دواپەردە!

ابراهیم حسێن

دەوردوکانی بورژواژی کوردایەتی کە باهۆزی دیموکراسییەتی موشەکی کرۆز و جەنگ و میلیتاریزم و وێرانکاری ڕۆژئاوا و ئەمریکا و لەجەرگەی یەکێک لە سینارۆ ڕەشەکانی ژیانی مرۆڤایەتی، شانسی ئەوەی بۆ ڕەخساند بەخەونی دەسەڵات بگا و فرسەتی ئەوەی پێدا بکرێتە مەئموری پاراستنی چاڵەکانی نەوت و پاسەوانی گۆپاڵ بەدەست بەسەر چینی کرێکار و جەماوەری بێبەش لە کوردستان، ئێستا لە بنبەستێکی تا بینەقاقادا گیری کردوە. ئەم دەورودوکانە چینایەتیەی کوردایەتی، ئیتر بەشێوەیەکی جیددی و بێگەڕانەوە کەوتۆتە بەرامبەر کێشە و پرسیاری  مانەوە.  چیتر پرسیاری مانەوە و ڕۆیشتنی ئەم دەسەڵاتە بێکەڵکە چینایەتیەی کوردایەتی تەنیا ئارەزوی دڵی ئێمە کرێکاران و ژنان و لاوان و جەماوەری بەرین و تەنیا ئەنجامگیری ئێمە کۆمۆنیزم و حیزبی کۆمۆنیستی کرێکاری نیە،  بەڵکو واقیعیەتێکی ڕون و دانپیانراو و کابوسێکی ناوخۆی ئەو دەسەڵات و دەورودوکانە چینایتیە و ناوخۆی خێزانی بۆرژوازیە بە هەموو باڵەکانیەوە.

ئیتر لەسەر پرسی مانەوە، دەعوا و دەمەقاڵە و شەڕە دەنوکیانە. لە بەڕێخستنی سیناریۆی جۆراوجۆری درۆ و ڕیاکاریدا خەریکن پێشبڕکێی یەکتردەکەن و پەردە لەسەر یەکتر هەڵدەماڵن. هەریەکەیان لەهەوڵی ئەوەدایە بیسەلمێنێ کامەیان کەمتر یان زۆرتر دژی خەڵک بوون. کامەیان زیاتر و کەمتر لە سەپاندنی ئەم شێوە ژیانە نالایقە و لەسەپاندنی بێمافی سیاسی و ئابوری و ئەو داماویە گەورەیە ڕۆڵی هەبووە. کامەیان زیاتر یان کەمتر ڕۆڵی هەبووە لەوەی کە ئەم کۆمەڵگەیە کارەبای نەبێ، خوێندن و سیسەمێکی تەندروستی دروست و پەروەردە و فێرکردنێکی ئەمڕۆیی و ژیان و گوزەرانێکی شایستەی نەبێ. یاسای کار و ئەو یاساو ڕێسایانە نەبن کە ماف وحورمەتی کرێکار و هاوڵاتیانی کۆمەڵگە لەلانی هەرە کەمی خۆیدا بپارێزێ. سەرپەنا و مەسکەن و بیمەی بێکاری و بیمە کۆمەڵایەتیەکان خەون و حەسرەتی هاوڵاتیان بێت. کێیان زیاتر یان کەمتر بەرپرسە لەوەی لێشاوی گەنجی ئەو وڵاتە سەرگەردان و بێئایندە بن لەهەر جۆرە دەرفەتێک بۆ بەگەڕخستنی تواناکانیان بێبەش بکرێن، یان ڕێگاکانی هاتونەهاتی گەڕان بە دوای ژیانێکی کەمێک شایستەتر بگرنەبەر، یان لە پێناو ژیان و کەرامەت و ئازادی خۆیان لە دژی ئەو دەسەڵاتە چینایەتیە بجەنگن و بکەونە بەرامبەر گۆپاڵ بەدەستەکانی پاسەوانەکانی چاڵەکانی نەوت وکۆمپانیاکان. لێشاوی ژنی ئەو مەملەکەتە تیرۆر و ڕەشەکوژ بکرێن و هەر ڕۆژێک لە تەمەنی ئەم دەسەڵاتە چینایەتیە عارێکی تر و برینێکی ترلە تەوێڵی خۆی و لە ویژدانی ئەو کۆمەڵگەیەدا هەڵکەنێ. کێیان زۆرتر یان کەمتر لە سەپاندنی ئەو بازاڕی کاری هەرزانە بەرپرسەکە کە چینی کرێکارێکی گەورە کە بزوێنەری بەرهەمهێنان و ژیانی شاری و شارنشینی و خوڵقێنەری سەروەت و سەرمایە و نازونیعمەتە، بە بێمافیەکی گەورەی ئابوری و سیاسی و کۆمەڵایەتی،  مەحکوم کردوە.

