بڕیارەکەی دادگای فیدراڵی عێراق

گفتوگۆ لەگەڵ لەگەڵ خەسرەو سایە، سەرۆکی مەکتەبی سیاسی        

ئۆکتۆبەر: ماوەیەک لەمەوبەر دادگای فیدراڵی عێراق بڕیارێکی سەبارەت بەنەوت و گازی هەرێمی کوردستان دەرکرد، کە لەناوەڕۆکدا لێسەندنەوەی هەقی دەرهێنان و فرۆشتنی نەوت و گازی لەلایەن حکومەتی هەولێرەوە، هەڵوەشاندۆتەوەو بەیەکجاری گێڕاویەتەوە بۆ ژێردەسەڵاتی حوکمەتی مەرکەزی.. بڕیارەکە لەگەڵ ئەوەدا کەپشت دەبەستێت بەچەند مادەیەکی دەستور، هاوکات لەبەرئەنجامی سکاڵایەکەوە دراوە کە لە ساڵی ٢٠١٢دا لەلایەن وەزارەتی نەوتی عێراقیەوە لەهەرێم کراوە، پرسیارەکە ئەوەیە کە بۆچی دوای ئەو هەموو ساڵە سکاڵایەک دەبێتە بنەمای دەرکردنی بڕیارێکی لەم جۆرە، ئایا ئەمە بڕیارێکی یاساییە یان سیاسیە؟

خەسرەو سایە: بەدڵنیایەوە بڕیارەکە نەک هەر سیاسیە، بگرە هەڕەشەیەکی ئاشکرایە کە لەکەناڵی قانونیەوە، دەستی بۆ براوە. ئەوەشی کە بۆ لەئیستادا بڕیاڕێکی لەم جۆرە دەدرێت، دەگەڕێتەوە بۆ ئەو کێشمەکێشەی کە لەنێوان ڕەوت و لایەنە بۆرژوازیەکاندا، لەپەیوەند بەسازدانەوەی دەوڵەت لەعێراقدا، سەریهەڵداوە، کێشمەکێشێک کەخۆی دەرهاویشتەی ئەو گۆڕانکاریە سیاسیانەیە کە لەدۆخی سیاسی ناوچەکە بەدوای تەواوبوونی جەنگی داعش و شەڕی بەوەکالەتی هێزە ناوچەیی و ناوخۆییەکاندا هاتۆتەکایەوە و هاوڕایی ئەمریکاو هاوپەیمان و دەوڵەتانی ناوچەکە لەوانە ئێران و تورکیاو سعودیەی لەسەر دوبارە سازدانەوەی سیستەمی حوکمڕانی لەعێراقدا، کردۆتە بابەتێکی پێویست. لەم پەیوەندەشدا، پێگەی ڕەوت و لایەنەکان و هاوکێشەی هێزی نێوانیان ئاڵوگۆڕی بەسەردا هاتوەو هەریەکەیان بۆ بەدەستهێنانەوەی پێگەی خۆیان لەڕیزبەستنێکی تازەدا، لەپەیوەند بە دەسەڵاتەوە، خستۆتە نێو کێشمەکێش و هەوڵدان بۆ بەستنی هاوپەیمانێتی تازەوە. هەروەک بینیمان کەچۆن هاوپەیمانێتی پارتی لەگەڵ سەدرو حەلبوسی هەم “ماڵی شیعە” و هەم “ماڵی کوردی” لێکترازاند و پێگەی یەکێتی لەبەرامبەر پارتیدا و مالیکی و رەوتەکەی لەبەرامبەر سەدردا، بردە دواوە. دواتریش ئەم کێشمەکێشە لەسەر پۆستی سەرۆک کۆمار، کاندیدەکەی