  گرنگ نییە. هەروەک هەردوولا دژی ئازادی و مافەکانی تاکی کۆمەڵگاشن لەوەی لەڕەمەزاندا هەردوولا هێرشیان زیاتر دەبێ بۆ سەر ئەو کەسانەی بەڕۆژوو نابن و بەشێوەی جۆراوجۆر ئیهانەو سەرکوتیان دەکەن. ریستۆرانتەکان دادەخەن بە هەزاران کرێکار بەبێ بمە بێکار دەبن ئەوەش لەو بارودۆخەدا ژیانی هەزاران خێزان دەبێتە ژیانی کولەمەرگی و دەیان کێشەی کۆمەڵایەتی لێ دەکەوێتەوە.

رێگاچارە ئەوەیە لە کوردستان دەبێ ئایین بکرێتە کاروکردەوەی تاک و لەدەوڵەت و دەسەڵات جیابکرێتەوە بۆ ئەوەی هەموو خەڵک  ئازاد بن.  ئاییندارانیش بۆخۆیان دەتوانن ئازادانە چۆنیان بوێ ئیتاعەی خۆیان بکەن، بەڵام مەترسی بۆ سەر ژیانی خەڵک و خۆشیان دروست نەکەن .

Check Also

وتەی حزبی کۆمۆنیستی کرێکاریی کوردستان لە لایەن (عامر سابیر)ەوە لە یادی یازدە ساڵەی تیرۆری (سەردەشت عوسمان)دا لە سیدنی ئوسترالیا….

ئیوارەتان باش، من عامر سابیرم، وتەی حزبی کۆمۆنیستی کرێکایی کوردستانتان پێشکەش ئەکەم. سەرەتا لە یادی …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *