مانیفێستی حزب بۆ ئاڵوگۆڕی شۆڕشگێڕانە

پەسەندکراوی کۆنگرەی پێنجەمی حزبی کۆمۆنیستی کرێکاریی کوردستان

ئامانجی حزب

حزبی کۆمۆنیستی کرێکاریی کوردستان وەکو حزبی چینی کرێکار، خەبات دەکات بۆ ڕێكخستن و ڕابەریکردنی شۆڕشی سۆشیالیستی لەپێناو هەڵپێچانی سیستەمی سەرمایەداری و کاری بەکرێ و دامەزراندنی كۆمه‌ڵگه‌یەکی کۆمۆنیستی خاڵی لە ستەم و چەوسانەوە و  نایەکسانی.

شۆڕشی سۆشیالیستی تەنها لەڕێگای هاتنەمەیدانی چینی کرێکار و جەماوەری ستەمکێش، لە ڕیزێکی رێکخراو لە دەوری ئاسۆی سۆشیالیستی و بە ڕابەریی حزبی کۆمۆنیستی چینی کرێکاردا مەیسەردەبێت؛ بەم پێیەش پێشڕەوی و سەرکەوتنی ئەم شۆڕشە لەهەر هانگاوێکدا ڕاستەوخۆ  پەیوەستە بە پەرەسەندنی بزوتنەوەی سۆشیالیستی و تەحەزوبی کۆمۆنیستی ئەم چینەوە. مەرجێکی سەرەکی پێشڕەوی و سەرکەوتنی ئەم شۆڕشە لە کوردستاندا، دابڕان و سنوربەندی چینی کرێکار و جەماوەری زەحمەتکێشە لە ئاسۆ و ئامانج و سیاسەتی بزوتنەوە و ئەحزابی بورژوازی. بەتایبەتیش، بەهێزبونی کۆمۆنیزم لە بەرامبەر ناسیۆنالیزمی کورد لە ئاستێکی کۆمەڵایەتی بەرفراواندا، مەرجێکی سەرەکی پێشڕەوی و سەرکەوتنی ئەم شۆڕشەیە لە کوردستاندا. هەروەها شۆڕشی کرێکاری لە هەر كۆمه‌ڵگه‌یەکدا، بەپێی بارودۆخ و گرفتەکانی ئەو كۆمه‌ڵگه‌یە، لە پرۆسێسێکی جیاواز و لە هەناوی وەڵامدانەوە بەو گیروگرفتانەدا دەڕواتە پێشەوە.

دوو گرفتی ئێستای کوردستان:

دۆخی ئێستا و ئەو گێژاوە سیاسیەی کوردستانی تیا ڕاگیراوە، گەلێک کۆسپ و ڕێگری گەورەی لە بەردەم شۆڕشی سۆشیالیستی و تەنانەت پێکهێنانی هەر ئاڵوگۆڕ و باشبونێکی بەرچاو لە ژیانی مادی و مەعنەوی خەڵکدا پێکهێناوە و بووەتە مایەی نەهامەتی و مەینەتباری سیاسی و ئابوری و کۆمەڵایەتی بۆ زۆربەی زۆری دانیشتوان. ئەم بارودۆخە لە لایەکەوە ئاکامی دەسەڵاتی داسەپاوی میلیشیایی حزبە ناسیۆنالیستە کوردەکان و دابڕدابڕکردنی ئەم كۆمه‌ڵگه‌یەیە بۆ ناوچەی دەسەڵاتی خۆیان و بەبارمتەگرتنی ژیان و گوزەرانی خەڵکەکەی، لە لایەکی ترەوە بەرئەنجامی لکاندنی کوردستانە بە دەوڵەتی قەومی ئیسلامی ئێستای عێراقەوە لە چوارچێوەی فیدراڵیزمی قەومیدا.

-دەسەڵاتی میلیشیایی حزبە ناسیۆنالیستە کوردەکان، وەکو هۆکاری بێدەرەتانی هەمەلایەنە بۆ جەماوەری فراوانی خەڵک، کەوتووەتە بەرامبەر بزووتنەوەیەکی ناڕەزایەتی فراوان و کۆتاییهێنان بەم دەسەڵاتە بووەتە خواستێکی بەرینی جەماوەری. لە بارودۆخی ئێستادا، دەرگا کرانەوە بەڕووی هەر ئاڵوگۆڕ و باشبونێکی بەرچاو لە ژیانی خەڵک و هەموارکردنی ڕەوتی بەرەوپێشچوونی شۆڕشی سۆشیالیستی، لە هەنگاوی یەکەمدا بەندە بە دەرهێنانی ئەم كۆمه‌ڵگه‌یە لەژێر ڕکێفی ده‌سه‌ڵاتی میلیشیایی حزبە ناسیۆنالیستەکان. ئەمە ئەرکی دەمودەستی شۆڕشی کرێکاریە. حزبی كۆمۆنیستی‌ كرێكاری‌ خەبات دەکات بۆ وەلانانی ‌ده‌سه‌ڵاتی میلیشیایی بۆرژوا-ناسیونالیستی كورد و دامه‌زراندنی‌ دەسەڵاتداریتی شورایی.

-فیدراڵیزمی قەومی کە رێکەوتنی سیاسی نێوان بۆرژوازی کورد و عەرەبە لەسەر دابەشکردنی دەسەڵات، هۆکاری ڕاستەوخۆی گرفتاربونی کوردستانە بەجۆرەها کێشە و گرفت، ڕەچەتەیەکە بۆ هەتاهەتاییکردنی ناکۆکی قەومی و دروستکردنی لەمپەری گەورە له‌به‌رده‌م ڕه‌وتی‌ بەرەوپپێشچونی كۆمه‌ڵگه‌. ئەم فیدراڵیزمە، لە هەمانکاتدا، کۆڵەکەیەکی راگرتن و بەردەوامیدانە بە شێوازی دەسەڵاتی میلیشایی ئەحزابی ناسیۆنالیستی کورد. بەڵام ناسیۆنالیزم فیدراڵیزمی قەومی و کێشەی کوردی لێکهەڵپێکاوە، بۆیە دەرهێنانی كۆمه‌ڵگه‌ لە گێژاوی فیدراڵیزم پەیوەستە بە یەکلاکردنەوەی کێشەی کوردەوە. تا کاتێک کە دەوڵەتێکی کۆنەپەرستی قەومی و دینی لە عێراقدا لەسەرکاربێت، تەنها رێگاچارەی ئەم کێشەیە جیابوونەوەی کوردستان و بەرپاکردنی دەوڵەتێکی سەربەخۆیە. بەڵام لە ئەگەری پەرەگرتنی بزووتنەوەی کرێکاری و شۆڕشگێڕانە لە ئاستی عێراقدا و پەیدابوونی دەرفەت بۆ هاتنەسەرکاری دەولەتێکی غەیرە قەومی و سیکۆلار، کە هەموو دانیشتوان بەبێ لەبەرچاوگرتنی ناسنامەی قەومی و دینی بە یەک چاو تەماشا بکات، حزبی کۆمۆنیستی کرێکاری تێدەکۆشیت بۆ سەرخستنی ئەو دەرفەتە. ئەمە رێگا دەکاتەوە بۆ ئەوەی کێشەی کورد و گێژاوی ئێستا لە چوارچێوەی عێراقێکی یەکگرتودا چارەسەر بکرێت. حزبی کۆمۆنیستی کرێکاری لەگەڵ ئەوەی هەمیشە پێداگری لەسەر مەبدەئی گەڕانەوە بۆ ڕای خەڵکی کوردستان دەکات بۆ بڕیاردان لەسەر مانەوە لە چوارچێوەی عێراق (بە مافی هاوڵاتی یەکسانەوە) یان جیابونەوە و پێکهێنانی دەوڵەتی سەربەخۆ، لە هەلومەرجێکی وادا پشتیوانی لە مانەوە لەگەڵ عێراق دەکات.

