hkkurdistan
سه‌رمایه‌داری داڕزیوه. چ گۆشه‌یه‌كی ئه‌م دنیایه هه‌یه به‌ڵا و نه‌گبه‌تیه‌كانی سه‌رمایه‌داری تێكی نه‌دابێ؟ برسێتی و به‌دخۆراكی بێوێنه، نه‌بوونی ئاوی خواردنه‌وه، بێ خانه‌ولانه‌یی، بێبه‌شی، بڵاوبوونه‌وه‌ی نه‌خۆشی، نائه‌منی ئابوری و كۆمه‌ڵایه‌تی سه‌رباری ده‌یان موسیبه‌تی تر به‌شێكن له‌و سیستمه‌ی كه بۆته هۆی بێدادی به‌سه‌ر سه‌ری خه‌ڵكه‌وه له‌مسه‌ری ڕۆژهه‌ڵاته‌وه بۆ ئه‌وسه‌ری ڕۆژئاوا.
له ماوه‌ی ئه‌م چه‌ند ساڵه‌ی دواییدا و به‌تایبه‌تیش دوای ده‌ستپێكردنی شه‌ڕ له ئۆكرانیا، جه‌نگ و میلیتاریزم باجی زۆریان له مرۆڤایه‌تی سه‌ندووه. له ئاكامی بارودۆخی قه‌یراناوی ئه‌م دواییانه‌دا، بۆرژوازی جیهانی ژیانی ملیۆنه‌های پایماڵ كردووه. ئه‌یانه‌وێ ئه‌و مافه سه‌ره‌تاییانه‌ش بسه‌ننه‌وه كه ساڵه‌هایه به خه‌باتی چینی كرێكار به‌ده‌ست هاتوون. حكومه‌ته بۆرژوازیه‌كان جه‌نگیان له دژی قوتی ده‌می ئێمه به‌رپاكردووه، بیمه‌كانیان بڕیوین، هه‌ڵاواسانیان به‌سه‌رماندا سه‌پاندووه و له هه‌وڵی ئه‌وه‌شدان مافی ناڕه‌زایه‌تی ده‌ربڕین و خۆپیشاندانمان لێ به‌رته‌سك بكه‌نه‌وه.
به‌ڵام پرۆلیتاریای جیهانیش ده‌سته‌وسان دانه‌نیشتووه. بگره شه‌پۆلی مانگرتن و ناڕه‌زایه‌تیه‌كانی كرێكارن له فه‌ڕه‌نسا و به‌ریتانیا و ئه‌ڵمانیا و كه‌نه‌دا و ئه‌مریكا و چین و كۆریای باشور و توركیا و ئێران و… به‌شی هه‌ره زۆری جیهان به‌ره‌نگاری بوونه‌وه‌ی چینایه‌تی چینی كرێكارن له دژی سه‌رمایه‌داری.
ناڕه‌زایه‌تیه‌كانی كرێكاران ته‌نها ده‌رباره‌ی خراپی هه‌لومه‌رجی كار و زیادكردنی كرێ و مافی ناڕه‌زایه‌تی ده‌ربڕین و دژی هه‌ڵاوسان و به‌رزبوونه‌وه‌ی نرخی پێداویستیه‌كانی ژیان و … هتد نیین، بگره وه‌بیرهێنانه‌وه‌ی ئه‌وه‌یه كه سیستمی سه‌رمایه‌داری ناتوانێ و نابێ به‌رده‌وام بێ. په‌یامێكی ڕۆشنه له‌لایه‌ن پرۆلیتاریاوه كه چیتر نابێ بۆرژوازی برینی قه‌یرانه‌كانی خۆی بكاته جه‌سته‌ی ئێمه‌وه.
ناڕه‌زایه‌تیه‌كان له‌وه زیاتر فراوان بوونه‌ته‌وه كه ته‌نها داواكاری چه‌ند خواستێك بكه‌ن و گه‌یشتووه به‌وه‌ی باس له پێویست بوونی شۆڕش بكه‌ن. هه‌ستانی كرێكارانی فه‌ڕه‌نسا ئیلهامبه‌خش و ئومێدبه‌خشه بۆ بزووتنه‌وه‌ی كرێكاری له جیهاندا. به‌ڵام هێشتاش كه‌موكوڕی سه‌ره‌كی نه‌بوونی ئه‌حزابێكی كۆمۆنیستیه له پێشه‌نگی جوڵانه‌وانه‌وه‌كانی كرێكاراندا. ئه‌حزابێكی كۆمۆنیستی پێویستن كه دیدگایه‌كی ڕۆشنی كۆمۆنیستی و سۆشیالیستی كرێكارییان هه‌بێ بۆ ڕابه‌رایه‌تی كردنی ته‌واوی بزووتنه‌وه‌كه به‌ره‌و شۆڕشی چینایه‌تی. شۆڕشێك پێویسته كه كۆتایی به كاری به‌كرێ و خاوه‌ندارێتی تایبه‌تی بهێنێ، كه سه‌رچاوه‌ی هه‌موو ئه‌و نادادپه‌روه‌ریه‌یه دژ به مرۆڤایه‌تی. پرۆلیتاریای جیهانی و كرێكاران پێویستیان به ئه‌حزاب و شۆڕشانێكه كه پشت به‌ستووه به ڕوانگه‌ی ماركسه‌وه بۆ كۆتایی هێنان به چه‌وسانه‌وه و زوڵمێك كه دژ به زۆرینه‌ی كۆمه‌ڵگه پیاده‌ئه‌كرێ.
ناڕه‌زایه‌تیه‌كان و جوڵانه‌وه‌كانی ئه‌م دواییانه پێویستیان به ئاسۆیه‌كی له‌م چه‌شنه هه‌یه، ئاسۆی كۆمۆنیستی كه ئه‌بێ به‌هێزبكرێ.
یه‌كی ئایار ڕۆژی هاوپشتی جیهانی و خه‌باتی چینایه‌تیمانه بۆ ئاینده‌یه‌كی ئازاد و یه‌كسان و خۆشگوزه‌ران.
بۆ پێشه‌وه به‌ره‌و ئه‌نته‌رناسیۆنالێكی كۆمۆنیستیی چینی كرێكار.
بژی یه‌كی ئایار
بژی شۆڕشی كۆمۆنیستی
ڕێكخراوی ده‌ره‌وه‌ی
حزبی كۆمۆنیستی كرێكاریی كوردستان
٢٦ ی نیسانی ٢٠٢٣