ئەم پێشبڕکێی درۆ و بەیەکدا هەڵشاخانەی ئەندامانی نێو ئەو خێزانە چینایەتیەی کوردایەتی و ئیسلامیەی کوردستان لە پرسی مانەوە دا بۆ ساغکردنەوە و دروستکردنی قارەمانێکی کارتۆنی خەیالیە تا لە ڕێگایانەوە هەم بتوانن جارێکی تر کڵاو بکەنەسەری خەڵک و هەم بتوانن کاتێکی زۆرتر بۆ مانەوە بکڕن. لە ئیدیعاکانی پارتی و بارزانی سەبارەت بە تەسلیم نەبوون بە بەغدا لە کێشەی نەوت و پێویستی بەرگری لە یەکڕیزی کوردی و بەرەنگاری لەپێناو ئابوری سەربەخۆ(سەڵاحیەتی فرۆشی نەوت بە شێوەی تائێستای) تا هاشوهوشی دۆنکیشۆتیەکانی تاڵەبانیەکان سەبارەت بە یەکدەستەترکردن و ڕێخکستنەوە و گێڕانەوەی هەیبەتی  یەکێتی مام لەبەرامبەر بارزانیەکان و لێدانی گەندەڵی، لە تانکەرە ئاوەکانی شاسوار و هەرزانکردنی بەنزین بۆ کڕینی دڵی خەڵک تا هاتنی پلاسخارت و پشی پشیکردنەکەی لەگەڵ سەرۆکی حیزبەکانی پاسەوانی نەوت و حەواشیەکانی لەهەردوو زۆنی زەرد و سەوز، بەشێکن لە تەقەلای هێزەکانی بۆرژوازی کورد و پارێزەرە نێو دەوڵەتیەکانیان بۆ پەیداکردنی وەڵامێک و دەریچەیەک بۆ مانەوە و ڕزگارکردنی ئەم ئەزمونە چینایەتیە پەککەوتەیە.