بنەماکانی پێویستیی ئاڵوگۆڕی شۆڕشگێڕانە:

– کۆمەڵگه‌ی مۆدێرنی کوردستان، وەکو کۆمەڵگه‌یەکی سەرمایەداری، تیایدا جیاوازی چینایەتی نێوان چینی سەرمایەدار و چینی کرێکار و جەماوەری ستەمدیدە، بەوپەڕی خۆی گەیشتوە. ناکۆکی نێوان ئەم دوو چینە، ناکۆکی سەرەکی كۆمه‌ڵگه‌یە و سەرجەم کێشە و ناکۆکیەکانی تر لە دەوری ئەمە تەوەرەیان بەستوە. لەماوەی ٣٠ ساڵی رابردودا دەسەڵاتی حزبە بۆرژوا-ناسیونالیستەکان، وەکو نوێنه‌ر و دەسەڵاتی چینی بۆرژوازی کورد ڕۆڵی خۆی گێڕاوە و لەسایەیدا کەمایەتیەکی کەم لەسەر حسابی چەوساندنەوەی چینی کرێکار و سەپاندنی هەژاری و نەداری و کوێرەوەری بەسەر زۆربەی هەرە زۆری دانیشتواندا، بوون بە میلیاردێر و لەناو سەروەت و ساماندا نوقم بون. لەلایەکی ترەوە كۆمه‌ڵگه‌ی کوردستانی ئەمڕۆ لەڕووی پەرەسەندنی ئابوری و پیشەسازی و بەهرەمەندبونی لە سەروەت و سامانێکی زۆره‌وه‌، زەمینە بابەتیەکانی بەرپاکردنی كۆمه‌ڵگه‌یەکی سۆشیالیستی تیادا فەراهەم بووە کە لە سایەیدا هەموان خۆشگوزەران بژین. ئەمانە چینی کرێکار و بزوتنەوەکەیانی کردوەتە هێزی بنەڕەتی بۆ ئاڵوگۆڕی شۆڕشگێرانە و شۆڕشی کۆمەڵایەتی ئەم چینەیان کردوەتە کارێکی پێویست و دەستبەجێ و لە ڕووی بابەتیشەوە مومیکن.

لە کوردستان، وەکو مەڵبەندێکی کاری هەرزان، پڕۆسەی بەرهەمهێنانی کۆمەڵایەتی لە بارودۆخێکی ئیمپریالیستانەی (مۆنۆپۆڵی) پەیوەندی نێوان کار و سەرمایەدا بەڕێوەدەچێت. لەم چوارچێوەیەشدا کوردستان مەیدانێکە بۆ ڕوتێکردنی کۆمپانیا و سەرمایەی دەرەکی و بەرهەمهێنانی زێدە قازانج لەسەر بناغەی چەوسانەوەی لەڕادەبەدەری چینی کرێکار و بێبەشکردنیان لە خۆشگوزەرانی و خزمەتگوزاری و بیمە کۆمەڵایەتیەکان و ئازادی سیاسی و مافە سەرەتاییەکان. سەرخانی سیاسی ئەم بارودۆخە بە ناچاری سەرکوت و ملهوڕیی سیاسیە، بە مەبەستی خامۆشکردنی چینی کرێکار و ڕاگرتنی نرخی هێزی کار لە هەرزانترین ئاستدا. بێگومان دۆخێکی ئاواش قازانجی هەموو بەشەکانی بۆرژوازی لەخۆیدا هەڵدەپێکێ و ڕەوتی ڕیفۆرمخوازی و سیستەمی دیموکراتی بۆرژوازی لە کوردستاندا دەکاتە یۆتۆپیا. بۆیە بەدیهێنانی ئازادی و ئاڵوگۆڕی بنەڕەتی لە ژیانی ئابوری و سیاسی و کۆمەڵایەتیدا دەخاتە گرەوی ئاڵوگۆڕی شۆڕشگێڕانەوە.

کارنامەی ٣٠  ساڵی دەسەڵاتی حزبە ناسیونالیستەکان، بە جەماوەری زەحمەتکێش و ئازادیخوازی نیشانداوە کە ئەو دەسەڵاتەی ئەم حزبانە بەناوی دەسەڵاتی خەڵک و سەرچاوەگرتوو لە ئیرادەی ئەوانەوە پڕوپاگەندەی بۆ دەکەن، نەک هەر دەسەڵاتی خەڵک نییه‌، بەڵکو لەسەر بناغەی پیشێلکردنی ئیرادە و مافەکانی ئەوان دامەزراوە. ئەم کارنامە ٣٠  ساڵیە شتیک نییه‌ جگە لە بردنی كۆمه‌ڵگه‌ بۆ ناو شەڕ و کوشتاری کۆنەپەرستانەی ناوخۆیان لەسەر دەسەڵات، بوونیان بەپاشکۆی زلهێزە جیهانیه‌کان و دەوڵەتانی کۆنەپەرستی ناوچەکە و راپێچکردنی کوردستان بۆ ناو سیناریۆ تەڵخەکان، گەندەڵی و تاڵان و بڕۆیی بێسنوری داهاتی كۆمه‌ڵگه‌، سەرکوتی ئازادی و ناڕەزایەتیە جەماوەریەکان و نەیارانی سیاسی دەسەڵات، تیرۆر و ڕەشەکوژی بەربڵاوی ژنان و … تاد. ئەمانە بوونە زەمینە و بنەماکانی پەرەگرتنی ئەو بزوتنەوەی ناڕەزایەتیە جەماوەریە کە لە ١٧ی شوبات و خرۆشانە جەماوەریەکانی دیکەدا بە دروشمی “بروخێ” و بەدەنگی بەرز “نا” وتن بەم دەسەڵاتە پێی ناوەتە مەیدانەوە. هەرچەندە بەردەوام ئەم بزوتنەوەیە سەرکوت کراوە، بەڵام خواست و ئامانجەکانی بەهێزی خۆیەوە ماوەتەوە و بەردەوامیش بەرەو قوڵبونەوە و ڕادیکاڵبونەوەی زیاتر ڕۆیشتوە و پێویستیی ئاڵوگۆڕی شۆڕشگێڕانەی ئەم هەلومەرجەی نەک هەر بۆ چینی کرێکار، بەڵکو بۆ هەموو جەماوەری ستەمدیدە بەرجەستە کردوە.

