hkkurdistan
جه‌مال موحسین
٧ ی سێپتێمبه‌ری ٢٠٢١
كات و وزه و وردبوونه‌وه‌یه‌كی زۆری ناوێ له كه‌ناڵی ئێن ئاڕ تی و ئه‌وانه‌ی له پشتیه‌وه‌ن تێبگه‌یت تا زوو بۆت ده‌ربكه‌وێت كه پاڵی به چ كۆنه‌په‌رستیه‌كه‌وه داوه، با خۆشی هه‌ر شانازی به هه‌ڵكردنی باهۆزی ’’بێلایه‌نی و فره‌ڕه‌نگی و میدیای ئازاد‘‘ه‌وه بكات. ئه‌م كه‌ناڵه هی شاسواری سه‌رمایه‌داری له‌پڕ هه‌ڵتۆقیوه. سه‌رمایه‌دارێكی دواكه‌وتووی خاوه‌ن هه‌مان بۆچوونی تره‌مپ ئاسا (تره‌مپ وه‌ك ڕه‌مزێك بۆ ئه‌وپه‌ڕی ڕاستڕه‌ویی كۆنه‌په‌رست). ’’سه‌ركرده‘‘ یه‌كی سیاسی كه هه‌ر زوو ده‌ستی به ئه‌زمونێكی شكستخواردووه‌وه گرت كه ئه‌ویش باوه‌شكردنه‌وه بوو بۆ ئیسلامی سیاسی وه‌ك ڕه‌وت و ڕوانگه‌یه‌كی بۆرژوازی. هه‌وڵی شاسوار زۆر باشتر و سه‌ركه‌وتووتر نه‌بووه و نابێ له هی نه‌وشیروان مسته‌فا كه سه‌ره‌تای ده‌ستپێكردنی بزووتنه‌وه‌كه‌ی ده‌می به ماچی ده‌ستی ئیسلامیه‌كان گه‌رمكرد و تا ئێستاش به‌شێكی به‌رچاو له هه‌ڵسوڕاو و ئه‌ندام په‌رله‌مانه‌كانی سه‌ر به مه‌یل و ڕوانگه‌ی ئیسلامین. به‌ڵام كاتێك كه گۆڕان خۆی به‌شێكی به‌رچاو له ده‌سه‌ڵات و پشكی بردنی پاره و سه‌روه‌تی كۆمه‌ڵگای پێبڕا و ”سه‌نگه‌ری” حزبه ئیسلامیه براكانی چۆڵ كرد و زۆرتر له دیوه‌خانی پارتی و یه‌كێتی و حوكمه میلیشیاییه‌كه‌یاندا جێگه‌ی گرت، هه‌ندێك لایه‌نی ئیسلامی هێشتا ئه‌یانه‌وێ خۆیان وه‌ك نه‌یار و ئۆپۆزسیۆنی ده‌سه‌ڵات و دۆخی ئێستا بقه‌بڵێنن.
له‌م نێوه‌شدا نه‌وه‌ی نوێ و سه‌رۆكه‌كه‌ی ئێستا له‌وانی دی زیاتر گۆڕه‌پانی بۆ ته‌خت بووه تاكو ئه‌م لافی ئۆپۆزسیۆن بوونه لێبدات! به‌ڵام چ ئۆپۆزسیۆنێك و نه‌یاری چی؟ ڕووكه‌شی هه‌ڵتۆقینی ئه‌م جوڵانه‌وه‌یه و سه‌رۆكه‌كه‌ی ئه‌وه‌یه كه له‌و دۆخه ناڕازین كه ده‌سه‌ڵات خوڵقاندوویه‌تی و گوایه دژی گه‌نده‌ڵی و خراپ به‌كارهێنانی ده‌سه‌ڵات ئه‌وه‌ستنه‌وه. له كاتێكدا ناوه‌ڕۆكی چینایه‌تی جوڵانه‌وه‌كه و خودی سه‌رۆكه‌كه‌ی، كه تاكو ئێستا نه‌یتوانیوه ئه‌ستۆپاكی خۆی بسه‌لمێنێ له‌به‌رامبه‌ر تۆمه‌تی بردنی پشكی سه‌رمایه له خه‌ڵك له كاتی كردنه‌وه‌ی پڕۆژه قازانجهێنه‌ره‌كانیدا، شتێك نییه جگه له وابه‌سته‌یی به چینێكه‌وه كه له ده‌سه‌ڵاتدایه و ئه‌ویش چینی سه‌رمایه‌دارانی كوردستانن له‌ڕێی حزب و حكومه‌ت و په‌رله‌مانه‌كه‌یانه‌وه. جوڵانه‌وه‌ی نه‌وه‌ی نوێ و له زاری سه‌رۆكه‌كه‌شیانه‌وه هه‌رگیز قسه‌یه‌كیان له‌سه‌ر ململانێ و شه‌ڕی خه‌ڵكی هه‌ژار و كه‌مده‌رامه‌ت و سه‌رمایه‌دار و خاوه‌ن سه‌روه‌تی كۆمه‌ڵگا نییه. قسه‌وباس و پڕۆژه‌یه‌كیان بۆ نه‌هێشتنی ئه‌و قڵشته چینایه‌تیه له نێوان كه‌مینه‌ی ده‌وڵه‌مه‌ند و زۆرینه‌ی هه‌ژاردا پێنییه و له بنه‌ڕه‌تدا ئامانجێكی له‌و چه‌شنه‌شیان نییه. ئه‌وانیش وه‌ك هێزه‌كانی تری ناو خێزان و به‌ره‌ی بۆرژوازی له‌وه ناڕازین كه ئه‌وانی تر به ئاره‌زووی خۆیان ئه‌دزن و ئه‌خۆن و تا ئێستا جێگه‌یه‌ك بۆ ئه‌مان قایل نین.
