hkkurdistan
پەیامێک بۆ هاوڵاتیانی کەرکوک!
کرێکاران، زەحمەتکێشان، خەڵکی ستەمدیدەی کەرکوک:
دوای کەمپەینێکی فراوان بۆ هەڵبژاردنی ئەنجومەنی پارێزگا و بەدەستەوە گرتنی هەموو ناسنامە قەومی و تایفییەکان، بۆ سەندنەوەی ناسنامەی هاوڵاتی بوون لە ئێوە، و دوای بەخشینەوەی دەیان بەڵێن و وادە و فریوکاری، سەرئەنجام هەڵبژاردن کۆتایی هات. هەڵبژاردن لە کەشی باڵادەستیی حیزبە دەسەڵاتدارەکان و بە دەستێوردارنی دەرەکی و بە پشت بەستن بە دزینی داهات و قوتی ئێوە هاوڵاتیان، بەڕێوەچوو.
پەیامی لایەنەکانی هەڵبژاردن نەعرەتەی قەومی و تایفی و درۆ و فریوکارییەکی ئاشکرا بوو، ئەو لایەنانەی کە زیاتر لە ٢٠ ساڵە دەسەڵاتیان بەسەر ئێوەدا داسەپاندووە. چ کارنامەی دەسەڵاتی بۆرژوازی کورد کە لە ساڵی ٢٠٠٥ وە تا ساڵی ٢٠١٧ درێژەی کێشا، چ دەسەڵاتی ناسیۆنال ئیسلامی شیعی، کە لە ساڵی ٢٠١٧ وە تا ئێستا دەسەڵاتی کەرکوکیان بەدەستەوەیە، جگە لە جیاکاری و دنەدانی قەومی و ڕشتنی تۆوی دووبەرەکایەتی و سەرکوت و تاڵانی و دزی و سەرانە سەندن و بێمافی و نەبوونی خزمەتگوازری و نائارامی و سەندنەوەی مافی پێکەوەژیانی ئاسایی و ئارامی ئێوە، زیاتر شتێکی تر نەبووە. هەموو ئەو لایەنە سیاسیە بۆرژوازیانەی لە هەڵبژاردندا بەشدارییان کرد و “شەیپوری دیموکراسییان” لێدا، ئەگەر ململانێی و جەنگێک لە نێوانیادا هەبێت، لەسەر دەست بەسەرداگرتنی کێڵگە نەوتییەکان و تاڵانی و دزییەکی ئاشکرایە، لە کاتێکدا ئێوە هاوڵاتیانی کەرکوک بە کورد و عەرەب و تورکمان و کلدان و ئاشوریەوە، لە سەرەتاییترین خزمەتگوازری و لە کەشێکی ئارام و لە سادەترین ماف و ئازادییەکانتان بێبەش کراون و لەناو شارێکدا کە دەریای نەوت و سامانە، برسی و بێکار و نەدار كراون و سیمای شاریشیان هێندە شێواندووە کە کەرکوکیان گۆڕیوە بە وێرانە.
چ ناسیۆنالیزمی عەرەبی شیعی و ئیسلامی و چ ناسیونالیزمی کورد و تورکمان بە بەدەستەوە گرتنی دروشمی” کەرکوک شارێکی عەرەبییە، کەرکوک قودس و دڵی کوردستانە، کەرکوک تورکمانییە” دەیانەوێت ناسنامەی ئینسانی و هاوڵاتی بوون، لە ئێوه دابماڵن و ئەو بەیەکەوە ژیان و کارکردن و ئارامی و تیکەڵاوییە مێژوویی و ئینسانی و بێ کیشەیە، درز تێ بخەن و دنەی قەومی و تایفی بدەن. ئەوەی ڕژێمی بەعسی لەگۆڕنراو بە سەرکوتی خوێناوی و بە سیاسەتی “بەعەرەبکردن، بەبەعسی کردن و ڕاگواستن” نەیتوانی ڕیزەکانی پێکەوەژیانی ئێوە بڕوخێنێ و دوژمنایەتی بخاتە نێوانتانەوە، ئێستا میراتگرانی بەعس و نۆکەرپیشەکانی ئێران و موچەخۆرەکانی ئەردۆغان، دەیانەوێت لەسایەی درۆی “هەڵبژاردن و دیموکراسی”دا، بە بەدەستەوە گرتنی ناسنامە قەومی و تایفیەکان ئەنجامی بدەن.
