hkkurdistan
عەبدوڵا مەحمود:
قوڵبوونەوەی قەیرانی هەرێمی کوردستان و گرفت و کێشە هەڵپەسێردراوەکانی، هەلومەرجێکی تایبەتی هێناوە ئاراوە. هەلومەرجێک کە هەمووان، لە بەرپرسانی دەسەڵاتەوە بۆ ئۆپۆزیسێۆن. لە نووسەرانەوە بۆ سیاسیەکان. لە موچەخۆرەکانی حزبەوە، بۆ ئەندام پەرلەمانە خۆش مەشرەفەکان. لە بەرپرسە نابەرپرسەکانی حکومەتەوە بۆ راوێژکارە زۆرو بۆر و بێکارەکان. تا دەگات خێڵێک لە سیاسی خانەنشین و چەند موچەیی و موچە دز و بن دیوار، هەموویان هەراسی خۆیان لە دۆخی کوردستان بەیان دەکەن. باسی چەق بەستوویی دۆخی هەرێمی کوردستان و ئاستەنگەکانی دەکەن.
لەدیدی هەموو ئەم جەنابانەوە، دۆخی چەقبەستویی هەرێمی کوردستان، سەرچاوەکەی پرسی سەرۆکایەتی هەرێم، لەکارکەوتنی پەرلەمانە شەرعیەکەیان!! و کشانەوەی چەند وەزیرێک و قوڵبوونەوەی کێشەو ململانێی نێوان بەشێک لە حزبە سیاسیەکانە. بێگومان ئەم کورتهێنانە لە بینینی کێشەو گرفتەکانی کۆمەڵگای کوردستان، و گرێدانەوەی ئەو هەموو بێدادی و زوڵم و ستەم و نابەرابەرییە ئابوری و کۆمەڵایەتی و دزی و تاڵانی و خۆبەستنەوە بە سیاسەتی زلهێزی دنیاو یاریچییە ناوچەییەکان… بە پرسی سەرۆکایەتی هەرێم و لە کارکەوتنی پەرلەمانەوە، قەیرانێکی ترە، بەڵام بەزۆر دروستکراو بۆ ئامانج و خواستی کورتبینانەی بەشداری سیاسی و دزیەکی بە یاسایکراو لەلایەن پێکهاتە ساختەکانی یاسایی و حقوقی سیستەمی حیزبۆکراتی و میلیشیایی کوردستانەوە.
پرسی سەرۆکایەتی هەرێم، کاراکردنەوەی پەرلەمان، کە زوربەی نووسەرانی و لێکۆڵەرە سیاسی و چاودێرەکانیان، بە گرفتی سەرەکی یان سەرچاوەی کێشەکانی هەرێم و هۆکاری چەقبەستووی دۆخەکەی دەزانن. جگە لە درۆیەک و هەوڵێک بۆ سواڵی بەشی سیاسی هیچی تر نییە. لەوەش واوەتر ئەم دهۆڵ کوتانە بۆ پرسی سەرۆکایەتی هەرێم و کاراکردنەوەی پەرلەمان، خۆڵکردنە چاوی خەڵکی کوردستان و شێواندنی رای گشتی دنیای دەرەوەیە.