– دەسەڵاتی میلیشیایی ئێستا کە گرفتاری بنبەستێکی سیاسی و ئابوریە، لە جەرگەی قوڵبونەوەی قەیرانی ئابوری و لێکترازانی ڕیزەکانی چینی دەسەڵاتداردا، توانای وەڵامدانەوە و چارەسەری کێشەکانی پەیوەست بە ژیانی خەڵکی نییه‌، ئەمەش وەکو فاکتەرێک جەخت لەسەر پێویستیی ئاڵوگۆڕی شۆڕشگێرانە دەکاتەوە.

– ئەزمونی چەندین ساڵی رابردوش بە کردەوە ئەو ڕاستیەی سەلماندوە کە ئەم دۆخە دژوارە و ئەم دەسەڵاتە گەندەڵ و ستەمکارە چاکسازی و پینەوپەڕۆ هەڵناگریت. لە چەند ساڵی رابردودا چەندین لایەنی بورژوا-ناسیۆنالیست و ئیسلامی ناڕازی بە دروشمی چاکسازیەوە، هاتنەمەیدان. بۆ دەورانێک خۆیان سواری شەپۆلی ناڕەزایەتی جەماوەر کرد. برەویان بەو خۆشباوەریە دا کە گوایە دەکرێت لە ڕێگای سندوقەکانی گاڵتەجاری بەناو هەڵبژاردن و خەباتی پەرلەمانی و گۆڕینی دەموچاوەکانەوە، ئەم دەسەڵاتە چاکسازی بکرێت و دۆخی مەینەتباری ئێستا چارەسەر بکرێت.  بەڵام ڕەوتی بابەتیی ڕوداوەکان نیشانیدا کە بانگەشەی چاکسازی تەنها پڕۆژه‌یەکە بۆ درێژەپێدانی دۆخی ئیستا و داشکاندنی ئامانجەکانی جەماوەری ناڕازی و کردنی بەدەستمایەی سەودا بۆ شەریکبونەوە لە دەسەڵات.

*      *     *

لەسەر بناغەی ئەو فاکتۆرانەی سەرەوە، دەرهێنانی كۆمه‌ڵگه‌ی کوردستان لە گێژاوی ئێستا و گێڕانەوەی ئیرادە بۆ جەماوەری کرێکار و زەحمەتکێش و دەستەبەرکردنی ئامانجەکانی بزوتنەوەی جەماوەری، تەنها لە ڕێگای ئاڵوگۆڕی شۆڕشگێڕانەوە مەیسەر دەبێت. ئاڵوگۆڕێک کە لە پرۆسەی شۆڕشی بەردەوامدا كۆمه‌ڵگه‌ بەرەو سۆشیالیزم ئاڕاستە دەکات.

کۆڵەکە و هۆکارەکانی ئاڵوگۆڕی شۆڕشگێڕانە:

– لە كۆمه‌ڵگه‌ی سەرمایەداریدا، شۆڕشی کرێکاری تاکە وەڵامی شۆڕشگێڕانەیە بۆ سەرجەم کێشەکان و کۆتاییهێنان بە نایەکسانی و ستەم و چەسانەوە. لەمڕۆی کوردستاندا، چینی کرێکار وەکو هێزی ئەسڵی ئەم شۆڕشە گەشە و پەرەسەندنێکی گەورەی بەخۆوە بینیوە؛ هەم لەڕووی زیادبونی ژمارەی ئەو بەشە لە دانیشتوان کە ناچارن هێزی کاریان بفرۆشن بۆ ئەوەی ژیانی خۆیان و خێزانەکانیان دابین بکەن؛ هەم لەڕووی چاوکرانەوە و درککردن بە بەرژەوەندی چینایەتی جیاواز و سەربەخۆیان؛ هەم لەڕووی ئاشنابوون بە زانست و تەکنەلۆژیا و چوونەسەری ئاستی هوشیاری سیاسی و ڕێکخراوبون و شێوەکانی خەباتەوە. ئەمە هێزی لەبن نەهاتوی شۆڕشی کرێکاریە، کە ئەو شۆڕشە دەکاتە کارێکی کردەنی. بەڵام سەرکەوتنی ئەم  شۆڕشە لە گرەوی ئەوەدایە کە ئەم چینە لە ڕیزی سەربەخۆی خۆیدا، هەم لە حزبی کۆمۆنیستی و هەم لە شورا و سەندیکا و یەکێتیە کرێکاریەکاندا ڕێکخراو و یەکگرتوو بێت، چ بۆ بەرگری لە ژیان و گوزەران و داخوازیە ڕۆژانەکانی و چ بۆ بەدەستەوە گرتنی ئاسۆ و سیاسەتی سۆشیالیستی و گێڕانی ڕۆڵی پێشەنگی گشت جەماوەری ستەمکێش لە ئاڵوگۆڕی شۆڕشگێڕانەدا.