ئه‌گه‌ر ئه‌مه لایه‌نێكی ناوه‌ڕۆكی چینایه‌تی ئه‌م پێكهاته‌یه‌ی بۆرژوازی بێت، لایه‌نێكی تری ئه‌وه‌یه له‌م دۆخه‌دا جه‌ماوه‌ری كرێكار و بێبه‌شی كوردستان له‌و ده‌سه‌ڵاته و ته‌واوی سیستمه‌كه‌ی ڕاست بۆته‌وه و خۆیان وته‌نی تۆفانی خه‌ڵك ئه‌یه‌وێ ”به‌له‌می هه‌موویان نوقم بكات”. نه‌وه‌ی نوێ هاتۆته‌پێش تا هه‌مان گه‌مه‌ی گڵاوی دوباره به‌لاڕێدابردنی ناڕه‌زایه‌تی خه‌ڵك بكات و بیباته‌وه سه‌ر ڕێڕه‌وی په‌رله‌مان و هه‌ڵبژاردن و ئاڵوگۆڕ له‌وڕێگه‌یه‌وه. تاكو له‌لایه‌ك ده‌سه‌ڵاتی بۆرژوازی له توڕه‌یی خه‌ڵك ڕزگاربكات و له‌لایه‌كی تریشه‌وه ئامڕازێك بێت بۆ خاوكردنه‌وه‌ی ئه‌و نه‌فره‌ت و ناڕه‌زایه‌تیه فراوانه‌ی له كۆمه‌ڵگه‌دا هه‌یه و سه‌رئه‌نجام هه‌ر ئه‌بێ بگات به شۆڕش بۆ ڕاماڵینی ته‌واوی سیستم و پێكهاته‌كانی.
سه‌رباری هه‌موو ئه‌مانه‌ش وه‌ك ئاماژه‌مان پێدا، نه‌وه‌ی نوێ و كه‌ناڵه به‌رچاوه‌كه‌ی پاڵیان به‌وپه‌ڕی كۆنه‌په‌رستی و دواكه‌وتوویی ئیسلامیه‌وه داوه و به ئه‌ندازه‌ی ئه‌و حزبه ئیسلامیانه ئاو به ئاشی كۆنه‌په‌رستی ئیسلامیدا ئه‌كه‌ن. كارێك كه ئه‌م جوڵانه‌وه‌یه و كه‌ناڵه‌كه‌ی بێشه‌رمانه ئه‌یكه‌ن گره‌وی له ”پاراستنی سه‌وابته ئاینیه‌كان”ی گۆڕان بردۆته‌وه و بوونه‌ته مینبه‌رێكی ئاشكرای ڕه‌واجدان به ئیسلامگه‌رایی و ئیماراتی ئه‌و بزووتنه‌وه‌یه! سه‌رۆكی جوڵانه‌وه‌كه خۆی دیزاینی مزگه‌وت ئه‌كات و له تێچووی نه‌وه‌ی نوێ دروستی ئه‌كات، وه‌ك ئه‌وه‌ی كه‌م له پاره‌ی دزراوی ده‌می خه‌ڵك كرابێ به ده‌می وه‌زاره‌تی ئه‌وقاف و كردنه‌وه‌ی مزگه‌وت و ته‌كیه‌خانه‌كان. هه‌روه‌ها ساڵانێكی زۆره ده‌روازه‌كانی كه‌ناڵی ناوبراو