لە کوردستان و لە دنیای واقعیدا، سەرۆکی هەرێمێک بوونی نییە. سەرۆکی بەشێک لە هەرێم و زونێک بوونی هەیە، کە حزبی خاوەن قەڵەمڕەوی لەم زونەدا، سەرۆکی پارتەکەی بە سەرۆکی هەرێم دەزانێت و بانگەشەی بۆ دەکات. چ حزبی هاوپەیمان و خاوەن رێکەوتنی ستراتیجی یەکێتی نیشتیمانی و چ حزبی بزوتنەوەی گۆڕان، کە لە زونی سەوزدان و بەشێکی تری هەرێمیان بەدەستەوەیە، هەرگیز سەرۆکی هەرێمی زونی زەردیان، بەسەرۆکی زونی سەوز نەزانیووەو لە دنیای واقعیشدا، کارایی هیچ بریارێکی ئەم سەرۆکی هەرێمە لەم زونەدا برەوی نەبووە. درێژکردنەوە و کورتکردنەوەی ماوەی سەرۆکایەتی هەرێم و سەرۆکەکەیشی، تەنها دانپیانانێکی دیبلۆماسیانەی یەکێتی و هیزەکانی زونی سەوزە بە سەرۆکی زونێکی تر کە زونی زەردە نەک هیچیتر. تا ئەو جێگایەش کە سەرۆکی هەرێم لە ناوەندەکانی بریاری ناوچەکەو جیهاندا، وەکو سەرۆک مامەڵەی لەگەڵ دەکرێت. پەیوەندی بە دەستڕۆشتویی پارتی و قورغکردنی هەموو جومگە هەستیارەکانی حکومداری و دەسەڵات و پەیوەندیەکانەوە، هەیە لەهەرێم و ناوچەکەدا. کاتێک پارتی لاواز بکرێت و جومگە هەستیارەکانی دەسەڵاتدارێتی لێ وەبگیرێتەوە، مامەڵە لەگەڵ سەرۆکەشی بەرەو کۆتایی دەچێت و ئەو حزبەی دەتوانێ پاوانی دەسەلات و جومگەکانی حکومرانی بکات، ئەو دەتوانێ سەرۆک دیاری بکات و لە دنیای دەرەوەو ناوچەکە مامەڵەی لەگەڵ بکرێت. ئەوەتا سەرباری ئەوەی حزب و هێزەکانی زونی سەوز، ماوەی سەرۆکایەتی هەرێم بە نایاسایی دەزانن، بەڵام دنیای دەرەوە یان ناوەندەکانی بڕیار مامەڵەی سەرۆکی هەرێم لەگەڵ سەرۆکی پارتی دەکەن، ئەویش تەنها بەو هۆیەوەیە کە سەرۆکی هەرێم سەرۆکی حزبێکی باڵادەستە کە قەڵەمرەوی جغرافیایەکی زۆرتر دەکات. حزبیکە قۆرغی دەسەڵاتی کردووە، هێزی میلیشیایی هەیە، بەشێكی زۆرتر لە سامانی وڵاتی پاوان کردووە… ئەمە حەقیقەتی سەرۆکی هەرێمە. بەجیا لەهەموو ئەمانە دۆخی هەرێمی کوردستان بە هەردوو زونەکەیەوە، بۆ خەڵکی کوردستان بە بوونی سەرۆکی هەرێمی ماوە یاسایی و بە سەرۆکی ماوەبەسەرچو و نایاسایەوە، هیچ جیاوازیەکی نەبووەو نییە. بە نەبوونی سەرۆکی هەرێمیش دۆخی هەرێم و ژیان و گوزەرانی خەڵکی کوردستان هیچ ئاڵوگۆرێکی بەسەردا نایەت. بەو راستیە سادانەوە، گرێدانەوەی دۆخی چەقبەستو و ئەزمەگرتوی هەرێم بە پرسی سەرۆکایەتی هەرێم و سەرۆکی هەرێمەوە، درۆیەکی ئاشکرایە.