پارتی لەمەیداندا وەدەرنا و تەنانەت موقتەدا سەدریشی ناچارکرد کەپڕۆسەی دانوسەنەکان لەسەر پێکهێنانی حکومەت ڕابگرێ و کۆبونەوەکانی پەرلەمانیش پەک بخات. لەدۆخێکی ئاوادایە کەهەر هێزە هەوڵدەدات بۆ قایمکردنی پێگەی خۆی دەست بۆ هەر کارتێکی سیاسی وقانونی بەرێت تا حەریفەکەی لەمەیدان دەربکات، وەیا پاشەکشەی بەسەردا داسەپێنێ. لەجەرگەی ئەم کێشمەکێشەدایە، کەئەمجارە مالیکی و ڕەوتەکەی بەپشتیوانی ئیران ولایەنگرانی، کارتی قانون و دادگای بەدەستەوە گرتووە و زیندوکردنەوەی سکاڵایەکی کۆن بەرامبەر بە پێگەی پارتی و ئەحزابی ناسیونالیستی کورد و دەسەڵاتی هەرێمایەتیان، ڕاست بێتەوە وبیکاتە دوژمنێکی هاوبەشی شیعەکان، تا ئەو درزەی لەماڵەکەیان کەوتوە پڕبکاتەوەو لێرەشەوە خۆی لەڕەوتەکەی سەدر نزیک بکاتەوە. بەدڵنیایەوە ئەم کێشمەکیشەو ئەم هەراوهوریایەی کە لەنێوان ڕەوت و باڵەکانی بۆرژوازیدا هاتۆتەکایەوە، تەنها بەبڕیارەکەی دادگای عێراقەوە ناوەستێ و لەداهاتوودا لاپەرەی زیاتر هەڵدەداتەوە، بەتایبەتی کەهێشتا پۆستی سەرۆک وەزیران و دابەشکردنی وەزارەتە سیادیەکان ماوە.       

ئۆکتۆبەر: کاردانەوەی حزبەکانی نێو دەسەڵات لەهەرێم، لەپێشیانەوە پارتی و مەسعود بەرزانی ڕایانگەیاند کە بڕیارەکەی دادگای عێراق نادەستوریەو لەدژی ئیستحقاقی نەوەیی کوردە، تەنانەت وا باس دەکەن کە ئەمە پیلانێکە لەدژی هەرێم و دەسەڵاتەکانی، وەڵامی ئێوە چییە بەم پڕوپاگەندانە؟ ئایا بڕیارێکی لەوجۆرە کە دادگای عێراق دەری کردوە بەمانانی سەرەتای کۆتاییهێنانە بەم دەسەڵاتە هەرێمایەتیەی ناسیونالیزمی کورد؟

خەسرەو سایە: لەڕاستیدا ئەم قسانە زیاتر بۆ راکێشانی خەڵکی ناڕازی کوردستانە بۆ ژێر سایەی سیاسەتێک کە پارتی و دەسەڵاتەکەی پەیڕەوی لێدەکات تا ئەوەی وەڵامێک بێت بەو لایەنانەی سکاڵاکەی حکومەتی عێراقیان جوڵاندووە. واتە بۆ ئەوەیە لەڕیگای بزواندنی هەستی قەومیەوە، زهنیەتی خەڵك بەلاڕێدا ببەن کە ڕۆژانە بۆ نان و کارو مەعیشەت یەخەی گرتوە. ئەمە هەر ئەو شێوازەیە کە بەردەوام حزبە ناسیونالیستەکان لەکاتی تێکچونی پەیوەندی نێوانیان لەگەڵ بەغدا و