په‌یامی كۆنگره‌ی پێنجه‌می حزبی كۆمۆنیستی كرێكاریی كوردستان بۆ چینی كرێكار

 هاوڕێیانی کرێکار… سڵاوی خەبات و تێکۆشانتان لە کۆنگرەی پینجەمەوە ئاڕاستە دەکەین        

هاوڕێیان!               

 کۆمەڵگەی کوردستان لە سەروبەندی ئاڵۆگۆڕێکی گەورەدایە. جەماوەری بێبەشی کوردستان، هاتونەتە مەیدان. کارگە و کارخانە و ناوەندەکانی کار تا دەگاتە شەقامی شارەکان و هەموو گۆشە و کەنارێکی ئەم کۆمەڵگەیە سەرڕێژە لە توڕەیی و ناڕەزایەتی فراوانی جەماوەری لەپێناو خواستە ڕەوا و ڕۆژانەیی و سنفی و دەستبەجێکانیان و هاوکات بۆ کۆتاییهێنان بە دەسەڵاتی تاڵانچی بزووتنەوەی کوردایەتی لە پێناو ”نان و ئازادی و ئایندەیەکی سیاسی ڕۆشن” دا.

لە هەلومەرجێکی ئاوادا، چینی کرێکار و بزووتنەوەی کۆمۆنیزمی کرێکاری پێویستە زامنی ئەوە بکات کە خەبات بۆ کۆتاییهێنان بە دەسەڵاتی بۆرژوازی کورد، لە ڕێگای سەراسەری کردنەوەی ناڕەزایەتیەکان و ڕێکخراوبوون و بەدەستەوەگرتنی ئاسۆیەکی شۆڕشگێڕانەوە، بەخێرایی و بە کەمترین دەردەسەری و قوربانیدان، بچیتە پێشەوە. بۆ ئەم مەبەستەش چینی كرێكار و کۆمۆنیستەکان دەبێت ببنە ڕابەری ڕاماڵینی ئەم دەسەڵاتە نەگریسەی سەرمایە و سەرمایەداری.

هاوڕێیانی کرێکار!

بزووتنەوەی كرێكاری و جەماوەری لەگەڵ ئەوەدا بۆ ڕاماڵینی دەسەڵات لە مەیداندایە، هاوکات ئەرکێکی هەرە گرنگ و چارەنووسسازی بۆ جێخستنی ئەلگۆ و جۆرێکی تری دەسەڵاتدارێتی لە ئەستۆیە، کە زامنی خۆشگوزەرانی و ئازادی و گێڕانەوەی شکۆ بۆ تاکەکانی مسۆگەر بکات، ئەوەش لە گرەوی ئەوەدایە کە خەبات و تێکۆشانی ئێستا، لەژێر ئاڵا و ئاسۆیەکی سیاسی شۆڕشگێڕانەدا بچێتە پێشەوە.

ئایندەی کۆمەڵگەیەکی ئازاد و خۆشگوزەران و ئینسانی و بەرابەر، لە ئێستاوە بینا دەکرێت. ئەوە لە توانادایە کە کۆمەڵگەی خاڵی لە ستەم و چەوساندنەوە، خاڵی لە هەژاری و گرانی و بێکاری، خاڵی لە سەرکوت و بێمافی، خاڵی لە چینی باڵادەست و ژێردەست، خاڵی لە خورافە و هەڵاواردن و نەریتی کۆنەپەرستانە و دواکەوتوو، بە کورتی کۆمەڵگەیەکی سۆشیالیستی بینا بکرێت. کۆنگرەی پێنجەمی حزب لەسەر ڕۆڵ و نەخشی چینی كرێكار و کۆمۆنیزمی كرێكاری بۆ ڕابەری بزووتنەوەی کۆتاییهێنان بە دەسەڵاتی ئێستا و بیناکردنی ئاییندەیەکی ئازاد و بەرابەر و خۆشگوزەران لە کوردستاندا پێداگری کردەوە.

هاوڕێیان!