– ئامڕازێکی سەرەکی شۆڕشی کرێکاری بیناکردنی حزبێکی سیاسی کۆمۆنیستی کرێکاریی کۆمەڵایەتی بەهێز و ڕیشەدارە، حزبێک کە سەرجەم ئۆرگانە ڕابەریەکانی لە ئاستی سەراسەری و محەلیدا، ڕاستەوخۆ بەشێک بن لە ڕابەریی بزوتنەوەی کرێکاری، حزبێک کە بەشی پێشڕەوی چینی کرێکاری لەخۆیدا سازدابێت و بە کردەوە ئامڕازی ناڕەزایەتی کۆمەڵایەتی چینی کرێکار بێت دژی نیزامی سەرمایەداری، حزبێک کە ڕابەرایەتیەکی سیاسیی کۆمۆنیست بۆ كۆمه‌ڵگه‌ مسۆگەر بکات، بە بەدیل و ڕێگاچارەی خۆیەوە لە سەنتەری کێشمەکێشی سیاسی لەسەر چارەنوسی كۆمه‌ڵگه‌ ڕاوەستێ، ئامڕاز و هۆکارێک بێت بۆ ڕێكخستنی چینی کرێکار، بەدیلی سۆشیالیستی بکاتە خاوەن سەنگێکی بەهێز لە ناو چینی کرێکار و بزوتنەوە شۆڕشگێڕانەکاندا.

– بەردەوامبونی بارودۆخی ئێستا ئاکامی دەسەڵاتی ناسیۆنالیزم و باڵادەستیی نەرێتی ناسیۆنالیستییە لە كۆمه‌ڵگه‌دا. ناسیونالیزم لە کوردستاندا تەنها ڕۆڵی ئایدۆلۆژیایەکی گشتی بۆرژوایی ناگێڕێ، بەڵکو ڕاستەوخۆ ئایدۆلۆژیای دەسەڵاتە. بۆیە پێشڕەویی هەر بزوتنەوەیەکی شۆڕشگێڕانە لەم كۆمه‌ڵگه‌یەدا ڕاستەوخۆ بەندە بە لاوازکردنی نفوزی فکری و سیاسی ناسیۆنالیزم‌، وەکو کۆڵەکەیەکی سەرەکی هەلومەرجی ئێستا و دەسەڵاتی بۆرژوازی کورد، وە وەلانانی نەرێتەکانیه‌وه‌. هەروەها بەندە بە دابڕانی جەماوەری کرێکار و خەڵکی ئازادیخواز لە ئاسۆ و ئامانج و سیاسەتی بزوتنەوەی ناسیۆنالیستی و حزبەکانی و بەهێزبونی کۆمۆنیزم لە ئاستی کۆمەڵایەتیدا. بۆیە پەرەدان بە هوشیاری و باوەڕ و نەرێتی کۆمۆنیستی و ڕووبەڕووبوونەوەی ناسیۆنالیزم لە هەموو مەیدانێکی فکری و سیاسی و کۆمەڵایەتیدا، مەرجی جیاکردنەوەی جەماوەری کرێکار و زەحمەتکێش و ئازادیخوازە لە ئاسۆ و نەرێت و بەدیلە بۆرژوازیەکان.

بزوتنەوەی جەماوەری  و پێگەی کۆمۆنیزم  لە کوردستان

– بزوتنەوەی ناڕەزایەتی جەماوەری، کە بە خواستی کۆتایهێنان بە دەسەڵاتی میلیشیایی حزبە ناسیۆنالیستەکانەوە هاتوەتە مەیدان، تا دێت فراوانتر و ڕادیکاڵتر دەبێتەوە، تا ئەو ڕادەیەی کە خەریکە لایەنە بورژوازیە بەناو ریفۆرمخوازەکان تێدەپەرێنێ. بەڵام سەرباری توڕەیی و ناڕەزایەتی توندی جەماوەری لە دژی دەسەڵاتی ئەم حزبانە، هێشتا ئەم بزوتنەوەیە نارێکخراو و بێبەبەشە لە ئاسۆ و رابەرییەکی رادیکاڵ و شۆڕشگێڕ. ئاسۆ و نەرێت و خورافاتی ناسیۆنالیستی و نەتەوە پەرستی و ئیسلامی بە گشتی، سەنگ و قورسایی زۆری لەسەر ئەم بزوتنەوەیە و كۆمه‌ڵگه‌ی کوردستان هەیە و یەکێکە لە کۆسپە هەرە گەورەکانی بەردەم خەباتی چینی کرێکار و جەماوەری زەحمەتکێش.

– لەگەڵ ئەوەی چینی کرێکاری کوردستان گەشە و پەرەسەندنێکی چەندایەتی و چۆنایەتی گەورەی بەخۆیەوە بینیوە و جیاوازی و ناکۆکی چینایه‌تی لە كۆمه‌ڵگه‌دا تاهاتوە قوڵتر بۆتەوە، بەڵام هێشتا چینی کرێکار و بزوتنەوەکەی لاواز و نارێکخراو و پەرتەوازەیە؛ لە ڕێگەی سەپاندنی تەزکیەی حزبیەوە، مافی کارکردنی بەشێکی زۆر لە کرێکاران بەبارمتەگیراوە و کراون بە پاشکۆی حزبە دەسەڵاتدارەکان؛ گرێبەستی کاتی کراوە بە شێوەی باوی کارکردن، ئەمەش وەکو کۆتیکی ئەسارەت لە دەست و قاچی چینی کرێکار ئاڵاوە؛ هەلومەرجی کار سەخت و نالەبارە و چینی کرێکار لە سەرەتاییترین مافە ئابوری و سیاسیەکانی بێبەریە؛ جێگاورێگای  ڕەوتی سۆشیالیستی لەناو چینی کرێکار و بزوتنەوەکەیدا لاوازە.

– لە کوردستاندا، کۆمۆنیزم خاوەن مێژوو و پێشینەیەکی خەباتکارانە و حزب و بەرنامەیەکی کۆمۆنیستی و ڕەخنەیەکی جیاوازە لە سەرمایەداری و ناسیۆنالیزم. سەرباری خاڵە لاوازەکانی: وەکو دەرنەکەوتنی بە وێنەی بەدیل و یاریکەرێکی سەرەکیی مەیدانی سیاسی کە نەتوانرێت ڕۆڵ  و سەنگی فەرامۆش بکرێت؛ لاوازیی ڕیشەی لە ناو چینی کرێکار و كۆمه‌ڵگه‌دا؛ دەرنەکەوتنی وەکو رابەر و رێکخەری بزوتنەوەی ناڕەزایەتی جەماوەری، بەڵام دەرفەتی ئەوەی لەبەردەمدایە کە کەموکوڕی و خاڵە لاوازەکانی تێپەڕێنێ و وەکو حزبێکی سیاسی بەهێز و ڕابەر و ڕێکخەری ئاڵوگۆڕی شۆڕشگێڕانە رۆڵ بگیڕێت.