ڕەوتە شیعی و سوننەکان، دەستیان بۆ بردووە. ئەگینا ئەوە ڕۆشنە کە نەپارتی و نە هیچ حزب و لایەنێکی کوردستانی و عێراقی و ئەوانەی کە لە”پرۆسەی سیاسی”دا بەشدارن، پەیڕەویان لە دەستورێک نەکردووە کە خۆیان نوسیویانەو هەرخۆشیان ئیمزایان لێداوە، بەڵکو وەک خۆیان دەڵێن هەموو شتێک دەبێ بە”شەراکەت و تەوافق” ببڕێتەوە. هەر بۆیە پارتی باش دەزانیت کە لەگەڵ ئەوەدا کەناتوانێ بڕیاری دادگای عێراقی ڕەتکاتەوە، بەڵام ئەوە “تەوافق”و سازانە دەستور و دادگاش دەخاتەلاوە. تەنانەت ئەگەر بابەتەکە دەستوریش بێت، بەهەموو ئەو ناڕۆشنی و لاستیکیەوە کە هەڵگریەتی، ئەوە خودی دەستوری عێراقە کە لەبەرئەنجامی دەورەیەک لەهاوکێشەی هێزو تەوازنێک کە لەنێوان ئەحزابی ناسیونالیستی کوردو لایەنە عێراقیەکاندا، لەژێر سایەی دەورو دەخاڵەتی سیاسی وسەربازی ئەمریکادا نوسراوەو ئیستاش دۆخەکە گۆڕدراوەو تەوازنێکی تری هێناوەتە کایەوە. لەبارەی “ئیستحقاقی نەتەوەی کورد”یشەوە، مەسەلەکە نان ومەعیشەتی خەڵکی کوردستان نیە، بەڵکو ئیستحقاق و ئیمتیازاتیکە کەهەردو بنەماڵەی دەسەڵاتدارو حزبەکانیان چاویان تێبڕیوە و بەناوی نەتەوەی کوردەوە پڕوپاگەندەی بۆدەکەن. ئەگینا چ هاوڵاتیەکی کەمدەرامەت و زەحمەتکێشی کوردستان لەدەرهێنان و داهاتی نەوت، کە ئەگەر”ئیستحقاقی نەتەوەی کورد”بێت سود مەند بووە. تا ئەو جێگەیەشی کەئایا ئەم بڕیارە سەرەتای کۆتایی دەسەڵاتی هەرێمایەتی و ئەو ئیختیاراتانەیە کە ئەحزابی ناسیونالیزمی کورد بەدەستی هێناوە، من پێموانیە کەوابێت، چونکە مەسەلەکە وجودی ئەمریکاو پشتیوانی دەوڵەتانێکی ئەوروپاییە بۆ دەسەلاتێک کە لەکوردستان دامەزراوە. ئەم دەوڵەتانە کە هەم بەرژەوەندییان لەهەرێمی کوردستان هەیەو هەم ملیاردها دۆلاریان سەرفکردووە تا بەئێستا گەیشتوون، سادە نیە بەئاسانی پێگەی هەرێم لە نەخشەی سیاسی عێراقدا کۆتایی پێبێت، بەتایبەتیش کە کوردستان ئێستا بەجۆرێک لەجۆرەکان بۆتە ئیسرائیلی دووەم بۆ ئەمریکاو مانەوەی لەعیراقدا، ئەویش لەدۆخێکدا کە داوای دەرچونی هێزەکانی ئەمریکا لەعێراق لەلایەن هێزە شیعەکانەوە لەئارادایە.         

