دادگای گاڵتە جاڕی ڕژێم ترس لە بزوتنەوەی کرێکاری …

نوسین: ھەتاو عەبدوڵاھی

پایەکانی رژیمی کۆماری ئیسلامی لەسەر ئەساسی ڕەشبگیری، ئەشکەنجە، تاوان، کوشتن و بڕین ڕۆنراوە و کۆماری سێدارە ھەر لەسەرەتای ھاتنە سەرکاری دوای بەلاڕیدا بردنی شۆڕشی مەزنی ساڵی ١٣٥٧ی ھەتاوی و سەپاندنی ھێژمۆنی خۆی، ھەر دەنگێکی ئازادیخوازی لەگەرودا کپ کرد و ماشێنی سەرکوت و کوشتنی وەگەڕ خست و لەو بوارەوە کارنامەیەک و مێژویەکی تەژی لە تاوانی بۆ خۆی تۆمار کردووە.

کۆماری مرۆڤکوژی ئیسلامی ئێران دوای بە دەسەڵات گەیشتنی دەستی کرد بە کوشتن و بڕین و سیاچاڵ و بەندیخانەکانی تەژی کرد لە جیا بیران و ئازادیخوازان و زۆر ڕوھەڵماڵراوانە و بێ پەروا کۆمەڵکوژیەکی دەست پێکرد کەلە سەردەمی خۆی کەم وێنە بوو. دەست و پەیوەندەکانی  خومەینی خوێنڕێژ لە سەروی ھەمویانەوە خەڵخاڵی مرۆڤکوژ بە ناوی خوا و بە پشت بەستن بە ئایینی درندە و قیزەونی ئیسلام کۆمەڵکوژی و ئیعدامیان لە سەرتاسەری ئێران بەڕێوەبرد کە لە ناویان دا دەتوانین ئاماژە بە جینایەتی ساڵی ٦٠ ی ھەتاوی بەو لاوە بکەین لە بە ھەزاران مرۆڤی ئازادیخوازیان لە بێدادگاکانی عەدڵی ئیلاھی بە مەرگ مەحکوم کرد و ئێعدامیان کردن. رژێم دوای ئەوە خەڵکی کوردستان ملکەچی زوڵم و زۆری حکومەتەکەی نەبوون بە ھێزی جەھل و نەزانی و تەیار و پۆشتە بە چەک و چۆڵ ھێڕشی سێ مانگەی بۆ سەر کوردستان دەست پێکرد، کە لە بەرامبەر ئیرادەی پۆلایینی خەڵکی کوردستان بە چۆک داھات. خومەینی و دەسەڵاتە دینی و دژەمرۆڤەکەی بەوەشەوە نەوەستاو ھەر بۆ مەبەست و ئامانجە تێرۆریست خوازانەکانی ھەیئەتێکی مەرگی دامەزراند بۆ ئەوەی تێرۆر و کوشتنی جیابیران لە دەرەوەی وڵات دەست پێ بکات. ھەیئەتی مەرگ لە چەند مۆرەی حکومەتی  پێکھاتبوون کە لە ناویان دا کەسی وەک شاھرودی جینسیەتکاری تێدا بوو ئەوان بە سەرپەرشتی ڕاستەوخۆی خومەینی و لەژێر ناوی جینایەتی موقەدەس دەستیان کرد بە تێرۆ و کوشتنی کەسایەتیە ناسراوەکانی دژبەری کۆماری ئیسلامی لە دەرەوەی وڵات. باڵوێزخانەکانی کۆماری ئیسلامی لە دەرەوەی وڵات بوونە شوێنی سازماندان و رێکخستنی کارە تێرۆریستیەکانی دەسەڵات و داڵدەدانی تێرۆریستان و بۆ ئەو مەبەستەش تێچویەکی یەکجار زۆر لەبەرچاو گیرابوو.