خراوه‌ته سه‌ر گازه‌رای پشت بۆ سه‌له‌فیزم و ده‌ق و سروته ئاینیه‌كان و كه‌ناڵی تایبه‌تی ئاینی بۆ كردوونه‌ته‌وه و مینبه‌ره‌كانی بۆ زۆربه‌ی كه‌سایه‌تیه‌كانی ئه‌وان، كه جگه له هه‌ڵڕشتنی جنێو و ژه‌هر و فه‌توای دژی ئازادی و دژه ژنان هیچی تریان پێ نییه، ئاوه‌ڵا كردووه. له هه‌ر كێشمه‌كێش و به‌رانبه‌روه‌ستانه‌وه‌یه‌كی ئازادیخوازی و كۆنه‌په‌رستیدا، زۆرتر قسه‌كه‌ری ئیسلامی (خۆیان وته‌نی به توندڕه و میانڕه‌وه‌وه) جێگه‌ی بایه‌خیان بووه و كاتیان پێدراوه تا به ئاره‌زووی خۆیان هه‌رچی بیروڕای ژه‌نگاویه بیهێننه‌وه ده‌ر و داكۆكی له فره‌ژنی و ده‌سه‌ڵاتی داعش و یاسا و ڕێسا و شه‌ریعه‌تی ئیسلامی بكه‌ن.
له‌م دواییانه‌دا ئه‌مه زیاتر كێشی كردووه و به‌ناوی بڵاوكردنه‌وه‌ی هه‌واڵه‌كانی سه‌باره‌ت به ئه‌فغانستان و تاڵیبانه‌وه چه‌ندین زانیاری و وته‌ی سه‌رانی حزبه ئیسلامیه‌كانیان داگرتۆته‌وه تاكو له‌ژێر ناوی ڕووماڵكردندا ڕه‌واج و بره‌و به ده‌سه‌ڵاتی ئیسلامی بده‌ن و وه‌ك ئه‌ڵته‌رناتیڤێك بۆ دۆخی هه‌رێم و جۆری ده‌سه‌ڵاته‌كه‌ی، كه گوایه وه‌ك ده‌سه‌ڵاتی حكومه‌ته‌كه‌ی ئه‌شره‌ف غه‌نی گه‌نده‌ڵه، بیده‌ن به گوێی كۆمه‌ڵگه و خه‌ڵكدا. له كاتێكدا كه ئیسلامیه‌كانی كوردستان به به‌ده‌سه‌ڵات گه‌یشتنه‌وه‌ی تاڵیبان شاگه‌شكه بوون و زمانی هه‌لهه‌له‌یان بۆ ئیماره‌ته ئیسلامیه‌كه‌ی ئه‌وان و له چارشێوه‌پێچانی ژنان و جیاكردنه‌وه‌ی كوڕان و كچان له قوتابخانه‌كان و ته‌واوی حوكمێكی پشتبه‌ستوو به شه‌ریعه‌تی ئیسلامی هاتۆته‌گۆ، كه‌ناڵه‌كه‌ی شاسوار و نه‌وه‌ی نوێش په‌یتاپه‌یتا بانگیان ئه‌كات و به‌رنامه و وته و لێدوانیان لێوه‌رئه‌گرێت.