ئۆکتۆبەر: بەڵام هەندێک لەحزبەکانی کوردستان، لەوانە نەوەی نوێ و کەسانێک لەبزوتنەوەی گۆران ویەکێتی، بڕیارەکەی دادگای عێراق بەئیجابی لەقەڵەم دەدەن و پڕوپاگەندەی ئەوە دەکەن کە بڕیارەکە نەوت و داهاتەکەی لەدەستی دوو بنەمەڵەو دوو حزبی وەک پارتی و یەکێتی دەردێنێ و کۆمەک دەکات بەشەفافیەت لەداهاتی نەوت و گێرانەوەی بۆ خزمەتی خەڵک و زامنکردنی موچەی فەرمانبەران. ڕای ئێوە لەسەر ئەم قسانە چییە؟

خەسرەوسایە: لەچاوی مشکەوە هیچ ئاژەڵێک هێندەی پشیلە دڕندە نیە، ئەمە مەنتقی سیاسی نەوەی نوێ و ئەو ڕەوتانەیە، کەبەشوێن چاکسازی و ڕیفۆرمکردنی دەسەڵات و سیستەمێکەوەن کەخەڵکی ناڕازی خواستی کۆتاییهێنان بەم حکومەتەو دەسەڵاتەی هەڵبڕێوە. ئەم ڕەوتانە کە دروشمی ئەنتی پارتیان کردۆتە بنەمای پروپاگەندەو هەڵویستەکانیان، بۆئەوەیە کە هەم خۆیان لەبەرەی خەڵکدا هەڵخەن وهەم بەر بگرن لەڕادیکاڵ بونەوەو سەربەخۆبونی بزوتنەوە ناڕەزایەتیە جەماوەریەکان، کەراستەوخۆ نەک هەر لەدژی حزبەکانی دەسەڵاتە، بەڵکو کەوتۆتە بەرامبەر بەگشت سیستەمێکی ئابوری و سیاسیەوە کە لەکوردستاندا بەسەر کۆمەلگادا داسەپاوە، واتە سیستەمی ئابوری بازاڕو کۆمپانیاکان و دەسەڵاتێکی حزبی کە بە پەرلەمانتاریزم و هەلبژاردن بۆیاخکراوە. ئەمە لەکاتێکدا کەبڕیار نیە خەڵکی کوردستان لەزەلکاوێکەوە ڕزگار ببێ و پێ بنێتە زەلکاویکی تر، بڕیار نیە خەڵکی ناڕازی کوردستان بۆ بەدەستهێنانی نان و کار و موچەو خزمەتگوزاریەکانیان، ڕوی خۆیان لەبنەمەڵەی تاڵەبانی و بەرزانی وەربگێڕن و ببنە لایەنگری بنەماڵەی حەکیم و سەدرو حەلبوسی ومالکی وئەوانی تر. ئەگەر بابەتەکەش تاڵانچێتی و نەبوونی شەفافیەتە لەداهاتی نەوتدا، ئایا حکومەتەکانی عەلاوی و مالیکی و عەبادی و عادل عەبدول مەهدی و کازمی شەفافتر بوون لەحکومەتی هەرێم  و کەمتر گەندەڵ و تاڵانچی بوون لەو دەسەڵاتەی کە لە کوردستاندا داهاتی نەوتی  لەدەستدایە!. ئایا ڕاپەڕین و ناڕەزایەتیە بەردەوامەکانی خەڵکی کرێکارو زەحمەتکێشی شارەکانی عێراق، کە حکومەتەکەی عادل عبدول مەهدی شکست پێهێنا، لەدژی ناعەدالەتی و خراپی موچەو بێکاری و نەبوونی خزمەتگوزاری و ئەو گەندەڵی و تاڵانچێتیە نەبوو کە دەسەڵاتدارانی عێراقی پێ دەناسرێتەوە. ئایا هەڵهاتنی وەزیری بازرگانی عێراق و لەسەرکار دەرکردنی وەزیری کارەباو گەندەلییەک کە بەسەر هوشیار زیباری، وەزیری دەرەوەی پێشوی عێراقدا ساغبوەوە، تا دزینی داهاتی نەوتی بەسرا و ئەو سکاڵایەی کە لەسەر مالیکی، لەدادگای عێراقدا بەدیارنەمانی ٢٠٠ملیار دۆلاری داهاتی نەوتی عێراق کەوتەسەر زاری خەڵک.. ئەمانە بەڵگەی ناشەفافبون و گەندەڵییەک نیە بەنێوچەوانی حکومەتە یەک لەدوای یەکەکانی عێراقەوە!؟ لەراستیدا ڕەوتگەلێکی وەک بزوتنەوەی نەوەی نوێ و ئەوانەی کە لەیەکێتی و گۆرانەوە داکەوتون، بەو پڕوپاگەندانەی دەیکەن، مەبەستیانە خۆیان لەبەرگی دژایەتی پارتی و یەکێتی و هەردو بنەماڵەی دەسەڵاتداردا هەڵخەن تا خەڵکی کوردستان بەخۆشخەیاڵیەوە بەدیار حکومەتی عێراقەوە رابگرن و خەبات و ناڕەزایەتیەکانی خەڵکی کوردستان تائەو ئاستە بەلاڕێدا ببەن کە تەسلیم بێت بەگەندەڵکاران و دەسەڵاتێکی تاڵانچی کە لە عێراقدا لەسەرکارە. ئەمەشیان تەنها وتەنها بۆ ئەوەیە، سواری شەپۆلی ناڕەزایەتیەکانی خەڵک ببن و بیکەنە وەسیلەی بەدەستهێنانی پێگەیەک لەو کێشمەکێشانەی کەئێستا لەنێوان هێزە سیاسیەکاندا سەری هەڵداوە. ئەمە لەکاتێکدایە کەسیستەمی حوکمڕانی چ لەعێراق و چ لە کوردستان، یەک ناوەڕۆکی چینایەتیان هەیە، و یەک کارنامەی هاوبەش لەدژی خەڵکی کرێکارو زەحمەتکێش دەبەنە پێشەوە.        

ئۆکتۆبەر: لەفەزای سیاسی ئێستای عێراقدا و لەڕوانگەی پەیوەندی نێوان هەرێم و بەغداوە، تاچەند ئەم بڕیارەی دادگای عێراق جێبەجێ دەبێت؟ ئایا پارتی و یەکێتی مل بەم بڕیارە دەدەن؟ لەکاتێکدا دەوترێت بڕیارەکانی دادگای فیدڕاڵ، قابیلی ڕەتکردنەوە نیە؟

خەسرەوسایە: سەرەتا دەبێ ئەو ڕاستیە بخەینە بەرچاوی خۆمان کەبڕیارەکەی دادگای فیدراڵی عیراق، جارێکی تر پەیوەندی نیوان هەرێم و بەغدا و ئەو قەوارە هەرێمایەتیەی کە لەدەستوردا بۆ ئەحزابی ناسیونالیستی کورد جێگیرکراوە، خستۆتە ژێر پرسیارەوە، بەڵام ئەم پەیوەندیە سیاسیە تا یاسایی، هەمیشەش لەبەر ڕۆشنایی ئاڵوگۆرە سیاسیەکان و تەوازنی نێوان ئەحزابی ناسیونالیزمی کورد و دەوڵەتی مەرکەزی و دەخاڵەتی ئەمریکاو دەوڵەتانی ناوچەکەدا، لەژێر چەتری” تەواوفق وشەراکەت”دا، چۆتە پێشەوە و چوارچێوەیەکی بەخۆیەوە گرتووە. تەنانەت ئەوەی کە لەدەستوردا هەیە و لەسەر پەیوەندی نیوان هەرێم و بەغدا دانی پیدا نراوە، هەمیشە لاوکی بووە، پەیڕەوی لێنەکراوە. تەنانەت ئەوە خودی حکومەتی عێراقە کە لەپیش هەرلایەنێکی ترەوە ئەوەی لەدەستوردا