هاوڵاتیانی کەرکوک و جەماوەری بێبەش!
ئێوه لەم هەڵبژرادنەدا بینیتان چۆن هێزە سیاسی و کاندیده‌کانیان لە دەرگای ماڵ بە ماڵی ئێوه‌یان دەدا و پێیان دەووتن دەست بخەنە سەر برینەکانتان، چاوتان دابخەن، دەنگمان پێ بدەن. ئەوە بۆ ئەوە نەبوو خزمەتگوزاری و ماف و ئازادییەکان و ئارامی و ئاسایش و بوژانەوە و بەیەکەوە ژیانی ئێوه زامن بکەن، بەڵکو بۆ ئەوە بوو هەژموونی ناسنامە قەومی و تایفیەکان بەسەر ئێوه‌دا زاڵ بکەن و لەو ڕێگایەشەوە درز بخەنە ڕیزی هاوچارەنووسیتانەوە لەگەڵ یەکتری. کەچی سەرباری ئەو مەکینە ڕاگەیاندنە گەورەیەی حیزبەکان و بانگەشەکانیان، لەگەڵ ئەوەدا بەهۆی بەبارمتەگرتنی قوتی هاوڵاتیان و بەستنەوەی لەشکرێک لە هێزی ئەمنی و سەربازی و کرێگرتە بە ڕیزەکانی خۆیان و بزواندنی هەست و سۆزەوە توانییان بەشێک لە خەڵکی کەرکوک بۆ بەشداری لە هەڵبژرادن ببه‌ن، بەڵام هێشتا نیوەی زیاتری ئێوه هاوڵاتیانی ژێر ستەمی دەسەڵاتی بۆرژوازی عەرەب و کورد، بێ گوێدانە ناسنامەکان، بەشداری هەڵبژاردنەکانتان نەکرد و بە بایکۆت وەکو بەردەوامیی ناڕەزایەتی بەدژی دەسەڵاتی تاڵانچیانی حیزب و لایەنەکان، وەڵامی ئەم سیناریۆی هەڵبژاردنەتان دایەوە. ئەمەش نیشانەی هوشیاری و راوەستاوی ئێوه‌یە بەدژی دەسەڵاتی جیاخواز و تاڵانچیانەی باڵەکانی بۆرژوازی.
هەڵبژاردن تەواو بوو، بەڵام هیشتا تەپ و تۆز و لێکەوتەکانی بانگەشەی قەومی و تایفی لێكترازان و دنەدان، سایەی خۆی ماوە و لێرە و لەوێ سوکایەتی و هێرش دەبینرێت، بەڵام ئەوە دوور و نزیک پەیوەندی بە هاوڵاتیانی کەرکوکەوە نییە، بەڵکو کاری بەنەخشە و پلان بۆ دارێژراوی هێز و لایەنە قەومی و تایفیەکانه. هەوڵێکی شکستخواردووە بە ئاقاری درز خستنە ناو هاوڵاتیانی کەرکوکەوە، وەکو بەشێک لە کارنامەی نەنگینی ئەزمونکراویان، کە دەبێ ئەو حاڵەتانەش پوچەڵ بکرێنەوە.
بانگەشەی ناسیونالیستە عەرەبەکان و ناسیونالیزمی کورد لە بەرگری لە مافی تورکمانەکان، بۆ بەرگری لەماف و ویستی خەڵکی تورکمان نییە، بەڵکو بۆ کەڵک وەرگرتنە بۆ دەستڕاگەیشتن بە پۆست و ئیمتیازاتی زیاتر و زیادکردنی هێزهاوسه‌نگی.
جەماوەری تێکۆشەری کەرکوک!