له هه‌مووی قه‌باعه‌تتر ئه‌وه‌یه كه مه‌لا كرێكار، كه خۆی له زیندانی ئیتاڵیایه و سزای ١٢ ساڵی به‌سه‌ردا سه‌پێندراوه و لێدوان و په‌یوه‌ندی ڕاسته‌وخۆی لێ قه‌ده‌غه‌كراوه، ئێن ئاڕ تی له‌ڕێگه‌ی خێزانه‌كه‌یه‌وه په‌یامی بۆ ده‌گوازێته‌وه. به شان و باڵیدا هه‌ڵئه‌دات و نه‌ك هه‌ر وه‌ك مه‌زڵوم نیشانی ئه‌دات، بگره وه‌ك كه‌سایه‌تیه‌كی سبه‌ینێی كۆمه‌ڵگه ئه‌یقه‌بڵێنێ. گوایه مه‌لا كرێكار نیگه‌رانه له دۆخی هه‌رێمی كوردستان و له دژی گه‌نده‌ڵیه و له‌سه‌ر هه‌مان هه‌ڵوێسته‌كانی پێشووشیه‌تی كه له دژی گه‌نده‌ڵی ده‌سه‌ڵاتی یه‌كێتی و پارتیه و له‌گه‌ڵ دروستبوونی گۆڕانكاریدایه! ئه‌ڵێی هه‌روه‌ك چۆن ئیمپریالیزمی جیهانی و تره‌مپ كه دوو ساڵ له‌مه‌وبه‌ر ڕێككه‌وتنی له‌گه‌ڵ تاڵیبان كرد و چۆن ئه‌شره‌ف به‌راده‌ریان له زیندان ده‌ربازكرد و دواتر له قه‌ته‌ره‌وه هێنایانه‌وه بۆ سه‌ر ده‌سه‌ڵاتی سه‌پێندراو به‌سه‌ر خه‌ڵكی ئه‌فغانستاندا، ئه‌گه‌ر به‌پێی به‌رژه‌وه‌ندی هه‌مان ئیمپریالیزم و ئه‌مریكا خوازرا كه سه‌رانێكی ئیسلامی بسه‌پێنن به‌سه‌ر كۆمه‌ڵگه‌ی ئێمه‌دا، ئه‌وا شاسواری فه‌ریكه تره‌مپ و كه‌ناڵه‌كه‌ی بنه‌وانه‌یان بۆ ئه‌مه شێلابێ! تاكو ڕێی تێبچێ مه‌لا كرێكار بكه‌ن به مڵۆزم به‌سه‌ر كۆمه‌ڵگه‌ی كوردستانه‌وه، دیاره ئه‌مه له كاتێكدا ئه‌گه‌ر ناڕه‌زایه‌تی و خه‌باتی خه‌ڵك نه‌بێته مقاوه‌مه‌یه‌كی له‌و چه‌شنه كه خۆی ده‌سه‌ڵات ڕابماڵێ و هه‌ر خۆشی ده‌سه‌ڵاتێكی جه‌ماوه‌ری كه پێكی ئه‌هێنێت بۆی نه‌پارێزرێ.
به‌ڕاستی نه‌وه‌ی نوێ و سه‌رۆكه سه‌رمایه‌داره‌كه‌ی زه‌رویه‌كن به‌سه‌ر ناڕه‌زایه‌تی جه‌ماوه‌ریه‌وه له دژی ده‌سه‌ڵات و سیستمی سه‌رمایه‌داری له كوردستاندا. به‌ڕاستی نه‌وه‌ی نوێ به ئه‌ندازەی ئیسلامیه‌كان قێزه‌ونه، به ئه‌ندازه‌ی ده‌سه‌ڵات تاوانباره و خه‌ڵك ئه‌بێ له خه‌باتی خۆیاندا بۆ ده‌ربازبوون له ده‌سه‌ڵاتی بۆرژوازی كورد، ئه‌م كۆسپه‌ش له‌به‌رده‌م خۆیدا لاببات و كۆمه‌ڵگه له‌وانیش پاك بكاته‌وه.
وه‌ك دوا وته، ئه‌و قسه‌یه‌ی ئه‌وان بۆ بێلایه‌نبوونی كه‌ناڵه‌كه ئه‌یكه‌ن به ئه‌ندازه‌ی بانگه‌شه‌ی سه‌رانی حكومه‌ته دز و جه‌رده‌كه‌ی كوردایه‌تی بۆ چاكسازی ڕسوایه. ئێن ئاڕ تی لایه‌نداره. لایه‌نداره بۆ هێشتنه‌وه‌ی كۆمه‌ڵگه‌ی كوردستان له‌سه‌ر سیستمی چه‌وسانه‌وه‌ی چینایه‌تی و مانه‌وه‌ی هه‌ژار و ده‌وڵه‌مه‌ند. لایه‌نداره بۆ شه‌ریكبوون له ده‌سه‌ڵات و بردن و دزینی سه‌روه‌تی كۆمه‌ڵگا له‌ژێرناوی شه‌رعیه‌ت وه‌رگرتنی ده‌نگ و په‌نجه‌مۆری خه‌ڵكدا. لایه‌نداره له كۆنه‌په‌رستی ئیسلامی و ئیسلامیه‌كان و دژایه‌تی ده‌نگی ئازادیخوازیدا… هه‌تا ئه‌توانرێ لیستی تاوانی ده‌سه‌ڵات بژمێردرێ، ئه‌وه‌نده‌ش ئه‌توانرێ دژبوونی ئه‌م كه‌ناڵه و نه‌وه‌ی نوێكه‌ی شاسوار به خه‌ڵكی كوردستان بژمێردرێ!