وەک دەڵێن “بۆ کورد” دانی پێدانراوە، بەفەرامۆشی سپێردراوە، لەوانە مەسەلەی کەرکوک، ناوچە جێناکۆکەکان، دیاریکردنی سنوری جوگرافی هەرێم، بەشی هەرێم لەبودجەی عێراقدا، جێگای هیزی چەکداری حزبەکان لە سوپاو مەنزومەی دیفاعی عێراقدا، پەیوەندیەکان بەولاتانی دەرەوە، ئینجا مەسەلەی گازو نەوتی هەرێم.. هەموو ئەمانە هیچ کات لەڕوانگەی دەستورەوە مامەڵەیان لەگەڵ نەکراوە، بەڵکو لەئەنجامی ڕیکەوتنی نێوان هەر دوو حکومەتی هەرێم و بەغداوە، بەشیوەیەکی سیاسی تەوافقی لەسەرکراوە. بەدڵنیایەوە بڕیارەکەی دادگای فیدڕاڵ هەر ئەم چارەنوسەی دەبێ و سەرەنجام لەلایەن پارتی و حزبەکانی نێو دەسەڵاتەکەی هەریمەوە هەروا مامەڵەی لەگەڵ دەکەن و دەقاودەق جێبەجێ ناکرێ و پارتی و یەکێتی و حزبەکانی تریش ناتوانن ملی پێبدەن. چونکە ملەدان بەم بڕیارە بەکردەوە، بەمانای بڕینەوەی لقی ئەو دارەیە کە لەسەری ڕاوەستاون. پێشم وانیە ئەحزابە شیعیەکان بەتایبەتی ڕەوتەکەی مالیکی و هاوپەیمانانی، کە لەپشت سەری ئەم بڕیارەی دادگاوەن، بتوانن و هێندەش جدی بن لەجێبەجێ کردنیدا. وەک وتیشم بڕیارەکە کارتێکی فشارەو زیاتر بۆ ملدانی پارتیە بەهەندێک خواستی باڵە ناڕازیەکەی شیعەکان تا لەپێکهێنانی حوکمەتدا پێگەیەکی پێبدەن. بەتایبەتی کە لەسالی ٢٠٠٧ وە چەندینجار یاسای نەوت و غاز خراوەتەڕوو، بەڵام حکومەتی عێراقی بەهۆی ناکۆکیە ناوخۆییەکانی خۆیەوە و ئەو مونافەسەو بەشبەشێنەیەی کەلەنێوان هێزە پێکهینەرەکانیدا هەیە، نەیتوانیوە، یاساکە پەسەند بکاو تێیپەڕێنێت. بڕیارەکەی دادگای فیدراڵیش ناتوانێت لەم دۆخە بەدەر بێ و چانسی جێبەجیکردنی زۆری لەبەردەمدابێت. لەلایەکی ترەوە ڕۆڵی ئەمریکا ودەوڵەتانی ئەورپایە لەم بابەتەدا، ئەوان کە ملیاردها دۆلاریان لەڕاگرتنی قەوارەی هەرێمدا سەرفکردوەو بەدەیان کۆمپانیایان لەکوردستاندا خستۆتە بواری دەرهێنانی نەوت و گازەوە و لەئەنجامدا کوردستانیان وەک بەدیلێکی ستراتیژی بۆ مانەوەی هێزەکانیان لەبەرچاوگرتووە، دیسانەوە سادە نیە، هەروا ڕازیبن بەوەی کەحکومەتی عێراقی چی بوێ و چی بخوازێت بەسەر هەرێم و دەسەڵاتی پارتی و یەکێتیدا جیبەجێی بکات… هەموو ئەمانە پێمان دەلێت کەچارەنوسی بڕیارەکەی دادگای فیدڕال لەبەردەم چارەسەرێکی میانەییدایە کەبەتەوافقی نیوان هەردوو حکومەتی هەرێم وعێراق و ڕیکەوتن لەسەری تێپەڕدەکرێت..         