– حزبی کۆمۆنیستی کرێکاری خەبات دەکات بۆ وەلانانی دەسەڵاتی میلیشیایی حزبە ناسیۆنالیستەکان و بەرپاکردنی دەسەڵاتی شوراکانی خەڵک، وەکو دەسەڵاتێکی شۆڕشگێڕانەی پشتبەستوو بە ئیرادەی ڕاستەوخۆی جەماوەر، کە دەستبەجێ خواستەکانی جەماوەر و بەرنامەی شۆڕشگێڕانەی چینی کرێکار جێبەجی دەکات. لە ڕوانگەی حزبی کۆمۆنیستی کرێکاریەوە وەلانانی دەسەڵاتی ئێستا لە ڕێگای هەستانێکی جەماوەریەوە، تەنها بە دەستکۆتاکردنی حزبە دەسەڵاتدارەکان بەرتەسک نابێتەوە، بەڵکو دەبێ حکومەت و پەرلەمان و هێزی میلیشا و دادگا و پەیوەندییە  دیبلۆماسیە  نهێنی و ئاشکراکان، واتە هەموو ئەو سەرخانە سیاسیەی کە سیستەمی دەسەڵاتدارێتی ئیستای پێکهێناوە، هەڵوەشێتەوە و دەسەڵاتدارێتی جەماوەری شوێنی بگرێتەوە.

– حزبی کۆمۆنیستی کرێکاری لە هەموو دەرفەتێکی شۆڕشگێڕانە و سیناریۆ جیاوازەکان کەڵک وەردەگرێت بۆ بەدەستەوەگرتنی دەسەڵاتی سیاسی و پیادەکردنی بەرنامەی شۆڕشگێڕانەی چینی کرێکار. بەڵام گونجاوترین وعەمەلیترین  سیناریۆ بۆ جێبەجێکردنی ئەم ستراتیژە و سەرخستنی، تێکەڵاوێکە لە شێوە جیاجیاکانی خەباتی ئابوری و سیاسی و…… جەماوەریی بەهێز و پەرەسەندوی ئەوتۆ کە هەم بتوانێ دەسەڵاتی ئێستا بخاتەژێر گوشارێکی توند و بەردەوامەوە، هەم بزوتنەوەی جەماوەریی ئێستا بەرەو هەستانێکی جەماوەری بەهێز و شۆڕشگێڕانە ئاڕاستە بکات. هەستانێکی شۆڕشگێڕانەی جەماوەری کە چینی کرێکار بڕبڕە پشت و حزبی کۆمۆنیستی کرێکاریی ڕابەر و ڕێکخەر و سۆشیالیزم ئاسۆکەی بێت.

*        *        *

لەم ڕێگایەدا تەنها خەباتێکی هەمەلایەنە و نەخشەدار دەتوانێ هەم سەرکەوتن و هەم پاراستنی سەرکەوتن مسۆگەر بکات. بۆیە لێکهەڵپێکانی گشت سیاسەت و تاکتیکەکانی حزب، هەروەها شێوە جیاوازەکانی خەباتی نهێنی و خەباتی ئاشکرا و قانونیی کارساز بۆ هەلومەرجە جیاوازەکان، لە ڕەوت و پرۆسەیەکی بە بەرنامەدا، مەرجی سەرخستنی ئەم ستراتیژە و ڕێكخستنی خەباتێکی نەخشەمەند و هاوئاهەنگە کە توانای بەرەوپێشچونی بەردەوام و سەرکەوتنی هەبێت.

هەروەها سەرکەوتنی ئەم خەباتە لەگرەوی ئەوەدایە کە هەلومەرج و قۆناغ و هێزهاوسەنگیە جیاوازەکان بناسرێنەوە و پلان و تاکتیکی گونجاو و کارسازیان بۆ دابڕێژرێت. لە ئاستێکی گشتیدا، قۆناغی ئێستا تا قۆناغی هەستانی جەماوەری و قۆناغی دەستبردن بۆ پەلاماری کۆتایی، قۆناغە جیاجیاکانی ڕەوتی چونەپێش و سەرکەوتنی ئەم ستراتیژە پێکدەهێنن. قۆناغی ئێستا، واتە ئەو قۆناغەی کە هێشتا حزب و کۆمۆنیزم و ئاسۆی سۆشیالیستی خاوەن سەنگێکی سیاسی بەهێزنین لە كۆمه‌ڵگه‌دا و بزوتنەوەی کرێکاری و جەماوەری هێشتا بەرتەسک و ناڕێکخراو و خاوەن ئاسۆیەکی شۆڕشگێڕانە و سەرتاسەری نییه‌. وە قۆناغی هەستانی جەماوەری ئەو دەورانەیە کە كۆمه‌ڵگه‌ کەوتۆتە سەر شاڕێی ئاڵوگۆڕی شۆڕشگێرانە، واتە دەورانێک کە حزب وەکو بەدیلێکی سیاسی و ڕێکخەر و ڕابەری بزوتنەوەی ناڕەزایەتی کرێکاری و جەماوەری و خاوەن پێگەیەکی کۆمەڵایەتی بەهێز لە مەیدان ڕاوەستاوە و بزوتنەوە و ئەحزاب و دەسەڵاتی بورژوازی کەوتوونەتە ژێر گوشارێکی توندەوە. هەروەها قۆناغی دەستبردن بۆ پەلاماری کۆتایی و جێگیرکردنی دەسەڵاتدارێتی جەماوەریی. واتە دەروانێک کە بزوتنەوەی شۆڕشگێڕانەی کرێکاری و جەماوەری بە ڕابەری حزبی کۆمۆنیستی کرێکاری و ئاسۆی سۆشیالیستیەوە توانای ئەوەی بەدەستهێناوە کە کۆتایی بە دەسەڵاتی ئێستا بهێنێ و حکومەتی شوراکان دابمەزرێنی.

هەلومەرجی سیاسی ئێستای کوردستان

– هەلومەرجی سیاسی ئێستای کوردستان لە بنەڕەتدا ڕەنگدانەوەی دۆخی سیاسی جیهان و ناوچەکەیە. ناکامی و شکستی سیاسەتەکانی ئەمریکا لە عێراق، ئەفغانستان، سوریا و ڕۆژهەڵاتی ناوەڕاستدا، تادەگات بە بەدەسەڵات گەیشتنەوەی تاڵیبان، پاشەکشەیەکی ئاشکرای بە ڕۆلی ئەمریکا کردووە. گرتنەبەری ڕێگای پاشەکشێی هیزە سەربازی و مەیدانیه‌کانی و ڕۆڵ پەیداکردنی دیبلۆماسیەت لە نێوان هێزە جیهانی و محەلیەکان، لەلایەک و، ڕۆڵ پەیداکردنی زیاتری روسیە و چین لە ئاستی دنیا و ڕۆژهەڵاتی ناوەڕاستدا، لەلایەکی ترەوە، بارودۆخێکی تازەی هێناوەتە ئاراوە.