بەجیا لە ململانێی نێوان لایەنەکانی دوای هەڵبژرادن لەسەر پۆست و ئیمتیاز و دەسەڵاتەکان، بەتایبەتیش لەسەر دزی و تاڵانی و هەژموونی بەسەر کێڵگە نەوتیەکاندا، کە بێ دوکەڵ و لێکەوتەی زیانبار بۆ سەر ئێوه و ژیان و گوزەرانتان تێ ناپەڕێت، هاوکات هەڵبژاردنێکی تر بۆ پەرلەمان” ئەنجومەنی نیشتیمانی” بەڕێگاوەیە. بۆیە پێویستە لەلایەکەوە لەدرێژەی ناڕەزایەتی و بایکۆتی ئێوه‌دا بە دەسەڵات و هەڵبژاردنە گاڵتەجارییەکەیان، بەچاوێکی کراوەتر و بەدەست خستنە ناو دەستی یەکتری و لە پێناو بە شکست کیشانی نەخشە و پلانی لایەنە سیاسییەکان لەدەوری یەکتری کۆببنەوە و لەلایەکی تریشەوە بۆ بەشکست کێشانی هەڵبژاردنی داهاتوو ئامادەتر بن. بۆ ئەوەش پێویست دەکات ناڕەزایەتی ئێوە بە دەسەڵات و سیناریۆکانیان بە هەڵبژاردنەکانیشەوە واوەتر لە بایکۆت بڕوات و زۆتر و فراوانتر و هاوکات رێکخراو بێت. کاتی ئەوە هاتووە چۆن حیزب و لایەنە سیاسیەکان دوای هەڵبژاردنەکان لەسەر پۆست و ئیمتیاز و دەسەڵاتەکان ڕێکدەکەون و دەیانەوێت ئەزموونی دەسەڵاتی شکستخواردویان بەسەر ئێوه‌دا درێژە پێبدەن، ئێوه‌ش لە ئێستاوە بە کۆبوونەوە لە دەوری یەکتری و بە دەستبردن بۆ ڕێکخراوبوون هەم بەدژی دەسەڵاتی داسەپاوی لایەنە سیاسیەکان و ڕەتکردنەوەی دەسەڵاتدارێتییان و هەم بۆ دامەزراندنی دەسەڵاتی خۆتان دەست بەکار بن. لە کارگە و کارخانەکان، لە ناوەندە خزمەتگوازرییەکان و لە گەڕەکەکان و لە ئاستی گشتی شاردا، پێویستە کەسانی دڵسۆز و جێگا متمانە و سەرڕاست، بێ گوێدانە ناسنامە قەومی و تایفیەکان، لەدەوری یەکتری کۆببنەوە و نەخشەی ڕووبەڕووبونەوە و خستنەگەڕی ئیرادە و توانایی سەرچاوەگرتوو لە متمانەی جەماوەری، بکەنە بنه‌مای کارتان. ئەگەر شاری کەرکوک شاری کەرکوکیەکان و هاوڵاتیانی ئەو شارەیە، پێویستە لەلایەن خودی ئێوه‌وە بەڕێوەببرێت. پێویستە داهات و سامانی شارەکەش بۆ خزمەتگوزاری و نەهێشتنی جیاکاری و سڕینەوەی ئاسەوارەکانی وێرانکاریی بەعس و حیزبە و لایەنە سیاسیەکانی دوای بەعس، تەرخان بکرێت و مافە فەردی و مەدەنی و ئازادییەکان و باشبژێوی، جێگەی دۆخی نەخوازراوی ئێستا لە دنەدانی قەومی و تایفی، لە نەبوون و وێرانبوونی خزمەتگوازرییەکان، لە دزی وتاڵانی، لە بێمافی و سەرکوت و نەبوونی ماف و ئازادییەکان… تاد، بگرێتەوە. بەسەمەرگەیشتنی ئەو ویستانەش لە گرەوی بیناکردن و دامەزراندنی شێوازێكی تری دەسەڵات و بەڕێوەبردنە کە بەشێوەی ڕاستەوخۆ و لەخوارەوە له‌ناو جه‌ماوه‌ره‌وه مەیسەر دەبێت، بە بەڕێوەبردن و بەدەستەوەگرتنی دەسەڵات لە ئاستی گەڕەک و کارگە و ناوەندەکان، تا ئاستی شار و بەڕێوەبردنی لە ڕێگای هەڵبژرادنی ئازادانە و ڕاستەوخۆی نوێنەرانی واقیعییەوە بەدیدێت.
ئێمە لە حیزبی کۆمۆنیستی کرێکاریی کوردستان ئاڵاهەڵگر و لە ڕیزی ێیشەوەی ئەو هەوڵ و خەبات و تیکۆشانەدا ڕادەوەستین.
حیزبی کۆمۆنیستی کرێکاریی کوردستان
٢٤/١٢/٢٠٢٣