بەڵام بنبەست و پەککەوتەیی ئەم دەورودوکانه لەوە قوڵتر و بنەڕەتیتر و چارەهەڵنەگرترە کە بکرێ بەم سیناریۆسازی و هاشوهوشە وەڵام وەربگرێتەوە. پوختە و ڕۆحی ئەم هەلومەرجە ئەوەیە کەکۆمەڵگەی کوردستان بەشێوەیەکی بنەڕەتی دوچاری بەرککەوتنێکی گەورە بۆتەوە لەگەڵ ئەم دەورودوکانە چینایەتیەی ئەمڕۆی کوردستان. هەربۆیە وەڵامی ئەو پرسیارەی ئایا کۆمەڵگەی کوردستان دەتوانێ بەفەڕزی درێژەکێشانی ئەم کۆنەپەرەستیە بۆرژواییە، بە هیچ ئایندەیەکی تەنانەت کەمێک باشتر ئومێدەواربێت، نەخێرە. چاوەڕوانی ئەوەی کە بکرێ کوردستانێکی ئازاد و خۆشبەخت هەبێ،  بەڵام  بارزانی و تاڵەبانی چارەنوسی کۆمەڵگەیان بەدەستەوەبێ،  خوێندن و نەوت و غازو کارەبا و نان و ئاوی خەڵکیان بەدەستەوە بێ، لە دەوری زۆنی زەرد و سەوز بە هێزی میلیشیا و زیندان ، حەساری ترس و سەرکوتیان تەنیبێ، ئەفسانەیە. نەک هەر کوردستانێکی ئازاد و خۆشبەخت، بەڵکو کوردستانێک کە هاوڵاتیان ژیان و گۆزەرانێکی ئاسایی و کارەبا و خوێندن و فیرکردنێکی دروست و خزمەتگوزاری و بیمە تەندروستی و  کۆمەڵایەتیەکانیان هەبێ، تەنانەت ئەوەی کە چاوەڕوانی ئەوە بکرێ بارزانیەکان و تاڵەبانیەکان و علی باپیر و شاسوارەکان دەتوانن بگۆڕێن، نوێنەرانی پەرلەمانتاریزم و پەرلەمان و هەڵبژاردنێکی دروست بەڕێدەخەن و ڕێزی خەڵک و تەنانەت یەکتر دەگرن و کێشەوبێشەکانیان بەشێوەی پەرلەمانی و ڕاگۆڕینەوە و دەنگدان یەکلا دەکەنەوە، ئەفسانەیە.

کۆمەڵگەی کوردستان، چینی کرێکار و ژنان و نەوەی ئەم سەردەمەی کوردستان شانسی خۆیان لەگەڵ دەسەڵاتی بۆرژوازی خۆیی، تاقیکردوە و گەیشتن بەم بەدبەختیە چینایەتیەی ئێستا، گەیشتن بە کۆمەڵگەیەک کە ئاماری کوشتنی تیایدا بە ئەندازەی شەڕێکی گەورە و خوێناویە، گەیشتن بە بە کوشتدانی هەزاران لەڕۆڵەکانی چینی کرێکار و جەماوەری بێبەش لەشەڕی دەسەڵات و کۆنتڕۆڵکردنی سەروەت و سامانی وڵات، گەیشتن بە وڵاتێکی خاڵی لە شادی و خۆشبینی و لێواو لێو لە گەنج و لاوی بێکار و بێ ئایندە،  گەیشتن بە زۆنی زەرد و سەوز و نارنجی، گەیشتن بەو ڕۆژگار و دەورودوکانە کە ڕزگار بوون لێی بووە بە ئارەزو و حەسرەتێکی گەورە، بەجۆرێک کە هەر مرۆڤێکی شەریف ئەگەر بتوانێ، ڕۆژێک ئامادە نابێ تێیدا بژی. نەک هەرئەوە، بەڵکو شانسی خۆیان لەگەڵ بەڵێندەرانی چاکسازی و گۆڕانکاری بەشێوەی بۆرژوایی و ناشۆڕشگێڕانە تاقی کردەوە، کەسانێک کە خواست و ئارەزوی کرێکاران وجەماوەری خەڵکیان بۆ گوڕانکاری و ڕزگاربوون لەو حاکمیەتە چینایەتیە گۆڕی بوو بە قۆنتەراتی سیاسی لەپێناو ئارامی سیاسی و دورخستنتەوەی کابوسی هاتنەمەیدانی شۆڕشگێڕانەی چینی کرێکار و جەماوەری بێبەش لەپێناو ئاڵوگۆڕ و ڕزگاربوون لەو دەورودوکانە چینایەتیەی کوردستان. سەرەنجام بینیمان ئەو پڕۆژەیە چۆن بوو بەگاڵتەجاڕ و بە هەواداچوو و نوێنەرانی ئەو پڕۆژەیە بوون بە گاڵتەجاڕ. بینیمان چۆن ئەو دۆنکیشۆتانەی پێیانوابوو دەتوانن لەڕێگەی سێرک و نمایشی کارتۆنی پەرلەمانیەوە خواست و خولیای کۆمەڵگەیەکی چەند ملیۆنی بۆ ئازادی و خۆشبەختی  بۆ ماوەیەکی دورتر بەنج بکەن.