‌-ئەمریکا دەیەوێ ئەم پاشەکشەیە بە شێوازی دیکە و لە جێگەی دیکە قەرەبوو بکاتەوە. جەمسەرە جیهانی و هێزە ناوچەییەکانی تریش بۆ پتەوکردنی پێگەی خۆیان، بە گەرمی لە هەوڵی قۆزتنەوەی ئەو دەرفەتەدان کە بە پاشەکشەی ئەمریکا لە ناوچەکەدا بۆیان هاتوەتەکایەوە.

– ئەم دۆخە جیهانییە عێراق و کوردستانی خستۆتە بەردەم ڕەوتێکی ڕوو لە ئاڵوگۆڕەوە. سیناریۆی دەوڵەتی بەشبەشێنەی قەومی و تایفی بە کردەوە ناکامی و شکستی خۆی سەلماندووە. جەماوەری خەڵکی عێراق دەمێکە لە دژی ئەم پرۆسەی دەوڵەتسازیە قەومی و دینیه‌ کۆنەپەرستانەیە وەستاونەتەوە، بەڵام ئێستا تەنانەت لایەنەکانی بەشدار لە دەسەڵاتیش چیتر ئومیدیان بەم پرۆسە سیاسیە نەماوە و ئەوانەی هێز لە خۆیان ڕادەبینن چاوی تەماحیان بڕیوەتە بەشی زیاتر و تەنانەت یەکجێکردنەوەی دەسەڵات لە دەستی خۆیاندا.

– لەم پرۆسەیەدا، ناکامی ئەمریکا و پاشەکشەی هێزە سەربازییەکانی بواری زیاتر بە رۆڵی هێزە محەلی و ناوچەییەکان دەدات. لەم دۆخەدا کەشێکی سیاسی کراوەتر و هەلومەرجێکی لەبارتر بۆ خەباتی چینایەتی دێتەکایەوە. بورژوازی و دەوڵەتانی ناوچەکە دەکەونە بەردەم فشاری چینی کرێکار و جەماوەری بەشمەینەت بۆ نیشاندانی بەرپرسیارێتی سیاسی و ئابوری و کۆمەڵایەتی.

– لە جەرگەی ئەم هەلومەرجە تازەیەدا، کە بورژوازی جیهانی و ناخۆیی لەگەڵ قەیران و ناکۆکی قوڵ بەرەوڕووە سەبارەت بە سازدانەوەی دەوڵەت لە ناوچەکە و بە دیاریکراوی لە عێراق.. هەوڵدەدەن دەوڵەتی شکستخواردوی بەشبەشێنە بە دەوڵەتێکی دیکەی کۆنەپەرست بگۆڕن بە جۆرێک کە جڵەوی دەخاڵەت و هاتنەمەیدنی خەڵک بگرێت. قەیرانی حکومەتی و ناکۆکی هێزە بورژوازیەکانی سەر مەیدانی سیاسی عێراق، ناکۆکی ناو ڕیزەکانی بورژوای کورد و حزبەکانیشی بەرینتر کردوەتەوە. یەکێک لە دەرئەنجامەکانی ئەم هەلومەرجە کرانەوەی دەرفەتە بۆ هەموو بزوتنەوە و هێزەکان تا مۆری خۆیان بدەن لە ڕەوتی ڕوداوەکان. ئەم دەرفەتە بۆ بزوتنەوەی کۆمۆنیستی و کرێکاریش کراوەیە.

– فاکتەرێکی دیکەی هەلومەرجی ئێستا، خرۆشان و هاتنەمەیدانی چینی کرێکار و جەماوەری زەحمەتکێشە لە ناوچەکە. بە تایبەت لە عێراق و ئێران و لوبنان. بە تایبەتی بزووتنەوەی ڕوخاندنی جمهوری ئیسلامی تەوژمێکی تازەی گرتۆتە خۆی. چینی کرێکار لەم بزوتنەوەیەدا رۆڵێکی گرنگی پەیدا کردووە. جمهوری ئیسلامی کەوتووەتە بەردەم هەڕەشەی ڕووخانی شۆڕشگێڕانەوە. ڕوخانی ئەم ڕژێمەش گورزێکی کوشندە دەبێت لە هەموو ئیسلامی سیاسی و حاکمیەتی بورژوازی لە ناوچەکەدا، هەروەها کاریگەری ڕاستەوخۆی دەبیت لەسەر دۆخی عێراق و کوردستان و باڵاکردنی بزووتنەوەی شۆڕشگێڕانە.

– ناسیۆنالیزمی کورد و حزبەکانی لە هەناوی ئاڵۆگۆڕەکانی دەیەی کۆتایی سەدەی ڕابروودا چارەنووسی خۆیان شەتەک دا بە سیاسەتەکانی ئەمریکا و هاوپەیمانەکانییه‌وە، بەوجۆرەش توانیان بەدەسەڵات بگەن و لەسەر کورسی دەسەڵات بمێننەوە. بەڵام کۆتایی هاتنی شەڕی داعش و ڕووداوەکانی ١٦ی ئۆکتۆبەر دوچاری ناکامی و تەریک کەوتنەوە و گێژاوی گەورەی کردن و ناکۆکیەکانی ناوخۆی بورژوازی کوردی قوڵکردەوە، بەجۆرێک کە تا ئێستاش نەیانتوانیوە شانی خۆیان لەژێر ئاکام و کاریگەریەکانی ئەو ڕوداوانە دەرکێشن. ئەوانە لەگەڵ گێژاوی فیدراڵیزم و فشارە بەردەوامەکانی بەغدا و سەرئەنجامیش ناکامی و کشانەوەی ئەمریکا لە عێراق و ناوچەکە و دەستپێکردنی ئەم ڕەوەندە تازەیە، دەسەڵاتی بورژوازی کورد و ئەزمونەکەیانی لەگەڵ دەورەیەکی نوێ لە بێئاسۆیی و سەرگەردانی و ناکۆکی ناخۆ بەرەوڕوو کردووە و دەورانی زێڕینیان رووی لە لێژی کردووە. ئەم ڕەوتە کوردستانی خستوەتە بەردەم دەورەیەکی ناجێگیر و سیناریۆگەلی جیاوازەوە، تا ڕادەیەک کە قەوارەی هەرێمی کوردستان و دەسەڵاتی حزبە ناسیۆنالیستەکان له‌ بەردەم ئەگەری جۆراوجۆردا قەراری گرتوە.