ئۆکتۆبەر: هەڵویستی حزب لەسەر ئەم بڕیارەی دادگای فیدراڵ چییە وحزب لەکوێ بڕیارەکەدا ڕادەوەستێت؟ خەڵک دەبێ چی بکات؟

خەسرەوسایە: سەرەتا ئەوە بڵێم کەحزبی ئێمە بەتەواوی توانایەوە لەدژی هەرجۆرە دەستدرێژیەکی ئابوری و سەربازی حکومەتی مەرکەزی بۆسەر ئەمنیەت و ژیان و گوزەران و مافەکانی خەڵکی کوردستان ڕادەوەستێت، هاوکاتیش پێمانوایە کە ڕێگای دەربازکردنی خەلکی کوردستان لەکێشمەکێشی نێوان هەریم و دەوڵەتی مەرکەزی و ئەو یاریە گڵاوەی کە ئەحزابی ناسیونالیستی کورد بەچارەنوسی خەلکی کوردستانەوە دەیکەن، هەڵوەشانەوەی فیدراڵیزمی قەومی و گەڕانەوەیە بۆ ڕای خەڵکی کوردستان کەئایا دەیانەوێت لەعێراقێکی نەقەومی و نەدینیدا بەمافی هاوڵاتی یەکسانەوە بمیننەوە وەیا سەربەخۆیی خۆیان ڕابگەیەنن. تا ئەو جێگەیەشی بەبڕیارەکەی دادگای فیدراڵی عێراق دەگەڕێتەوە ئێمە پێمانوایە کارتێکی فشارە کە لەکێشمەکێشی نێوان حزبەکان لەناوخۆی کوردستان و لەپەیوەند بەو بەڕیزبەندی و هاوپەیمانێتیەی کە لەنێوان ڕەوت و باڵەکانی نێو “پرۆسەی سیاسی” عێراقەوە سەری هەڵداوە و هیچ پەیوەندێکی بەماف و خواستەکانی خەڵکەوە نە لە عێراق و نە لە کوردستان نیە، تەنانەت ئەگەر نەوت وگازی هەرێم تەسلیم بەعێراقیش بکرێ وەیا هەر لەدەستی یەکیەتی و پارتی و کۆمپانیاکانیادا بمێنی، نەوەلام بە موچەی خەڵکی کرێکارو کارمەندی کوردستان دەدرێتەوە و نەداهاتەکەی دەکەوێتە خزمەتی ئەوانەوە. ئەم ڕاستیەش بۆ خەڵكی کرێکارو زەحمەتکێشی شارەکانی خواروو و ناوەڕاستی عێراق هەروایە. کەوایە بڕیاری خەڵكی ناڕازی بەم بڕیارەی دادگای فیدراڵ هەر ئەوەیە کە کۆتایی بەدەسەڵات و سیستەمێک بهێنن کە لەدەست گەندەڵکاران و تاڵانچیاندایەو بەخەباتی خۆیان دەسەڵاتدارێتی جەماوەری خۆیان دامەزرێنن وخۆیان کۆمەڵگا بەڕێوەبەرن وسیستەمێک دامەزرێنن کە داهاتی کۆمەڵگا بکەوێتە خزمەتی هاوڵاتیانەوە. واتە خەڵک نەک هەر نابێ لەبەرەی هیچ کام لەرەوت و بالەکانی بۆرژوازی چ لەکوردستان و چ لەعێراق ڕاوەستێ و ئومێدی خۆی بەکێشمەکێسی نیوانیانەوە گرێ بداتەوە، بەڵکو دەبێ بەتەوژمێکی فراوانەوە ناڕەزایەتیەکانی ئێستای خۆیان لەبەرامبەر چینی دەسەلاتداردا، یەکگرتوانە بهێننەمەیدانەوەو ئەم دەسەلاتانە بروخێنن، بەدڵناییەوە بەدوای دەسەڵاتگرتنی جەماوەر ڕێگای ئەوەش دەدۆزریتەوە کەچۆن کەیسی نەوت و غاز لەسەراسەری عێراقدا، بەهەرێمیشەوە ئیدارە پێبدەن وبیخنە خزمەتی دابینکردنی ژێانێکی خۆشگوزەرانەوە.