سەرەنجام تەنانەت پێش ئەوەی کە وەڵامی ئەو کڵاولەسەرکردنە لە کرێکاران و خەڵکی بێبەش  وەربگرنەوە، تەنانەت  پێش ئەوەی کە خەڵک بەڕادەی پێویست ئامادە بێت ڕاستی چینایەتی پشتی( بەڵێنی دەیگۆڕین)ی  بزووتنەوەی گۆڕان، لە زمانی کۆمۆنیزمی کرێکاری و حیزبەکەیەوە بیستێت، براگەورەی چینایەتیان لەزۆنی زەرد بە ناردنی زێرەڤانی بۆ سەر سلێمانی و زۆنی سەوز و مەرەخەسکردنی سەرۆکی پەرلەمان و ڕوداوی بازگەکەی دێگەڵە، وەهمی پەرلەمان و پەرلەمانبازی بە هەوادا برد.  ئەو ڕاستیەی بە عەمەلی بە خەڵک ڕاگەیاند کە کۆمۆنیستەکان لەسەر حەقن. لەسەر حەقن لەوەی کە ئەم دەورودوکانە بێکەڵکە بە منجەمنج و وردەوردە  و لەڕێگەی جوڵانەوەی فشار و پاڕانەوە بۆ گۆڕانکاری ناگۆڕێ، بەڵکو دەبێ لەنەبەردێکی سیاسی و چینایەتی جیددیدا چینی کرێکار و کۆمۆنیزم و جەماوەری بێبەش ئەم کۆنەپەرەستیە شکست پێ بێنن و بەسەریدا سەرکەون.

وەڵامی نیازی کۆمەڵگەیەکی چەند میلیۆنی بە ژیانێک سایستە تەنکەرە ئاو و بەنزین هەرزانکردن و بەڵێنی گەورە و بچوکی  دۆنکیشیۆتیانەی گەندەڵی نیە لەلایەن هێزگەلێک کە گەورەبووی ئەو زۆنگاوەن. هاشوهوشی  دواشەڕ لەپێناو هێشتنەوەی فرۆشتنی قاچاغی نەوت لەژێر ناوی ئابوری سەربەخۆ و قەوارەی هەرێم لەلایەن سەرانی زۆنی زەرد و کودەتا و  هەڵبژاردنی کارتۆنی و تەنانەت ڕانانی فەزای ترس و سەرکوت و خۆڕانانی گێڕانەوەی یەکێتی مام  و هیچ یەک لەو سیناریۆیانە نیە. بەڵکو نەبەرد و کێشمەکێشێکی قوڵ و بنەڕەتی  چینایەتیە و ناوەڕۆکی ئەو دەعوا و کێشمەکێش لەسەر بوون و نەبوون و مانەوە و ڕۆیشتنی ئەم دەسەڵات و قەوارە بۆرژواییەی کوردستانە. ئەم نەبەردەش نەبەردێکی چینایەتی و سیاسیە. کۆمۆنیزم  وحیزبی کۆمۆنیستی کرێکاری بەشێک نیە لە بزوتنەوەی فشار بۆ سەپاندن و داواکردنی هەندێک گۆڕان لە پەیکەرەی ئەم دەسەڵاتە چینایەتی، بەڵکو جۆڵانەوەیەکە بۆ ئاڵوگۆڕ و ڕزگاری لەو دەسەڵاتە چینایەتیە و ئامرازێکە بۆ سەرکەوتنێکی سیاسی چەپ و سۆسیالیستی لە کوردستان.