سەرخەتی سیاسەت و ئەرکەکانی حزب لەم قۆناغەدا؛

بە لەبەرچاوگرتنی ئەم هەلومەرجە سیاسیە و دۆخی بزوتنەوەی ناڕەزایەتی جەماوەری و سەنگ و مەوقعیەتی ئێستای حزب و کۆمۆنیزم، حزبی کۆمۆنیستی کرێکاریی ئەم سەرخەتە گشتیانە دەکاتە بنەمای بەرنامەکار و ئەرکەکانی ئەم قۆناغە:

– دەرکەوتنی حزب وەکو حزبێکی سیاسی خاوەن ڕۆڵێکی لە فەرامۆش نەهاتوو، ئۆپۆزیسیۆنی سەرەکی دەسەڵاتی میلیشیایی ئەحزابی ناسیۆنالیست. دابینکردنی ڕابەریەکی کۆمۆنیستی بۆ بزوتنەوەی ناڕەزایەتی کرێکاری و جەماوەری و لە ئاستی کۆمەڵایەتیدا قەراردانیان بەرامبەر بە ڕابەرانی ناسیۆنالیست. بوونی حزب بە حزبی ڕێکخەری ناڕەزایەتی کرێکاری و جەماوەری. بەرجەستە بوونی وەکو حزبی بەدیل و ڕابەر و رێکخەر و سەرنگونیخواز. لێکهەڵپێکانی خەباتی ئاشکرا و قانونی لەگەڵ خەباتی نهێنی بەپێی بەرنامەیەکی ڕۆشن بەجۆرێک کە بەردەوامی کار و هەڵسوڕانی حزب لە هەموو هەلومەرجە جیاوازەکان لەبەرچاو بگرێت.

– پەرەپێدان و مونسەجیم کردن و بەتواناکردنی مەیلی کۆمۆنیستی لەناو بزوتنەوەی کرێکاری و شکڵدان بەشێوە جۆراوجۆرەکانی رێکخراوبون و تەحەزوبی کۆمۆنیستی ئەم مەیلە. کردنی حزب بە حزبی کرێکارانی کۆمۆنیست  و پێشڕەو و ڕابەرانی بەکردەوەی بزوتنەوەی کرێکاری، ڕێكخستن و یەکگرتوکردنی خەباتی ئابوری چینی کرێکار لە دەوری پلاتفۆڕمێکی سەراسەی، وەکو مەیدانێکی گرنگی خەباتی چینایەتی. بەرجەستەکردنی پێویستی شۆڕشی کرێکاری وەکو تەنها ڕێگای کۆتایهینان بە کۆیلایەتی بەکرێ و ستەمی سەرمایە و سەرجەم نەهامەتیەکانی دنیای ئێستا. بەهێزکردنی پایەی کۆمۆنیزم و نەرێتی سۆشیالیستی لەناو چینی کرێکاردا. هێنانەمەیدانی چینی کرێکار لە ڕیزێکی رێکخراو و سەربەخۆ لە مەیدانە جیاجیاکانی خەباتدا.

– پەرەپێدان و ڕێکخراوکردن و سەرتاسەری کردنەوەی ناڕەزایەتیە جەماوەریەکانی ئێستا لە بوارە جیاجیاکانی خەباتی ئابوری و سیاسیدا، توندکردنەوەی گوشاری هەمەلایەنە لەسەر حزبە دەسەڵاتدارەکان و پاشەکشە پێکردنیان و سەپاندنی خواست و داواکاریەکانی جەماوەر بەسەر دەسەڵاتدا، بەهێزکردنی پێگەی ئاسۆی شۆڕشگێڕانە و سۆشیالیستی و هەمەگیر کردنی مەیل و خواستی کۆتایهینان بە دەسەڵاتی میلیشیایی ئیستای کوردستان، دەستەبەرکردنی سیاسەت و تاکتیکی گونجاو و ڕادیکاڵ و کارساز، دەرکێشانی لەژێر قورسایی نەرێت و ئاسۆی ناسیۆنالیستی و ئیسلامیەکان.

– رەخنەگرتن و پەردەهەڵماڵین لەسەر سیاسەت و کارکرد و نەرێت و بیروباوەڕی ناسیۆنالیستی و نەتەوەپەرستی و ئیسلامی. لێدان لە نفوزی سیاسی و کۆمەڵایەتی حزبەکانی ئەم بزوتنەوانە و بەهێزکردنی ئاسۆ و نەرێتی سۆشیالیستی و ئەنتەرناسیۆنالیستی و مۆدێرن و شۆڕشگێڕانە لە بەرامبەریاندا. پەردەهەڵماڵین لەسەر ناوەڕۆک و ئاکامە کارەساتبارەکانی سیاسەتی ناسیۆنالیستی و فیدراڵیزمی قەومی و ڕۆڵی لە خوڵقاندنی گێژاوی ئێستا و بەردەوامیدان بە دەسەڵاتی میلیشیایی، بەرجەستەکردنی بەدیلی حزب لەبەرامبەریدا. پەردەهەڵماڵین لەسەر لایەن و پڕۆژەکانی بەناو ڕیفۆرمخوازی ناسیۆنالستی و ئیسلامی وەکو پڕۆژەگەلی کۆنەپەرستانە بۆ لەباربردنی مەیل و ڕەوتی ئاڵوگۆڕی شۆڕشگێڕانە و دەستەمۆکردنی بزوتنەوەی ناڕەزایەتی بۆ دەسەڵاتی میلیشیایی، لەپێناو گەیشتن بەئامانجە بورژوازی و کۆنەپەرستانەکانی خۆیان.

– وەساتنەوە دژی هەڕەشە و ملهوڕی حکومەتی بەغدا و میلیشیا ئیسلامیەکانی عێراق بەرامبەر خەڵکی کوردستان و بە بارمتەگرتنی ژیان و گوزەرانی خەڵک لە میانەی کێشمەکێش لەگەڵ حزبە دەسەڵاتدارەکانی کوردستان. بە تایبەتی لە ئەگەری سەقامگیربونی دەوڵەتێکی کۆنەپەرست لە عێراق کە بیەوێ بە ملهوڕی و زەخت و زۆری سیاسی و ئابوری و عەسکەری، یان بە بەندوبەست لەگەڵ حزبە بورژوازیە کوردەکان لەسەر و ئیرادەی خەڵکەوە کوردستان و دانیشتوانەکەی، راپێچی ژێرباری سیاسەتەکانی خۆی بکات.