پەکخستنی پەرلەمان، یەکێکی تر لەو مەسەلانەیە کە وەکو هۆکاری چەق بەستووی هەرێمی کوردستان دەناسێنرێت. بەڵام لە دنیای واقعیدا پەکخستنی پەرلەمان لەلایەن پارتی و بە زۆری هێز و ناردنەوەی سەرۆکی پەرلەمانی سەر بە لیستی نیلیی بۆ زونی سەوز، هەرگیز هۆکاری سەرەکی دۆخی چەق بەستو یان قەیراناوی هەرێم نییە. ئەمەش درۆیەکی تری شاخدارە، بۆشاردنەوەی راستی هەلومەرجی هەرێم. هەموو کەسێکی هوشیار و راستبێژ و دەزانێت، پەرلەمان لەهەلومەرجی نەبوونی دەوڵەت و قەوارەی دەوڵەتیدا، لە کاریکاتۆرێکی عەنتیکەی حزبی زیاتر شتیكی تر نابێت. پەرلەمان و تەنانەت حکومەتیش لەژێر دەسەڵاتی میلیشیایدا، موچە خۆری حزب و دوو دەزگای فریودەرانەی قورمیشکراون بۆ جێبەجێکردنی ئەجندای حزبی باڵا دەست. هەر کاتێك حزبی باڵادەست بیەوێت بەزۆر دەرگاکانی کڵۆم دەدات. هەروەکو بە تەجروبە بینیمان، کاتێک سەرۆکی پەرلەمان هەوڵیدا ویستی میلیشیایی و سنوری دەسترۆشتووی میلیشیایی ببەزێنێت، پارتی ناردیەوە ماڵ و دەرگای پەرلەمانیشی داخست. ئەو پەرلەمانەی کە زۆرێک لە بازرگانە سیاسیەکان و خێڵی نووسەرانی موچەخۆر بە تاکە دەزگای شەرعی کوردستانیان، دەزانێ. ئەزموونی پەرلەمان لە کوردستاندا، ئەزمونێکی عەنتیکەی هەیە. پەرلەمان لە مێژووی خۆی و لە هیچ کام لە خولەکانیدا، هەزار بریارو پرۆژە یاساشی دەرکردبێت، هیچ حزبێکی دەستڕۆشتوو لە زونی خۆی و ژێر قەڵەمرەوی خۆیدا، بایەخێکی بۆی دانەناوە. مەگەر خزمەتی بە حزب و تاڵانی حزبی کردبێت. خۆ لە پەیوەند بە خواستی خەڵکی کوردستانەوە، لە یاساو ریسای مۆدێرنەوە بۆ رێکخستنی ماف و ئەرکی هاوڵاتیان و موچەو بەرپرسیارییەتی…تاد. تا دەگاتە لێپرسینەوە لە دزانی ئاشکراو گەندەڵ، بکوژان و نۆکەران، نەیتوانییوە هیچ کارە بێت و هیچ بکات… چونکە پەرلەمانی میلیشیایی هێندەی دەزگاو دامەزراوەیەکە بۆ رەوایەتی بەخشین بە دزی و تاڵانی و دەسەڵاتی بەزۆر داسەپاوی حزبی، نیو ئەوەندە دەزگای تەشریعی بۆ یاسا دەرکرن و چاودێریکردنی کارەکانی حکومەت نەبووە… ئەگەر کەسێک لای وایە ئەمانە راستی نین، با نمونەیەکی پێچەوانەی ئەم بۆچونەمان نیشان بدات. پەرلەمان و حکومەت لە کوردستان جگە لە درۆیەکی گەورەو بازارێک بۆ بەخشینی پسۆلەی دەوڵەمەند بوون بە ئەندام پەرلەمانەکان و وەزیرەکان و دریژ کردنەوەی لیستی خانەنشینی و فریودانی رای گشتی دنیای دەرەوە زیاتر هیچیتر نەبووەو نییە. کاتێکیش ویستێک هەبێت بۆ گوێرایەڵ نەبوون بۆ ویستی حزبی باڵادەست و خاوەن هێزی چەکدار، پەرلەمان وەکو دوکانێکی ئاسایی کڵۆم دەدرێت. دیارە سەرانی ئەو حزبانە بە رەوانەکردنی کادرە پلە لەخوارەکانیان بۆ پەرلەمان، ئەو راستیە دەسەلمێنن، کە پەرلەمان هیچ و هیچکارەیە. بۆیە سەرانی بڵند پایەیان لە پۆستی حزبیدا، خۆیان بەشایانی ئەم شوێنە نازانن.