لە ماوەی زیاتر لە چوار دەیە کە کۆماری ئیسلامی دەسەڵاتی خۆی بەسەر خەڵکی ئێراندا سەپاندووە لەھەر مەقتەعێکی زەمەنی و بە ھەر بیانوویەک کاربەدەستانی رێژیم بە پشت بەستن بە یاسای بنەڕەتی حکومەت کە یاسایەکی دژە مرۆڤ و دینیە خەڵکی ئازادیخواز و جیابیریان کردوە بە ئامانجی خۆیان و بۆ سەرکوت و بێ دەنگکردنیان لە ھیچ جینایەتێک سڵیان نەکردوە. ئێعدام، ئەشکەنجە، رەشبگیری، زیندانی قورس و سزای ئیسلامی و نامرۆڤانە و چارەرەشی دیاری کۆماری ئیسلامی و وەلامی نارەزایەتی خەڵکی بێتاوان بووە. لە بەرامبەر ھەموو ئەوکوشتو بڕین و سەرکوتەدا دەمانەوێ چاوێک بە کارنامەی دژە خۆکەی کۆماری ئیسلامی کە خەڵکی خۆڕاگر و خەباتکاری ئێرانن بخشێنین.

بەندیخانەکانی کۆماری ئیسلامی ھەر لە سەرەتاوە تا بە ھەنوکەش لە ئازادیخوازان ئاخێندراوە و بێدادگاکانی دەسەڵاتی خوێنرێژ  بە پشت بەستن بە ئیسلام و کتێبی قورئان مژوڵی سەپاندنی حوکمی ناڕەوا بە سەر جیابیران دایە. لە بەرامەبەر ھەموو ئەوکوشت و بڕ و سەرکوتەدا دەمانەوێ ئاوڕێک لە بزوتنەوەی ئازادیخواز و دژە حکومەت بخشێنین کە ھەر لە سەرەتاوە نایان بە رژیم و دەسەڵاتەکەی وت و لە بەرامبەر زوڵم و زۆر دا وەستان و تا بە ئێستاش لەسەر پێیە..

لە ئەنجامی سیاسەتە شەڕانگێز و سەرەڕۆیانەکانی ئێران و گەمارۆ یەک لە دوای یەکەکانی کە بە سەریدا سەپا بارودۆخی خەڵکی ئێران رۆژ بە ڕۆژ خراپتر بووە و دوکەڵی نابەرپرسیارێتی سیستم چووە چاوی خەلکی ئەم وڵاتە، بە تایبەت چینی کرێکار و کەم داھات وەک ھەمیشە زیاتر زەرەرمەند بوون.  دوا بە دوای گەمارۆ قورسە ئابوریەکان و چارەرەشی خەڵک و بێمافی ھەرچی زیاتریان کۆماری ئیسلامی جارێکی تر نابەرپرسیاری خۆی بەرامبەر بە خەڵک و کێشەکانیان نیشان داو بە گرتن و زیندان و سەرکوت وەڵامی خەڵکی دایەوە. لەوکاتەدا کە خەڵک بە تایبەتی چینی کەم داھات بۆ تێچوی ژەمە نانێک ماونەتەوە و پارەی رۆژێک فرۆشتنی ھێزی بازوی کرێکارێک وەڵامدەری ژەمە نانێکیش نییە کۆماری تێرۆریست بۆ گارانتی و مانەوەی ھێژمۆنی خۆی سەروەت و سامانی خەڵک سەرفی گروپە تێرۆریستیەکانی حیزبوڵای لوبنان و سوریە و فەلستین دەکات و وەک ئەرکی خۆی ناوی لێ دەبات. ئاکامی ئەو سیاسەتانە و گرانی و بێکاری و سەرھەڵدانی دیاردە کۆمەڵایەتیەکان بە ھۆی داڕمامی ئابوری ئێران بوو بە ھەوێنی خۆ رێکخستن و یەکگرتوویی خەڵک بە ڕێبەری بزوتنەوەی کرێکاری و خۆی لە خۆپێشاندان و ناڕەزایەتی و ڕژانە سەرشەقـامدا دیتەوە. خەڵک سەرەرای سەرکوتی زۆر و ئەشکەنجە و زیندان لە خەبات و دروشم دان کە یەک لەوان (نان ، کار، ئازادی بوو نەکشانەوە و راستەوخۆ پایەکانی کۆماری ئیسلامێ و رێبەرییان کردە سەردێری دروشمەکانیان. کۆماری ئیسلامی و دەزگای سەرکوت و نیھادە ئەمنیەتیەکانیش وەک ھەمیشە جارێکی تر کارنامەیەکی رەشیان بۆ خۆیان تۆمار کرد و لە ھیچ جینایەتێک درێغیان نەکرد. کۆماری ئیسلامی و دامەزراوە ئەمنیەتیەکانی دەستیان کرد بە گرتن و زیندانیکردنی ئازادیخوازان کە لەم دواییانەدا رێبەرانی بزوتنەوەی کرێکاری کە لەناویان دا سێپیدە قۆلیان و ئیسمائیل بەخشی و ھتد دوایی دەبینرێن. لە تازەترین ھەڵوێستی رژێم بەرامبەر بە ئازادیخوازان جارێکیتر بێ دادگاکانی  بە ناوی خوا و شەرعەوە حوکمی ناعادڵانەی بەسەر رێبەرانی کرێکاریدا سەپاند و حوکمی ناڕەوای زیندانی درێژ ماوە و شەلاقی بۆ بڕینەوە. ئەوەی کە کۆماری ئیسلامی جارێکی تر رواڵەتی ڕاستەقینە و دزێوی خۆی نیشان دا و حوکمی نارەوای بە سەر ئازادیخوازان دا سەپاند پرسێکی دوور لە ڕاستی نەبوو، سزای دادگایەکی پوچ بۆ کەسانێک کە  تەنیا  تاوانیان!! بەرگری لە ژیان و ژیانێکی باشترو مرۆڤی بوو، ئەم سزایە ترسە لە بزوتنەوەی کرێکاریی و نارەزایەتی جەماوەری و بۆ ترساندنی کۆمەڵگەیە… بەڵام ئەو سزایانە بەر بە بزوتنەوەی کرێکاریی و جەماوەری بۆ روخاندنی رژێم ناگریت. ئەوەی ڕون و ئاشکرایە شکستی کۆماری ئیسلامی و دوایین پەلەقاژەکانێتی بۆ مانەوەی پایە لەرزۆکەکانی دەسەلاتەکەی. ڕێبەرانی کرێکاری و بزوتنەوەی ئازادیخوازی و بزوتنەوەی یەکسانیخوازی ژنان بە کوشتن و بڕین و زیندان لە خەبات سڵ ناکەن و تەنانەت بەندیخانەش دەکەنە قوتابخانەی خۆڕاگری و مێژوو  دەمێکە ئەو ڕاستیەی دەرخستووە. خەڵکی ئازادیخوازیش دەبێ  ھەروا لەسەر پێ لە بەرامبەر زوڵم و زۆری ڕژێم راوەستن و ھەوڵ بۆ نەمانی یەکجارەکی کۆماری زیندان و ئەشکەنجە بدەن. کۆماری ئیسلامی و کاربەدەستانی ئەوە باش دەزانن کە بە زویی دەسەڵاتی قیزەون و دینیان کۆتایی پێدێ و لە دادگایەکی  خەڵکیدا  بەھۆی  تاوانی کوشتار، جەنگ، سێدارە، سەنگسار، تاڵانی و دزی… بە سزای خۆیان دەگەن.

Check Also

تیرۆری شیرین ئەبو عاقلە کردەوەیەکی تیرۆریستی دەوڵەتی ملهوڕی سەر کوتگەری ئیسرائیلە

دەشتی جەمال دوێنێ ١١ی مەی ٢٠٢٢ پەیامنێری کەناڵی ئەلجەزیرە، شیرین ئەبو عاقلە لە کاتی ڕوماڵی …

وەڵامێک بنووسە

پۆستی ئەلکترۆنیکەت بڵاو ناکرێتەوە .