– وەستانەوە دژی سیاسەت و دەخاڵەتی جەمسەرە بورژوازیە جیهانیه‌کان و دەوڵەتانی کۆنەپەرستی ناوچەکە، بە تایبەتی جمهوری ئسلامی و دەوڵەتی تورکیا. پەردەهەڵماڵین لەسەر ئاکامە کارەساتبارەکانی دەخاڵەتە سیاسی و سەربازیەکانی ئەو میحوەرانە و کێشمەکێشی کۆنەپەرستانەیان. وەستانەوە دژی دەورگێڕانی ناسیۆنالیزمی کورد و حزب و دەسەڵاتەکەی وەکو دەسکەلای دەوڵەت و میحوەرە ناوچەیی و جیهانییه‌کان بۆ بردنەپێشی سیاسەت و پلانەکانیان.

– قورسایی و باڵادەستی یاسا و نەرێتە دواکەوتووه‌ ئیسلامی و ناسیۆنالیستیەکان بەسەر كۆمه‌ڵگه‌دا، هاندەرێکی بەهێزی ژنان ولاوان و خەڵکی پێشکەوتنخوازە بۆ ئەوەی ببنە هاوپەیمان لەگەڵ چینی کرێکار و بزوتنەوە یەکسانیخواز و پێشڕەوانەکەیدا. ڕۆڵی لە پێشینەی کۆمۆنیزمیش لە بزوتنەوەی ناڕەزایەتی جەماوەری و ڕابەریکردنی بزوتنەوەی ژناندا، پاڵنەرێکە بۆ هەڵخڕانی ئەم بەشانە لە دەوری ئاسۆی کۆمۆنیستی. حزب تێدەکۆشێت خەبات و ناڕەزایەتی ئەو بەشانە لە دەوری سیاسەتێکی کۆمۆنیستی ڕێکخراو و ڕابەری بکات و وەکو فاکتەرێکی ئاڵوگۆڕی شۆڕشگێڕانە لە مەیدان و لە هاوشانی چینی کرێکار ڕایانگرێت. بە تایبەتی فۆکوس لەسەرمەسەلەی ژنان، پەرەپێدان و ئاسۆدارکردن و ڕێکخراوکردنی بزوتنەوەی ژنان لە دژی ستەم  و هەڵاواردن و کوشتاری ناموسپەرستانە و ئامادەکردنی هەڵسوڕاوانی کۆمۆنیستی ئەم بزوتنەوەیە بۆ بەدەستەوە گرتنی ڕابەرایەتیەکەی، بەگژاچونەوەی یاسا و نەرێتە ئیسلامی و ناسیۆنالیستیە پیاوسالارەکان و گوشاردانانی توند لەسەر دەسەڵات، بۆ ملدان بە داخوازیەکانی بزوتنەوەی ژنان و لەکارخستنی نەرێتە پیاوسالاریەکان.

– بەرگری شێلگیرانە لە ئازادی سیاسی بێقەیدوبەند، وەستانەوە دژی پلان و هێرشەکانی دەسەڵات بۆ سەر ئازادی سیاسی.

– بەهێزکردنی گیانی هاوخەباتی و هاوپشتی چینی کرێکاری کوردستان لەگەڵ چینی کرێکار لە عێراق و بزوتنەوەی ناڕەزایەتی جەماوەری لە هەردوو مەیدانەکەدا. برەودان بەم خەباتە لە پێناو هەڵپێچانی هێز و دەسەڵات و هێزە قەومی و دینییه‌کان و بەڕێخستنی پرۆسەیەکی ئاڵوگۆڕی شۆڕشگێڕانە لە عێراق. پەرەدان بە گیانی هاوخەباتی و پشتیوانی لەگەڵ چینی کرێکار و بزوتنەوە جەماوەری و شۆڕشگیرانەکانی ناوچەکە.

-دەرەوەی ووڵات بۆ حزبی کۆمۆنیستی کرێکاری لەبنەڕەتدا مەیدانێکی خەباتە بۆ بردنەپێشی ڕەوتی شۆڕشی کرێکاری لە کوردستان، هاوکات مەیدانێکە بۆ پتەوکردنی هاوخەباتی ئەنتەرناسیۆنالیستی چینی کرێکار و بەهێزکردن و پەرەپێدانی مارکسیزم و کۆمۆنیزم. بەرنامەکاری حزب لە دەرەوەی وڵات و بەدیاریکراوی هەڵسوڕانی رێکخراوی دەرەوە، فۆکوس دەکات لەسەر بەدەستهێنانی پشتیوانی بۆ بزوتنەوەی کرێکاری و جەماوەری و بەرگری لە ئازادی، توندکردنەوەی گوشار لەسەر دەسەڵات، بەهێزکردنی هاوپشتی لەگەڵ بزوتنەوەی کرێکاری و سۆشیالیستی و ئازادیخوازانەکانی جیهان.

– پەرەدان بە مارکسیزم و برەودان بە هەژمونی کۆمۆنیزمی کرێکاری و بەهێزکردن و مونسەجیم کردنی ئەم بزووتنەوەیە و هاوخەباتی حزبەکانی. پتەوکردنی پەیوەندی  و هاوخەباتی لەگەل ئەحزاب و رێکخراو و بزوتنەوە کۆمۆنیستی و کرێکاری و سۆشیالیستەکانی جیهان.

*     *      *

ئەرکی رابەری حزبە لەسەر بناغەی بنەما سەرەکیەکانی ئەم ستراتیژە، هەستێت بە داڕشتنی ئەرکە دەم و دەستەکانی ئێستا، هەروەها ئەرکەکانی حزب لە بڕگەکانی دیکەی ئەم ستراتیژەدا، پێ بەپێی چونەپێش و تێپەڕاندنی ئەم بڕگەیە و پێکهاتنی ئاڵوگۆڕ لە هاوسەنگی هێزدا.

کۆنگرەی پێنجەمی حزبی کۆمۆنستی کرێکاریی کوردستان

دێسه‌مبه‌ری 2021

Check Also

وەڵامی یەکیەتی نیشتمانی بە موچە و قووتی کارمەندانی کوردستان، سەرکوتگەرییە!

ئەمڕۆ مامۆستایان و فەرمانبەرانی ناڕازی بۆ هاتنەدەنگ و داواکردنی موچە نەدراوەکانیان کە لەنێوان حزبە دەسەڵاتدارەکانی …

وەڵامێک بنووسە

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *