پێشمەرگە و شەڕ بۆ” نیشتمان “

عەبدوڵا ساڵح

شەڕ لە دژی داعش لە موسڵ دەستی پێکرد، لەناوبردنی ئەم ڤێرژنە لە سوپەر وەحشیەتی ئیسلامی سیاسی بە شەڕی سەربازی، ویستی بەشەریەتی مودێرنە لە هەموو گۆشەیەکی ئەم جیهانە، ئەم سەرەتانە دەبێ لەجەستەی مرۆڤایەتی دەربهێنرێ، بۆیە هێزە بەشدار بووەکان لەو شەڕەدا، هەرناسنامەو شوناسێکیان هەبێ بەلای منەوە گرنگ نی یە .

زۆر ئاشکرایە هێزە بەشداربووەکانی ئەم شەڕە هەر ئەوان بوون داعشیان خوڵقاندو پارێزگاریان کرد، ئەمڕۆش شەڕی لەناوبردنی دەکەن، ئیتر بەهەر هۆیەکەوە بێت، کە گرنترینیان ئێکسپایەر بوونی ڕۆڵی ئەم ڤێرژنەیەو گەڕانە بەدوای بەدیلی تردا. لەگەڵ هەموو ئەمانە ، ئەگەر لە ژنە یەزیدیە یەخسیرەکانی ژێر دەستی داعش بپرسی: هێزێک هاتووە دەیەوێ داعش لەناو بەرێ ڕاتان چی یە ؟ ئەوان بێشک شوناس و ناسنامەی ئەو هێزەیان مەبەست نیە، ئێمەش ئەگەر لەبری ئەو ژنانەو وەک ئەوان بیر بکەینەوە دەبێ هەمان هەڵوێستمان هەبێ .

 پێشمەرگە ڕۆڵێکی گرنگ دەبینێ لەو شەڕە، ئێمە لێرەوە دەستخۆشیان لێدەکەین و دەزانین ئەوان، وەک ‌هێ، دەوری ڕاستەوخۆیان لەگەشەو پەرەگرتنی داعشدا نەبوە، بەڵام ئەو بازرگانە چاوچنۆکانەی لەژێر باڵی مەسئولە حزبیە گەورەکاندا هەڵتۆقین و بە چاوتروکانێک بوونە ملێۆنێر و ملیاردێر، ژێر بەژێر سات و سەودایان لەگەڵ داعش هەبوو، ئەم دۆسیە کە ئێستا پەردەپۆش کراوە دەبێ ڕۆژێک ئاشکرا بکرێ.

قەڵەم بەدەستەکانی ئەحزابی کوردی دەسەڵاتدار چەند ڕۆژێکە بۆقی ئەوە لێدەدەن کە ” پێشمەرگە موڵکی گەلە و هیچ حزبێک نابێ خۆی بکا بە خاوەنی “، منیش دەڵێم سەد خۆزگە وا بوایە ، بەڵام کاتێک ئاوڕێکی خێرا لە ڕابردوو دەدەینەوە، پێچەوانەکەیمان بۆ دەردەکەوێ کە خۆی لەبن چەند ڕاستی یەکدا حەشار داوە :

ئەم هێزە پێکهاتە سەرەکیەکەی ڕۆڵەی خەڵکی کرێکارو زەحمەتکێشە کە بە ئیستلاحی هەندێک لە حزبە کوردیەکان بە ( پێشمەرگەی سادە ) ناویان دەبەن ! ئەوانە خۆراکی سەرەکی هەر شەڕ و ئاڵۆزیەکن کە ڕووبدا ودواتریش کە گیان لەدەست دەدەن کەس و کارو منداڵەکانیان دەبێ بپاڕێنەوە تا لەتە موچەیەکیان دەدرێتێ. تەلەفزیۆنە کوردیەکان و میدیاکان شاهیدی ئەم ڕاستیەن .