دەسەڵاتی بۆژوازی کورد، لەگەڵ ئەزمەیەکی قوڵی دەسەڵاتدارێتی و بێ ئاسۆیی سیاسی بەرەو ڕووە، بن بەستە لە وەڵامدانەوە بە خواست و داواکارییەکانی کرێکاران و جەماوەری ملیۆنی خەڵکی کوردستان. ئەم دەسەڵاتە لە هەموو مەیدان و زەمینەیەکی سیاسی و ئابوری و کۆمەڵایەتی و تەنانەت فەرهەنگیدا، شکستی خۆی نیشانداوە. جەماوەری کوردستان هیچ متمانەیەکیان بەو دەسەڵاتە نەماوە و ئۆپۆزیسیۆنی بۆرژوازیش زۆر لەوە شکستخواردووتر و بودەڵەترە ئەو دەسەڵاتە لە داڕوخان رزگار بکات، یان بتوانێت ڕێگایەک بۆ چاکسازی بخاتە ڕوو. هەر ئەو واقعیەتە بوار دەدات بە چینی كرێكار و کۆمۆنیزم کە ڕۆڵی شایستەی خۆی بۆ سازدان و ڕێکخستن و ڕابەریکردنی شۆڕش بۆ هەڵپێچانی دەسەڵاتی ئێستا بگێڕێت و کۆمەڵگەیەکی تر بینابکات، کە ئیرادە بۆ ئینسان بگێڕێتەوە و دنیایەکی باشتر دابمەزرێنێ.

حزبی کۆمۆنیستی كرێكاریی کوردستان ئاڵاهەڵگری دامەزراندنی ئەو دنیا باشترەیە، بۆیە بە حزبی کۆمۆنیستی كرێكاریی کوردستان و بە حزبی بەرپاکەری شۆڕشی كرێكارییەوە، پەیوەست بن. 

ئازادی، یه‌كسانی، حکومەتی کرێکاریی

کۆنگرەی پێنجەمی حزبی کۆمۆنیستی کرێکاریی کوردستان

١٧ و ١٨ ی دیسێمبەری ٢٠٢١

Check Also

سەندیکای کرێکارانی خزمەتگوزاری بازرگانی گشتی بەریتانیا، لەدژی لەشکرکێشی تورکیاو پشتیوانی کردن لەنارەزایەتیەکانی خەڵکی کوردستان پشتیوانی دەکات!

ئەمرۆ سێ شەمە ٢٦/٤/٢٠٢٢ لەکۆبوونەوەی نێوان جۆن مەڵۆنی (John Moloney ) جێگری سکرتێری سەندیکای خزمەتگوزاری …

One comment

  1. هاوڕیان سڵاویکی شۆرشگیرانە لە هەموان
    ساڵیکی سەرکەوتنو پڕ بەها دەخوازم بۆ بەردەوامی لە خەباتی کۆلنەدان بۆ بەرەو جێهێنانێکی یەکسانو سەقامگیر دورلە چەوسانەوەی سەرمایەداری وەک داوایەکی ملیونەها زەحمتکێشی کوردستان و جیهان .
    سەرنجیک لە م نوسراوە : نوسراوە هاوڕێیانی کرێکار ؟
    وەک دەزانین زۆربەی خۆینەری ئەم پەیجە ڕۆشن بیرە بەڵام بە پیشە کرێکار نیە ؟ لە گەڵ ڕێزم بۆ چینی کریکاری هەژارو بێ بەش ،با وەک سەردەمی تودەمان لێ نەیە ، بازنەی خەباتمان با فراوانتر کەین . ، نوسراوەکەی تودە بۆ کرێکاران بەڵام یەک تاکە کرێکاریش نە دەرامەتی کڕینی ڕۆژنامەکەی هەبو ، وە نە خۆینەری بو! بە باوەڕی من تەنها نوسرابایە هاورێیان ئەوکات هەر نەبوایە خۆمان بە هاوشانی خەباتی کڕیکاران بزانیە. دیسان سەرکەوتنتان دەخوازم
    Sweden 2022-01-01
    Asso Zand
    zand.asso@gmail.xom

وەڵامێک بنووسە

پۆستی ئەلکترۆنیکەت بڵاو ناکرێتەوە .