پشتیوانی لە خواستی رەوای مامۆستایان و وانەبێژان و نارەزایەتیەکانیان دەکەین!

وا بریارە بەیانی یەک شەممە ٢٨/١/٢٠٢٤ خۆپیشاندان و نارەزایەتی ڕەوای مامۆستایان بۆ موچە و دامەزراندن و پلە بەرزکردنەوە بەشێوەی سەراسەری لە سلێمانی و شارەزور و هەڵەبجەو گەرمیان و ئیدارەی راپەرین..، بەردەوام بێت.  لەبەرامبەردا دەسەڵاتداران لەباتی ئەوەی  وەڵام بەخواستی مامۆستایان و وانەبێژان بداتەوە و درکی هەلومەرجی ژیان و گوزەرانیان بکات، پەنا بۆ سزدان و گوشار هێنان و هەڵخرانی حاکم و مەلا و پیاوانی ئاینی دەبات، بۆ رووبەڕووبونەوەی نارەزایەتییەکانیان. ئەم مامەڵەی دەسەڵات دەبێ ریسوا بکرێت. هاوکات دەبێ هەوڵی حاکم و مەلا و پیاوانی ئاینی کە بەرگری لە دەسەڵات دەکەن و لەدژی خواستی مامۆستایان و وانەبێژان و نارەزایەتی حەقخوازانەیان، پروپاگەندە بۆ شکاندنی بایکۆت دەکەن، لەقاو بدرێ و وەک نیشانەیەک لەناکۆکی حاشاهەڵنەگری ئەم کاسەلێسانەی دەسەڵات، پەنجەییان بۆرابکێشرێت.

نارەزایەتی و خۆپیشاندانی زیاتر لە ٤ مانگەی ئۆردوێکی بەرینی مامۆستایان بۆ موچەو دابەشکردنی لەکاتی خۆیدا و وە بۆدامەزراندنی وانەبێژان، خواستێکی هێندە رەوایە، کە پیویستە سەرجەم جەماوەری بیبەشی کوردستان و لە پیشیانەوە سەرجەم کارمەندەدانی خوێندن و پەروەردەو کەس و کاری خوێندکاران، بچنە پشتیان و بە نارەزایەتیەکانیانەوە پەیوەست بن. هاوکات مامۆستایان و وانەبێژانی ناڕازی پێویستە بە ورەیەکی بەرزو بەپشت بەستن بەخواست و داوا رەواکانیان، دریژە بە خۆپیشاندان و نارەزایەتیەکانیان بدەن و بە ریزی یەکگرتوویان و بە نیشاندانی هیزی سەراسەری و یەکگرتوانەی خۆیان، وەڵامی هەرەشە و چاوسورکرانەوەی دەسەڵات و پلانی درز خستنە نێو ریزەکانیان و و هەوڵی کۆنەپەرستان وکاسەلێسانی دەسەڵاتداران بدەنەوە.

ئیمە لە حزبی کۆمۆنیستی کرێکاریی کوردستان لەکاتێکدا لە کەنار مامۆستایان و وانەبێژاندا بۆ خواستە رەواکانیان رادەوستین، هاوکات بەتوندی ئیدانەی پلان و چاوسورکردنەوە و گوشار هێنان و بەدەستەوە گرتنی حەربەی سزادانی مامۆستایان و وانەبێژان لەلایەن دەسەڵاتەوە، دەکەین. هاوکات هەر هەوڵێکی حاکم و مەلا وسەرۆک عەشیرەت وئەوانەی کە بۆ دژایەتی خواستی مامۆستایان و نارەزایەتی حەقخوازانەیان، لەپاڵ دەسەڵاتدا ڕاوەستاوان، ریسواو شەرمەزار دەکەین.

بەردەوامی و سەرکەوتن بۆ بزوتنەوەی نارەزایەتی مامۆستایان و وانەبێژان…

حزبی کۆمۆنیستی کرێکاریی کوردستان

٢٧/١/٢٠٢٤

 

Check Also

ژمارە ٧٨ی بڵاوکراوەی ئۆکتۆبەر کەوتەبەردیدی خوێنەرانەوە!

ئۆکتۆبەری ژمارە ٧٨ کەوتە بەردیدی خوێنەرانەوە، ئۆکتۆبەر، ئۆرگانی حزبی کۆمۆنیستی کرێکاریی کوردستان. ٢٥ی شوباتی ٢٠٢٤ …