سەرکردەکانی پێشمەرگە، بەتایبەتی باڵاکان، هەمان ئەو پێخەفە گەرمەو هەمان ئەو پاروە چەورەو هەمان ئەو لاف و گەزافە لێدەدەن کە بەر لە قەیرانی ئابوری و شەڕی داعش لێیانداوە، بەڵام شەیپوری سەر کەوتن کە بەخوێنی ئەو پێشمەرگانەی بەرەی شەر هاتۆتە دی، دەبێ بەدەست باڵا دەستەکانەوە بێ و لە کۆنگرە ڕۆژنامەوانەکانیان بەرامبەر میدیای جیهانی و ناوخۆیی وەک پاڵەوانی مەیدان دەرکەون !  هەر ئەو سەرکردانە بە دووربینی دوور ئەنگێو و بەدووری چەندین کیلۆمەتر لەبەرەکانی شەڕەوە دەردەکەون و وێنەیان دەگیرێ کە گوایە فەرماندەهی و ڕابەری شەڕکە دەکەن و دڵۆپە خوێنێکیشیان لێ بێ ئەوا تەلەفزیۆنە حزبیەکانیان هات و هاواریان نابڕێتەوە !.

دووبارە دەڵێم سەد خۆزگە قسەی قەڵەم بەدەستەکانی حزبە کوردیە دەسەڵاتدارەکان ڕاست بایەو پێشمەرگە سەر بە حزب و تاقم نەبوایە، بەڵام داخەکەم کاتێک دەبینم ئەو ڕاو ڕوتەی دەکرێ لەکوردستان، ئەو بەتاڵان بردنی سەروەت و سامانە، ئەو خەفەکردنی دەنگی ئازادە، ئەو پێشێلکاری کردنەی سەرەتاییترین مافی مرۆڤە، ئەو تیرۆرکردنی ڕۆژنامە نوسانە، ئەو برسیکردنی خەڵکە و دەیان ئەوی تر…… لەژێر سایەی لولەی تفەنگی هەمان ئەو پێشمەرگانەدا دەکرێ کە ئەو بەناو نوسەرانە ئەمڕۆ بیریان کەوتۆتەوە زەزمزەمەی” نیشتمانی ” بوونیان بۆ دەڵێن.

نامەوێ کارەساتی ساڵه‌کانی 1995 / 1996 بیری خەڵک بێنمەوە کە زامەکەی لەجەستەی ئەواندا چەندە قوڵە، ئەم ‌هێزانەی ئيمڕۆ ئەو زەمزەمەیان بۆ دەگوترێ لەلایەن هەمان ئەو قەڵەم بەدەستانەوە،  ئەو کات چ ئەرکێکیان خرابووە ئەستۆ !؟

پێشمەرگە کاتێک شەڕبۆ نیشتمان دەکا کە لە ژێر سایەی سیاسەتی ئەم حزبانە بەواقعی بێتە دەرێ، دابەش نەبوبی بەیەکەی حەفتاو هەشتا، ئامادە نەبێت لولەی تفەنگەکەی بە کۆنترۆڵی دەستی سەرانی حزبەکان بسوڕێ، دوای سەرکەوتنیش سک هەڵگوشێ. دەسکەوتەکانی ئەم شەڕە و شەڕی دواتریش لەپێناو ئازادی و خۆشگوزەرانی خۆی و کۆمەڵگادابێت، کۆمەڵگایەک کە جەماوەری خەڵک بەهەموو چین و توێژەکانەوە ئیرادە بکەن حوکمی خۆیان بگرنە دەست خۆیان، هێزی پێشمەرگەش ببێتە هێزی ئەو خەڵکە، ئەو کات پاڵەوانەکانی سەر شاشەی تەلەفزیۆنەکان ناتوانن لەژێر سایەی ئەوان دا لاف و گەزاف ڵێدەن، ئەمجا دەردەکەوێ ئەو گەورە بەرپرسانە دابڕاو لە لولەی چەکی پێشمەرگە لە پیاوی ڕەشۆکی بەولاوە هیچیتر نێن.

22 / 10 / 2016