دەبێ دەستبەجێ و بێ قەیدو شەرت سابیر ئەحمەد و عەبدوڵا هیوا ئازاد بکرێن!

بەرواری ٨ی ئەم مانگە، دادگای نەوجەوانانی کەرکوک-گەرمیان سزای زیندانی ٤ ساڵی بەسەر هەردوو تازەلاو سابیر ئەحمەد (تەمەن ١٧ ساڵ) و عەبدوڵا هیوا (تەمەن ١٦ ساڵ)دا سەپاند، کە لە خۆپێشاندانەکانی ئابی ساڵی ٢٠٢٠دا بەشداریان کردووە.
دادگا ئەم دوو تازەلاوەی بە مادەی ٣٤٢ یاسای سزادانی عێراقی تایبەت بە سوتاندنی موڵک و ماڵی گشتی سزا داوە. سزادانی ئەم دوو تازەلاوە بە تۆمەتی بەشداری لە خۆپێشاندان و سوتاندنی موڵکی گشتی و بە پێی یاسای سزادانی عێراقی، خۆی تاوانێکی ئاشکرایە… نارەزایەتی و خۆپیشاندانەکانی کوردستان تەنها کاردانەوەیەکی ئاسایی جەماوەری بێبەشە بەو هەموو نابەراری و ستەم و بێمافی و دزی و گەندەڵیەی سەراپای کۆمەڵگەی کوردستانی تەنیووە… ئەوەی دەبێت و دەبوو سزا بدرێت، ئەوانەن کە ئەم دۆخە سەختەیان بۆ خەڵکی کرێکار و زەحمەتکێش و لاوانی کوردستان خوڵقاندووە. ئەو سەرە گەورانەی دەسەڵات و دەوربەرەکەیان، کە تەواوی موڵکی گشتییان دەستبەسەردا گرتووە و لەسەر خۆیان و کەسوکاریان تاپۆیان کردووە، شایستەی ئەوەن ڕووبەڕووی سزای توند و سەخت بکرێنەوە، نەک هاوڵاتیان و لاوانێک، کە دژی ئەو جەهەنەمەی دەسەلات سازی کردووە، هاتوونەتە مەیدان.
بەدەستەوە گرتنی سزای یاسای عێراقی لە جێگای یاسای خۆپیشاندان، تاوانێکی ترە بەرانبەر بەو دوو تازەلاوە بەدەستەوە گیراوە، کەمەبەست لێی ترساندنی خەڵک و سەرجەم جەماوەری ناڕازییە. ئیمە لە رێکخستنی گەرمیانی حزبی کۆمۆنیستی کرێکاریی کوردستانەوە ئەو سزایە بە سزایەکی ناڕەوا دەزانین و داواکارین دەست بەجێ و بێ قەیدو شەرت، ئەو سزا قورسە هەڵبوەشێتەوە و هەردوو تازەلاوەکە ئازاد بکرێن و قەرەبوو بکرێنەوە.
مافی بەشداری لە خۆپیشاندانەکان و بە فەرمی ناسینی توڕەیی خەڵک و لاوان لەدەسەڵاتێکی ستەمگەر و دز و تاڵانچی، پێچەوانەی یاسا نییە و نابێ سزای لەسەر بێت… ئەوەی دەبێت سزا بدرێت ئەو دەسەڵات و تاڵانچیانەن، کە گەرمیان و سەرجەم کوردستانیان تاڵان کردووە و هەموو سەرچاوەکانی کار و داهاتیان لەدەستی خۆیان و کەسوکاریاندا قۆرغ کردووە… هەروەها داوا لە خەڵکی ئازادیخواز و ئینسان دۆست و دادوەرانی پێشکەوتنخواز دەکەین ئەم ستەمە قبوڵ نەکەن و بەهەموو ڕیگایەکی دروست هەوڵی ئازادکردنی ئەم دوو تازەلاوە و سەرجەم زیندانیانی خۆپیشاندانەکان بدەن… لەم هەوڵ و تیکۆشانەدا ئیمە لەڕیزی پیشەوەدا رادەوستین.
ڕیکخستنی گەرمیانی
حزبی کۆمۆنیستی کریکاریی کوردستان

Check Also

جمهوری ئیسلامی و هاوچارەنوسەکانی پێکەوە دەڕۆن!

ڕێبوارئەحمەد بزوتنەوەی هەڵپێچانی جمهوری ئیسلامی تادێت زیاتر پەرەدەگرێت و خەڵکی ئیران لەسەر ڕێگای فەراهەمکردنی پێداویستیەکانی …