ئایارێکی جیاواز!

بنار مستەفا

لە کوردستان و جیهان، ئەمساڵ یەکی ئایار جیاوازی زۆری بوو لەگەڵ ئایاری ساڵانی ڕابردوو. ڕۆژی جیهانی چینی کرێکار بەمانای تایبەتی خۆی و وەک سمبوڵی خەباتی چینایەتی و ئەلتەرناتیڤێک بەرانبەر سیستەمی سەرمایەداری خۆی نیشاندا.

جەنگ، برسێتی و گرانی مۆتەکەی جەماوەری کرێکار و زەحمەتکێشی جیهان بووە لە ماوەی ڕابردوودا. بە ئەزموون دەرکەوتووە، کە سیستەمی سەرمایەداری نەک ناتوانێت خۆشگوزەرانی بۆ جەماوەری ستەمدیدە بەدیبهێنێت، بەڵكو ڕۆژانە ژیان و گوزەرانیان سەختتر و دژواتر دەکات. باجی قەیرانی ئابووری بەسەر کرێکاراندا دەشكێننەوە و کەڵەکەی سەرمایەی سەرمایەداران دەپارێزن.

هەر بۆیە ئایاری ئەمساڵ بەرجەستەتر وەستانەوە بوو بەڕووی ئەم سیستەمە و حکومەت و دارودەستەکانی، کە هێرشی توندیان بەڕووی کرێکاران و خەڵکی زەحمەتکێش بەڕێخستووە و نیازی توندکردنەوەی زیاتری هێرشەکانیانن. لەزۆر جێگەی جیهان بەشداری لە چالاکییە ئایارییەکان و بەرزنرخاندنی ئەم ڕۆژە بە بەراورد بە ساڵانی ڕابردوو زیاتر بوو. هەروەها خەسڵەتی چینایەتی و نیشاندانی چینی کرێکار، وەک هێزێکی ناڕازای و ئومێدبەخش بە کۆتایی سیستەمی ئێستا، لەزۆر جێگەی جیهان لە ئایاری ئەمساڵدا بەڕوونی دیاربوو.

لە کوردستانیش ئەم جیاوازییە بینرا و بیسترا. چالاکی یەکی ئایاری کرێکاران و بڵاوکراوەی دەنگی کرێکار لە بازیان، نمونەیەکی تازە و گرنگی خەباتی چینی کرێکاری کوردستانە. بەرزڕاگرتنی ئەم ڕۆژە لەلایەن خودی کرێکاران، بەشداری بەرچاویان و بەیانکردنی خواستەکانیان، ئومێد دەداتەوە ئەوەی بابەتی ژیان و گوزەران و خەباتی کرێکاری لەنێوخۆی کرێکاران خۆیاندا زیندوو بێت و بەرەو گۆڕانکاری ڕیشەیی هەنگاوبنێن. ئەمەش دەرگایەکی تر بەڕووی خەباتی کرێکاراندا دەکاتەوە و سەرمایەدار و دەسەڵاتداران ناتوانن وەک جاران ئاسان دەست بۆ سەرکوت و چەوساندنەوە بەرن. ئەم چالاکیەی ئایار، گرنگی پڕمانای خۆی هەیە و بەردەوامبوونی لە ساڵانی ئایندە، جێگەوڕێگەی خەباتی کرێکارانی کوردستان دەباتە ئاستێكی باڵاتر.

هەروەها بەشداری زۆری جەماوەر و کرێکاران لە مارشی یەکی ئایار لە سلێمانی، نیشانیدا کۆمەڵگای کوردستان تەنها مەیدانی ناسیۆنالیزم و ئیسلامی سیاسی نییە، بەلكو بزووتنەوەیەکی فراوانی جەماوەری بوونی هەیە، کە لەپێناو ئازادی و یەکسانی و کۆتاییهێنان بە ستەم و چەوساندنەوە خەبات دەکات. هێزێکی تر، کە دەکرێت مایەی ئومێدی زۆری بێبەشان بێت، ئەمساڵ فراوانتر خۆی نیشاندا.

بوونی هێزێکی کرێکاری پێداویستیەکی گرنگە لە بەرانبەر دەسەڵات و هێزەکانی تردا، کە دەیانەوێت دۆخ و گوزەرانی کرێکاران لەجێگەی خۆیدا بمێنێتەوە و تەنها لە دەسەڵاتدا گۆڕانکاری شکڵی ئەنجام بدەن. لە کوردستانیش ئەزموون کراوە، کە ژیان و گوزەرانی کرێکاران ئاڵوگۆڕێ بەسەردا نایەت، گەر کرێکاران خۆیان لە مەیدان نەبن و لە پێناویدا نەجەنگێن. تا سەرمایەداریش بمێنێت، ڕزگاری یەکجاری مەیسەر نابێت. ئایاری ئەمساڵ نیشانی دا، کە هێزی ئاڵوگۆڕ و ژێرەوژوورکردنی سیستەمی ئێستا، بوونی هەیە و خەریکە چالاکانەتر دێتە مەیدان.

سەرەتای ئایاری ٢٠٢٤

 

Check Also

وتەی ڕێکخستنی ئوسترالیای حیزبی کۆمۆنیستی کرێکاریی کوردستان

لە مەراسیمی ڕێزلێنان لە ژیان و خەباتی هاوڕێ حوسێنی مورادبەگی لە سیدنی، ئوسترالیا.  عامر سابیر …