ئەو دوو بیانووە لەکارکەوتنی پەرلەمان و پرسی سەرۆکایەتی، پەیوەندی بە دۆخی چەق بەستوی هەرێمی کوردستان و ئەو هەموو زوڵم و بێدادی و قوڵی قڵشتی چینایەتی و بێمافییە هەمە لایەنە سیاسی و ئابوری کۆمەڵایەتیەوە نییە کە کوردستان دەرگیری بووە… پرسی پەرلەمان و سەرۆکایەتی هەرێم دەشی بەشێک لە ناکۆکی نێوان بلۆکی ناوخۆیی بۆرژوازی کورد و حزبەکانی بێت، لەسەر بەشی پۆست و نابەرابەری لە دابەشکردنی سامانی بەتاڵانبراوی خەڵکی کوردستان. بەڵام هەرگیز ئەم بلۆکە بۆرژوازییە کێشەی لەسەر مافە زۆرو زەوەندە پێشێلکراوەکانی خەڵکی کوردستان و ویستە پایماڵکراوەکانیان نەبووە و نییە. دزی و تاڵانی ئاشکرا بێداد دەکات، تا ئەو ڕادەیەی بەشێک لەسەرانی حزبەکانیش بە هۆکاری جیا جیا و بە مەبەستی تایبەتی ناچاربوون دانی پیا بنێن. بێکاری و گرانی و هەژاری رۆژ بەرۆژ بەرینتر و فراونتر دەبێتەوە. خزمەتگوزارییە کۆمەڵایەتی و تەندروستیەکان، لەئاستی نەبوون و هەرزان فرۆشیدان بە کەرتی تایبەتی. ئاو کارەبا و سوتەمەنی و بێخانەو لانەیی، کەسەرەتاییترین پێداویستی دانیشتوانن، مۆتکەی سەر ژیانی خەڵکین. سلکی خوێندن وپەروەردە تا بە زانکۆ و پەیمانگاکان دەگات، وێرانەن. کرێکاران و کارمەندان، بەچەند مانگ جارێک موچە یان نیوەموچەیەکی نیوە ناچڵ وەردەگرن، کە ناو هێنانی لەچاو گرانی بازار و کارێک کە ئەنجامی دەدەن، شەرماوەنترین پەڵەی رەشە بە ناوچەوانی دەسەڵاتی بزوتنەوەی کوردایەتیەوە، کە حالەتی لەو چەشنە لە هیچ شوێنێکی ئەم گۆی زەویە نەبووەو نابێت. لاوان ناچارن پۆل پۆل وڵات جێ بهێڵن، سڵ لە ریگای پر تەلبەند و کیڵگەی ئەلغام و پۆلیسی وێژدان مردوی سنورەکان و شەپۆلی دەریا سەرشێتە ئینسان لوشدەرەکان، ناکەنەوەو وێڵی دوای ژیانن. دەیانەوێ هەرچۆنێک بووە ژیان و ئاییندە بدۆزنەوە. باسی دۆخی مەینەتباری مناڵان و تازە لاوان، دڵهەژێنە. ستەم و بێمافی سەر ژنان تا دەگاتە توندوتیژی و تیرۆریان، جەنگێکی بێ وەستاوی پیاوسالاری و سیستەمی سیاسیە لە دژیان و تۆمەتبارانیشیان، ئازادن. خانەنشینانی واقعی ئەو ئینسانانەی کۆمەڵگا لەسەر شانی ئەوان چەرخاوەو بیناکراوە، فرێدراونتە کەنار کۆمەڵگا، و کەس ئاوڕ لە ویست و خواستەکانیان ناداتەوە. ئازادییە سیاسیەکان و ئازادی بیرورا دەربرین و رۆژنامەگەری… نەک هەر لەژێر هەرەشەدان، بەڵکو تادێت لیستی پێشێلکاریەکان و تیرۆرەکان، بەرەو هەوراز تر دەچێت. تۆمەتبارو بکوژانیشیان، دەشاردرێنەوە. سەیر ئەوەیە تیرۆرەکان بە ئاشکراو بەرۆژی روناک دەکرێن، بەڵام بکوژانیان هەر لەتاریکیدا، دەهێڵنەوە. یاساو رێسای کۆنەپەرستانە رۆژانە دەمەزەرد دەکرێنەوە و کۆنەپەرستی ئیسلامی و داعشی و رەوتگەلی جۆراجۆری ئیسلامی مەیدانداریان پێدەکرێت. تا دێت کۆمەڵگای کوردستان بەرەو دواوە پەلکیش دەکەن. مافە فەردی و مەدەنیەکان، لە ژێر هەرەشەی بەردەوامدان. لە ژێر ناوی ڕیزگرتن و پاراستنی پیرۆزییە دینی و نیشتیمانی و نەتەوەیەکاندا، پیرۆزییە ئینسانیەکان و مافی تاک و لێکۆڵینەوە و توێژینەوەی زانستی و رەخنەگرتنی راشکاو لە کەلتور و ئەخلاقیاتی دواکەوتوانەی کۆمەڵگا، یاساغکراوە.
ململانێی حزبی و سێبەری نائارامی ئەو ململانێیە و کێشانی بە توندوتیژی، هەرگیز سێبەری نەگریسی لەسەر خەڵکی کوردستان ئاوا نەبووە. خوشخزمەتی بە وڵاتانی ناوچەکەو دابەش بوونی بلۆکی بۆرژوازی کورد بەسەر دوو قوتبی ئێرانی و تورکی، پاشخانێکی دریژی هەیەو بەردەوامە. پەیوەندی دەسەڵاتی میلیشییای بە ناوەندو بەغداوە، لەرزۆک و هەمیشەش مایەی هەرەشەیە بۆ سەرخەڵکی کوردستان. فیدرالیزمی قەومی لەدنیای واقعیدا تەنها لاشەکەی ماوە. ململلانێی نێوان هەرێم و بەغدا، ئەگەر ماوە بە ماوەش خامۆش بێت، گومان هەڵنەگرە هەرگیز ناتوانریت کۆتایی بیت. لکاندنەوەی کوردستان بە عێراقەوە لە ژێر ناوی ئەو فدرالیزمیە قەومیە مردوەدا، بنەمای زوربەی کێشەکانی نێوان هەرێم و بەغدایە. خۆ بەستنەوەی بزوتنەوەی کوردایەتی بە سیاسەتەکانی غەرب و ئەمریکاو و نۆکەرە ناوچەیەکانیان و دابەش بوونیان بەسەر هێزە ناوچەیەکان، ئیرادەی سیاسی خەڵکی کوردستانی تێكشکاندووە. جەنگی دژی داعشی حزبە میلیشیایەکان، بە پشتیوانی ئەمریکاو غەرب و گەورەترین جبەخانەی چەک و پشتیوانی مالیەوە، بە هەموو پێوانەیەک لەچاو خۆراگری و جەنگی بەرگری ژنان و پیاوانی چەکداری دەستکورت لە چەک و تەقەمەنی کانتۆنەکانی کۆبانی و عفرین و جزیرەدا، زۆر لاواز و کەم و مایەی شێلگیر نەبوونە. ئەوە بەجیا لەوەی ئەم دەسەڵاتەو لە پێشیانەوە پارتی تۆمەتباری سەرەکی کارەساتی جینۆسایدی ئیزیدیەکانە، لە ئاکامی راکردنی هێزەکانیان و تەسلیمکردنی خەڵکی شەنگال بەدەست چەکدارانی داعشی ئیسلامییدا. لە ئێستاشدا لاوازبوونی داعش لە بەرەکانی جەنگدا، بە مانای لاوازبوونی کۆنەپەرستی داعشی لە شارەکانی کوردستاندا، نییە. بە پێچەوانەوە کۆنەپەرستی داعشی و یاساو ریسای ئیسلامی داعشی، ئێستا لە کوردستاندا لەلایەن دەسەڵاتی حزبی و میلیشیایەوە، برەوی پێدەدرێت. ئەوە بەجیا لەوەی هەر ئەم دەسەڵاتە ژینگەیەکی گونجاوی بۆ ئیسلامی سیاسی و رەوتەکانی… خوڵقاندووە. هەروەها لە عێراقیشدا حەشدی شەعبی وەکو میلیشیایەکی تایفی، دەبێتە جێگرەوەی داعش، ئەمەش مەترسیەکی گەورەیە چ بۆ عێراق و چ بۆکوردستان…
ئایندەی سیاسی کوردستان، هێشتا نادیار و کۆسپی بەردەم ئیرادە نواندنی خەڵکی کوردستان بۆ سەربەخۆیی و پێکهێنانی وڵاتێکی سکیولار و غەیرە دینی، حزبە میلیشیایەکانی کوردستانن. مەگەر بۆ شاردنەوەی شکست و گواستنەوەی رای گشتی لەسەر دۆخی نەخوازراوی کوردستان یان وەکو کارتی گوشار لە نەورۆزەکاندا، لە بەرامبەر بەغدا بەدەستەوە بگیرێت. واتە پرسی سیاسی خەڵکی کوردستان و پرسی سەربەخۆیی و ریفراندۆم لەلایەن بزوتنەوەی ناسیونالیستی کوردی، بەتایبەت لە لایەن پارتی و سەرۆکەکەیەوە، کراوەتە کایەیەکی سات و سەودا و فریوکاری و خۆدزینەوە لە وەڵامدانەوە بە گرفتەکانی تری کۆمەڵگا.