چینی کرێکار و نەوەی ئەمڕۆی کۆمەڵگە و ژنان و بێبەشانی کۆمەڵگە بۆ ئەوئاڵۆگۆڕە و بۆ ئەو سەرکەوتنە سیاسیە لەشەڕ لە پێناو ئازادی و بەختەوەری و لە پێناو بەدەستەوە گرتنی چارەنوسی خۆیان،  پێویستیان بە کۆمۆنیزم و حیزبی کۆمۆنیستی کرێکاری و بە ڕابەرانی ڕادیکاڵ و ئازادیخوازی چەپی کۆمۆنیست و کرێکاری هەیە تا لەو نەبەردە سیاسیە دا سەرکەون.

بێگومان یەکێک لەهەرەفاکتەرە گرنگەکان کەوایکردوە تا ئێستا ئەم هەلومەجە درێژە بکێشێ و ئەم دەسەڵاتە بێکەڵکەی سەرمایەداری لە کوردستان ژیان و ئازادی و خۆشبەختی و نان و ئاو سەروەت و نیعمەتەکانی کار و هەڵسوڕانی کۆمەڵایەتی وچارەنوسی کۆمەڵگەی لەدەستدابێ، هەوڵ و تەقەلای بۆرژوازی بووە بۆئەوەی کۆمۆنیزمی کرێکاران، کۆمۆنیزمی ڕادیکاڵ و حیزبی کۆمۆنیستی کرێکاری بخاتە گۆشە تاریکەکانی کۆمەڵگەوەو لە کۆمەڵگا دایببڕیت. بەبێ لێدان و سەرکوت و خستنە پەراوێزی شوراو جوڵانەوەی شورایی شارەکانی کوردستان وکۆمۆنیزم و حیزبی کۆمۆنیستی کرێکاری  ئەم بەدبەختیەی ئەمڕۆی کوردستان، بەبێ کوشتاری کۆمۆنیستەکان لە سلێمانی، بە بێ تیرۆری شاپور و قابیل ونەزیر عومەر و فەرهاد فەرەجەکان و قەدەغەکردنی کۆمۆنیزم لە سلێمانی و هەولێر ئەم دەورودوکان و ئەم بەدبەختیە چینایەتیە ی ئێستا، بەو ئاسانیە مەیسەر نەدەبوو.

ئەگەر پەردەکانی یەکەمی هاتنە سەرکاری ئەم کۆنەپەرەستی و قەوارە چینایەتیەی کوردایەتی بەسەرکوتی کۆمۆنیزم و جوڵانەوەی شورایی و کوشتاری ژن و نەعرەتەی ئیسلام و نەتەوەپەرەستی دەستی پێکرد و پێی گرت، ئەوا پەردەی کۆتایی ئەم دەورودوکانە چینایەتیە بەناچاری جارێکی تر لە نەبەردیدا لەپێناو کۆنتڕۆلکردن و سەرکەوتن بەسەر ئەو کۆنەپەرەستیە بورژواییەی کوردایەتیدا، باوەش بۆ  ئەو هێز و ڕەوتە ڕادیکاڵ و شوراییە کرێکاری و کۆمۆنیستیە دەکاتەوە و لەهەرکات زیاتر داوای دەکا. ڕۆژانی داهاتوی خەباتی چینایەتی لە کوردستان ئەو پرسیارە دەخاتە سەرمێزی هەر ڕابەرێکی جوڵانەوەی کرێکاری و  کۆمۆنیستی و بزوتنەوەکانی خوازیاری ئاڵۆگۆڕی بنەرەتی!

۱۹.٦.۲.۲۲

 

 

 

Check Also

گفتوی بڵاوکراوەی ئۆکتۆبەر لەگەڵ خسرەو سایە، سەرۆکی مەکتەبی سیاسی حزب سەبارەت بە داگیرکردنی پەرلەمان لەلایەن لایەنگرانی موقتەدا سەدرو کێشەی پێکهێنانی حکومەتی عێراق

ئۆکتۆبەر: لە کۆتایی مانگی تەموزدا و بۆماوەی چەندرۆژ لایەنگرانی موقتەدا سەدر بینای پەرلەمانی عێراقیان داگیرکرد. …

وەڵامێک بنووسە

پۆستی ئەلکترۆنیکەت بڵاو ناکرێتەوە .