هەموو ئەمانە و لیستێکی دریژتریش کارنامەی بزوتنەوەی ناسیونالیزمی کورد و بەدیاریکراوی کارنامەی دەسەڵاتی چارەکە سەدەی پارتی و یەکێتی نیشتیمانییە. کەبەشی بریار بەدەستی بزوتنەوەی گۆرانیش بەشێک بوون لەم دەسەڵاتە. ئەم هەلومەرجە ٨ کابینەی حکومی وچەند دەورەی پەرلەمانی و چەندین حکومەتی شەراکەتی دوو قۆڵی و ئیدارەی جیاو حکومەتی بنکە فراوان و… تیا پێک هاتووە، هیچ کام لەمانە نەک وەڵامێکی گونجاویان بە پرس و کێشە واقعیەکانی کۆمەڵگای کوردستان نەداوەتەوە، بەڵکو تا هاتووە دۆخی کوردستانیان خراپتر کردووە. پرسی دەستور تا دەگاتە پرسی کاراکردنەوەی پەرلەمان و سەرۆکی هەرێم، ململانێی یەک دوو ساڵی رابردوی نێوان حزبەکانی پیکهێنەری حکومەتی!! بنکە فراوانە. لە کاتێکدا دۆخی هەرێم و ئەو هەلومەرجە دڵهەژێنەی هەیەو ساڵ بەساڵ خراپتر دەبێت، بەرهەمی دەسەڵاتی بزوتنەوەی کوردایەتیە لە سالێ ١٩٩١ وە تا ئێستا. بەرهەمی شکستی ئەزمونێکی دیاریکراوە. کەسانێک لە سیاسی و نوسەرەوە بۆ هەر لێکۆڵەرو چاودێرێکی سیاسی، کە دەیانەوێ ئەم هەلومەرجە ببەستنەوە بەپرسی سەرۆکایەتی هەرێم و لەکارکەوتنی پەرلەمانەوە، گەورەترین درۆیی مێژویی دەرخواردی کۆمەڵگا ئەدەن. ئەم دەسەڵاتە دەسەڵاتی قەیرانە، دەسەڵاتی دژی هەر هەوڵێکی چاکسازیی و دەرهێنانی کۆمەڵگای کوردستانە لەو گێژاوە سیاسیەی تێیکەوتووە. وە دژی هەر ئاڵوگورێکە بە سودی باشترکردنی ژیان وگوزەرانی خەڵکی کوردستان و گێرانەوەی ئیرادەی راستەوخۆکەی بۆ دیاریکردنی ئایندە سیاسیەکەی.
دەرچوون لە قەیران بە حزبی قەیران خوڵقێن ناکرێت. چاکسازی بە دزو تاڵانچیان، ناکرێت. دەوڵەت و پرسی سەربەخۆیی کاری ئەو حزبانە نییە، کە دژی ئیرادەی راستەوخۆی خەڵکی کوردستان بن و خۆشخزمەتی و نۆکەرایەتی بۆ وڵاتانی ناوچەکە بووبێت بە نەریتیان.
رێگا چارە بۆ دۆخی نەخوازراوی کوردستان، نە کاراکردنەوەی پەرلەمان و نەچارەسەری پرسی سەرۆکایەتیە. نە هەڵبژاردنەوەی دوبارەو نە پیكهێنانی کابینەی نوێی حکومەتە. پێش مەرجی سەرەکی کۆتاییهێنان بە هەلومەرجی کوردستان کۆتاییهیانانە بە دەسەڵاتی میلیشیایی ناسیونالیزمی کورد. ناسیونالیزمی دەسەڵات بەدەستی کورد هۆکاری بناغەیی هەلومەرجی کوردستان و گرفتە کەڵەکە بووەکانیەتی، بە حکومەت و پەرلەمانی ناکاراو کاراوە، بە حکومەتی زۆرینەو بنکە فراوانەوە، بەسەرۆکی هەرێمی ماوە یاسایی و ماوە بەسەرچووە، بە دەسەڵات و ئۆپۆزیسیۆنەوە.
رێگا چارەی واقعی، شۆرشی کرێکارییە کە چینی کرێکاری رێکخراو و جەماوەری زەحمەتکیش بە کۆبونەوەیان لەدەوری ئاسۆی سۆسیالیزم، دەتوانن بەسەمەری بگەیەنن. دەسەڵاتی میلیشیایی ناسیونالیزمی کورد، لە رێگای هەڵبژاردنەوە وەلانانرێت. شۆرش تاکە وەڵامی کارسازە بۆ دەستکۆتاکردنیان لە دەسەڵات و سامانی تاڵانکراو و سەرکوت و کۆنەپەرستی… بێگومان وەڵامدانەوە بە ئایندەی سیاسی کوردستان و پێکهێنانی دەسەڵاتی شورایی و جیاکردنەوەی کوردستان لە عێراق و بە ئیرادەی راستەوخۆی خەڵکی کوردستان، کاری شۆرشی کرێکاریی ئاسانتر و خەباتی چینایەتی سادەترو زەمانی سەرکەوتنی زۆرتر دەبیت، دەبێ بۆ شۆرش ئامادەکاری بکرێت. بژی شۆرشی کرێکاری…
سێبتەمبەری ٢٠١٦
www.abdullamahmud.com
